٧
إِلِيشَاعْ إِزْوَارْ إِبَارّحْ س ؤُسنْجمْ ن سَامَارْيَا
١ خنِّي إِنَّا إِلِيشَاعْ: ”سْڒمْ إِ وَاوَاڒْ ن سِيذِي! أَمُّو إِ إِقَّارْ سِيذِي: ’ثِيوشَّا غَارْ ڒْْوقْثْ-أَ أَذْ ثسْوَا إِجّْ ن ڒقْيَاسْ ن وَارنْ أَزْذَاذْ غَارْ ثوَّارْثْ ن سَامَارْيَا مْغِيرْ إِجّْ ن شِيقْلُو ؤُ أَذْ مّنْزنْ ؤُڒَا ذ ثْنَاينْ ن ڒقْيَاسْ ن إِمنْذِي إِ يِيجّْ ن شِيقْلُو وَاهَا!“
٢ إِجّْ ن ؤُنغْرَافْ ن ڒْْعسْكَارْ، ونِّي خْ ؤُغِيڒْ نّسْ إِعمّذْ ؤُجدْجِيذْ، يَارَّا-د خْ ورْيَازْ ن أَربِّي: ”خْزَارْ، وَاخَّا مَاڒَا سِيذِي إِڭَّا ڒكْوَازَا ذڭْ ؤُجنَّا، مَا إِزمَّارْ أَيَا أَذْ إِمْسَارْ؟“ مَاشَا نتَّا إِنَّا: ”خْزَارْ، أَذْ ث ثْژَارذْ س ثِيطَّاوِينْ نّشْ، مَاشَا وَارْ زَّايسْ ثتّتّذْ.“
٣ ثُوغَا ذِينْ أَربْعَا ن يرْيَازنْ زَّاثْ إِ وَاذَافْ ن ثوَّارْثْ. نَّانْ إِجّْ إِ ونّغْنِي: ”مَايمِّي غَا نقِّيمْ ذَا أَڒْ غَا نمّثْ؟
٤ مَاڒَا أَذْ نِينِي: ’أجّْ أَنغْ أَذْ نَاذفْ غَارْ ثنْذِينْثْ!‘، خنِّي إِدْجَا ڒَْاژْ ذِي ثنْذِينْثْ ؤُ نشِّينْ أَذْ ذَايسْ نمّثْ. ؤُ مَاڒَا نقِّيمْ نشِّينْ ذَا، أَذْ نمّثْ عَاوذْ. خنِّي ڒخُّو، أجّْ أَنغْ أَذْ نفّغْ أَذْ نوْضَا ذڭْ إِفَاسّنْ ن ڒْْمَارْڭحْ ن ڒْْعسْكَارْ ن أَرَامْ. مَاڒَا نِيثْنِي جِّينْ أَنغْ ندَّارْ، أَذْ نقِّيمْ ندَّارْ، ؤُ مَاڒَا نِيثْنِي نْغِينْ أَنغْ، خنِّي أَذْ نمّثْ.“
٥ نِيثْنِي كَّارنْ ذِي ثْبَامْبَاسْثْ، حِيمَا أَذْ ؤُيُورنْ غَارْ ڒْْمَارْڭحْ ن ڒْْعسْكَارْ ن أَرَامْ. مَاشَا ؤُمِي ؤُذْفنْ نِيثْنِي غَارْ طَّارْفْ ن ڒْْمَارْڭحْ ن ڒْْعسْكَارْ ن أَرَامْ، وَارْ ذِينْ ثُوغِي ؤُڒَا ذ إِجّنْ.
٦ مَاغَارْ سِيذِي إِجَّا ڒْْعسْكَارْ ن أَرَامْ أَذْ إِسڒْ إِ يِيجّْ ن ؤُجَارِّي ن إِكَارُّوثنْ ذ إِجّْ ن دّْرِيزْ ن إِيْسَانْ ذ دْجْغَارغْ ن إِجّْ ن ڒْْعسْكَارْ ذ أَمقّْرَانْ، أَڒَامِي نِيثْنِي نَّانْ إِجّنْ إِ ونّغْنِي: ”خْزَارْ، أَجدْجِيذْ ن إِسْرَائِيل إِشْرَا ذ إِحَارّشْ-د خَانغْ إِجدْجِيذنْ ن إِحِيتِّييّنْ ذ إِجدْجِيذنْ ن إِمِيصْرِييّنْ.“
٧ كَّارنْ ؤُشَا أَروْڒنْ ذِي ثْبَامْبَاسْثْ ؤُشَا جِّينْ إِقِيضَانْ نْسنْ ذ ييْسَانْ نْسنْ ذ يغْيَاڒْ نْسنْ ؤُڒَا ذ ڒْْمَارْڭحْ ن ڒْْعسْكَارْ أَمْ مَامّشْ ثنْ ثُوغَا، ؤُشَا أَروْڒنْ مَاحنْذْ أَذْ سّْنجْمنْ ڒعْمَارْ نْسنْ.
٨ ڒَْامِي د-إِوْضنْ أَيْثْ ن بُو-ڒْْبَارْصْ غَارْ طَّارْفْ ن ڒْْمَارْڭحْ ن ڒْْعسْكَارْ، ؤُذْفنْ غَارْ إِجّْ ن ؤُقِيضُونْ، شِّينْ، سْوِينْ ؤُ إِوْينْ سّنِّي نُّوقَارْثْ ذ وُورغْ ذ وَارُّوضنْ ؤُشَا فّْغنْ، سّْنُوفَّارنْ أَيَا. أَوَارْنِي مَانْ أَيَاعقْبنْ-د، ؤُذْفنْ غَارْ إِجّْ ن ؤُقِيضُونْ نّغْنِي ؤُشَا إِوْينْ ؤُڒَا سّنِّي شَا، ؤُشَا فّْغنْ، سّْنُوفَّارنْ أَيَا عَاوذْ.
٩ خنِّي نَّانْ إِ وَايَاوْيَا: ”نشِّينْ وَارْ نتّڭّْ مِينْ إِدْجَانْ نِيشَانْ. أَسّْ-أَ ذ إِجّْ ن وَاسّْ ن ڒخْبَارْ أَصبْحَانْ ؤُ نشِّينْ نسّغْذْ. مَاڒَا نْرَاجَا ذَا أَڒْ إِ غَا إِفُّو ڒْْحَاڒْ، أَذْ أَنغْ ثڒْقفْ ڒْْمُوعْصِييّثْ. خنِّي ڒخُّو، أَسمْ-د، أجّْ أَنغْ أَذْ نُويُورْ، أَذْ ث نْعَاوذْ ذِي ثَادَّارْثْ ن ؤُجدْجِيذْ.“
١٠ نِيثْنِي إِوْضنْ ذِينْ، ڒَْاغَانْ خْ ؤُعسَّاسْ ن ثوَّارْثْ ن ثنْذِينْثْ، حَاجَانْ أَسنْ، نَّانْ: ”نشِّينْ نُوذفْ غَارْ ڒْْمَارْڭحْ ن ڒْْعسْكَارْ ن أَرَامْ، ؤُ خْزَارْ، وَارْ ذِينْ ؤُڒَا ذ إِجّْ، وَارْ نسْڒِي إِ شَا ن ڒْْحسّْ ن يوْذَانْ، مْغِيرْ إِيْسَانْ ثُوغَا قّْننْ ذ يغْيَاڒْ ثُوغَا شَارْفنْ، ذ إِقِيضَانْ أَمْ مَامّشْ دْجَانْ.“
١١ إِڒَاغَا خْ إِعسَّاسنْ ن ثوَّارْثْ ؤُشَا سِّيوْضنْ نِيثْنِي أَرقَّاسْ غَارْ ذَاخڒْ ن ثَادَّارْثْ ن ؤُجدْجِيذْ.
١٢ إِكَّارْ ؤُجدْجِيذْ ذِي دْجِيڒثْ، إِنَّا إِ إِمْسخَّارنْ نّسْ: ”نشّْ أَذْ أَومْ إِنِيغْ مِينْ أَكِيذْنغْ إِ غَا يڭّْ أَرَامْ. نِيثْنِي سّْننْ، أَقَا نشِّينْ ذ أَيْثْ ن بُو-دْجُوژْ. خْ ؤُينِّي فّْغنْ زِي ڒْْمَارْڭحْ ن ڒْْعسْكَارْ، حِيمَا أَذْ نُوفَّارنْ ذڭْ إِيَّارْ، قَّارنْ: ’مَاڒَا نِيثْنِي أَذْ فّْغنْ زِي ثنْذِينْثْ، أَذْ ثنْ نطّفْ دَّارنْ ؤُشَا أَذْ نَاذفْ غَارْ ثنْذِينْثْ.‘ “
١٣ إِجّنْ زڭْ إِمْسخَّارنْ يَارَّا-د، إِنَّا: ”أجّْ إِرْيَازنْ أَذْ كْسِينْ خمْسَا ن إِيْسَانْ نِّي عَاذْ ذِينْ إِدْجَانْ، إِنِّي إِقِّيمنْ ذِي ثنْذِينْثْ، ؤُ خنِّي أَذْ نْژَارْ مَا أَذْ أَسنْ إِمْسَارْ أَمْ وَاطَّاسْ ن أَيْثْ ن إِسْرَائِيل إِنِّي ذَا إِقِّيمنْ، نِيغْ أَمْ وَاطَّاسْ ن أَيْثْ ن إِسْرَائِيل إِنِّي إِتّْوَاهلّْكنْ. أجّْ أَنغْ أَذْ ثنْ نسّكّْ ؤُشَا خنِّي أَذْ نْژَارْ مِينْ إِ غَا يِيڒِي.“
١٤ كْسِينْ نِيثْنِي ثْنَاينْ ن إِيْسَانْ ن ثَازْڒَا. أَجدْجِيذْ إِسّكّْ إِ-ثنْ أَوَارْنِي إِ ڒْْعسْكَارْ ن أَرَامْ، إِنَّا: ”ؤُيُورمْ، ثخْزَارمْ!“
١٥ نِيثْنِي ضْفَارنْ ثنْ أَڒْ لْ-ؤُرْذُونْ، ؤُ خْزَارْ، أَبْرِيذْ مَارَّا إِنْثِي س وَارُّوضْ ذ ڒحْوَايجْ نِّي إِمّنْضَارنْ أَيْثْ ن أَرَامْ أَمْ ثُوغَا تّْقدْجِيقنْ ذِي ثَاروْڒَا نْسنْ. إِرقَّاسنْعقْبنْ ؤُ سِّيوْضنْ ڒخْبَارْ إِ ؤُجدْجِيذْ.
١٦ خنِّي إِفّغْ ڒْْڭنْسْ زِي ثنْذِينْثْ ؤُشَا كشّْضنْ ڒْْمَارْڭحْ ن ڒْْعسْكَارْ ن أَرَامْ ؤُشَا ثمّنْزْ إِجّْ ن ڒقْيَاسْ ن وَارنْ أَزْذَاذْ س يِيجّْ ن شِيقْلُو ذ ثْنَاينْ ن ڒقْيَاسْ ن إِمنْذِي س يِيجّْ ن شِيقْلُو عْلَاحْسَابْ أَوَاڒْ ن سِيذِي.
١٧ إِڭَّا ؤُجدْجِيذْ أَنغْرَافْ ن ڒْْعسْكَارْ ونِّي خْ إِتّْشَاڒْ، حِيمَا أَذْ يِيڒِي خْ ثوَّارْثْ، مَاشَا إِعْفسْ خَاسْ ڒْْڭنْسْ ذِي ثوَّارْثْ أَڒَامِي إِمُّوثْ أَمْ مَامّشْ ثُوغَا إِنَّا ورْيَازْ ن أَربِّي، ونِّي إِسِّيوْڒنْ ؤُمِي ثُوغَا غَارسْ د-إِهْوَا ؤُجدْجِيذْ.
١٨ أَقَا إِمْسَارْ أَمْ مَامّشْ ثُوغَا إِسِّيوڒْ ورْيَازْ ن أَربِّي إِ ؤُجدْجِيذْ، إِ إِنَّانْ: ”ثِيوشَّا غَارْ ڒْْوقْثْ-أَ أَذْ مّنْزنْ غَارْ ثوَّارْثْ ن سَامَارْيَا ثْنَاينْ ن ڒقْيَاسْ ن إِمنْذِي س يِيجّْ ن شِيقْلُو ذ يِيجّْ ن ڒقْيَاسْ ن وَارنْ أَزْذَاذْ س يِيجّْ ن شِيقْلُو.“
١٩ ثُوغَا يَارَّا-د ؤُنغْرَافْ ن ڒْْعسْكَارْ خْ ورْيَازْ ن أَربِّي، إِنَّا: ”خْزَارْ، وَاخَّا مَاڒَا سِيذِي إِڭَّا ڒكْوَازَا ذڭْ ؤُجنَّا، مَا إِزمَّارْ أَذْ إِمْسَارْ ؤُيَا؟“ ؤُ نتَّا ثُوغَا إِنَّا: ”خْزَارْ، أَذْ ث ثْژَارذْ س ثِيطَّاوِينْ نّشْ، مَاشَا وَارْ زَّايْسنْ ثتّتّذْ.“
٢٠ أَمُّو إِ ذ أَسْ ثمْسَارْ، مَاغَارْ ڒْْڭنْسْ إِعْفسْ خَاسْ ذِي ثوَّارْثْ. أَڒَامِي إِمُّوثْ.