٩
ثِيغَارْصَا ثِيمزْوُورَا - أَعُودْجِي ن سِيذِي
١ ذڭْ وَاسّْ وِيسّْ ثْمنْيَا إِمْسَارْ، أَقَا مُوسَا إِڒَاغَا إِ هَارُونْ ذ وَارَّاوْ نّسْ ذ إِمْغَارنْ ن إِسْرَائِيل
٢ ؤُشَا إِنَّا إِ هَارُونْ: ”كْسِي غَاركْ إِجّْ ن ؤُعجْمِي، أَمژْيَانْ ن ؤُفُونَاسْ، أَمْ ثْغَارْصْثْ ن دّنْبْ، ؤُڒَا ذ إِجّْ ن إِشَارِّي أَمْ ثْغَارْصْثْ ن وشْمَاضْ، أَقَا أَذْ إِڒِينْ شْنَانْ قَاعْ، ؤُشَا أجّْ إِ-ثنْ أَذْ د-قَارّْبنْ غَارْ وُوذمْ ن سِيذِي.
٣ سِيوڒْ أَكْ-ذ أَيْثْ ن إِسْرَائِيل ؤُشَا إِنِي: ”كْسِيمْ إِجّْ ن ؤُمْيَانْ زڭْ إِغَايْضنْ أَمْ ثْغَارْصْثْ ن دّنْبْ ؤُ كْسِي إِجّْ ن ؤُعجْمِي ذ إِجّْ ن يزْمَارْ، أَقَا أَذْ إِڒِينْ إِمُودَّارنْ شْنَانْ قَاعْ ن إِجّْ ن ؤُسڭّْوَاسْ، إِ ثْغَارْصْثْ ن وشْمَاضْ،
٤ ؤُشَا كْسِي عَاوذْ إِجّْ ن ؤُفُونَاسْ ذ إِجّْ ن ؤُشَارِّي أَمْ ثْغَارْصَا ن ڒهْنَا، مَاحنْذْ أَذْ ثنْ قدّْمنْ ذ دّْبِيحثْ إِ سِيذِي، ؤُڒَا ذ إِشْثْ ن ثوْهِيبْثْ ن ڒْْغِيدْجثْ إِخدْجْضنْ س زّشْثْ، مِينْزِي أَسّْ-أَ أَذْ أَومْ د-إِبَانْ سِيذِي.“
٥ خنِّي أَوْينْ مِينْ خفْ إِوصَّا مُوسَا غَارْ زَّاثْ ن ؤُقِيضُونْ ن ؤُمْسَاڭَارْ ؤُشَا ثَامسْمُونْثْ ثْقَارّبْ-د ؤُشَا بدّنْ نِيثْنِي زَّاثْ إِ وُوذمْ ن سِيذِي.
٦ ؤُشَا مُوسَا إِنَّا: ”ذ مَانْ أَيَا مِينْ خفْ إِوصَّا سِيذِي مَاحنْذْ أَذْ ث ثڭّمْ. ؤُشَا خنِّي أَذْ أَومْ د-إِبَانْ ؤُعُودْجِي ن سِيذِي.“
٧ إِنَّا مُوسَا إِ هَارُونْ: ”قَارّبْ-د غَارْ ؤُعَالْطَارْ ؤُشَا سوْجذْ ثَاغَارْصْثْ نّشْ ن دّنْبْ ذ ثْغَارْصْثْ نّشْ ن وشْمَاضْ ؤُشَا أڭّْ أَصْڒَاحْ خْ يِيخفْ نّشْ ؤُ خْ ڒْْڭنْسْ. سوْجذْ عَاوذْ ثَاوْهِيبْثْ ن ڒْْڭنْسْ ؤُشَا أڭّْ خَاسنْ أَصْڒَاحْ أَمْ مَامّشْ ث إِوصَّا سِيذِي.“
٨ خنِّي إِقَارّبْ-د هَارُونْ غَارْ ؤُعَالْطَارْ ؤُشَا إِغَارْصْ إِ ؤُعجْمِي ن ثْغَارْصْثْ ن دّنْبْ إِ إِدْجَانْ إِ يِيخفْ نّسْ.
٩ أَرَّاوْ ن هَارُونْ إِوْينْ أَسْ-د إِذَامّنْ ؤُشَا نتَّا إِسُّوفْ أَضَاضْ نّسْ ذڭْ إِذَامّنْ ؤُشَا إِڭَّا إِ-ثنْ خْ وَاشَّاونْ ن ؤُعَالْطَارْ. مِينْ إِشطّنْ ن إِذَامّنْ إِسيّبْ إِ-ثنْ غَارْ ؤُضَارْ ن ؤُعَالْطَارْ.
١٠ إِسّْبخَّارْ ثَاذُونْثْ ذ ثِيژَّاڒْ ذ مِينْ يُويْڒنْ غَارْ ثْسَا ن ثْغَارْصْثْ ن دّنْبْ خْ ؤُعَالْطَارْ أَمْ مَامّشْ يُومُورْ سِيذِي إِ مُوسَا.
١١ إِسّشْمضْ أَيْسُومْ ذ يِيڒمْ س ثْمسِّي بَارَّا إِ ڒْْمَارْڭحْ ن ڒْْعسْكَارْ.
١٢ إِغَارْصْ ثَاغَارْصْثْ ن وشْمَاضْ ؤُشَا أَرَّاوْ نْ هَارُونْ قدّْمنْ أَسْ إِذَامّنْ ؤُشَا نتَّا إِزدْجعْ إِ-ثنْ خْ ؤُعَالْطَارْ غَارْ مَارَّا إِغزْذِيسنْ نّسْ.
١٣ خنِّي قدّْمنْ أَسْ ثَاغَارْصْثْ ن وشْمَاضْ إِ تّْوَابْضَانْ ذ إِشدْجِيقنْ، ؤُڒَا ذ أَزدْجِيفْ، ؤُشَا نتَّا إِسّْبخَّارْ إِ-ت خْ ؤُعَالْطَارْ.
١٤ إِسِّيرْذْ أَذَانْ ذ إِضَارنْ ؤُشَا إِسّْبخَّارْ إِ-ثنْ خْ ثْغَارْصْثْ ن وشْمَاضْ إِ إِدْجَانْ خْ ؤُعَالْطَارْ.
١٥ أَوَارْنِي أَسْ إِسّْقَارّبْ-د ثَاوْهِيبْثْ ن ڒْْڭنْسْ. نتَّا إِكْسِي أَمْيَانْ ن ثْغَارْصْثْ ن دّنْبْ إِ ڒْْڭنْسْ ؤُشَا إِغَارْصْ أَسْ ؤُشَا إِسّوْجذْ إِ-ث ذ ثَاغَارْصْثْ ن دّنْبْ أَمْ مَامّشْ إِسّوْجذْ إِشَارِّي أَمزْوَارُو.
١٦ إِسّْقَارّبْ-د ثَاغَارْصْثْ ن وشْمَاضْ ؤُشَا إِسّوْجذْ إِ-ت عْلَاحْسَابْ لْفَارِيضَا.
١٧ إِقدّمْ ثَاوْهِيبْثْ ن ڒْْغِيدْجثْ ؤُشَا إِكْسِي زَّايسْ إِجّْ ن وُورُو إِشُّورْ ؤُشَا إِسّْبخَّارْ أَيَا خْ ؤُعَالْطَارْ، زَّاثْ إِ ثْغَارْصْثْ ن وشْمَاضْ ن صّْبحْ.
١٨ إِغَارْصْ عَاوذْ إِ ؤُفُونَاسْ ؤُ إِ يِيشَارِّي ن ثْغَارْصْثْ ن ڒهْنَا ذِي طّْوعْ ن ڒْْڭنْسْ، ؤُشَا أَرَّاوْ ن هَارُونْ قدّْمنْ أَسْ إِذَامّنْ ؤُشَا إِزدْجعْ إِ-ثنْ خْ ؤُعَالْطَارْ غَارْ مَارَّا إِغزْذِيسنْ نّسْ.
١٩ خْ ثَاذُونْثْ ن ؤُفُونَاسْ ؤُ ن إِشَارِّي: أَنوَّارْ س ثَاذُونْثْ نّسْ ذ مِينْ إِذْڒِينْ أَضَانْ ذ ثِيژَّاڒْ ذ مِينْ يُويْڒنْ غَارْ ثْسَا،
٢٠ أَقَا سَّارْسنْ ثَاذُونْثْ نِّي خْ إِذْمَارنْ ؤُشَا نتَّا إِسّْبخَّارْ ثَاذُونْثْ خْ ؤُعَالْطَارْ.
٢١ مَاشَا إِذْمَارنْ ذ ؤُشكْرُوذْ أَفُوسِي إِسّنْهزّْ إِ-ثنْ هَارُونْ أَمشْنَاوْ إِشْثْ ن ثوْهِيبْثْ ن ونْهزِّي زَّاثْ إِ وُوذمْ ن سِيذِي، أَمْ مَامّشْ ث إِوصَّا مُوسَا.
٢٢ خنِّي إِسّْڭعّذْ هَارُونْ إِفَاسّنْ نّسْ غَارْ ڒْْڭنْسْ ؤُشَا إِبَاركْ إِ-ثنْ ؤُشَا إِهْوَا أَوَارْنِي ڒَْامِي إِقدّمْ ثَاغَارْصْثْ ن دّنْبْ ذ ثْغَارْصْثْ ن وشْمَاضْ ذ ثْغَارْصْثْ ن ڒهْنَا.
٢٣ ؤُشَا يُوذفْ مُوسَا أَكْ-ذ هَارُونْ غَارْ ؤُقِيضُونْ ن ؤُمْسَاڭَارْ ؤُشَا نِيثْنِي فّْغنْ زَّايسْ عَاوذْ ؤُشَا بَارْكنْ ڒْْڭنْسْ ؤُشَا إِبَانْ ؤُعُودْجِي ن سِيذِي إِ مَارَّا ڒْْڭنْسْ
٢٤ ؤُشَا ثفّغْ-د ثْمسِّي زِي زَّاثْ إِ وُوذمْ ن سِيذِي، ثشَّا ثَاغَارْصْثْ ن وشْمَاضْ خْ ؤُعَالْطَارْ ؤُڒَا ذ ثَاذُونْثْ. ؤُمِي إِژْرَا ڒْْڭنْسْ مَانْ أَيَا، سْڒِيوڒْونْ ؤُشَا وْضَانْ غَارْ ثمُّورْثْ خْ ؤُغمْبُوبْ نْسنْ.