٢١
مَانَاسِّي، أَجدْجِيذْ ن يَاهُوذَا
١ ثُوغَا غَارْ مَانَاسَّا ثنْعَاشْ ن إِسڭّْوُوسَا ؤُمِي إِذْوڒْ ذ أَجدْجِيذْ. نتَّا إِحْكمْ خمْسَا ؤُ-خمْسِينْ ن إِسڭّْوُوسَا ذِي ؤُرْشَالِيمْ. يمَّاسْ قَّارنْ أَسْ هَافْصِي-بَاهْ.
٢ نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي، أَمْ مَامّشْ جّْعَايفْ ن ڒڭْنُوسْ نِّي ثُوغَا إِسُّوفّغْ سِيذِي زِي زَّاثْ ن وُوذمْ ن أَيْثْ ن إِسْرَائِيل زِي ڒْوَارْثْ نْسنْ.
٣ نتَّا إِبْذَا أَذْ إِعْذڒْ ڒڭْعُوذِي نِّي ثُوغَا إِهْذمْ بَابَاسْ حِيزْقِييَا. نتَّا إِسّْبدّْ إِعَالْطَارنْ إِ بَاعَالْ ؤُشَا إِڭَّا إِشْثْ ن ثْربِّيثْ ن شْوَارْثِي أَمْ مَامّشْ ثُوغَا ت إِڭَّا أَخَابْ، أَجدْجِيذْ ن إِسْرَائِيل، ؤُشَا إِبنْذقْ إِ مَارَّا ڒْْعسْكَارْ ن ؤُجنَّا ؤُشَا إِعْبذْ أَسنْ.
٤ إِسّْبدّْ عَاوذْ إِعَالْطَارنْ ذِي ثَادَّارْثْ ن سِيذِي إِ خْ إِنَّا سِيذِي: ”ذِي ؤُرْشَالِيمْ أَذْ سّْمثْنغْ إِسمْ إِنُو.“
٥ نتَّا إِبْنَا إِعَالْطَارنْ إِ مَارَّا ڒْْعسْكَارْ ن ؤُجنَّا ذِي ثْنَاينْ ن ڒمْرَاحَاثْ ن ثَادَّارْثْ ن سِيذِي.
٦ نتَّا إِجَّا مِّيسْ أَذْ يكّْ خْ ثْمسِّي ؤُ إِسّْخدَّامْ ثَابزْڭِيوْثْ ؤُ ثُوغَا إِتّْڭزّنْ. نتَّا يِيوِي-د إِنِّي إِسَّاوَاڒنْ أَكْ-ذ إِمتَّانْ، ذ إِڭزَّاننْ. نتَّا إِڭَّا أَطَّاسْ مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي، مَاحنْذْ أَذْ ث إِسْعَارْ.
٧ نتَّا إِسّْبدّْ إِجّْ ن ڒخْيَاڒْ إِنقْشنْ ن ثْربِّيثْ ن شْوَارْثِي نِّي ثُوغَا إِڭَّا، ذِي ثَادَّارْثْ نِّي خْ ثُوغَا إِنَّا سِيذِي إِ ذَاوُوذْ، مِّيسْ ن سُولِيمَانْ: ”ذِي ثَادَّارْثْ-أَ ؤُ ذِي ؤُرْشَالِيمْ إِ فَارْزغْ زِي مَارَّا ثِيقبَّاڒْ ن إِسْرَائِيل، أَذْ سّْمثْنغْ إِسمْ إِنُو إِ ڒبْذَا.
٨ نشّْ وَارْ تّجِّيغْ عَاذْ أَضَارْ ن إِسْرَائِيل أَذْ إِودَّارْ بَارَّا إِ ثمُّورْثْ إِ وْشِيغْ إِ ڒجْذُوذْ نْسنْ. مْغِيرْ إِتّْخصَّا أَسنْ أَذْ حْضَانْ أَذْ ڭّنْ أَمْ مَامّشْ مَارَّا مِينْ ذ أَسنْ ؤُمُورغْ ؤُ أَمْ مَامّشْ مَارَّا شَّارِيعَا إِ ذ أَسنْ يُومُورْ ؤُمْسخَّارْ إِنُو مُوسَا.“
٩ مَاشَا نِيثْنِي وَارْ سْڒِينْ شَا، مَاغَارْ مَانَاسَّا يَارَّا إِ-ثنْ أَذْ ودَّارنْ، أَڒَامِي أَرنْينْ ذِي ثُوعّفْنَا مَاهُو ڒڭْنُوسْ نِّي إِمْحَا سِيذِي زَّاثْ إِ وُوذمْ ن أَيْثْ ن إِسْرَائِيل.
١٠ خنِّي إِسِّيوڒْ سِيذِي س ؤُقمُّومْ ن إِمْسخَّارنْ نّسْ، إِنَابِييّنْ، إِنَّا:
١١ ”مِينْزِي مَانَاسَّا، أَجدْجِيذْ ن يَاهُوذَا، إِڭَّا جّْعَايفْ-أَ، إِڭَّا نتَّا ثُوعّفْنَا مَاهُو خْ أَيْثْ ن أَمُورْ إِنِّي إِ ذِينْ إِدْجَانْ قْبڒْ نّسْ. نتَّا يَارَّا ؤُڒَا ذ يَاهُوذَا أَذْ إِخْضَا س إِميْضَا نّسْ ن لْ-أَصْنَامْ.
١٢ س ؤُيَا، أَمُّو إِ إِقَّارْ سِيذِي، أَربِّي ن إِسْرَائِيل: ’خْزَارْ، نشّْ أَذْ ڭّغْ ثُوعفّْنَا خْ ؤُرْشَالِيمْ ذ يَاهُوذَا، مَاحنْذْ مَارَّا وِي خَاسْ إِ غَا إِسْڒنْ، أَقَا ثْنَاينْ ن إِمزُّوغنْ نّسْ أَذْ طْنطْننْ.
١٣ نشّْ أَذْ قّْنغْ إِ ؤُرْشَالِيمْ فِيڒُو ن ڒعْبَارْ ن سَامَارْيَا ذ ڒْْمِيزَانْ ن ثَادَّارْثْ ن أَخَابْ. نشّْ أَذْ مسْحغْ ؤُرْشَالِيمْ أَمْ مَامّشْ مسْحغْ إِجّْ ن طّبْصِي. مسْحنْ ث ؤُ خنِّي قڒْبنْ ث خْ ؤُزدْجِيفْ نّسْ.
١٤ أَذْ جّغْ مِينْ إِقِّيمنْ زِي ثسْغَارْثْ ن ڒْْوَارْثْ إِنُو، أَذْ ثنْ سِّيوْضغْ غَارْ إِفَاسّنْ ن ڒْْعذْيَانْ نْسنْ ؤُ نِيثْنِي أَذْ ذوْڒنْ ذ ثَاحڭّْوَاسْثْ ذ ثَاكشَّاضْثْ إِ مَارَّا ڒْْعذْيَانْ نْسنْ،
١٥ مَاغَارْ نِيثْنِي ڭِّينْ مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي ؤُ مَاغَارْ نِيثْنِي سْعَارنْ أَيِي زڭْ وَاسّْ إِ ذِي فّْغنْ ڒجْذُوذْ نْسنْ زِي مِيصْرَا أَڒْ أَسّْ-أَ.
١٦ عَاوذْ ثُوغَا مَانَاسَّا إِسِّيزّڒْ أَطَّاسْ ن إِذَامّنْ إِمزْذَاڭنْ أَڒَامِي زَّايْسنْ إِشُّورْ مَارَّا ؤُرْشَالِيمْ زڭْ إِجّْ ن طَّارْفْ غَارْ ونّغْنِي، بْڒَا مَا نِيذَارْ عَاذْ دّنْبْ نّسْ إِ زِي يَارَّا يَاهُوذَا أَذْ إِخْضَا، ؤُمِي إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي.
١٧ إِمزْرُوينْ إِقِّيمنْ ن مَانَاسَّا ذ مَارَّا مِينْ إِڭَّا ؤُڒَا ذ دّنْبْ نّسْ إِ إِڭَّا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن يَاهُوذَا؟
١٨ مَانَاسَّا إِڭَّا أَذْ يَاريّحْ جَارْ ڒجْذُوذْ نّسْ. نتَّا إِتّْوَانْضڒْ ذڭْ وحْوِيشْ ن ثَادَّارْثْ نّسْ، ذِي ڒمْرَاحْ ن عُوصَا. مِّيسْ أَمُونْ إِذْوڒْ ذ أَجدْجِيذْ ذڭْ ومْشَانْ نّسْ.
أَمُونْ، أَجدْجِيذْ ن يَاهُوذَا
١٩ أَمُونْ ثُوغَا غَارسْ ثْنَاينْ ؤُ-عِيشْرِينْ ن إِسڭّْوُوسَا ؤُمِي إِذْوڒْ ذ أَجدْجِيذْ. نتَّا إِحْكمْ ثْنَاينْ ن إِسڭّْوُوسَا ذِي ؤُرْشَالِيمْ. يمَّاسْ قَّارنْ أَسْ مْشُولَّامِيثْ، يدْجِيسْ ن حَارُوزْ زِي يُوثْبَا.
٢٠ نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي، أَمُّو نِيشَانْ أَمْ مَامّشْ ث إِڭَّا بَابَاسْ مَانَاسَّا.
٢١ نتَّا يُويُورْ كُوڒْ أَبْرِيذْ إِ ذِي يُويُورْ بَابَاسْ. نتَّا إِسخَّارْ إِ إِميْضَا ن لْ-أَصْنَامْ إِ ثُوغَا إِسخَّارْ ؤُڒَا ذ بَابَاسْ ؤُشَا إِسْجذْ أَسنْ.
٢٢ نتَّا إِسْمحْ ذِي سِيذِي، أَربِّي ن ڒجْذُوذْ نّسْ، ؤُ نتَّا وَارْ يُويُورْ شَا ذڭْ وبْرِيذْ ن سِيذِي.
٢٣ إِمْسخَّارنْ ن أَمُونْ ڭِّينْ خَاسْ إِشْثْ ن ثْمعْمُوتْشْ ؤُشَا نْغِينْ أَجدْجِيذْ ذِي ثَادَّارْثْ نّسْ.
٢٤ مَاشَا ڒْْڭنْسْ ن ثمُّورْثْ نْغِينْ مَارَّا إِنِّي ثُوغَا إِڭِّينْ إِشْثْ ن ثْمعْمُوتْشْ إِ ؤُجدْجِيذْ أَمُونْ، ؤُشَا ڒْْڭنْسْ ن ثمُّورْثْ ڭِّينْ مِّيسْ يُوشِييَا ذ أَجدْجِيذْ ذڭْ ومْشَانْ نّسْ.
٢٥ إِمزْرُوينْ إِقِّيمنْ ن أَمُونْ ذ مِينْ إِڭَّا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن يَاهُوذَا؟
٢٦ نتَّا إِتّْوَانْضڒْ ذڭْ ونْضڒْ نّسْ ذڭْ وحْوِيشْ ن عُوزَّا. مِّيسْ يُوشِييَا إِذْوڒْ ذ أَجدْجِيذْ ذڭْ ومْشَانْ نّسْ.