١٤
أَمَاصْيَا، أَجدْجِيذْ ن يَاهُوذَا
١ ذڭْ ؤُسڭّْوَاسْ وِيسّْ ثْنَاينْ ن يُووَاشْ، مِّيسْ ن يَاهُويَاحَازْ، أَجدْجِيذْ ن إِسْرَائِيل، إِذْوڒْ أَمَاصْيَا، مِّيسْ ن يُووَاشْ، ذ أَجدْجِيذْ ن يَاهُوذَا.
٢ نتَّا ثُوغَا غَارسْ خمْسَا ؤُ-عِيشْرِينْ ن إِسڭّْوُوسَا، ؤُمِي إِذْوڒْ ذ أَجدْجِيذْ. نتَّا إِحْكمْ ذِي ؤُرْشَالِيمْ. يمَّاسْ قَّارنْ أَسْ يَاهُوعَاذَانْ، زِي ؤُرْشَالِيمْ.
٣ نتَّا إِڭَّا مِينْ إِدْجَانْ نِيشَانْ ذِي ثِيطَّاوِينْ ن سِيذِي، مَاشَا وَارْ إِدْجِي أَمْ بَابَاسْ ذَاوُوذْ. إِڭَّا نِيشَانْ أَمْ مَامّشْ إِڭَّا بَابَاسْ يُووَاشْ.
٤ مْغِيرْ وَارْ تّْوَاكّْسنْثْ ڒڭْعُوذِي. ڒْْڭنْسْ يِيوِي عَاذْ ثِيغَارْصَا ذ ثوْهِيبِينْ ن ڒبْخُورْ خْ ڒڭْعُوذِي.
٥ ؤُمِي ثُوغَا ثَاڭلْذَا ثمْثنْ ذڭْ إِفَاسّنْ نّسْ، إِمْسَارْ بلِّي نتَّا إِنْغَا إِمْسخَّارنْ نِّي إِنْغِينْ أَجدْجِيذْ، بَابَاسْ.
٦ مَاشَا إِحنْجِيرنْ ن إِقتَّاڒنْ وَارْ ثنْ إِنْغِي شَا، أَمْ مَامّشْ ث يُورَا ذڭْ وذْلِيسْ إِتّْوَانّْضنْ ن شَّارِيعَا ن مُوسَا، إِ ذِي إِوصَّا سِيذِي، إِنَّا: ”إِبَابَاثنْ وَارْ تّْوَانقّنْ ذِي سِّيبّثْ ن إِحنْجِيرنْ نْسنْ ؤُڒَا إِحنْجِيرنْ وَارْ تّْوَانقّنْ ذِي سِّيبّثْ ن إِبَابَاثنْ نْسنْ، مَاغَارْ كُوڒْ إِجّْ أَذْ إِتّْوَانغْ خْ دّْنُوبْ ن يِيخفْ نّسْ.“
٧ نتَّا إِغْڒبْ خْ أَيْثْ ن إِذُومْ ذِي ثغْزُورْثْ ن ثْمدْجَاحْثْ،عشْرَا أَڒفْ ن يرْيَازنْ، ؤُ إِطّفْ سَالَاعْ ذڭْ ؤُمنْغِي ؤُ إِڭَّا أَسْ يَاقْثَايِيلْ، أَڒْ أَسّْ-أَ.
٨ خنِّي إِسّكّْ أَمَاصْيَا إِرقَّاسنْ غَارْ يُووَاسْ، مِّيسْ ن يَاهُويَاحَازْ، مِّيسْ ن يَاهُو، أَجدْجِيذْ ن إِسْرَائِيل، إِنَّا: ”أَسْ-د، أجّْ أَنغْ أَذْ نمّڒْقَا إِ ؤُمنْغِي.“
٩ مَاشَا يُووَاشْ، أَجدْجِيذْ ن إِسْرَائِيل، إِسّكّْ إِجّْ ن ؤُرقَّاسْ غَارْ أَمَاصْيَا، أَجدْجِيذْ ن يَاهُوذَا، إِنَّا: ”شْبَارْقْ أَكْ-ذ إِسنَّاننْ إِ إِغمّْينْ خْ إِذُورَارْ ن لُوبْنَانْ، إِسّكّْ إِشْثْ ن ثبْرَاثْ غَارْ ثْشجَّارْثْ ن ثنْڭلْثْ خْ إِذُورَارْ ن لُوبْنَانْ، إِنَّا: ’أوْشْ يدْجِيسْ ذ ثَامْغَارْثْ إِ مِّي!‘ مَاشَا إِجّْ ن ڒْْوحْشْ ن ڒخْڒَا إِ ذِينْ يُويُورنْ خْ إِذُورَارْ ن لُوبْنَانْ، إِكَّا ؤُ إِعْفسْ خْ شْبَارْقْ أَكْ-ذ إِسنَّاننْ.
١٠ إِوَا شكْ ثْغڒْبذْ خْ إِذُومْ ؤُ ڒخُّو ثْذوْڒذْ ذَايكْ نّْفَاخثْ ذڭْ وُوڒْ نّشْ. طّفْ ذڭْ ؤُوقَّارْ إِ غَاركْ ؤُ قِّيمْ ذِي ثَادَّارْثْ نّشْ، مِينْزِي مَايمِّي غَا ثمّنْضَارذْ إِخفْ نّشْ ذِي ڒْْغَارْ ؤُ أَذْ ثوْضِيذْ، شكْ ذ يَاهُوذَا أَكِيذكْ؟“
١١ مَاشَا أَمَاصْيَا وَارْ إِخْسْ أَذْ إِسڒْ، ؤُشَا يُووَاشْ، أَجدْجِيذْ ن إِسْرَائِيل، إِڭعّذْ أَڒَامِي نتَّا ذ أَمَاصْيَا، أَجدْجِيذْ ن يَاهُوذَا، مّْقَابَاڒنْ غَارْ بَايْثْ-شَامْسْ إِ إِدْجَانْ ذِي يَاهُوذَا.
١٢ يَاهُوذَا إِتّْوَاغْڒبْ س ؤُفُوسْ ن إِسْرَائِيل، ؤُشَا نِيثْنِي أَروْڒنْ، كُوڒْ إِجّْ غَارْ ؤُقِيضُونْ نّسْ.
١٣ يُووَاشْ، أَجدْجِيذْ ن إِسْرَائِيل، إِطّفْ أَمَاصْيَا، أَجدْجِيذْ ن يَاهُوذَا، مِّيسْ ن يُووَاشْ، مِّيسْ ن أَخَازْيَا، ذِي بَايْثْ-شَامْسْ ؤُشَا يِيوضْ ث-إِ-د غَارْ ؤُرْشَالِيمْ. ذِينِّي إِڭَّا إِشْثْ ن ثَازِّيثْ ذِي ڒْْحِيضْ ن ؤُرْشَالِيمْ، زِي ثوَّارْثْ ن إِفْرَايِيمْ أَڒْ ثوَّارْثْ ن ثغْمَارْثْ، خْ إِجّْ ن وبْرِيذْ ن أَربْعَا-مْيَا ن إِغَادْجنْ.
١٤ يِيوِي مَارَّا ؤُرغْ ذ نُّوقَارْثْ ذ مَارَّا ڒقْشُوعْ إِ إِتّْوَافنْ ذِي ثَادَّارْثْ ن سِيذِي ؤُ ذڭْ إِخَّامنْ ن ثْخُوبَايْ ن ثَادَّارْثْ ن ؤُجدْجِيذْ، ؤُڒَا ذ إِرهَّاننْ، ؤُشَا إِعْقبْ غَارْ سَامَارْيَا.
١٥ إِمزْرُوينْ إِقِّيمنْ ن يُووَاشْ ذ مِينْ إِڭَّا ذ ثْمڭَّا نّسْ إِمحْضنْ ذ مَامّشْ إِمّْنغْ أَكْ-ذ أَمَاصْيَا، أَجدْجِيذْ ن يَاهُوذَا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن إِسْرَائِيل؟
١٦ يُووَاشْ إِڭَّا أَذْ يَاريّحْ جَارْ ڒجْذُوذْ نّسْ. نتَّا إِتّْوَانْضڒْ ذِي سَامَارْيَا جَارْ إِجدْجِيذنْ ن إِسْرَائِيل. مِّيسْ يَارُوبْعَامْ إِذْوڒْ ذ أَجدْجِيذْ ذڭْ ومْشَانْ نّسْ.
١٧ أَمَاصْيَا، مِّيسْ ن يُووَاشْ، أَجدْجِيذْ ن يَاهُوذَا، إِدَّارْ عَاذْ خمّسْطَاشْ ن إِسڭّْوُوسَا أَوَارْنِي إِ ڒْْموْثْ ن يُووَاشْ، مِّيسْ ن يَاهُويَاحَازْ، أَجدْجِيذْ ن إِسْرَائِيل.
١٨ إِمزْرُوينْ إِقِّيمنْ ن أَمَاصْيَا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن يَاهُوذَا؟
١٩ نِيثْنِي ڭِّينْ إِشْثْ ن ثْمعْمُوتْشْ خَاسْ ذِي ؤُرْشَالِيمْ، أَڒَامِي نتَّا يَارْوڒْ غَارْ لَاخِيشْ، مَاشَا نِيثْنِي سّكّنْ أَوَارْنِي أَسْ إِنِّي ث إِضْفَارنْ غَارْ لَاخِيشْ ؤُشَا نْغِينْ ث ذِينِّي.
٢٠ نِيثْنِي إِوْينْ ث-إِ-د خْ ييْسَانْ ؤُ نتَّا إِتّْوَانْضڒْ ذِي ؤُرْشَالِيمْ جَارْ ڒجْذُوذْ نّسْ ذِي ثنْذِينْثْ ن ذَاوُوذْ.
٢١ مَارَّا ڒْْڭنْسْ ن يَاهُوذَا يِيوِي عَازَارْيَا، ونِّي ؤُمِي غَارْ إِدْجَا سطَّاشْ ن إِسڭّْوُوسَا، ؤُ ڭِّينْ ث ذ أَجدْجِيذْ ذڭْ ومْشَانْ ن بَابَاسْ أَمَاصْيَا.
٢٢ نتَّا إِبْنَا إِلَاثْ ؤُ يَارَّا إِ-ث ذڭْ ؤُفُوسْ ن يَاهُوذَا، أَوَارْنِي ڒَْامِي إِڭَّا أَذْ يَاريّحْ ؤُجدْجِيذْ جَارْ ڒجْذُوذْ نّسْ.
يَارُوبْعَامْ، أَجدْجِيذْ ن إِسْرَائِيل
٢٣ ذڭْ ؤُسڭّْوَاسْ وِيسّْ خمّسْطَاشْ ن أَمَاصْيَا، مِّيسْ ن يُووَاشْ، أَجدْجِيذْ ن يَاهُوذَا، إِذْوڒْ يَارُوبْعَامْ، مِّيسْ ن يُووَاشْ، أَجدْجِيذْ ن إِسْرَائِيل ذِي سَامَارْيَا. نتَّا إِحْكمْ وَاحِيثْ ؤُ-عِيشْرِينْ ن إِسڭّْوُوسَا ذِي سَامَارْيَا.
٢٤ نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي. نتَّا وَارْ إِحيّذْ خْ مَارَّا دّْنُوبْ ن يَارُوبْعَامْ، مِّيسْ ن نَابَاطْ، ونِّي يَارِّينْ إِسْرَائِيل أَذْ إِخْضَا.
٢٥ نتَّا يَارَّا-د مَارَّا ثَامُّورْثْ ن إِسْرَائِيل سَاذُو ؤُفُوسْ نّسْ زِي مَانِي غَا ثِيوْضذْ غَارْ حَامَاثْ أَڒْ ڒبْحَارْ ن ڒوْضَا عْلَاحْسَابْ أَوَاڒْ ن سِيذِي، أَربِّي ن إِسْرَائِيل، إِ ثُوغَا إِسِّيوڒْ س ؤُقمُّومْ ن ؤُمْسخَّارْ نّسْ يُونُوسْ، مِّيسْ ن أَمِيتَّايْ زِي جَاثْ-حَافِيرْ.
٢٦ مَاغَارْ سِيذِي إِژْرَا أَقَا ڒغْبنْ ن إِسْرَائِيل ذ أَمرْزَاڭْ أَطَّاسْ ؤُ وَارْ ذِينْ إِقِّيمْ عَاذْ ونِّي إِتّْوَاطّْفنْ ذ ونِّي ؤُمِي جِّينْ ؤُ وَارْ ثُوغِي ونِّي إِعَاوْننْ إِ إِسْرَائِيل.
٢٧ سِيذِي ثُوغَا وَارْ ينِّي أَذْ إِمْحَا إِسمْ ن إِسْرَائِيل زِي سَاذُو إِجنْوَانْ، ؤُشَا إِسّنْجمْ إِ-ثنْ س ؤُفُوسْ ن يَارُوبْعَامْ، مِّيسْ ن يُووَاشْ.
٢٨ إِمزْرُوينْ إِقِّيمنْ ن يَارُوبْعَامْ ذ مَارَّا مِينْ إِڭَّا ذ مَارَّا ثِيمڭَّا نّسْ إِمحْضنْ ذ مَامّشْ إِمّْنغْ ؤُ مَامّشْ إِكسّبْ ثْوَاڒَا نّغْنِيثْ ذِيمَاشْقْ ذ حَامَاثْ إِنِّي ثُوغَا إِدْجَانْ غَارْ يَاهُوذَا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن إِسْرَائِيل؟
٢٩ يَارُوبْعَامْ إِڭَّا أَذْ يَاريّحْ جَارْ ڒجْذُوذْ نّسْ، جَارْ إِجدْجِيذنْ ن إِسْرَائِيل. مِّيسْ زَاكَارِييَّا إِذْوڒْ ذ أَجدْجِيذْ ذڭْ ومْشَانْ نّسْ.