٧
١ ”وَا ذ أَزرْفْ إِ ثْغَارْصْثْ ن ؤُمْوَارْوَاسْ. أَقَا ذ ثَامْقدَّاسْثْ قَاعْ.
٢ ذڭْ ومْشَانْ مَانِي غَارّْصنْ إِ ثْغَارْصْثْ ن وشْمَاضْ، أَذْ غَارْصنْ إِ ثْغَارْصْثْ ن ؤُمَارْوَاسْ. أَذْ إِزدْجعْ إِذَامّنْ نّسْ خْ ؤُعَالْطَارْ غَارْ مَارَّا إِغزْذِيسنْ نّسْ.
٣ أَذْ يَاوِي مَارَّا ثَاذُونْثْ نّسْ: أَنوَّارْ ن ثَاذُونْثْ ذ ثَاذُونْثْ نِّي إِذْڒِينْ أَذَانْ،
٤ ؤُشَا أَذْ إِكّسْ ثْنَاينْ ن ثِيژَّاڒْ أَكْ-ذ ثَاذُونْثْ إِ خَاسنْثْ إِدْجَانْ غَارْ ثجْعِينَّا، ؤُڒَا ذ مِينْ يُويْڒنْ غَارْ ثْسَا ؤُشَا يَارْسَا خْ ثِيژَّاڒْ،
٥ ؤُشَا أَكهَّانْ أَذْ إِسّْبخَّارْ أَيَا خْ ؤُعَالْطَارْ أَمْ يِيشْثْ ن ثوْهِيبْثْ ن ثْمسِّي إِ سِيذِي. أَقَا-ت ذ ثَاغَارْصْثْ ن ؤُمَارْوَاسْ.
٦ مَارَّا أَوْثمْ جَارْ إِكهَّاننْ أَذْ زَّايسْ يشّْ. أَذْ إِتّْوَاشّْ ذڭْ إِجّْ ن ومْشَانْ أَمْقدَّاسْ، أَقَا-ت ذ ثَامْقدَّاسْثْ قَاعْ.
٧ أَذْ يِيڒِي إِجّْ ن ؤُزرْفْ أَمْ إِ ثْغَارْصْثْ ن دّنْبْ أَمْ إِ ثْغَارْصْثْ ن ؤُمْوَارْوَاسْ. أَذْ يِيڒِي ويْسُومْ ن ثْغَارْصْثْ إِ ؤُكهَّانْ، ونِّي ثُوغَا زَّايسْ إِڭّْ أَصْڒَاحْ خْ شَا ن يِيجّنْ.
٨ أَكهَّانْ نِّي إِ غَا إِقدّْمنْ ثَاغَارْصْثْ ن وشْمَاضْ ن شَا ن إِجّنْ، إِ ؤُكهَّانْ نِّي أَذْ ثِيڒِي ثڒْمشْثْ ن ثْغَارْصْثْ ن ثْمسِّي نِّي د-إِقدّمْ، ثِيڒْمشْثْ أَذْ ثِيڒِي إِ نتَّا.
٩ كُوڒْ ثَاوْهِيبْثْ ن ڒْْغِيدْجثْ نِّي ضَارّْحنْ نِيثْنِي ذِي ثفْقُونْثْ ؤُڒَا ذ مَارَّا مِينْ إِتّْوَاسّْوجْذنْ ذِي طَّاجِّينْ نِيغْ ذڭْ وخْذِيمْ، ذ مَانْ أَيَا أَذْ يِيڒِي إِ ؤُكهَّانْ نِّي ث إِقدّْمنْ، أَذْ يِيڒِي إِ نتَّا.
١٠ كُوڒْ ثَاوْهِيبْثْ ن ڒْْغِيدْجثْ إِ إِتّْوَاخدْجْضنْ س زّشْثْ ن زِّيثُونْ نِيغْ يُوژْغنْ، أَذْ ثِيڒِي إِ مَارَّا أَرَّاوْ ن هَارُونْ، أَمْ إِ يِيجّْ أَمْ إِ ونّغْنِي.“
١١ ”وَا ذ أَزرْفْ إِ ثْغَارْصْثْ ن ڒهْنَا ثنِّي إِ غَا إِقدّمْ بْنَاذمْ إِ سِيذِي.
١٢ مَاڒَا أَذْ ت إِقدّمْ إِ ؤُقَاذِي، خنِّي أَذْ إِقدّمْ أَكْ-ذ ثوْهِيبْثْ ن ؤُقَاذِي ؤُڒَا ذ ڒمْسمْنَاثْ بْڒَا أَنْثُونْ إِخدْجْضنْ س زّشْثْ ذ ثڒْفَافْ بْڒَا أَنْثُونْ تّْوَاذهْننْثْ س زّشْثْ ذ ڒمْسمْنَاثْ ن وَارنْ أَزْذَاذْ تّْوَاخدْجْضنْثْ س زّشْثْ.
١٣ أَذْ إِقدّمْ ثَاوْهِيبْثْ نّسْ أَكْ-ذ ڒمْسمْنَاثْ ن وغْرُومْ س ونْثُونْ، جْمِيعْ أَكْ-ذ ثوْهِيبْثْ ن ؤُقَاذِي، ثنِّي إِدْجَانْ زِي ثوْهِيبِينْ نّسْ ن ڒهْنَا.
١٤ زِي كُوڒْ دَّارْبْ ن ثَاوْهِيبْثْ أَذْ إِقدّمْ إِشْثنْ زَّايسْ أَمْ ثوْهِيبْثْ ن ؤُسْڭعّذْ إِ سِيذِي. أَذْ ثِيڒِي إِ ؤُكهَّانْ نِّي إِ غَا إِزدْجْعنْ إِذَامّنْ ن ثْغَارْصَا ن ڒهْنَا خْ ؤُعَالْطَارْ غَارْ مَارَّا إِغزْذِيسنْ نّسْ، أَذْ ثِيڒِي إِ نتَّا.
١٥ أَيْسُومْ ن ثوْهِيبْثْ ن ؤُقَاذِي، ثنِّي إِدْجَانْ زِي ثوْهِيبِينْ نّسْ ن ڒهْنَا، أَذْ إِتّْوَاشّْ ذڭْ وَاسّْ إِ ذِي غَا إِقدّمْ ثَاوْهِيبْثْ نّسْ. وَارْ إِتّجِّي زَّايسْ وَالُو أَڒْ صّْبحْ.
١٦ مَاڒَا ثَاوْهِيبْثْ نّسْ ثُوسَا-د أَكْ-ذ إِجّْ ن لْوَاعْذْ نِيغْ ثدْجَا ذ إِشْثْ ن ثوْهِيبْثْ س ڒْْخَاضَارْ، أَذْ ثتّْوَاشّْ ذڭْ وَاسّْ إِ ذِي إِ غَا إِقدّمْ ثَاغَارْصْثْ نّسْ ؤُشَا مِينْ زَّايسْ إِشطّنْ أَذْ إِتّْوَاشّْ ذڭْ وَاسّْ إِ-ث-إِ-د-إِضْفَارنْ.
١٧ مِينْ إِشطّنْ عَاذْ زڭْ ويْسُومْ ن ثْغَارْصْثْ أَذْ إِتّْوَاشْمضْ س ثْمسِّي ذڭْ وَاسّْ وِيسّْ ثْڒَاثَا.
١٨ مَاڒَا إِتّْوَاشّْ عَاذْ زڭْ ويْسُومْ ن ثْغَارْصْثْ نّسْ ن ڒهْنَا ذڭْ وَاسّْ وِيسّْ ثْڒَاثَا، خنِّي ونِّي ت إِقدّْمنْ وَارْ إِتِّيڒِي إِ أَرْضَا ن سِيذِي ؤُ ثَاغَارْصْثْ نّسْ وَارْ ذ أَسْ ثتّْوِيحْسِيبْ شَا ذ ثَاغَارْصْثْ ن ڒهْنَا. أَذْ ثِيڒِي ذ إِشْثْ ن جّْعِيفشْثْ ؤُشَا ونِّي زَّايسْ غَا إِشّنْ أَذْ يَارْبُو ڒْْمُوعْصِييّثْ نّسْ.
١٩ أَيْسُومْ نِّي إِحَاذَانْ شَا ن ثْمسْڒَاشْثْ إِخمْجنْ، وَارْ زَّايسْ تّتّمْ. أَذْ ث سّْشمْضنْ س ثْمسِّي. زِي مِينْ إِشطّنْ ن ويْسُومْ، إِزمَّارْ أَذْ زَّايسْ يشّْ مَارَّا ونِّي إِزذْڭنْ.
٢٠ ذ ونِّي إِ غَا إِشّنْ زڭْ ويْسُومْ ن ثْغَارْصْثْ ن ڒهْنَا، ثنِّي إِدْجَانْ إِ سِيذِي، أَمْ خَاسْ يَارْسَا ڒخْمجْ نّسْ، ڒعْمَارْ نِّي أَذْ إِتّْوَاقسّْ زِي ڒْْڭنْسْ نّسْ.
٢١ مَاڒَا إِحَاذَا حذْ شَا ن ثْمسْڒَاشْثْ إِخْمجْ، أَمشْنَاوْ ڒخْمجْ ن بْنَاذمْ نِيغْ ڒخْمجْ ن يِيشْثْ ن ڒبْهِيمثْ إِخمْجنْ نِيغْ شَا ن ثْمسْڒَاشْثْ إِ إِدْجَانْ ذ نّْعِي ن ڒخْمجْ، ؤُشَا خنِّي أَذْ يشّْ زڭْ ويْسُومْ ن ثْغَارْصِينْ ن ڒهْنَا إِ سِيذِي، ڒعْمَارْ نِّي أَذْ إِتّْوَاقسّْ زِي ڒْْڭنْسْ نّسْ.“
ثَاذُونْثْ ذ إِذَامّنْ أَقَا ذ ڒحْرَامْ إِ مَاشَّا
٢٢ إِسِّيوڒْ سِيذِي أَكْ-ذ مُوسَا، إِنَّا:
٢٣ ”سِيوڒْ أَكْ-ذ أَيْثْ ن إِسْرَائِيل، إِنِي: ’كنِّيوْ وَارْ تّتّمْ شَا قَاعْ ثَاذُونْثْ ن ؤُفُونَاسْ نِيغْ ن إِزْمَارْ نِيغْ ن إِغَايْضْ.
٢٤ ثَاذُونْثْ ن إِشْثْ ن ڒْْخشْبثْ ذ ثَاذُونْثْ ن إِجّْ ن ؤُمُودَّارْ مزّْقنْ ث، ثْعدّڒْ أَذْ ثتّْوَاڭّْ إِ مَامّشْ مَا ثڭَّا ڒْْخذْمثْ، مَاشَا كنِّيوْ وَارْ زَّايسْ تّتّمْ وَالُو.
٢٥ مَانْ ونْ إِ غَا إِشّنْ ثَاذُونْثْ ن يِيشْثْ ن ڒبْهِيمثْ إِ زِي د غَا سّْقَارّْبنْ إِشْثْ ن ثوْهِيبْثْ ن ثْمسِّي إِ سِيذِي، ڒعْمَارْ نِّي زَّايسْ إِ غَا إِشّنْ، أَذْ إِتّْوَاقسّْ زِي ڒْْڭنْسْ نّسْ.
٢٦ ذِي مَارَّا ثِيزذِّيغِينْ نْومْ وَارْ تّتّمْ ؤُڒَا ذ شَا زڭْ إِذَامّنْ، أَمْ زڭْ إِجْضَاضْ أَمْ زِي ڒبْهَايمْ.
٢٧ كُوڒْ إِجّْ ن ڒعْمَارْ نِّي إِ غَا إِشّنْ مْغِيرْ شَا زڭْ إِذَامّنْ، ڒعْمَارْ نِّي أَذْ إِتّْوَاقسّْ زِي ڒْْڭنْسْ نّسْ.‘ “
ثَاسْغَارْثْ ن ثْغَارْصَا ن ڒهْنَا إِ إِكهَّاننْ
٢٨ إِسِّيوڒْ سِيذِي أَكْ-ذ مُوسَا، إِنَّا:
٢٩ ”سِيوڒْ أَكْ-ذ أَيْثْ ن إِسْرَائِيل، إِنِي: ’وِي إِ د غَا إِسّْقَارّْبنْ ثْغَارْصْثْ نّسْ ن ڒهْنَا إِ سِيذِي، أَذْ إِقدّمْ ثَاوْهِيبْثْ نّسْ إِ سِيذِي زِي ثْغَارْصْثْ ن ڒهْنَا نّسْ.
٣٠ س إِفَاسّنْ نّسْ أَذْ يَاوِي ثِيوْهِيبِينْ ن ثْمسِّي زَّاثْ إِ سِيذِي. ثَاذُونْثْ إِ إِدْجَانْ خْ إِذْمَارنْ أَذْ ت يَاوِي أَكْ-ذ إِذْمَارنْ نِّي، مَاحنْذْ أَذْ ت إِسّنْهزّْ زِي سَّا غَارْ ذَا أَمْ يِيشْثْ ن ثوْهِيبْثْ ن ونْهزِّي زَّاثْ إِ وُوذمْ ن سِيذِي.
٣١ أَكهَّانْ أَذْ إِسّْبخَّارْ ثَاذُونْثْ خْ ؤُعَالْطَارْ، مَاشَا إِذْمَارنْ أَذْ إِڒِينْ إِ هَارُونْ ذ وَارَّاوْ نّسْ.
٣٢ زِي ثْغَارْصَا نْومْ ن ڒهْنَا أَذْ ثْقدّْممْ إِ ؤُكهَّانْ عَاوذْ أَشكْرُوذْ أَفُوسِي ذ ثَاوْهِيبْثْ ن ؤُسْڭعّذْ.
٣٣ أَشكْرُوذْ أَفُوسِي أَذْ يِيڒِي ذ ثَاسْغَارْثْ ن ونِّي زڭْ وَارَّاوْ ن هَارُونْ إِ غَا إِقدّْمنْ إِذَامّنْ ن ثْغَارْصِي ن ڒهْنَا ذ ثَاذُونْثْ نْسنْثْ.
٣٤ مِينْزِي نشّْ كْسِيغْ إِذْمَارنْ ن ونْهزِّي ذ ؤُشكْرُوذْ إِ د-إِتّْوَاسّْڭعّْذنْ ذ ثَاوْهِيبْثْ زِي ثْغَارْصِي ن ڒهْنَا ن أَيْثْ ن إِسْرَائِيل ؤُ وْشِيغْ ثنْ إِ ؤُكهَّانْ هَارُونْ ؤُ إِ وَارَّاوْ نّسْ أَمْ يِيشْثْ ن لْفَارِيضَا إِ ڒبْذَا، زِي جِّيهثْ ن أَيْثْ ن إِسْرَائِيل.
٣٥ ثَا ذ ثَاسْغَارْثْ إِتّْوَاسّْذهْننْ ن هَارُونْ ذ ثسْغَارْثْ إِتّْوَاسّْذهْننْ ن وَارَّاوْ نّسْ زِي ثوْهِيبِينْ ن ثْمسِّي ن سِيذِي ذڭْ وَاسّْ إِ ثنْ د-إِسّْقَارّبْ، مَاحنْذْ أَذْ إِڒِينْ ذ إِكهَّاننْ إِ سِيذِي،
٣٦ ثَاسْغَارْثْ نِّي إِوْشَا سِيذِي إِ أَيْثْ ن إِسْرَائِيل ذڭْ وَاسّْ إِ ثنْ إِذْهنْ. أَقَا ذ إِشْثْ ن ثوْصيّثْ إِ ڒبْذَا إِ مَارَّا جِّيڒَاثْ نْسنْ.‘ “
٣٧ وَا ذ أَزرْفْ إِ ثْغَارْصْثْ ن وشْمَاضْ ذ ثوْهِيبْثْ ن ڒْْغِيدْجثْ ذ ثْغَارْصْثْ ن دّنْبْ ذ ثْغَارْصْثْ ن ؤُمَارْوَاسْ ذ ثْغَارْصَا إِ ؤُذشّنْ ذ ثْغَارْصَا ن ڒهْنَا،
٣٨ أَزرْفْ إِ إِوصَّا سِيذِي إِ مُوسَا ذڭْ وذْرَارْ ن سِينَا، أَسّْ مِينْ ذِي إِوصَّا أَيْثْ ن إِسْرَائِيل أَذْ قدّْمنْ ثِيوْهِيبِينْ نْسنْ إِ سِيذِي ذِي ڒخْڒَا ن سِينَا.