١٣
ثِيوصَّا زِي جِّيهثْ ن ڒهْڒَاشْ ن ڒْْبَارْصْ
١ إِسِّيوڒْ سِيذِي أَكْ-ذ مُوسَا ذ هَارُونْ، إِنَّا:
٢ ”مَاڒَا إِجّْ ن بْنَاذمْ غَارسْ ذِي ثڒْمشْثْ ن أَرِّيمثْ نّسْ أَعبُّوزْ نِيغْ إِشْثْ ن ثْحبُّوشْثْ نِيغْ إِجّْ ن ونْڭَازْ إِشّمْڒڒْ، ؤُشَا وَانِيثَا إِزمَّارْ أَذْ إِذْوڒْ ذ ؤُضُونْ ن ڒْْبَارْصْ ذِي ثڒْمشْثْ ن أَرِّيمثْ نّسْ، أَذْ ث أَوْينْ غَارْ هَارُونْ، أَكهَّانْ، نِيغْ غَارْ يِيجّنْ زڭْ وَارَّاوْ نّسْ، غَارْ إِكهَّاننْ.
٣ أَكهَّانْ أَذْ إِخْزَارْ غَارْ وُوضُونْ ذِي ثڒْمشْثْ ن أَرِّيمثْ نّسْ ؤُشَا مَاڒَا إِژْرَا أَقَا إِژُوطَّانْ ذڭْ ومْشَانْ ن وُوضُونْ ذوْڒنْ ذ إِشمْڒَاڒنْ ؤُشَا إِبَانْ وُوضُونْ عَاذْ يُودْجغْ خْ ثڒْمشْثْ ن أَرِّيمثْ نّسْ، أَقَا خنِّي ذ ؤُضُونْ ن ڒْْبَارْصْ. خْمِي ث غَا إِژَارْ ؤُكهَّانْ، أَذْ ث إِبَارّحْ ذ أَمخْمُوجْ.
٤ مَاشَا مَاڒَا أَنْڭَازْ إِشّمْڒڒْ ذِي ثڒْمشْثْ ن أَرِّيمثْ نّسْ ذ أَشمْڒَاڒْ ؤُ وَارْ يُودْجِيغْ خْ ثڒْمشْثْ ؤُ إِژطَّانْ وَارْ ذْوِيڒنْ ذ إِشمْڒَاڒنْ، خنِّي أَذْ إِبلّعْ ؤُكهَّانْ خْ ونِّي ذِي إِدْجَا ؤُضُونْ نِّي سبْعَا ن وُوسَّانْ.
٥ مَاڒَا إِژْرَا إِ-ث ؤُكهَّانْ ذڭْ وَاسّْ وِيسّْ سبْعَا ؤُشَا إِژْرَا أَقَا ؤُضُونْ أَمنِّي إِقِّيمْ، وَارْ إِمْغِيرْ وُوضُونْ ذِي ثڒْمشْثْ، خنِّي أَذْ ث إِبلّعْ ؤُكهَّانْ عَاوذْ سبْعَا ن وُوسَّانْ نّغْنِي.
٦ ذڭْ وَاسّْ وِيسّْ سبْعَا أَذْ ث إِژَارْ ؤُكهَّانْ عَاوذْ ؤُشَا مَاڒَا إِبَانْ أَقَا ؤُضُونْ يَارْسَا ؤُشَا وَارْ إِمْغِيرْ عَاذْ كْثَارْ خْ ثڒْمشْثْ، خنِّي أَكهَّانْ أَذْ ث إِبَارّحْ ذ أَمزْذَاڭْ. ثُوغَا-ت ذ إِشْثْ ن ثْفُورِييْ. أَذْ إِسِّيرْذْ أَرُّوضْ نّسْ ؤُشَا أَذْ يِيڒِي إِزْذِيڭْ.
٧ مَاشَا مَاڒَا إِمْغَارْ وُوضُونْ أَطَّاسْ خْ ثڒْمشْثْ أَوَارْنِي ڒَْامِي ث إِژْرَا ؤُكهَّانْ ذِي طّْوعْ ن ؤُسِيزْذڭْ نّسْ، إِتّْخصَّا أَذْ إِسّْشنْ إِخفْ نّسْ إِ ؤُكهَّانْ ثْوَاڒَا نّغْنِي.
٨ مَاڒَا إِژْرَا ؤُكهَّانْ، أَقَا ڒهْڒَاشْ إِمْغَارْ خْ ثڒْمشْثْ، أَذْ ث إِبَارّحْ ذ أَمخْمُوجْ. أَقَا-ث ذ ڒهْڒَاشْ ن ڒْْبَارْصْ إِ إِدْجَا.
٩ خْمِي ؤُضُونْ نْ ڒْبَارْصْ أَقَا-ث ذڭْ إِجّْ ن بْنَاذمْ، أَذْ ث أَوْينْ غَارْ ؤُكهَّانْ.
١٠ مَاڒَا إِژْرَا ؤُكهَّانْ، أَقَا إِبَانْ إِجّْ ن ؤُعبُّوزْ ذ أَشمْڒَاڒْ ذِي ثڒْمشْثْ، ؤُ إِژطَّانْ ذوْڒنْ ذ إِشمْڒَاڒنْ ؤُ إِبَانْ-د ويْسُومْ إِدَّارْ ذڭْ ؤُعبُّوزْ،
١١ أَقَا-ث ذ ڒْْبَارْسْ أَقْذِيمْ ذِي ثڒْمشْثْ ن أَرِّيمثْ نّسْ ؤُشَا أَكهَّانْ أَذْ زَّايسْ إِبَارّحْ ذ أَمخْمُوجْ. وَارْ خَاسْ إِتّْبلِّيعْ شَا، مِينْزِي نتَّا أَقَا إِخْمجْ.
١٢ مَاڒَا يُويُورْ ڒْْبَارْصْ خْ ثِيڒْمشْثْ مَارَّا ؤُشَا إِذْڒَا ڒْْبَارْصْ مَارَّا ثِيڒْمشْثْ ن ونِّي غَارْ إِدْجَا ؤُضُونْ زڭْ ؤُزدْجِيفْ نّسْ أَڒْ إِضَارنْ نّسْ، أَڒْ مَانِي إِزمَّارْ أَذْ إِژَارْ ؤُكهَّانْ س ثِيطَّاوِينْ نّسْ،
١٣ ؤُشَا إِژْرَا إِ-ث ؤُكهَّانْ، إِژْرَا ڒْْبَارْسْ إِذْڒَا مَارَّا أَرِّيمثْ نّسْ، خنِّي نتَّا أَذْ إِبَارّحْ ذ أَمزْذَاڭْ إِ ونِّي ذِي إِدْجَا وُوضُونْ. ثِيڒْمشْثْ أَقَا-ت ذ ثَاشمْڒَاتْشْ قَاعْ. نتَّا أَقَا إِزْذِيڭْ.
١٤ مَاشَا ذڭْ وَاسّْ مَانِي ذَايسْ إِ غَا د-إِبَانْ ويْسُومْ إِدَّارْ، أَذْ يِيڒِي إِخْمجْ.
١٥ مَاڒَا إِژْرَا ؤُكهَّانْ أَيْسُومْ نِّي إِدَّارْ، أَذْ ث إِبَارّحْ ذ أَمخْمُوجْ. أَيْسُومْ إِدَّارنْ إِخْمجْ، أَقَا-ث ذ ڒهْڒَاشْ ن ڒْْبَارْصْ.
١٦ مَاشَا مَاڒَا إِبدّڒْ ويْسُومْ إِدَّارنْ ؤُ إِذْوڒْ ذ أَشمْڒَاڒْ، إِتّْخصَّا أَسْ أَذْ د-يَاسْ غَارْ ؤُكهَّانْ.
١٧ مَاڒَا إِژْرَا إِ-ث ؤُكهَّانْ ؤُشَا أَقَا أَمْشَانْ ن ؤُضُونْ إِذْوڒْ ذ أَشمْڒَاڒْ، أَذْ إِبَارّحْ ؤُكهَّانْ ونِّي ذِي إِدْجَا ڒهْڒَاشْ ذ أَمزْذَاڭْ. نتَّا أَقَا إِزْذِيڭْ.
١٨ مَاڒَا ذِينْ خْ ثڒْمشْثْ ن ويْسُومْ إِشْثْ ن ثْحبُّوشْثْ ؤُ ثتّْوَاسّْڭنْفَا ثَانِيثَا،
١٩ مَاشَا ذڭْ ومْشَانْ ن ثْحبُّوشْثْ إِذْوڒْ ذ إِجّْ ن ؤُعبُّوزْ إِمْڒڒْ نِيغْ ذ إِجّْ ن ونْڭَازْ إِشّمْڒڒْ، أَشمْڒَاڒْ إِرُوحْ غَارْ ثزْوغْ، خنِّي أَذْ إِژَارْ ؤُكهَّانْ مَانْ أَيَا.
٢٠ خْمِي غَارسْ إِ غَا إِخْزَارْ ؤُكهَّانْ ؤُشَا إِژْرَا أَقَا-ث سَاذُو ثڒْمشْثْ ؤُشَا إِژطَّانْ نّسْ ذ إِشمْڒَاڒنْ، خنِّي أَكهَّانْ أَذْ ث إِبَارّحْ ذ أَمخْمُوجْ، أَقَا-ث ذ ؤُضُونْ ن ڒْْبَارْصْ ونِّي يُويُورنْ س ثْحبُّوشْثْ.
٢١ مَاشَا مَاڒَا إِژْرَا إِ-ث ؤُكهَّانْ ؤُشَا وَارْ ذَايسْ يُوفِي ؤُڒَا ذ إِجّْ ن ؤُژطُّو ذ أَشمْڒَاڒْ ؤُشَا وَارْ إِذْوِيڒْ يُودْجغْ خْ ثڒْمشْثْ، مَاشَا إِذْوڒْ يَارْسَا، خنِّي أَذْ خَاسْ إِبلّعْ ؤُكهَّانْ سبْعَا ن وُوسَّانْ.
٢٢ مَاڒَا ثُويُورْ خْ ثڒْمشْثْ مَارَّا، خنِّي أَكهَّانْ أَذْ ث إِبَارّحْ ذ أَمخْمُوجْ. أَقَا-ث ذ ؤُضُونْ ن ڒْْبَارْصْ.
٢٣ مَاشَا مَاڒَا أَنْڭَازْ إِشّمْڒڒْ ن ثڒْمشْثْ إِقِّيمْ ذڭْ ومْشَانْ نّسْ، وَارْ إِمْغِيرْ شَا، أَقَا-ث ذ شَّامثْ ن ثْحبُّوشْثْ ؤُشَا أَكهَّانْ أَذْ ث إِبَارّحْ ذ أَمزْذَاڭْ.
٢٤ نِيغْ مَاڒَا إِذْوڒْ ذِي ثڒْمشْثْ ن أَرِّيمثْ إِجّْ ن ؤُيزِّيمْ ن وشْمَاضْ ؤُشَا أَيْسُومْ إِدَّارنْ ن ؤُيزِّيمْ ن وشْمَاضْ إِذْوڒْ ذ إِجّْ ن ونْڭَازْ إِشّمْڒڒْ، أَشمْڒَاڒْ إِرُوحْ غَارْ ثزْوغْ نِيغْ ذ أَشمْڒَاڒْ،
٢٥ ؤُشَا إِژْرَا ؤُكهَّانْ مَانْ أَيَا، ؤُشَا خْزَارْ، إِژطَّانْ إِ إِدْجَانْ ذڭْ ونْڭَازْ إِشّمْڒڒْ أَقَا ذوْڒنْ ذ إِشمْڒَاڒنْ، ؤُشَا إِبَانْ أَقَا أَمْشَانْ ن ونْڭَازْ يُودْجغْ ذِي ثڒْمشْثْ، أَقَا-ث ذ ڒْْبَارْصْ نِّي د-إِفّْغنْ زڭْ ؤُيزِّيمْ ن وشْمَاضْ. أَكهَّانْ أَذْ ث إِبَارّحْ ذ أَمخْمُوجْ. أَقَا-ث ذ ؤُضُونْ ن ڒْْبَارْصْ.
٢٦ مَاشَا مَاڒَا أَكهَّانْ إِژْرَا مَانْ أَيَا ؤُشَا وَارْ إِتّْوِيڒِي إِژطَّانْ إِشمْڒَاڒنْ ذڭْ ونْڭَازْ إِشّمْڒڒْ ؤُشَا إِژْرَا أَنْڭَازْ وَارْ يُودْجِيغْ خْ ثڒْمشْثْ ؤُشَا يَارْسَا، خنِّي أَذْ خَاسْ إِبلّعْ ؤُكهَّانْ سبْعَا ن وُوسَّانْ.
٢٧ ذڭْ وَاسّْ وِيسّْ سبْعَا أَذْ ث إِژَارْ ؤُكهَّانْ ؤُشَا مَاڒَا إِمْغَارْ ونْڭَازْ كْثَارْ خْ ثڒْمشْثْ، أَكهَّانْ أَذْ ث إِبَارّحْ ذ أَمخْمُوجْ. أَقَا-ث ذ ؤُضُونْ ن ڒْْبَارْصْ.
٢٨ مَاشَا مَاڒَا أَنْڭَازْ إِشّمْڒڒْ إِقِّيمْ ذڭْ ومْشَانْ نّسْ، وَارْ إِمْغِيرْ خْ ثڒْمشْثْ ؤُشَا يَارْسَا، أَقَا-ث ذ أَعبُّوزْ ن وشْمَاضْ. أَكهَّانْ أَذْ ث إِبَارّحْ ذ أَمزْذَاڭْ، مِينْزِي أَقَا-ت ذ شَّامثْ ن وشْمَاضْ.
٢٩ مَاڒَا إِجّْ ن ورْيَازْ نِيغْ إِشْثْ ن ثمْغَارْثْ ذَايسْ ؤُضُونْ ذڭْ ؤُزدْجِيفْ نِيغْ ذِي ثْمَارْثْ،
٣٠ ؤُشَا إِخْزَارْ ؤُكهَّانْ غَارْ ؤُضُونْ، ؤُ خْزَارْ، أَقَا إِتّْبَانْ يُودْجغْ ذِي ثڒْمشْثْ ؤُشَا ذَايسْ إِژطَّانْ إِوَارْغنْ ذ إِزْذَاذنْ، خنِّي أَكهَّانْ أَذْ ث إِبَارّحْ ذ أَمخْمُوجْ. أَقَا-ت ذ ثْفُورِي ن يِيڒمْ، أَقَا-ث ذ ڒْْبَارْصْ ن ؤُزدْجِيفْ نِيغْ ن ثْمَارْثْ.
٣١ مَاشَا مَاڒَا إِژْرَا ؤُكهَّانْ ؤُضُونْ ن ثْفُورِي ن يِيڒمْ، إِژْرَا أَقَا وَارْ يُودْجِيغْ ذِي ثڒْمشْثْ ؤُشَا وَارْ ذَايسْ إِژطَّانْ إِبَارْشَاننْ، خنِّي أَذْ خَاسْ إِبلّعْ ؤُكهَّانْ خْ ونِّي ذِي إِدْجَا وُوضُونْ ن ثْفُورِي ن يِيڒمْ إِ يِيجّْ ن ڒْْمِيجَاڒْ ن سبْعَا ن وُوسَّانْ.
٣٢ أَذْ إِژَارْ ؤُكهَّانْ ؤُضُونْ ذڭْ وَاسّْ وِيسّْ سبْعَا ؤُشَا مَاڒَا إِژْرَا، أَقَا ثْفُورِي ن يِيڒمْ وَارْ ثمْغِيرْ، وَارْ ذَايسْ يُوفِي إِژطَّانْ إِوَارْغنْ ؤُشَا ثْفُورِي ن يِيڒمْ وَارْ ثُودْجِيغْ خْ ثڒْمشْثْ،
٣٣ خنِّي نتَّا أَذْ إِحفّْ إِ يِيخفْ نّسْ، مَاشَا أَمْشَانْ ن ثْفُورِي ن يِيڒمْ وَارْ ث إِتّْحفِّي شَا ؤُشَا أَكهَّانْ أَذْ إِبلّعْ خْ ونِّي ذِي إِدْجَا ثْفُورِي ن يِيڒمْ عَاذْ إِشْثْ ن ثْوَاڒَا نّغْنِي إِ يِيجّْ ن ڒْْمِيجَاڒْ ن سبْعَا ن وُوسَّانْ.
٣٤ ذڭْ وَاسّْ وِيسّْ سبْعَا أَذْ إِژَارْ ؤُكهَّانْ أَمْشَانْ ن ثْفُورِي ن يِيڒمْ. مَاڒَا إِژْرَا أَقَا ثْفُورِي ن يِيڒمْ وَارْ ثمْغِيرْ شَا، وَارْ ثُودْجِيغْ خْ ثڒْمشْثْ، خنِّي أَكهَّانْ أَذْ ث إِبَارّهْ ذ أَمزْذَاڭْ. أَذْ إِسِّيرْذْ أَرُّوضْ نّسْ ؤُشَا أَذْ يِيڒِي إِزْذِيڭْ.
٣٥ مَاشَا مَاڒَا ثْفُورِي ن يِيڒمْ ثمْغَارْ أَطَّاسْ خْ ثڒْمشْثْ أَوَارْنِي إِ ؤُسِيزْذڭْ نّسْ،
٣٦ ؤُشَا إِژْرَا إِ-ث ؤُكهَّانْ ؤُشَا إِژْرَا ثْفُورِي ن يِيڒمْ ثمْغَارْ خْ ثڒْمشْثْ، خنِّي وَارْ يَارزُّو ؤُكهَّانْ خْ إِژطَّانْ إِوَارْغنْ عَاذْ، نتَّا أَقَا إِخْمجْ.
٣٧ مَاشَا مَاڒَا ثْفُورِي ن يِيڒمْ أَقَا ثْبَانْ-د ثْبدّْ ذِي ثِيطَّاوِينْ نّسْ، ؤُشَا فّْغنْ-د زَّايسْ إِژطَّانْ إِبَارْشَاننْ، خنِّي أَقَا ثڭّنْفَا ثْفُورِي ن يِيڒمْ ؤُشَا نتَّا أَقَا إِزْذڭْ. أَكهَّانْ أَذْ ث إِبَارّحْ ذ أَمزْذَاڭْ.
٣٨ مَاڒَا بَاننْ-د إِمُوشَانْ شّمْڒڒنْ، إِشّمْڒڒنْ ذ إِشمْڒَاڒنْ، ذِي ثڒْمشْثْ ن إِجّْ ن ورْيَازْ نِيغْ ن إِشْثْ ن ثمْغَارْثْ،
٣٩ ؤُشَا إِژْرَا ؤُكهَّانْ مَانْ أَيَا ؤُشَا إِژْرَا أَقَا ذِي ثڒْمشْثْ ن أَرِّيمثْ بَاننْ-د إِمُوشَانْ أَرْسَانْ، إِشمْڒَاڒنْ، خنِّي أَقَا-ت ذ إِشْثْ ن ثْفُورِي ن ثڒْمشْثْ، نتَّا أَقَا إِزْذڭْ.
٤٠ مَاڒَا إِوْضَا ؤُشُوَّافْ ن ؤُزدْجِيفْ ن إِجّْ ن ورْيَازْ، أَقَا ذ أَقشَّارْ، خنِّي نتَّا أَقَا إِزْذِيڭْ.
٤١ مَاڒَا ثَانْيَارْثْ ن شَا ن يِيجّْ أَذْ ثذْوڒْ ثَاڒقَّاغْثْ، أَقَا ثَانْيَارْثْ نّسْ ثْقشَّارْ وَاهَا، نتَّا أَقَا إِزْذِيڭْ.
٤٢ مَاشَا مَاڒَا ذِينْ إِجّْ ن ؤُضُونْ إِمْڒڒْ إِرُوحْ غَارْ ثزْوغْ خْ ؤُزدْجِيفْ أَقشَّارْ نِيغْ خْ ثنْيَارْثْ ثَاقشَّارْثْ، أَقَا-ث ذ ڒْْبَارْصْ نِّي د-إِفّْغنْ خْ ؤُزدْجِيفْ نّسْ أَقشَّارْ نِيغْ خْ ثنْيَارْثْ نّسْ ثَاقشَّارْثْ.
٤٣ مَاڒَا إِژْرَا إِ-ث ؤُكهَّانْ ؤُشَا إِژْرَا أَقَا أَعبُّوزْ ن وُوضُونْ إِمْڒڒْ، إِرُوحْ غَارْ ثزْوغْ خْ ؤُزدْجِيفْ نّسْ أَقشَّارْ نِيغْ خْ ثنْيَارْثْ نّسْ ثَاقشَّارْثْ، إِبَانْ-د أَمْ ڒْْبَارْصْ ن ثڒْمشْثْ ن أَرِّيمثْ،
٤٤ خنِّي أَقَا أَرْيَازْ ذ بُو-ڒْْبَارْصْ إِ إِدْجَا، نتَّا أَقَا إِخْمجْ. أَكهَّانْ أَذْ ث إِبَارّحْ ذ أَمخْمُوجْ، ؤُضُونْ أَقَا-ث خْ ؤُزدْجِيفْ نّسْ.“
٤٥ ”إِتّْخصَّا أَذْ إِتّْوَاشَارّڭْ وَارُّوضْ ن بُو-ڒْْبَارْصْ إِ ذِي إِدْجَا وُوضُونْ ؤُشَا أَذْ إِضْڒقْ إِ ؤُشُوَّافْ خْ ؤُزدْجِيفْ نّسْ، أَذْ إِڒحّفْ أَشْڒَاغمْ غَارْ ؤُينْشِيشْ، أَذْ إِڒَاغَا: ’أَمخْمُوجْ! أَمخْمُوجْ!‘
٤٦ مَارَّا ؤُسَّانْ إِ ذَايسْ إِ غَا يِيڒِي وُوضُونْ، أَذْ يِيڒِي إِخْمجْ. نتَّا ذ أَمخْمُوجْ. نتَّا أَذْ إِزْذغْ وحّْذسْ ؤُشَا ثْزذِّيغْثْ نّسْ أَذْ ثِيڒِي بَارَّا إِ ڒْْمَارْڭحْ ن ڒْْعسْكَارْ.“
٤٧ ”مَاڒَا ؤُضُونْ ن ڒْْبَارْصْ ذڭْ إِجّْ ن وَارُّوضْ، ذڭْ إِجّْ ن وَارُّوضْ ن ثَاضُوفْثْ نِيغْ ذڭْ إِجّْ ن وَارُّوضْ ن ڒقْطنْ،
٤٨ نِيغْ ذڭْ وشْضَاضْ إِخيّْضنْ نِيغْ ذڭْ ؤُفِيڒُو إِمُّوذنْ، نِيغْ ن ڒقْطنْ نِيغْ ن ثَاضُوفْثْ، نِيغْ غَارْ يِيڒمْ، نِيغْ غَارْ مَامّشْ مَا ڒْْقشْعثْ ن يِيڒمْ،
٤٩ ؤُ ثِيشْثِي إِتّْوَاوْثنْ ذڭْ وَارُّوضْ نِيغْ ذڭْ يِيڒمْ، نِيغْ غَارْ وشْضَاضْ إِخيّْضنْ نِيغْ غَارْ ؤُفِيڒُو إِمُّوذنْ، نِيغْ ذِي مَامّشْ مَا ن ڒْْقشْعثْ نِّي تّڭّنْ س يِيڒمْ، ثزِّيزُو نِيغْ ثزْوغْ، أَقَا-ث ذ ؤُضُونْ ن ڒْْبَارْصْ. أَذْ إِتّْوَاسّْشنْ أَيَا إِ ؤُكهَّانْ.
٥٠ أَكهَّانْ أَذْ إِخْزَارْ غَارْ ومْشَانْ ن ؤُضُونْ ؤُشَا مِينْ إِضْننْ أَذْ ث إِبلّعْ سبْعَا ن وُوسَّانْ.
٥١ ذڭْ وَاسّْ وِيسّْ سبْعَا أَذْ إِخْزَارْ غَارْ وُوضُونْ. مَاڒَا إِمْغَارْ ؤُضُونْ ذڭْ وَارُّوضْ، نِيغْ غَارْ وشْضَاضْ إِخيّْضنْ نِيغْ غَارْ ؤُفِيڒُو إِمُّوذنْ، نِيغْ ذڭْ يِيڒمْ ن مَامّشْ مَا ڒْْقشْعثْ نِّي تّڭّنْ س يِيڒمْ، أَقَا ؤُضُونْ ذ ڒْْبَارْسْ إِقسْحنْ إِ يدْجَا، أَقَا إِخْمجْ.
٥٢ أَذْ إِسّشْمضْ أَرُّوضْ نِيغْ أَفِيڒُو ذ أَزِيرَارْ نِيغْ أَفِيڒُو إِمُّوذنْ، نِيغْ ن ثَاضُوفْثْ نِيغْ ن ڒقْطنْ إِ إِدْجَا، نِيغْ مَامّشْ مَا ڒْْقشْعثْ نِّي تّڭّنْ س يِيڒمْ إِ ذَايسْ ثُوغَا ؤُضُونْ، مِينْزِي أَقَا-ث ذ ڒْْبَارْصْ إِقسْحنْ. إِتّْخصَّا أَذْ إِتّْوَاسّشْمضْ س ثْمسِّي.
٥٣ مَاشَا مَاڒَا إِژْرَا ؤُكهَّانْ مَانْ أَيَا ؤُشَا أَقَا ؤُضُونْ وَارْ إِمْغِيرْ شَا ذڭْ وَارُّوضْ، نِيغْ ذڭْ وشْضَاضْ إِخيّْضنْ نِيغْ ذڭْ ؤُفِيڒُو إِمُّوذنْ، نِيغْ ذِي مَامّشْ مَا ڒْْقشْعثْ نِّي تّڭّنْ س يِيڒمْ،
٥٤ خنِّي أَذْ يُومُورْ ؤُكهَّانْ مَاحنْذْ أَذْ سِّيرْذنْ مِينْ ذِي يدْجَا وُوضُونْ، ؤُشَا أَوَارْنِي إِ مَانْ أَيَا أَذْ خَاسْ إِبلّعْ ثْوَاڒَا نّغْنِي ڒْْقدّْ ن سبْعَا ن وُوسَّانْ.
٥٥ مَاڒَا إِژْرَا ؤُكهَّانْ ؤُضُونْ أَوَارْنِي إِ ؤُسِيرْذْ، ؤُشَا إِژْرَا ؤُضُونْ وَارْ إِبذِّيڒْ شَا ؤُشَا ؤُضُونْ وَارْ إِمْغِيرْ، أَقَا أَرُّوضْ نِّي إِخْمجْ. إِتّْخصَّا أَذْ ث ثسّشْمضذْ س ثْمسِّي. أَقَا ؤُضُونْ إِذْوڒْ يُودْجغْ إِتّتّْ غَارْ ضفَّارْ نِيغْ غَارْ زَّاثْ.
٥٦ مَاشَا مَاڒَا إِژْرَا ؤُكهَّانْ مَانْ أَيَا ؤُشَا إِژْرَا بلِّي ؤُضُونْ يَارْسَا أَوَارْنِي إِ ؤُسِيرْذْ، خنِّي أَذْ ث إِقسّْ زڭْ وَارُّوضْ، نِيغْ زڭْ يِيڒمْ، نِيغْ زڭْ وشْضَاضْ إِخيّْضنْ نِيغْ زڭْ ؤُفِيڒُو إِمُّوذنْ.
٥٧ مَاشَا مَاڒَا إِبَانْ وُوضُونْ ثْوَاڒَا نّغْنِي ذڭْ وَارُّوضْ، نِيغْ غَارْ وشْضَاضْ إِخيّْضنْ نِيغْ غَارْ ؤُفِيڒُو إِمُّوذنْ، نِيغْ ذِي مَامّشْ مَا ڒْْقشْعثْ نِّي تّڭّنْ س يِيڒمْ، أَقَا إِدُّوقّزْ ڒْْبَارْصْ. إِتّْخصَّا أَذْ ثسّشْمضْ س ثْمسِّي مِينْ ذَايسْ إِ إِدْجَانْ ؤُضُونْ.
٥٨ أَرُّوضْ، نِيغْ أَفِيڒُو ذ أَزِيرَارْ نِيغْ أَفِيڒُو إِمُّوذنْ نِيغْ مَامّشْ مَا ڒْْقشْعثْ نِّي تّڭّنْ س يِيڒمْ، ونِّي ثسِّيرْذذْ ؤُشَا إِرُوحْ خَاسْ وُوضُونْ، أَذْ ث ثسِّيرْذذْ ثْوَاڒَا نّغْنِي ؤُشَا خنِّي أَذْ يِيڒِي إِزْذِيڭْ.“
٥٩ وَا ذ أَزرْفْ ن وُوضُونْ ن ڒْْبَارْصْ ن وَارُّوضْ ن ثَاضُوفْثْ نِيغْ ن ڒقْطنْ، نِيغْ ن وشْضَاضْ إِخيّْضنْ نِيغْ ن ؤُفِيڒُو إِمُّوذنْ، نِيغْ ن مَامّشْ مَا ڒْْقشْعثْ نِّي تّڭّنْ س يِيڒمْ، مَاحنْذْ خنِّي أَذْ بَارّْحنْ س ثزْذڭْ نّسْ نِيغْ س ڒخْمجْ نّسْ.