٤
ڒْحُوكَّامْ إِمقّْرَاننْ ن سُولِيمَانْ ذ ڒْْوُولَاثْ نّسْ
١ ثُوغَا أَجدْجِيذْ سُولِيمَانْ ذ أَجدْجِيذْ خْ مَارَّا إِسْرَائِيل.
٢ إِنَا ثُوغَا ذ ڒْْحُوكَّامْ نّسْ إِمقّْرَاننْ:
عَازَارْيَا، مِّيسْ ن صَاذُوقْ، ثُوغَا-ث ذ أَكهَّانْ.
٣ إِلِيحُورَافْ ذ أَخِييَا، إِحنْجِيرنْ ن شِيشَا، ثُوغَا أَثنْ ذ إِمَارِيرنْ.
يَاحُوشَافَاطْ، مِّيسْ ن أَخِيلُوذْ، ثُوغَا-ث ذ أَمَارِيرْ أَمزْوَارُو.
٤ بَانَايَا، مِّيسْ ن يَاهُويَاذَاعْ، ثُوغَا-ث خْ ڒْْعسْكَارْ.
صَاذُوقْ ذ أَبْيَاثَارْ ثُوغَا أَثنْ ذ إِكهَّاننْ.
٥ عَازَارْيَا، مِّيسْ ن نَاثَانْ، ثُوغَا-ث خْ ڒْْوُولَاثْ.
زابُوذْ، مِّيسْ ن نَاثَانْ، ثُوغَا-ث ذ أَوْكِيڒْ ذ أَمدُّوكّڒْ ن ؤُجدْجِيذْ.
٦ أَخِيشَارْ ثُوغَا-ث خْ ثْزذِّيغْثْ ن ؤُجدْجِيذْ.
أَذُونِيرَامْ، مِّيسْ ن أَبْذَا ثُوغَا-ث خْ لْجِيزْيَا.
٧ سُولِيمَانْ غَارسْ ثنْعَاشْ ن ڒْْوُولَاثْ خْ مَارَّا إِسْرَائِيل، إِنِّي إِبدّنْ خْ ڒعْوتْشْ ن ؤُجدْجِيذْ ذ ثَادَّارْثْ نّسْ. خْ كُوڒْ إِجّْ س ؤُيُورْ نّسْ ذڭْ ؤُسڭّْوَاسْ، ثُوغَا خَاسْ أَذْ ث إِكْسِي.
٨ إِنَا ذ إِسْمَاونْ نْسنْ:
مِّيسْ ن حُورْ خْ إِذُورَارْ ن إِفْرَايِيمْ.
٩ مِّيسْ ن ذَاقَارْ ذِي مَاقَاسْ ؤُ ذِي شَاعَالُوبِّيمْ، بَايْثْ-شَامْسْ ذ إِلُونْ-بَايْثْ-حَانَانْ.
١٠ مِّيسْ ن حَاسَاذْ ذِي أَرُوبُوثْ. نتَّا ثُوغَا غَارسْ سُوكُو ذ مَارَّا ثَامُّورْثْ ن حَافِيرْ.
١١ مِّيسْ ن أَبِينَاذَابْ غَارسْ مَارَّا ثِيوْرِيرِينْ ن ذُورْ. ثَافَاثْ، يدْجِيسْ ن سُولِيمَانْ، ثُوغَا-ت غَارسْ ذ ثَامْغَارْثْ.
١٢ بَاعْنَا، مِّيسْ ن أَخِيلُوذْ، غَارسْ ثَاعْنَاكْ، مَاجِيدُّو ذ مَارَّا بَايْثْ-شَانْ إِ إِدْجَانْ غَارْ صُورْثَانْ، سْوَادَّايْ ن يَازْرَاعِيلْ، زِي بَايْثْ-شَانْ أَڒْ أَبَالْ-مَاحُولَا، أَڒْ ؤُغزْذِيسْ نّغْنِي ن يُوقْمَاعَامْ.
١٣ مِّيسْ ن جَابَارْ ثُوغَا ذِي رَامُوثْ-جِيلْعَاذْ. نتَّا غَارسْ ذْشُورَاثْ ن يَا‘إِرْ، مِّيسْ ن مَانَاسَّا، ثِينِّي إِدْجَانْ ذِي جِيلْعَاذْ. ثُوغَا غَارسْ ؤُڒَا ذ جِّيهثْ ن أَرْجُوبْ، ثنِّي ذِي بَاشَانْ، ستِّينْ ن ثِيندَّامْ مْغَارنْثْ س ڒْْحِيضْ ؤُ س زّكْرُونْ ن نّْحَاسْ.
١٤ أَخِينَاذَابْ، مِّيسْ ن عِيدُّو، غَارسْ مَاحَانَايِيمْ.
١٥ أَخِيمَاعَاصْ ثُوغَا-ث ذ لْوَالِي ذِي نَافْثَالِي. نتَّا يِيوِي ؤُڒَا بَاسِيمَاثْ، يدْجِيسْ ن سُولِيمَانْ، ذ ثَامْغَارْثْ نّسْ.
١٦ بَاعْنَا، مِّيسْ ن هُوشَا إِ، ثُوغَا-ث ذ لْوَالِي ذِي أَشِيرْ ؤُ ذِي بَاعَالُوثْ.
١٧ يَاهُوشَافَاطْ، مِّيسْ ن فَارُوحْ، ثُوغَا-ث ذ لْوَالِي ذِي إِسَّاكَارْ.
١٨ شِيمْعِي، مِّيسْ ن إِيْلَا، ثُوغَا-ث ذ لْوَالِي ذِي بِينْيَامِينْ.
١٩ جَابَارْ، مِّيسْ ن ؤُرِي، ثُوغَا-ث ذ لْوَالِي ذِي ثمُّورْثْ ن جِيلْعَاذْ، ثَامُّورْثْ ن سِيحُونْ، أَجدْجِيذْ ن إِمُورِييّنْ، ؤُ ن عُوجْ، أَجدْجِيذْ ن بَاشَانْ. نتَّا ثُوغَا ذ أَينِّي ن لْوَالِي ذِي ثمُّورْثْ نِّي.
٢٠ ثُوغَا ڒْْڭنْسْ ن يَاهُوذَا ذ إِسْرَائِيل س وَاطَّاسْ أَمْ يِيجْذِي غَارْ ثْمَا ن ڒبْحَارْ، أَمُّو أَطَّاسْ. نِيثْنِي شِّينْ، سْوِينْ ؤُ فَارْحنْ.