٥
إِزْڒِي وِيسّْ خمْسَا - ثَاژَادْجِيثْ إِ ؤُسنْجمْ
١ عْقڒْ، أَ سِيذِي، خْ مِينْ إِ ذ أَنغْ إِمْسَارنْ،
خْزَارْ-د ؤُ وَاڒَا ڒْْحڭْرَا نّغْ.
٢ ثوْضَا ثسْغَارْثْ ن ڒْْوَارْثْ نّغْ إِ إِبَارَّانِييّنْ،
ؤُڒَا ذ ثُوذْرِينْ نّغْ رُوحنْثْ ت غَارْ مِيدّنْ.
٣ نشِّينْ نذْوڒْ ذ إِيُوجِيڒنْ بْڒَا بَابَاثْنغْ،
ثِييمَّاثِينْ نّغْ ذوْڒنْثْ أَمْ ثِيجَّاڒْ.
٤ أَمَانْ نّغْ نْسسّْ إِ-ثنْ س ثْمنْيَاثْ،
أَكشُّوضْ نّغْ نتّْخدْجَاصْ خَاسْ.
٥ ضفَّارنْ أَنغْ خْ يِيرِي نّغْ،
نشِّينْ نمُّوثْ س ڒْْوحْڒَانْ،
مَاشَا وَارْ ذ أَنغْ جِّينْ أَرَّاحثْ.
٦ أَقَا نْسَارّحْ أَفُوسْ غَارْ مِيصْرَا، غَارْ أَشُّورْ،
مَاحنْذْ أَذْ نجِّيونْ أَغْرُومْ.
٧ إِبَابَاثنْ نّغْ خْضَانْ،
وَارْ دْجِينْ عَاذْ.
ؤُ نشِّينْ نَاربُّو ڒْْمُوعْصِييّثْ نْسنْ.
٨ إِمْسخَّارنْ دّبَّارَانْ خَانغْ،
ؤُڒَا ذ إِجّْ وَارْ ذ أَنغْ إِسّنْفكِّي
زڭْ إِفَاسّنْ نْسنْ.
٩ نشِّينْ نْسبّڒْ ثُوذَارْثْ نّغْ
مَاحنْذْ أَذْ د-نَاوِي أَغْرُومْ نّغْ،
زِي سِّيبّثْ ن سِّيفْ ذِي ڒخْڒَا.
١٠ ثِيڒْمشْثْ نّغْ ثتّحْذُوذُوقْ أَمْ ثفْقُونْثْ،
زِي ڒْْحَاذُوقْ ن ثْمسِّي ن ڒَْاژْ.
١١ سّْخَارْڭنْ ثِيمْغَارِينْ ذِي صِيهْيُونْ،
ؤُڒَا ذ ثِيعْزَارِييِّينْ ذِي ثْندَّامْ ن يَاهُوذَا.
١٢ ڒْْحُوكَّامْ يُويْڒنْ ثنْ س إِفَاسّنْ ن يِيخفْ نْسنْ،
إِوسُّورَا وَارْ ثنْ وقَّارنْ عَاذْ.
١٣ إِرْيَازنْ إِجهْذنْ قَاعْ أَربُّونْ إِژْرَا ن ثْسِيرْثْ،
ؤُ إِحُوذْرِييّنْ تّْنقْرَاضنْ
سَاذُو ڒحْمڒْ ن ؤُكشُّوضْ.
١٤ إِمْغَارنْ سّْبدّنْ أَغِيمِي ذِي ثوُّورَا ن ثنْذِينْثْ،
إِحُوذْرِييّنْ سّْبدّنْ زڭْ ؤُزنْزُونْ نْسنْ خْ إِفِيڒَانْ.
١٥ ثْودَّارْ ڒفْرَاحثْ ن وُوڒْ نّغْ،
شّْضِيحْ نّغْ س نُّوبْثَاثْ إِذْوڒْ ذ أَشْضَانْ.
١٦ إِوْضَا أَنغْ ثَاجّْ خْ ؤُزدْجِيفْ نّغْ.
ؤُشْثْ خَانغْ، مَاغَارْ نشِّينْ نخْضَا.
١٧ س ؤُينِّي إِهْڒشْ وُوڒْ نّغْ أَطَّاسْ،
س ؤُينِّي بَّارشْننْثْ ثِيطَّاوِينْ نّغْ،
١٨ زِي سِّيبّثْ ن وذْرَارْ ن صِيهْيُونْ
نِّي إِتّْوَاخَارّْبنْ،
مَانِي تَّاوْينْ تَّارَّانْ إِشعْبَاونْ.
١٩ شكْ، أَ سِيذِي، أَذْ ثقِّيمذْ إِ ڒبْذَا،
ڒْْكُورْسِي إِڭلّْذنْ نّشْ أَقَا-ث زِي جِّيڒْ أَڒْ جِّيڒْ.
٢٠ مَايمِّي ثخْسذْ شكْ أَذْ أَنغْ ثتُّوذْ إِ ڒبْذَا؟
مَايمِّي إِ ذَايْنغْ ثْسمْحذْ قَاعْ أَنشْثْ ؤُيَا ن وُوسَّانْ؟
٢١ أَ سِيذِي، أَرّْ أَنغْ-د غَاركْ،
خنِّي أَذْ غَاركْ د-نذْوڒْ.
أَرّْ أَنغْ-د ؤُسَّانْ نّغْ ذ جْذِيذْ أَمْ زِيشْ.
٢٢ مَاغَارْ مَا س ثِيذتّْ ثنْضَارذْ أَنغْ كُوڒْشِي؟
مَا ثفُّوڭْمذْ خَانغْ أَمُّو قَاعْ؟