٥
١ ”مَاڒَا إِخْضَا حذْ ؤُمِي إِسْڒَا أَهجِّي ن إِشْثْ ن نّعْڒثْ ؤُشَا نتَّا ذ أَشهَّاذْ خَاسْ، نِيغْ إِژْرَا إِ-ث نِيغْ إِسّنْ إِ-ث: مَاڒَا وَارْ خَاسْ إِقَّارْ وَالُو، خنِّي أَذْ يَارْبُو ڒْْمُوعْصِييّثْ نّسْ.
٢ نِيغْ مَاڒَا إِحَاذَا حذْ مِينْ مَا زِي ثْمسْڒَاشْثْ إِخمْجنْ، ڒْْخشْبثْ ن ڒْْمَاڒْ إِخْمجْ، نِيغْ ڒْْخشْبثْ ن ڒبْهِيمثْ إِخمْجنْ، نِيغْ ڒْْخشْبثْ ن ؤُمُودَّارْ إِخْمجْ إِتّْبُوعنْ، ؤُشَا نتَّا وَارْ إِسِّينْ أَيَا، أَقَا إِخْمجْ ؤُ ذَايسْ أَمَارْوَاسْ.
٣ نِيغْ مَاڒَا إِحَاذَا شَا ن ڒخْمجْ ن بْنَاذمْ، مِينْ مَا زِي ڒخْمجْ نّسْ إِ زِي إِذْوڒْ نتَّا إِخْمجْ، مَاڒَا ثنُّوفَّارْ خَاسْ ؤُشَا إِسّنْ إِثْ أَوَارْنِي أَسْ، أَقَا ذَايسْ أَمَارْوَاسْ.
٤ نِيغْ مَاڒَا إِژُّودْجْ حذْ س ثْشَارْفَايحْ نّسْ، مَاحنْذْ أَذْ إِڭّْ ڒْْغَارْ نِيغْ أَذْ إِڭّْ ڒْْخَارْ، نِيغْ مِينْ مَا إِزمَّارْ بْنَاذمْ أَذْ إِنْطقْ أَمنِّي وَاهَا س إِشْثْ ن ثْجَادْجِيثْ، أَمْ وَارْ ت إِسِّينْ، مَاشَا إِسّنْ إِ-ث أَوَارْنِي مَانْ أَيَا، أَقَا ذَايسْ أَمَارْوَاسْ ذِي سِّيبّثْ ن إِشْثْ زِي ثْمسْڒَايِينْ-أَ.
٥ خنِّي أَذْ إِمْسَارْ، مَاڒَا ذَايسْ أَمَارْوَاسْ ذِي سِّيبّثْ ن إِشْثنْ زِي ثْمسْڒَايِينْ-أَ، أَذْ إِنْعمْ خْ مِينْ ثُوغَا إِخْضَا.
٦ خْ دّنْبْ إِ إِڭَّا، إِتّْخصَّا أَسْ أَذْ إِقدّمْ إِشْثْ ن ثوْثمْثْ ن وُودْجِي ذ ثَاغَارْصْثْ ن ؤُمَارْوَاسْ، إِشْثْ ن ثخْسِي نِيغْ إِشْثْ ن ثْغَايْضثْ، ذ ثَاغَارْصْثْ ن دّنْبْ إِ سِيذِي، ؤُشَا أَكهَّانْ أَذْ خَاسْ إِڭّْ أَصْڒَاحْ ذِي سِّيبّثْ ن دّنْبْ نّسْ.
٧ مَاشَا مَاڒَا أَفُوسْ نّسْ وَارْ غَارسْ مِينْ إِقدّنْ إِ يِيجّْ زڭْ وُودْجِي، خنِّي أَذْ يَاوِي إِ سِيذِي إِ ثْغَارْصْثْ ن ؤُمَارْوَاسْ خْ دّنْبْ إِ إِڭَّا، ثْنَاينْ ن ثجْلِيلِّيحِينْ نِيغْ ثْنَاينْ ن إِذْبِيرنْ إِمژْيَاننْ، إِجّنْ إِ ثْغَارْصْثْ ن دّنْبْ ؤُ إِجّنْ إِ ثْغَارْصْثْ ن وشْمَاضْ.
٨ أَذْ ثنْ يَاوِي غَارْ ؤُكهَّانْ، ونِّي د غَا يَاوْينْ ذ أَمزْوَارُو ثَاجْلِيلِّيحْثْ نِيغْ أَضْبِيرْ إِ إِدْجَانْ إِ ثْغَارْصْثْ ن دّنْبْ ؤُشَا أَذْ إِكّسْ أَزدْجِيفْ نّسْ زِي شْوَايْثْ أَوَارْنِي يِيرِي نّسْ، مَاشَا وَارْ ث إِبطِّي مَارَّا.
٩ أَذْ إِرُوشّْ شْوَايْثْ ن إِذَامّنْ غَارْ ؤُغزْذِيسْ ن ؤُعَالْطَارْ ؤُشَا مِينْ إِشطّنْ زڭْ إِذَامّنْ، أَذْ ث إِژمّْ غَارْ ؤُضَارْ ن ؤُعَالْطَارْ. أَقَا-ت ذ ثَاغَارْصْثْ ن دّنْبْ.
١٠ أَذْ إِسّوْجذْ أَمدَّارْ نّغْنِي أَمْ ثْغَارْصْثْ ن وشْمَاضْ عْلَاحْسَابْ لْفَارِيضَا ؤُشَا أَمُّو إِ خَاسْ إِ غَا يڭّْ ؤُكهَّانْ أَصْڒَاحْ خْ دّنْبْ نّسْ إِ إِڭَّا ؤُشَا أَذْ أَسْ إِتّْوَاغْفَارْ.
١١ مَاڒَا أَفُوسْ نّسْ وَارْ غَارسْ مِينْ إِقدّنْ إِ ثْنَاينْ ن ثجْلِيلِّيحِينْ نِيغْ إِ ثْنَاينْ ن إِذْبِيرنْ إِمژْيَاننْ، خنِّي ونِّي إِخْضَانْ، أَذْ يَاوِي أَمْ ثوْهِيبْثْ نّسْ ثَاعْشَارْثْ ن إِجّْ ن إِفَا ن وَارنْ أَزْذَاذْ ذ ثَاوْهِيبْثْ ن دّنْبْ. وَارْ خَاسْ إِتّڭّْ زّشْثْ ؤُڒَا وَارْ خَاسْ إِسّْرُوسِي جَّاوِي، مِينْزِي أَقَا-ت ذ ثَاغَارْصْثْ ن دّنْبْ.
١٢ أَذْ ت يَاوِي غَارْ ؤُكهَّانْ ؤُشَا أَكهَّانْ أَذْ زَّايسْ إِكْسِي إِجّْ ن وُورُو إِشُّورْ ؤُشَا أَذْ إِسّْبخَّارْ أَيَا أَمْ ڒِْيذَارثْ ذَايسْ خْ ؤُعَالْطَارْ، خْ ثوْهِيبِينْ ن ثْمسِّي إِ سِيذِي. أَقَا-ت ذ ثَاغَارْصْثْ ن دّنْبْ.
١٣ أَمُّو إِ خَاسْ غَا يڭّْ ؤُكهَّانْ أَصْڒَاحْ خْ دّنْبْ نّسْ نِّي إِڭَّا زِي جِّيهثْ ن إِشْثنْ زِي ثْمسْڒَايِينْ-أَ ؤُشَا أَذْ أَسْ إِتّْوَاغْفَارْ. مِينْ إِشطّنْ أَذْ يِيڒِي إِ إِكهَّاننْ أَمْ مَامّشْ إِ يدْجَانْ أَكْ-ذ ثوْهِيبْثْ ن ڒْْغِيدْجثْ.“
ثِيغَارْصَا ن ؤُمَارْوَاسْ
١٤ إِسِّيوڒْ سِيذِي أَكْ-ذ مُوسَا، إِنَّا:
١٥ ”مَاڒَا إِڭَّا حذْ س ڒغْذَارْ ؤُشَا إِخْضَا س ؤُودَّارْ ذِي ثْمسْڒَايِينْ إِقدّْسنْ ن سِيذِي، إِتّْخصَّا أَذْ يَاوِي إِشَارِّي إِشْنَانْ قَاعْ زڭْ وُودْجِي ذ ثَاغَارْصْثْ ن ؤُمَارْوَاسْ إِ سِيذِي. أَذْ ثِيڒِي ڒْْقِيمثْ نّسْ عْلَاحْسَابْ ڒْْقِيمثْ إِ ثْقدَّارذْ شكْ ذڭْ إِشِيقْلُوثنْ ن نُّوقَارْثْ عْلَاحْسَابْ شِيقْلُو ن زَّاوشْثْ إِقدّْسنْ. أَقَا ذ ثَاغَارْصْثْ ن ؤُمَارْوَاسْ.
١٦ زِي ثْمسْڒَايِينْ إِقدّْسنْ أَذْ يَارّْ ذِي مِينْ ذِي إِخْضَا قْبڒْ، ؤُشَا أَذْ ذَايسْ يَارْنِي ڒخْمُوسْ. ؤُشَا أَذْ إِوْشْ مَانْ أَيَا إِ ؤُكهَّانْ ؤُشَا أَكهَّانْ أَذْ ث إِسّصْڒحْ س إِشَارِّي ن ثْغَارْصْثْ ن ؤُمَارْوَاسْ ؤُشَا أَذْ أَسْ إِتّْوَاغْفَارْ.
١٧ مَاڒَا إِخْضَا حذْ ؤُشَا إِڭَّا إِشْثْ ن ثْمسْڒَاشْثْ إِ وَارْ ثتّْشُووَّارْ أَذْ ثتّْوَاڭّْ، أَمْ د-إِفّغْ ذڭْ إِشْثْ ن ثْمسْڒَاشْثْ زِي ثْوصَّا ن سِيذِي، ؤُشَا ثُوغَا ثْنُوفَّارْ خَاسْ، أَذْ ذَايسْ يِيڒِي ؤُمَارْوَاسْ ؤُشَا أَذْ يَارْبُو ڒْْمُوعْصِييّثْ نّسْ.
١٨ أَذْ يَاوِي إِجّْ ن إِشَارِّي إِشْنَانْ قَاعْ زڭْ وُودْجِي غَارْ ؤُكهَّانْ إِ ثْغَارْصْثْ ن ؤُمَارْوَاسْ، أَذْ ثِيڒِي ڒْْقِيمثْ نّسْ عْلَاحْسَابْ ڒْْقِيمثْ إِ ثْقدَّارذْ شكْ ؤُشَا أَذْ ث إِسّصْڒحْ ؤُكهَّانْ خْ ؤُودَّارْ نّسْ إِ ذِي إِودَّارْ أَمْ وَارْ ث إِسِّينْ ؤُشَا أَذْ أَسْ إِتّْوَاغْفَارْ.
١٩ أَقَا ذ ثَاغَارْصْثْ ن ؤُمَارْوَاسْ. س ثِيذتّْ ثُوغَا ذَايسْ أَمَارْوَاسْ زَّاثْ إِ سِيذِي.“
٢٠ إِسِّيوڒْ سِيذِي أَكْ-ذ مُوسَا، إِنَّا:
٢١ ”مَاڒَا إِخْضَا حذْ ؤُشَا إِغْذَارْ سِيذِي أَمْ إِسّْخَارِّيقْ خْ جَّارْ نّسْ خْ مِينْ ذ أَسْ إِمّوْشنْ، مَاحنْذْ أَذْ ث إِحْضَا، نِيغْ خْ مِينْ إِجَّا ذڭْ ؤُفُوسْ نّسْ، نِيغْ خْ مِينْ خَاسْ يُوشَارنْ، نِيغْ خْ شَا ن ؤُبعّجْ إِ إِڭَّا إِ جَّارْ نّسْ،
٢٢ نِيغْ أَمْ إِسّْخَارِّيقْ خْ شَا مِينْ إِودَّارنْ إِ شَا ن يِيجّنْ ؤُ إِتّْوَافْ زَّايسْ ؤُشَا خنِّي نتَّا إِجِّيدْجْ ژُورْ، وَاهْ، أَمْ إِسّْخَارِّيقْ نتَّا خْ إِشْثنْ زِي مَارَّا ثِيمسْڒَايِينْ نِّي إِتّڭّْ بْنَاذمْ أَڒَامِي إِخطَّا س مَانْ أَيَا،
٢٣ خنِّي إِتّْخصَّا، ؤُمِي إِخْضَا ؤُشَا إِذْوڒْ ذَايسْ ؤُمَارْوَاسْ، أَقَا نتَّا أَذْ د-يَارّْ ثُوشفَّارْثْ نِّي يُوشَارْ، نِيغْ مِينْ إِتّْوَاكّْسنْ نِّي إِكْسِي نتَّا س ؤُغِيڒْ، نِيغْ مِينْ ثُوغَا إِحْضَا نِّي ذ أَسْ إِمّوْشنْ مَاحنْذْ أَذْ ت إِحْضَا، نِيغْ مِينْ إِودَّارنْ نِّي يُوفَا.
٢٤ ؤُشَا مَارَّا مِينْ خفْ إِجِّيدْجْ ژُورْ، أَذْ د-يَارّْ ڒْْقِيمثْ نّسْ ثْمُونْ ؤُشَا أَذْ يَارْنِي ڒخْمُوسْ. نتَّا أَذْ ث إِوْشْ إِ ونِّي ؤُمِي د-ثُوسَا ذڭْ وَاسّْ ن ثْغَارْصْثْ نّسْ ن ؤُمَارْوَاسْ.
٢٥ نتَّا أَذْ يَاوِي ثَاغَارْصْثْ نّسْ ن ؤُمَارْوَاسْ غَارْ سِيذِي، إِجّْ ن إِشَارِّي إِشْنَانْ قَاعْ زڭْ وُودْجِي، ونِّي ڒْْقِيمثْ نّسْ أَذْ ثِيڒِي عْلَاحْسَابْ ڒْْقِيمثْ إِ ثْقدَّارذْ شكْ، أَذْ ثِيڒِي ذ ثَاغَارْصْثْ ن ؤُمَارْوَاسْ، ؤُشَا أَذْ ث يَاوِي غَارْ ؤُكهَّانْ.
٢٦ خنِّي أَكهَّانْ أَذْ خَاسْ إِڭّْ أَسْڒَاحْ زَّاثْ إِ وُوذمْ ن سِيذِي ؤُشَا أَذْ أَسْ إِتّْوَاغْفَارْ خْ مِينْ إِڭَّا، مَاڒَا إِذْوڒْ ذَايسْ أَمَارْوَاسْ س إِشْثْ ن ثْمسْڒَاشْثْ زِي مَارَّا ثِيمسْڒَايِينْ-أَ.“