١٦
إِفَارِيسِييّنْ تَّارنْ إِشْثْ ن ڒعْڒَامثْ
١ ؤُسِينْ-د غَارسْ إِفَارِيسِييّنْ ذ إِصَاذُوقِييّنْ، سّقْسَانْ ث حِيمَا أَذْ ث جَارّْبنْ، مَاحنْذْ أَذْ أَسنْ إِسّْشنْ شَا ن ڒعْڒَامثْ زڭْ ؤُجنَّا.
٢ مَاشَا نتَّا يَارَّا-د، إِنَّا أَسنْ: ”غَارْ ثْمذِّيثْ أَذْ ثِينِيمْ: ’أَقَا ڒْْحَاڒْ إِفّغْ!‘، مِينْزِي أَجنَّا ذ أَزڭّْوَاغْ.
٣ ؤُ غَارْ ڒفْجَارْ أَذْ ثِينِيمْ: ’أَقَا أَسّْ-أَ أَذْ إِسُوضْ ؤُسمِّيضْ!‘، مِينْزِي أَجنَّا ذ أَزڭّْوَاغْ أَڒْ أَبَارْشَانْ. أَ إِمْنَافْقنْ، كنِّيوْ ثسّْنمْ أَذْ ثْفَارْزمْ ؤُذمْ ن ؤُجنَّا، مَاشَا ڒعْڒَامَاثْ ن زّْمَانْ-أَ وَارْ ثْزمَّارمْ أَذْ ثنْثْ ثْفَارْزمْ.
٤ جِّيڒْ أَعفَّانْ إِزنَّانْ يَارزُّو إِشْثْ ن ڒعْڒَامثْ، مَاشَا وَارْ ذ أَسْ إِتّْموْشِي ؤُڒَا ذ إِشْثْ ن ڒعْڒَامثْ مْغِيرْ ڒعْڒَامثْ ن يُونُوسْ، أَنَابِي!“ خنِّي إِجَّا إِ-ثنْ، إِرُوحْ.
أَنْثُونْ ن إِفَارِيسِييّنْ ذ إِسَاضُوقِييّنْ
٥ ڒَْامِي د-إِوْضنْ إِمحْضَارنْ نّسْ غَارْ ؤُجمَّاضْ ن ڒبْحَارْ، تُّونْ أَذْ كِيسنْ د-أَوْينْ أَغْرُومْ.
٦ إِنَّا أَسنْ يَاسُوع: ”حْضَامْ إِخفْ نْومْ زڭْ ونْثُونْ ن إِفَارِيسِييّنْ ذ إِصَاذُوقِييّنْ.“
٧ نِيثْنِي مْشَاوَارنْ جَارْ أَسنْ خْ مَانْ أَيَا، نَّانْ: ”أَقَا إِنَّا مَانْ أَيَا مِينْزِي وَارْ ذ نِيوِي شَا أَغْرُومْ!“
٨ يَاسُوع، أَمْ ثُوغَا إِسّنْ مَانْ أَيَا، إِنَّا أَسنْ: ”أَ كنِّيوْ إِ ذِي إِدْجَا ذْرُوسْ ن لْ-إِيمَانْ، مَايمِّي ثمْشَاوَارمْ جَارْ أَومْ أَقَا مَانْ أَيَا إِدْجَا ؤُمِي وَارْ د-ثِيوْيمْ أَغْرُومْ؟
٩ مَا عَاذْ وَارْ ثفْهِيممْ شَا؟ مَا وَارْ ثعْقِيڒمْ شَا خْ خمْسَا ن إِڒقّْوَازْ ن وغْرُومْ إِ خمْسَا-أَڒَافْ، ؤُ مشْحَاڒْ ن ثْسُودْجَاثِينْ إِ ثْيَارْومْ؟
١٠ نِيغْ خْ سبْعَا ن إِڒقّْوَازْ ن وغْرُومْ إِ أَربْعَا أَڒَافْ، ؤُ مشْحَاڒْ ن ثْسُودْجَاثِينْ إِ ثْيَارْومْ؟
١١ مَا عَاذْ وَارْ ثفْهِيمنْ شَا بلِّي نشّْ وَارْ كِيومْ سِّيوْڒغْ شَا خْ وغْرُومْ ؤُمِي ذ أَومْ نِّيغْ: ’حْضَامْ إِخفْ نْومْ زڭْ ونْثُونْ ن إِفَارِيسِييّنْ ذ إِصَاذُوقِييّنْ‘؟“
١٢ سّنِّي فهْمنْ أَقَا نتَّا وَارْ ذ أَسنْ إِنِّي، مَاحنْذْ أَذْ حْضَانْ إِخفْ نْسنْ زڭْ ونْثُونْ ن وغْرُومْ، مَاشَا زِي ثْغُورِي ن إِفَارِيسِييّنْ ذ إِصَاذُوقِييّنْ.
لْمَاسِيحْ ذ مِّيسْ ن أَربِّي إِدَّارنْ
١٣ ڒَْامِي د-يِيوضْ يَاسُوع غَارْ ثمُّورْثْ ن قَايْصَارِييَا-فِيلِيبُّوسْ، إِسّقْسَا إِمحْضَارنْ نّسْ: ”مِينْ عْنِيغْ نشّْ، مِّيسْ ن بْنَاذمْ، عْلَاحْسَابْ مِينْ قَّارنْ إِوْذَانْ؟“
١٤ نَّانْ أَسْ: ”شَا قَّارنْ ’ذ يُوحَانَّا أَمْسغْضَاصْ‘، ؤُ ونّغْنِي: ’ذ إِلِييَا‘، ؤُ ونّغْنِي عَاوذْ: ’ذ إِرْمِييَا‘ نِيغْ ’ذ إِجّنْ زڭْ إِنَابِييّنْ‘.“
١٥ إِنَّا أَسنْ: ”مَاشَا كنِّيوْ، مِينْ خَافِي ثقَّارمْ؟“
١٦ يَارَّا-د خَاسْ شِيمْعُونْ بُوطْرُوسْ، إِنَّا: ”شكْ ذ لْمَاسِيحْ، مِّيسْ ن أَربِّي إِدَّارنْ.“
١٧ يَارَّا-د خَاسْ يَاسُوع، إِنَّا أَسْ: ”سّعْذْ نّشْ، أَ شِيمْعُونْ، مِّيسْ ن يُونَا، مِينْزِي وَارْ إِدْجِي ذ أَيْسُومْ نِيغْ ذ إِذَامّنْ إِ ذ أَشْ إِمْڒنْ مَانْ أَيَا، مَاشَا ذ بَابَا إِ إِدْجَانْ ذڭْ إِجنْوَانْ.
١٨ عَاوذْ نشّْ أَذْ أَشْ إِنِيغْ، أَقَا شكْ ذ ’بُوطْرُوسْ‘، ذ أَژْرُو، ؤُ خْ وژْرُو-يَا أَذْ بْنِيغْ ثَامسْمُونْثْ إِنُو ؤُشَا ثِيوُّورَا ن ڒَْاخَارْثْ وَارْ ذ أَسْ زمَّارنْثْ.
١٩ ذ نشّْ أَذْ أَشْ وْشغْ ثِيسَارُوثِينْ ن ثْڭلْذِيثْ ن إِجنْوَانْ، ؤُ مَارَّا مِينْ غَا ثْشدّذْ ذِي ثمُّورْثْ، أَذْ يِيڒِي إِشدّْ ذڭْ إِجنْوَانْ، ؤُ مَارَّا مِينْ غَا ثْفسْيذْ ذِي ثمُّورْثْ، أَذْ يِيڒِي إِفْسِي ذڭْ إِجنْوَانْ.“
٢٠ ڒخْذنِّي يُومُورْ إِمحْضَارنْ نّسْ، حِيمَا وَارْ خبَّارنْ حذْ بلِّي نتَّا ذ لْمَاسِيحْ.
يَاسُوع إِسَّاوَاڒْ خْ ڒْْموْثْ ذ ثْنُوكْرَا نّسْ إِ ثْوَاڒَا ثَامزْوَارُوثْ
٢١ سّنِّي إِبْذَا يَاسُوع أَذْ إِسّْشنْ إِ إِمحْضَارنْ نّسْ بلِّي إِتّْخصَّا أَسْ أَذْ إِرَاحْ غَارْ ؤُرْشَالِيمْ، أَذْ إِودّبْ أَطَّاسْ زڭْ إِمْغَارنْ ن ڒْْڭنْسْ ؤُ زڭْ إِمقّْرَاننْ ن إِكهَّاننْ ذ إِمْسڒْمَاذنْ ن إِذْلِيسنْ، أَذْ إِتّْوَانغْ ؤُشَا أَذْ د-إِتّْوَاسّْنكَّارْ ذڭْ وَاسّْ وِيسّْ ثْڒَاثَا.
٢٢ مَاشَا بُوطْرُوسْ يِيوْيِي ث وحّْذسْ، إِبْذَا إِتّْوبّخْ إِ-ث، إِنَّا: ”وَارْ إِتِّيڒِي، أَ سِيذِي! مَانْ أَيَا وَارْ ذ أَشْ إِتّمْسَارْعمَّارْصْ.“
٢٣ مَاشَا نتَّا إِنّقْڒبْ، إِنَّا إِ بُوطْرُوسْ: ”فّغْ خَافِي، أَ شِّيطَانْ، شكْ ذ إِشْثْ ن ثْعنْكْرِيفْثْ إِ نشّْ، مِينْزِي وَارْ شكْ إِشْقِي مِينْ إِدْجَانْ ن أَربِّي، مَاشَا مِينْ إِدْجَانْ ن إِوْذَانْ.“
٢٤ ڒخْذنِّي إِنَّا يَاسُوع إِ إِمحْضَارنْ نّسْ: ”مَاڒَا شَا ن إِجّنْ إِخْسْ أَذْ أَيِي إِضْفَارْ، أَذْ إِنْكَارْ إِخفْ نّسْ، أَذْ إِكْسِي صَّالِيبْ نّسْ ؤُشَا أَذْ أَيِي إِضْفَارْ.
٢٥ مِينْزِي ونِّي إِخْسنْ أَذْ إِسّنْجمْ ثُوذَارْثْ نّسْ، أَذْ ت إِودَّارْ، مَاشَا ونِّي إِ غَا إِودَّارنْ ثُوذَارْثْ نّسْ ذِي طّْوعْ إِنُو أَذْ ت يَافْ.
٢٦ مِينْزِي مَانْ ڒفْضڒْ إِ غَارسْ غَارْ بْنَاذمْ مَاڒَا يَارْبحْ دُّونشْثْ مَارَّا، مَاشَا إِڒْقفْ إِ-ث ذْرُوشْثْ ذِي ڒعْمَارْ نّسْ؟ نِيغْ مِينْ غَا إِوْشْ بْنَاذمْ إِ وصْڒَاحْ ن ڒعْمَارْ نّسْ؟
٢٧ مِينْزِي مِّيسْ ن بْنَاذمْ أَذْ د-يَاسْ س ؤُعُودْجِي ن بَابَاسْ أَكْ-ذ لْمَالَاكَاثْ نّسْ، ؤُشَا خنِّي أَذْ إِخدْجصْ كُوڒْ إِجّنْ عْلَاحْسَابْ مِينْ إِڭَّا.
٢٨ س ثِيذتّْ نشّْ أَذْ أَومْ إِنِيغْ، أَقَا شَا زڭْ إِنَا إِ ذَا إِبدّنْ، وَارْ تّْقِيسِينْ شَا ڒْْموْثْ أَڒْ غَا ژَترنْ مِّيسْ ن بْنَاذمْ إِتَّاسْ-د ذِي ثْڭلْذِيثْ نّسْ.“