١١
إِمُودَّارنْ إِزذْڭنْ ذ إِنِّي إِخمْجنْ
١ إِسِّيوڒْ سِيذِي أَكْ-ذ مُوسَا ذ هَارُونْ، إِنَّا أَسنْ:
٢ ”سِيوڒْ أَكْ-ذ أَيْثْ ن إِسْرَائِيل ؤُشَا إِنِيمْ: ’إِنَا أَقَا أَثنْ ذ ڒْْمَاڒْ، إِنِّي ؤُمِي إِعدّڒْ أَذْ ثشّمْ زِي جَارْ مَارَّا ڒْْمَاڒْ نِّي ذِينْ خْ ثمُّورْثْ.
٣ إِعدّڒْ أَذْ ثشّمْ زِي مَارَّا ڒْْمَاڒْ إِ غَارْ ثدْجَا ثشْضشْثْ إِمّْسبْضَانْ، أَقَا فَارْقَا ن ثشْضشْثْ إِمْسّبْضَانْ قَاعْ، ؤُ سنّجْ إِ مَانْ أَيَا تَّارَّانْ إِفژْ.
٤ مَاشَا زڭْ إِنِّي إِتَّارَّانْ إِفژْ ذ يِينِّي غَارْ ثدْجَا ثشْضشْثْ إِمّْسبْضَانْ، وَارْ تّتّمْ إِنَا: أَڒْغمْ، مِينْزِي إِتّفّژْ، مَاشَا وَارْ غَارسْ بُو ثشْضشْثْ إِمّْسبْضَانْ، س ؤُينِّي أَقَا إِخْمجْ إِ كنِّيوْ،
٥ أَكَاوْكَا ن ثصْضَارْثْ، مِينْزِي إِتَّارَّا إِفژْ، مَاشَا ثَاشْضشْثْ وَارْ ثمّْسبْضِي، ؤُ س ؤُينِّي أَقَا إِخْمجْ إِ كنِّيوْ،
٦ أَمنِّي أَيَارْزِيزْ، مِينْزِي إِتَّارَّا إِفژْ، مَاشَا وَارْ غَارسْ ثَاشْضشْثْ إِمّْسبْضَانْ، س ؤُينِّي أَقَا إِخْمجْ إِ كنِّيوْ،
٧ عَاوضْ إِڒفْ، مِينْزِي غَارسْ ثَاشْضشْثْ إِمّْسبْضَانْ ؤُشَا أَقَا فَارْقَا ن ثشْضشْثْ إِمّْسبْضَانْ قَاعْ، مَاشَا وَارْ إِتَّارِّي إِفژْ، س ؤُينِّي أَقَا إِخْمجْ إِ كنِّيوْ.
٨ زڭْ ويْسُومْ نْسنْ وَارْ زَّايسْ تّتّمْ نِيغْ أَذْ ثْحَاذَامْ ڒْْخشْبَاثْ نْسنْ، أَقَا خمْجنْ إِ كنِّيوْ.‘ “
٩ ”إِنَا إِعدّڒْ أَذْ ثنْ ثشّمْ زِي جَارْ مَارَّا إِمُودَّارنْ نِّي إِدَّارنْ ذڭْ وَامَانْ: مَارَّا وِي غَارْ إِدْجَا وَافْرِيونْ ذ ثقْشُورْثْ ذڭْ وَامَانْ ؤُ ذِي ڒبْحُورْ ؤُ ذِي ثْغزْرَاثِينْ، إِنَا إِعدّڒْ أَذْ ثنْ ثشّمْ،
١٠ مَاشَا مَارَّا وِي وَارْ غَارْ يدْجِي إِفْرِيونْ نِيغْ ثَاقْشُورْثْ ذِي ڒبْحُورْ ؤُ ذِي ثْغزْرَاثِينْ، زِي جَارْ مَارَّا إِ زِي سّفّْينْ أَمَانْ ؤُڒَا زِي جَارْ مَارَّا مِينْ إِدَّارنْ ذڭْ وَامَانْ، أَذْ أَومْ يِيڒِي ذ نّْعِي.
١١ وَاهْ أَذْ أَومْ يِيڒِي ذ نّْعِي. وَارْ إِعدّڒْ أَذْ ثشّمْ زڭْ ويْسُومْ نْسنْ ؤُ ڒْْخشْبَاثْ نْسنْ أَذْ غَارْومْ إِڒِينْثْ ذ نّْعِي.
١٢ مَارَّا مِينْ إِدْجَانْ ذڭْ وَامَانْ بْڒَا إِفْرِيونْ ذ ثقْشُورْثْ، أَذْ غَارْومْ يِيڒِي ذ نّْعِي.“
١٣ ”زڭْ إِجْضَاضْ أَذْ غَارْومْ إِڒِينْ إِنَا ذ نّْعِي، وَارْ زَّايْسنْ تّتّمْ شَا، أَقَا أَثنْ ذ نّْعِي: أَڭِيذرْ، إِسْغِي، أَڭِيذرْ ن ڒبْحَارْ،
١٤ أَشفَّارْ إِطَّاونْ س ثَازْڒَا، أَمسّْغُويْ أَمُوقْضِيعْ ن ثِيطَّاوِينْ أَكْ-ذ مَارَّا مَارْكَاثْ نّسْ،
١٥ مَارَّا مَارْكَاثْ ن ؤُبَاغڒْ،
١٦ يدْجِيسْ ن ثْغُويِّيثْ، أَعنَّافْ، أَجْضِيضْ ن ڒبْحَارْ، ڒْْبَازْ أَكْ-ذ مَارْكَاثْ نّسْ،
١٧ أَحمَّاڒْ ن ڒْْكَاسْ، بُو-ثْشَارَارُّوثْ، بُو-ؤُسُوضِي ن ڒْْموْثْ،
١٨ بُو-يُونْثَاحْ، بُو-ؤُعُوقِّي، بُو-ؤُحَاوَارْ،
١٩ أَبلَّارْجْ، بُو-ؤُسُوضِي إِعفّْننْ أَكْ-ذ مَارَّا مَارْكَاثْ نّسْ، ذُونْذُونْ ذ ڒْْوضْوَاضْ.“
٢٠ ”مَارَّا وِي غَارْ إِدْجَا أَفْرِيونْ إِ إِتّْبُوعنْ ؤُ إِڭُّورنْ خْ أَربْعَا ن إِضَارنْ، أَذْ غَارْومْ يِيڒِي ذ نّْعِي.
٢١ مَاشَا زِي مَارَّا إِنِّي إِتّْبُوعنْ أَمْ غَارْسنْ أَفْرِيونْ ؤُ ڭُّورنْ خْ أَربْعَا ن إِضَارنْ، إِعدّڒْ إِ كنِّيوْ أَذْ ثشّمْ إِنِّي غَارْ إِدْجَا إِضَارنْ إِ ونْڭَازْ سنّجْ إِ إِضَارنْ نْسنْ إِ ثشْڒِي، حِيمَا أَذْ زَّايْسنْ نڭْزنْ خْ ثمُّورْثْ.
٢٢ إِنَا ثْزمَّارمْ أَذْ زَّايْسنْ ثشّمْ: ثَامُورْغِي ن ويْڒَافْ أَكْ-ذ مَارْكَاثْ نّسْ، ثَامُوغْرِي ن ثصْضَارْثْ أَكْ-ذ مَارْكَاثْ نّسْ، ثَامُوغْرِي إِنڭّْزنْ أَكْ-ذ مَارْكَاثْ نّسْ ذ ثَامُوغْرِي إِڒحّْفنْ أَكْ-ذ مَارْكَاثْ نّسْ.
٢٣ مَارَّا وِي غَارْ إِدْجَا أَفْرِيونْ إِ إِتّْبُوعنْ ؤُ غَارسْ أَربْعَا ن إِضَارنْ، أَذْ غَارْومْ يِيڒِي ذ نّْعِي.“
٢٤ ”س إِمُودَّارنْ-أَ إِ غَا ثتّْوَاخمْجمْ. مَارَّا وِي غَا إِحَاذَانْ ڒْْخشْبَاثْ نْسنْ، أَذْ يِيڒِي إِخْمجْ أَڒْ ثَامذِّيثْ.
٢٥ مَانْونْ يِيوْينْ شَا زِي ڒْْخشْبَاثْ نْسنْ، أَذْ إِسِّيرْذْ أَرُّوضْ نّسْ ؤُشَا أَذْ يِيڒِي إِخْمجْ أَڒْ ثَامذِّيثْ.
٢٦ مَارَّا ڒبْهَايمْ، إِنِّي غَارْ ثدْجَا ثشْضشْثْ إِمّْسبْضَانْ إِ زِي فَارْقَا ن ثشْضشْثْ وَارْ ثْفَارْقْ قَاعْ، ؤُڒَا وَارْ تَّارَّانْ إِفژْ، أَذْ غَارْومْ إِڒِينْ خمْجنْ. مَارَّا وِي ثنْ إِ غَا إِحَاذَانْ، أَذْ يِيڒِي إِخْمجْ.
٢٧ كُوڒْ أَمُودَّارْ جَارْ إِمُودَّارنْ إِ إِڭُّورنْ خْ أَربْعَا ن ثْڒقَّا ن إِضَارنْ نْسنْ، أَذْ غَارْومْ يِيڒِي إِخْمجْ. مَارَّا وِي غَا إِحَاذَانْ ڒْْخشْبَاثْ نْسنْ، أَذْ يِيڒِي إِخْمجْ أَڒْ ثَامذِّيثْ.
٢٨ وِي يِيوْينْ شَا ن ڒْْخشْبَاثْ نْسنْ، أَذْ إِسِّيرْذْ أَرُّوضْ نّسْ ؤُشَا أَذْ يِيڒِي إِخْمجْ أَڒْ ثْمذِّيثْ. أَذْ أَومْ إِڒِينْ خمْجنْ.“
٢٩ ”زِي جَارْ إِمُودَّارنْ إِتّْبُوعنْ، إِنِّي إِتّْبُوعنْ خْ ثمُّورْثْ، ذ إِنَا أَذْ خَاومْ إِڒِينْ خمْجنْ إِ كنِّيوْ: أَجَارْبُوعْ، أَغرْذَا، إِشْفَارْ أَكْ-ذ مَارْكَاثْ نّسْ،
٣٠ إِقّْلِي، ثَاكْنَاكَارْثْ، أَزرْمُومُّويْ، أَحْذِيضْ ذ ثَاثَا.
٣١ إِنَا أَذْ غَارْومْ إِڒِينْ خمْجنْ زِي جَارْ مَارَّا إِمُودَّارنْ نِّي إِتّْبُوعنْ خْ ثمُّورْثْ. مَارَّا وِي ثنْ إِ غَا إِحَاذَانْ أَوَارْنِي ڒْْموْثْ نْسنْ، أَذْ يِيڒِي إِخْمجْ أَڒْ ثَامذِّيثْ.
٣٢ مَارَّا مِينْ خفْ إِوْضَا شَا زِي ڒْْخشْبَاثْ نْسنْ أَذْ يِيڒِي إِخْمجْ، نِيغْ إِشْثْ ن ڒْْقشْعثْ ن ثفْڒَاوْثْ، نِيغْ أَرُّوضْ، نِيغْ ثِيڒْمشْثْ، نِيغْ ثَاخَانْشثْ، نِيغْ مِينْ مَا ڒْْقشْعثْ إِ خفْ إِوْضَا شَا زَّايْسنْثْ، إِتّْخصَّا أَذْ إِتّْوَاسَّارْسْ ذڭْ وَامَانْ، أَذْ يِيڒِي إِخْمجْ أَڒْ ثَامذِّيثْ ؤُ أَوَارْنِي أَيَا أَذْ يِيڒِي إِزْذِيڭْ.
٣٣ مَارَّا ڒْْقشْعثْ ن ثْڒَاخْثْ، ثنِّي ؤُمِي ذِي إِوْضَا شْوَايْثْ زَّايسْ، أَقَا مَارَّا مِينْ ذَايسْ إِدْجَانْ أَذْ يِيڒِي إِخْمجْ ؤُشَا إِتّْخصَّا إِ كنِّيوْ أَذْ ثَارْژمْ طّبْصِي.
٣٤ مَارَّا مَاشَّا نِّي تّْنُومَانْ إِوْذَانْ أَذْ شّنْ، ثنِّي خْ وْضَانْ وَامَانْ نِّي، أَذْ ثِيڒِي ثخْمجْ، ؤُ مَارَّا ثِيسِّيثْ نِّي تّْنُومَانْ إِوْذَانْ أَذْ سْونْ، مَامّشْ مَا ثڭَّا ڒْْقشْعثْ إِ ذِي ثدْجَا مَاشَّا نِيغْ ثِيسِّيثْ، أَذْ ثِيڒِي ثخْمجْ.
٣٥ مَارَّا مِينْ خفْ إِوْضَا شَا ن ڒْْخشْبَاثْ نْسنْ، أَذْ يِيڒِي إِخْمجْ. أَفَارْنُو ذ ثْزوْضَا أَذْ تّْوَارْژنْ، أَقَا خمْجنْ ؤُشَا أَذْ غَارْومْ إِڒِينْ خمْجنْ.
٣٦ مَاشَا ڒْْعُونْصَارْ نِيغْ ذ أَنُو مَانِي غَارْ سِّيزّْڒنْ أَمَانْ، أَذْ يِيڒِي إِزْذڭْ. مَاشَا وِي غَا إِحَاذَانْ ڒْْخشْبَاثْ نْسنْ، أَذْ يِيڒِي إِخْمجْ.
٣٧ ؤُشَا مَاڒَا إِوْضَا شَا زِي ڒْْخشْبَاثْ نْسنْ خْ شَا ن زَّارِيعثْ إِ ؤُزَارْعْ، ثنِّي إِتّْخصَّا عَاذْ أَذْ زَارْعنْ، خنِّي أَذْ ثِيڒِي ثِيزْذڭْ.
٣٨ مَاشَا مَاڒَا سيّْبنْ أَمَانْ خْ زَّارِيعثْ ؤُشَا إِوْضَا خَاسْ شَا زِي ڒْْخشْبَاثْ نْسنْ، خنِّي أَذْ غَارْومْ ثِيڒِي زَّارِيعثْ نِّي ثخْمجْ.
٣٩ ؤُشَا مَاڒَا إِمُّوثْ إِجّْ زِي جَارْ ڒْْمَاڒْ نِّي ثشِّيمْ، خنِّي وِي غَا إِحَاضَانْ ڒْْخشْبثْ نّسْ، أَذْ يِيڒِي إِخْمجْ أَڒْ ثَامذِّيثْ.
٤٠ ونِّي إِشّنْ زِي ڒْْخشْبثْ نّسْ، أَذْ إِسِّيرْذْ أَرُّوضْ نّسْ ؤُشَا أَذْ يِيڒِي إِخْمجْ أَڒْ ثَامذِّيثْ. ونِّي يَارْبُونْ شَا زِي ڒْْخشْبثْ نّسْ، أَذْ إِسِّيرْذْ أَرُّوضْ نّسْ ؤُشَا أَذْ يِيڒِي إِخْمجْ أَڒْ ثَامذِّيثْ.
٤١ كُوڒْ أَمُودَّارْ إِتّْبُوعنْ خْ ثمُّورْثْ، أَقَا-ث ذ نّْعِي. وَارْ إِعدّڒْ أَذْ إِتّْوَاشّْ.
٤٢ زِي جَارْ مَارَّا إِمُودَّارنْ إِتّْبُوعنْ، إِنِّي إِتّْبُوعنْ خْ وُوذمْ ن ثمُّورْثْ، وَارْ تّتّمْ شَا مَارَّا مِينْ إِڭُّورنْ خْ ؤُعذِّيسْ نِيغْ مَارَّا مِينْ إِڭُّورنْ خْ أَربْعَا ن إِضَارنْ أَڒْ مَارَّا مِينْ إِڭُّورنْ خْ وَاطَّاسْ ن إِضَارنْ، مِينْزِي أَقَا أَثنْ ذ نّْعِي.
٤٣ وَارْ تّڭّمْ نّْعِي إِ ڒعْمُورْ نْومْ س مَارَّا إِمُودَّارنْ إِتّْبُوعنْ نِّي ذِينْ إِتّْبُوعنْ خْ وُوذمْ ن ثمُّورْثْ، وَارْ زَّايسْ سّْخمَّاجمْ إِخفْ نْومْ أَڒَامِي أَذْ زَّايْسنْ ثْخمْجمْ.
٤٤ مِينْزِي نشّْ ذ سِيذِي، أَربِّي نْومْ. كنِّيوْ أَذْ ثسّْقذْسمْ إِخفْ نْومْ ؤُشَا أَذْ ثِيڒِيمْ ذ إِمْقدَّاسنْ، مِينْزِي نشّْ أَقَا ذ أَمْقدَّاسْ. وَارْ سّْخمَّاجمْ ڒعْمُورْ نْومْ س مَارَّا إِمُّوذَارنْ إِتّْبُوعنْ، إِنِّي إِتّْبُوعنْ خْ وُوذمْ ن ثمُّورْثْ.
٤٥ مِينْزِي نشّْ ذ سِيذِي، ونِّي كنِّيوْ د-إِسّْڭعّْذنْ زِي ثمُّورْثْ ن مِيصْرَا، حِيمَا أَذْ إِڒِيغْ ذ أَربِّي نْومْ. إِڒِيمْ ذ إِمْقدَّاسنْ، مَاغَارْ أَقَا نشّْ ذ أَمْقدَّاسْ.“
٤٦ وَا ذ أَزرْفْ خْ ڒْْمَاڒْ، خْ إِجْضَاضْ ؤُ خْ مَارَّا إِمُودَّارنْ نِّي زَّايْسنْ إِسّفْينْ وَامَانْ ؤُشَا خْ مَارَّا إِمُودَّارنْ نِّي إِتّْبُوعنْ خْ ثمُّورْثْ،
٤٧ حِيمَا أَذْ إِتّْوَاڭّْ ڒْْفَارْقْ جَارْ مِينْ إِخمْجنْ ذ مِينْ إِزْذِيڭنْ ؤُ جَارْ إِمُودَّارنْ إِنِّي إِعدّْڒنْ إِ مَاشَّا ذ إِمُودَّارنْ إِنِّي وَارْ إِعدّْڒنْ إِ مَاشَّا.