٢٧
لْوُوعُوذْ ذ ؤُفكِّي زَّايْسنْ
١ إِسِّيوڒْ سِيذِي أَكْ-ذ مُوسَا، إِنَّا:
٢ ”سِيوڒْ أَكْ-ذ أَيْثْ ن إِسْرَائِيل ؤُشَا إِنِي أَسنْ، أَقَا مَاڒَا إِخْسْ حذْ أَذْ إِڭّْ إِجّْ ن لْوَاعْذْ إِ أَربِّي، أَذْ يِيڒِي تَّامَانْ ن ؤُفكِّي ن ڒعْمُورْ إِتّْوَاسّْقدّْسنْ إِ سِيذِي عْلَاحْسَابْ ڒْْقِيمثْ إِ ثْقدَّارذْ شكْ.
٣ مَاڒَا ڒْْقِيمثْ إِ ثْقدَّارذْ شكْ أَقَا ذ ڒْْقدّْ ن إِجّْ ن ورْيَازْ زِي عِيشْرِينْ أَڒْ ستِّينْ ن إِسڭّْوُوسَا، خنِّي أَذْ ثِيڒِي ڒْْقِيمثْ إِ ثْقدَّارذْ خمْسِينْ شِيقْلُو ن نُّوقَارْثْ عْلَاحْسَابْ شِيقْلُو ن زَّاوشْثْ إِقدّْسنْ.
٤ مَاڒَا ذ إِشْثْ ن ثمْغَارْثْ، خنِّي أَذْ ثِيڒِي ڒْْقِيمثْ إِ ثْقدَّارذْ ثْڒَاثِينْ شِيقْلُو.“
٥ ”ؤُشَا مَاڒَا ذ إِجّْ ن ؤُبْڒِيغْ زِي خمْسَا أَڒْ عِيشْرِينْ ن إِسڭّْوُوسَا، خنِّي أَذْ ثِيڒِي ڒْْقِيمثْ إِ ثْقدَّارذْ إِ يِيجّْ ن ورْيَازْ عِيشْرِينْ شِيقْلُو ؤُ إِ يِيشْثْ ن ثمْغَارْثْعشْرَا شِيقْلُو.“
٦ ”مَاڒَا ذ إِجّْ ن ؤُحنْجِيرْ زڭْ يِيجّْ ن ؤُيُورْ أَڒْ خمْسَا ن إِسڭّْوُوسَا، خنِّي أَذْ ثِيڒِي ڒْْقِيمثْ إِ ثْقدَّارذْ إِ يِيجّْ ن ورْيَازْ خمْسَا شِيقْلُو ن نُّوقَارْثْ ؤُ إِ يِيشْثْ ن ثمْغَارْثْ ثْڒَاثَا شِيقْلُو ن نُّوقَارْثْ.“
٧ ”مَاڒَا ذ إِجّْ ن مِّيسْ ن بْنَاذمْ زِي ستِّينْ إِسڭّْوُوسَا نِيغْ سنّجْ، خنِّي، مَاڒَا نتَّا ذ أَرْيَازْ، أَذْ ثِيڒِي ڒْْقِيمثْ إِ ثْقدَّارذْ خمّسْطَاشْ شِيقْلُو ؤُ مَاڒَا ذ ثَامْغَارْثْ أَذْ ثِيڒِي ڒْْقِيمثْ إِ ثْقدَّارذْعشْرَا ن شِيقْلُو.“
٨ ”مَاڒَا ثُوغَا إِژْڒضْ أَطَّاسْ ؤُ وَارْ إِزمَّارْ أَذْ إِوْشْ ڒْْقِيمثْ إِ ثْقدَّارذْ شكْ، خنِّي أَذْ ث سّْبدّنْ زَّاثْ إِ وُوذمْ ن ؤُكهَّانْ ؤُشَا خنِّي أَذْ إِقدَّارْ ؤُكهَّانْ ڒْْقِيمثْ نّسْ. أَذْ ث إِقدَّارْ ؤُكهَّانْ عْلَاحْسَابْ مِينْ إِزمَّارْ أَذْ إِسّْمُونْ ؤُفُوسْ ن ونِّي إِوْشِينْ أَوَاڒْ، أَمُّو إِ ث غَا إِقدَّارْ ؤُكهَّانْ.“
٩ ”مَاڒَا ذ ڒبْهَايمْ إِ زِي غَا قدّْمنْ ثَاوْهِيبْثْ إِ سِيذِي، خنِّي مَارَّا مِينْ زَّايْسنْ غَا إِوْشْ نتَّا إِ سِيذِي، أَذْ يِيڒِي إِقدّسْ.
١٠ وَارْ إِتّْبذِّيڒْ ؤُ وَارْ إِخدْجفْ أَمُودَّارْ إِشْنَانْ خْ ونِّي إِقبْحنْ نِيغْ أَمُودَّارْ إِقبْحنْ خْ ونِّي إِشْنَانْ. مَاڒَا إِبدّڒْ عَاذْ إِشْثْ ن ڒبْهِيمثْ س إِشْثْ ن ڒبْهِيمثْ نّغْنِي، خنِّي ثَا ذ ثنِّي إِ خْ ت إِبدّڒْ أَذْ إِڒِينْثْ قدّْسنْثْ.
١١ مَاڒَا ثدْجَا ذ إِشْثْ ن ڒبْهِيمثْ ثخْمجْ، وَارْ إِعدّڒْ أَذْ ت قدّْمنْ ذ ثَاوْهِيبْثْ إِ سِيذِي، خنِّي أَذْ يَارّْ ڒبْهِيمثْ نِّي أَذْ ثْبدّْ زَّاثْ إِ وُوذمْ ن ؤُكهَّانْ.
١٢ أَكهَّانْ أَذْ إِقدَّارْ ڒْْقِيمثْ نّسْ جَارْ مِينْ إِشْنَانْ ذ مِينْ وَارْ إِحْڒِينْ. ؤُشَا أَمْ مَامّشْ إِ ت غَا ثْقدَّارذْ شكْ، أَمْ ؤُكهَّانْ، أَمُّو إِ غَا ثِيڒِي.
١٣ مَاڒَا نتَّا إِخْسْ عَاذْ أَذْ ت إِفْذِي، أَذْ خَاسْ يَارْنِي إِشْثْ ن ثسْغَارْثْ ن ثخْمُوسشْثْ نْ ڒْقِيمثْ إِ ثْقدَّارذْ شكْ.“
١٤ ”مَاڒَا شَا ن يِيجّنْ إِسّْقدّسْ ثَادَّارْثْ نّسْ، مَاحنْذْ أَذْ ثِيڒِي ثْقدّسْ إِ سِيذِي، خنِّي أَذْ إِقدَّارْ ؤُكهَّانْ ڒْْقِيمثْ نّسْ جَارْ مِينْ إِشْنَانْ ذ مِينْ إِقبْحنْ. أَمْ مَامّشْ إِقدَّارْ ؤُكهَّانْ ڒْْقِيمثْ نّسْ، أَمُّو إِ غَا ثِيڒِي.
١٥ مَاڒَا ونِّي ت إِسّْقدّْسنْ إِخْسْ أَذْ إِفْذِي ثَادَّارْثْ نّسْ، خنِّي نتَّا أَذْ خَاسْ يَارْنِي إِشْثْ ن ثسْغَارْثْ ن ثخْمُوسشْثْ ن ڒْْقِيمثْ إِتّْوَاڭّنْ س نُّوقَارْثْ ؤُشَا أَذْ ثِيڒِي نّسْ عَاوذْ.“
١٦ ”مَاڒَا شَا ن يِيجّنْ إِسّْقدّسْ إِ سِيذِي شَا ن ثسْغَارْثْ ن ييَّارْ نِّي غَارسْ إِدْجَانْ، خنِّي أَذْ ثْقدَّارذْ ڒْْقِيمثْ نّسْ عْلَاحْسَابْ زَّارِيعثْ نّسْ. زَّارِيعثْ ن إِجّْ ن ؤُحُومِيرْ ن إِمنْذِي أَذْ أَسْ ڭّنْ خمْسِينْ شِيقْلُو.
١٧ مَاڒَا ثُوغَا إِسّْقدّسْ إِيَّارْ نّسْ زڭْ ؤُسڭّْوَاسْ ن ؤُسْڒِيوْڒوْ، خنِّي أَذْ ثذْوڒْ ڒْْقِيمثْ ن ييَّارْ ثْبدّْ عْلَاحْسَابْ ڒْْقِيمثْ إِ ثْقدَّارذْ.
١٨ مَاڒَا ثُوغَا إِسّْقدّسْ إِيَّارْ نّسْ أَوَارْنِي إِ ؤُسڭّْوَاسْ ن ؤُسْڒِيوْڒوْ، خنِّي أَكهَّانْ أَذْ أَسْ إِهْصبْ ڒْْقِيمثْ س نُّوقَارْثْ ن إِسڭّْوُوسَا إِقِّيمنْ أَڒْ أَسڭّْوَاسْ ن ؤُسْڒِيوْڒوْ إِ د غَا يَاسنْ ؤُ خنِّي أَذْ ثِيڒِي ڒْْقِيمثْ قلّْ خْ ڒْْقِيمثْ ثْمُونْ إِ ثُوغَا ثْقدَّارذْ شكْ.
١٩ مَاڒَا ونِّي إِسّْقدّْسنْ إِيَّارْ، إِخْسْ أَذْ ث إِفْذِي نِيشَانْ، خنِّي أَذْ يَارْنِي إِشْثْ ن ثسْغَارْثْ ن ثخْمُوسشْثْ ذِي نُّوقَارْثْ خْ ڒْْقِيمثْ إِ ثْقدَّارذْ شكْ ؤُشَا خنِّي أَذْ أَسْ يِيڒِي عَاوذْ.“
٢٠ ”مَاڒَا وَارْ إِخْسْ أَذْ إِفْذِي إِيَّارْ نِّي نِيغْ مَاڒَا إِزّنْزْ إِيَّارْ إِ يِيجّْ ن ورْيَازْ نّغْنِي، خنِّي وَارْ إِزمَّارْ أَذْ إِتّْوَافْذِي عَاذْ ييَّارْ.
٢١ أَوَارْنِي ڒَْامِي د-إِفّغْ ذڭْ ؤُسڭّْوَاسْ ن ؤُسْڒِيوْڒوْ، أَذْ يِيڒِي إِيَّارْ إِقدّسْ إِ سِيذِي أَمْ يِيجّْ ن ييَّارْ إِتّْوَاحَارّْمنْ قَاعْ. أَذْ يِيڒِي ذ أَڭْڒَا ن ؤُكهَّانْ.“
٢٢ ”مَاڒَا شَا ن يِيجّنْ إِسّْقدّسْ إِجّْ ن ييَّارْ نِّي إِسْغَا إِ سِيذِي، مَاشَا وَارْ إِدْجِي ييَّارْ ن وَاڭْڒَا نّسْ،
٢٣ خنِّي أَكهَّانْ أَذْ أَسْ إِحْسبْ تَّامَانْ ن ڒْْقِيمثْ إِ ثْقدَّارذْ شكْ أَڒْ أَسڭّْوَاسْ ن ؤُسْڒِيوْڒوْ ؤُشَا نتَّا أَذْ إِخدْجصْ ڒْْقِيمثْ إِ ثْقدَّارذْ ذڭْ وَاسّْ نِّي ذ إِجّْ أَمْ إِشْثْ ن ثْمسْڒَاشْثْ ثْقدّسْ إِ سِيذِي.
٢٤ ذڭْ ؤُسڭّْوَاسْ ن ؤُسْڒِيوْڒوْ أَذْ د-إِعْقبْ ييَّارْ عَاوذْ إِ ونِّي خْ ث إِسْغَا، إِ ونِّي ثُوغَا غَارْ ثدْجَا ثمُّورْثْ ذ أَڭْڒَا.
٢٥ أَقدَّارْ أَذْ يِيڒِي عْلَاحْسَابْ شِيقْلُو ن زَّاوشْثْ إِقدّْسنْ. أَذْ يِيڒِي شِيقْلُو عِيشْرِينْ جِيرَا.“
٢٦ ”مَاشَا أَمنْزُو، ونِّي إِفَارْزنْ إِ سِيذِي زِي ڒبْهَايمْ أَمْ ؤُمنْزُو، وَارْ إِعدّڒْ أَذْ ث إِسّْقدّسْ ؤُڒَا ذ إِجّنْ، نِيغْ ذ أَفُونَاسْ إِ إِدْجَا نِيغْ ذ إِجّنْ زڭْ وُودْجِي، أَقَا-ث إِ سِيذِي.
٢٧ مَاشَا مَاڒَا ثُوغَا-ث زڭْ إِشْثْ ن ڒبْهِيمثْ إِخمْجنْ، إِزمَّارْ أَذْ ت إِفْذِي عْلَاحْصَابْ ڒْْقِيمثْ إِ ثْقدَّارذْ شكْ ؤُشَا أَذْ خَاسْ يَارْنِي إِشْثْ ن ثسْغَارْثْ ن ثخْمُوسشْثْ. مَاڒَا وَارْ ثتّْوَافذِّي، خنِّي أَذْ ثمّنْزْ عْلَاحْسَابْ ڒْْقدّْ إِ ثْقدَّارذْ شكْ.“
٢٨ ”مَاشَا ؤُڒَا ذ إِشْثْ ن ڒْْحَاجّثْ نِّي إِتّْوَاحَارّْمنْ زڭْ إِجّْ ن ورْيَازْ إِ سِيذِي زِي مَارَّا مِينْ غَارسْ إِدْجَانْ ن إِوْذَانْ ذ ڒبْهَايمْ ذ إِيَّارنْ، وَارْ إِعدّڒْ أَذْ ثمّنْزْ نِيغْ أَذْ ثتّْوَافْذِي. مَارَّا مِينْ إِتّْوَاحَارّْمنْ، أَذْ يِيڒِي ذ أَمْقدَّاسْ قَاعْ إِ سِيذِي.
٢٩ مَارَّا مِينْ إِتّْوَاحَارّْمنْ قَاعْ إِ ؤُثحِّي، مِينْ إِتّْوَاحَارّْمنْ زڭْ إِوْذَانْ، وَارْ إِعدّڒْ أَذْ إِتّْوَافْذِي، مَاشَا إِتّْخصَّا أَذْ إِتّْوَانغْ نِيشَانْ.“
٣٠ ”مَارَّا ثِيعْشُورَايْ ن ثمُّورْثْ، زِي زَّارِيعثْ ن ثمُّورْثْ ؤُ زِي ڒْْغِيدْجثْ ن ثْشجِّيرَا، أَذْ إِڒِينْثْ إِ سِيذِي، أَقَا أَثنْثْ قدّْسنْثْ إِ سِيذِي.
٣١ مَاڒَا شَا ن يِيجّنْ إِخْسْ أَذْ إِفْذِي شَا زِي ڒعْشُورْ نّسْ، خنِّي أَذْ خَاسْ يَارْنِي إِشْثْ ن ثسْغَارْثْ ذِي خمْسَا.
٣٢ خْ مَارَّا ثِيعْشُورَايْ زڭْ إِفُونَاسنْ ذ ثْفُونَاسِينْ ذ وُودْجِي، زِي مَارَّا مِينْ إِكِّينْ سَاذُو ؤُزدْجَاضْ ن ؤُمكْسَاوْ، أَذْ يِيڒِي ؤُمُودَّارْ وِيسّْعشْرَا إِقدّسْ إِ سِيذِي.
٣٣ وَارْ إِعدّڒْ أَذْ يَارْزُو مَامّشْ ثشْنَا نِيغْ مَامّشْ وَارْ ثحْڒِي إِ ثدْجَا، ؤُڒَا وَارْ ث إِتّْبذِّيڒْ شَا، مَاشَا مَاڒَا إِبدّڒْ إِ-ث، خنِّي أَمُودَّارْ نِّي ذ ونِّي زِي ث إِ غَا إِبدّڒْ أَذْ إِڒِينْ قدّْسنْ. وَارْ إِعدّڒْ أَذْ إِتّْوَافْذِي.“
٣٤ أَقَا ثِينَا ذ ثِيوصَّا نِّي إِ زِي إِوصَّا سِيذِي إِ مُوسَا ؤُ إِ أَيْثْ ن إِسْرَائِيل ذڭْ وذْرَارْ ن سِينَا.