١ أَرِيحَا ثُوغَا ثقّنْ ثِيوُّورَا نّسْ نِيشَانْ زَّاثْ إِ وُوذمْ ن أَيْثْ ن إِسْرَائِيل. ؤُڒَا ذ إِجّْ وَارْ إِزمَّارْ أَذْ إِفّغْ، ؤُڒَا ذ إِجّْ وَارْ إِزمَّارْ أَذْ ذِينْ يَاذفْ. ٢ خنِّي إِنَّا سِيذِي إِ يَاشُووَا: ”خْزَارْ، نشّْ ڭِّيغْ أَشْ أَرِيحَا أَكْ-ذ ؤُجدْجِيذْ نّسْ، أَيْثْ ن بُو-ثغْرُوضْثْ إِمحْضنْ، ذڭْ ؤُفُوسْ نّشْ. ٣ إِتّْخصَّا كنِّيوْ أَذْ ثنّْضمْ إِ ثنْذِينْثْ. مَارَّا إِعسْكَارِييّنْ أَذْ نّْضنْ إِ ثنْذِينْثْ إِشْثْ ن ثْوَاڒَا. أَمْيَا إِ غَا ثڭّمْ ستَّا ن وُوسَّانْ. ٤ سبْعَا ن إِكهَّاننْ أَذْ إِزْوَارنْ زَّاثْ إِ تَّابُوثْ أَذْ أَرْبُونْ سبْعَا ن وَاشَّاونْ ن إِشَارِّي إِ ؤُسْڒِيوْڒوْ. ذڭْ وَاسّْ وِيسّْ سبْعَا أَذْ ثنّْضمْ إِ ثنْذِينْثْ سبْعَا ن ثْوَاڒَاوِينْ ؤُ خنِّي أَذْ سُوضنْ إِكهَّاننْ ذڭْ وَاشَّاونْ ن إِشَارِّي. ٥ خْمِي غَا يِيڒِي إِجّْ ن ؤُسُوضِي ذ أَزِيرَارْ ذڭْ يِيشّْ ن ؤُسْڒِيوْڒوْ ؤُ كنِّيوْ أَذْ ثسْڒمْ ڒْْحسّْ-أَ ن ؤُسُوضِي ذڭْ ؤُيِيشّْ ن إِشَارِّي، خنِّي أَذْ يَارّژْ ڒْْڭنْسْ إِمُونْ س ثْغُويِّيثْ ذڭْ ؤُجنَّا. خَاسْ ؤُشَا أَذْ إِوْضَا ڒْْحِيضْ ن ثنْذِينْثْ ؤُشَا أَذْ خَاسْ إِژْوَا ڒْْڭنْسْ، كُوڒْ إِجّْ ن ورْيَازْ أَذْ يُويُورْ نِيشَانْ غَارْ زَّاثْ.“

٦ خنِّي إِڒَاغَا يَاشُووَا، مِّيسْ ن نُونْ، خْ إِكهَّاننْ، إِنَّا أَسنْ: ”كْسِيمْ كنِّيوْ تَّابُوثْ ن ڒْْعَاهْذْ ؤُ تّجّمْ سبْعَا ن إِكهَّاننْ أَذْ إِزْوَارنْ غَارْ زَّاثْ إِ وُوذمْ ن تَّابُوثْ ن سِيذِي أَذْ أَرْبُونْ سبْعَا ن وَاشَّاونْ ن إِشَارِّي إِ ؤُسْڒِيوْڒوْ.“ ٧ نَّانْ إِ ڒْْڭنْسْ: ”ژْوَامْ ؤُ ثنّْضمْ إِ ثنْذِينْثْ. جّمْ إِعسْكَارِييّنْ س ڒسْنَاحْ أَذْ ژْوَانْ زَّاثْ إِ وُوذمْ ن تَّابُوثْ ن سِيذِي.“

٨ إِمْسَارْ أَمْ مَامّشْ ثُوغَا إِنَّا يَاشُووَا إِ ڒْْڭنْسْ. سبْعَا ن إِكهَّاننْ ثُوغَا أَربُّونْ سبْعَا ن وَاشَّاونْ ن إِشَارِّي إِ ؤُسْڒِيوْڒوْ ؤُشَا ژْوَانْ زَّاثْ إِ وُوذمْ ن سِيذِي، سُوضنْ ذڭْ وَاشَّاونْ ن إِشَارِّي ؤُشَا تَّابُوثْ ن ڒْْعَاهْذْ ن سِيذِي ثڭُّورْ أَوَارْنِي أَسنْ. ٩ إِرْيَازنْ إِحزّْمنْ س ڒسْنَاحْ إِزْوَارنْ زَّاثْ إِ وُوذمْ ن إِكهَّاننْ نِّي إِسُوضنْ ذڭْ وَاشَّاونْ ن إِشَارِّي ؤُ خْ ضفَّارْ ن تَّابُوثْ يُوسَا-د ؤُغزْذِيسْ أَنڭَّارُو ن ڒْْعسْكَارْ، أَمْ ڭُّورنْ، تّْسُوضنْ نِيثْنِي ذڭْ وَاشَّاونْ ن إِشَارِّي.

١٠ يَاشُووَا أَقَا يُومُورْ ڒْْڭنْسْ، إِنَّا ”وَارْ تّسْغُويُّومْ، وَارْ تّجِّيمْ ثْمِيجَّا نْومْ أَذْ أَسْ إِسڒْ حذْ، وَارْ د-إِتّفّغْ ؤُڒَا ذ إِجّْ ن وَاوَاڒْ زڭْ ؤُقمُّومْ نْومْ أَڒْ أَسّْ نِّي ذ أَومْ غَا إِنِيغْ: ’سْغُويّمْ!‘ خنِّي أَذْ ثسْغُويّمْ إِ ؤُمنْغِي.“ ١١ خَاسْ ؤُشَا يجَّا تَّابُوثْ ن سِيذِي أَذْ ثنّضْ إِ ثنْذِينْثْ، إِشْثْ ن ثْوَاڒَا ثنّضْ أَسْ-د. خنِّي ذوْڒنْ غَارْ ڒْْمَارْڭحْ ن ڒْْعسْكَارْ، سّنْسنْ ذِي ڒْْمَارْڭحْ. ١٢ ثِيوشَّا نّسْ غَارْ ثُوفُّوثْ ن زِيشْ إِكَّارْ يَاشُووَا ؤُشَا أَرْبُونْ إِكهَّاننْ تَّابُوثْ ن سِيذِي. ١٣ سبْعَا ن إِكهَّاننْ نِّي ثُوغَا يَاربُّونْ سبْعَا ن وَاشَّاونْ ن إِشَارِّي إِ ؤُسْڒِيوْڒوْ زَّاثْ إِ وُوذمْ ن تَّابُوثْ ن سِيذِي، قِّيمنْ ڭُّورنْ، سُوضنْ ذڭْ وَاشَّاونْ ن إِشَارِّي ؤُ إِرْيَازنْ إِحزّْمنْ س ڒسْنَاحْ إِزْوَارنْ غَارْ زَّاثْ ؤُ خْ ضفَّارْ ن تَّابُوثْ ن سِيذِي إِضْفَارْ ؤُغزْذِيسْ أَنڭَّارُو ن ڒْْعسْكَارْ، أَمْ قِّيمنْ ڭُّورنْ أَمْ تّْسُوضنْ ذڭْ وَاشَّاونْ ن إِشَارِّي. ١٤ ذڭْ وَاسّْ وِيسّْ ثْنَاينْ نّْضنْ عَاوذْ إِشْثْ ن ثْوَاڒَا إِ ثنْذِينْثْ ؤُشَا ذوْڒنْ غَارْ ڒْْمَارْڭحْ ن ڒْْعسْكَارْ. أَمُّو إِ ڭِّينْ ستَّا ن وُوسَّانْ. ١٥ ذڭْ وَاسّْ وِيسّْ سبْعَا، إِمْسَارْ، أَقَا كَّارنْ زِيشْ، ؤُمِي إِصْبحْ ڒْْحَاڒْ، ؤُشَا نّْضنْ أَمُّو سبْعَا ن ثْوَاڒَاوِينْ إِ ثنْذِينْثْ. ذڭْ وَاسّْ نِّي وَاهَا نّْضنْ إِ ثنْذِينْثْ سبْعَا ن ثْوَاڒَاوِينْ. ١٦ ؤُشَا إِمْسَارْ غَارْ ثْوَاڒَا وِيسّْ سبْعَا ؤُمِي سُوضنْ إِكهَّاننْ ذڭْ وَاشَّاونْ ن إِشَارِّي، أَقَا يَاشُووَا إِنَّا إِ ڒْْڭنْسْ: ”سْغُويّمْ، مِينْزِي سِيذِي إِڭَّا أَومْ ثَانْذِينْثْ ذڭْ ؤُفُوسْ! ١٧ ثَانْذِينْثْ أَذْ ثتّْوَاحَارّمْ إِ سِيذِي، ثَانْذِينْثْ ذ مَارَّا مِينْ ذَايسْ. مْغِيرْ ثَامْغَارْثْ ن فَارْقْ-شّْغڒْ رَاحَابْ وَاهَا ذ مَارَّا إِنِّي غَارسْ إِدْجَانْ ذِي ثَادَّارْثْ نّسْ أَذْ قِّيمنْ دَّارنْ، مِينْزِي نتَّاثْ ثسّْنُوفَّارْ خْ إِرقَّاسنْ نِّي ثُوغَا نسّكّْ. ١٨ حْضَامْ إِخفْ نْومْ زِي مَارَّا مِينْ إِتّْوَاحَارّْمنْ، مَاحنْذْ كنِّيوْ وَارْ ثذِّيكّْوِيڒمْ ذ أَيْثْ ن ڒحْرَامْ أَمْ ثكْسِيمْ شَا ن مِينْ إِدْجَانْ ذ ڒحْرَامْ ؤُ أَذْ ثَارّمْ ڒْْمَارْڭحْ ن ڒْْعسْكَارْ ن إِسْرَائِيل ذ ڒحْرَامْ ؤُ أَذْ ث ثْغضْڒمْ ذ أَرّْژِييثْ. ١٩ مَارَّا نُّوقَارْثْ ذ وُورغْ ذ ڒقْشُوعْ ن نّْحَاسْ ذ وُوزَّاڒْ، مَارَّا أَيَا ذ أَمْقدَّاسْ إِ سِيذِي ؤُشَا أَذْ ث ثسِّيذْفمْ ذڭْ وخَّامْ ن ثْخُوبَايْ ن سِيذِي.“ ◘ ٢٠ خَاسْ ؤُشَا إِسْغُويْ ڒْْڭنْسْ إِ ؤُمنْغِي ؤُشَا سُوضنْ ذڭْ وَاشَّاونْ ن إِشَارِّي. ؤُشَا إِمْسَارْ، ؤُمِي إِسْڒَا ڒْْڭنْسْ ڒْْحسّْ ن ؤُسُوضِي ذڭْ ؤُيِيشّْ ن إِشَارِّي، أَقَا ڒْْڭنْسْ يَارّژْ ذڭْ إِشْثْ ن ثْغُويِّيثْ ذڭْ ؤُجنَّا ؤُ ڒْْحِيضْ ن ثنْذِينْثْ إِهْذمْ ؤُ ڒْْڭنْسْ إِڭعّذْ، يُوذفْ غَارْ ثنْذِينْثْ، كُوڒْ إِجّْ ن ورْيَازْ يُويُورْ نِيشَانْ غَارْ زَّاثْ، ؤُشَا طّْفنْ نِيثْنِي ثَانْذِينْثْ. ◘ ٢١ حَارّْمنْ مَارَّا مِينْ إِدْجَانْ ذِي ثنْذِينْثْ إِ ڒْْحُوكْمْ س ڒقْضعْ ن سِّيفْ، زڭْ إِرْيَازنْ أَڒْ ثِيمْغَارِينْ، زڭْ إِحْرَامنْ أَڒْ إِوسُّورَا، أَڒْ أَفُونَاسْ، ؤُدْجِي ذ وغْيُوڒْ. ٢٢ إِنَّا يَاشُووَا إِ ثْنَاينْ ن يرْيَازنْ نِّي ثُوغَا إِتّْبرْڭَاڭنْ ثَامُّورْثْ: ”أَذْفمْ غَارْ ثَادَّارْثْ ن ثمْغَارْثْ ن فَارْقْ-شّْغڒْ، ؤُ سُّوفّْغمْ ثَامْغَارْثْ نِّي أَكْ-ذ مَارَّا مِينْ غَارسْ، أَمْ مَامّشْ كنِّيوْ إِ ذ أَسْ ثجِّيدْجمْ.“ ◘ ٢٣ خنِّي ؤُذْفنْ إِبْڒِيغنْ، إِبرْڭَاڭنْ، ؤُشَا سُّوفّْغنْ-د رَاحَابْ أَكْ-ذ بَابَاسْ ذ يمَّاسْ ذ أَيْثْمَاسْ ذ مَارَّا مِينْ إِدْجَانْ نّسْ. سُّوفّْغنْ مَارَّا ڒَْادْجْ نّسْ ؤُشَا ڭِّينْ أَسنْ مَانِي غَا قِّيمنْ بَارَّا إِ ڒْْمَارْڭحْ ن ڒْْعسْكَارْ ن إِسْرَائِيل. ٢٤ سّْشمْضنْ ثَانْذِينْثْ ذ مَارَّا مِينْ ذَايسْ س ثْمسِّي. مْغِيرْ نُّوقَارْثْ ذ وُورغْ ذ ڒقْشُوعْ ن نّْحَاسْ ذ وُوزَّاڒْ، سِّيذْفنْ ثنْ غَارْ وخَّامْ ن ثْخُوبَايْ ذِي ثَادَّارْثْ ن سِيذِي. ٢٥ رَاحَابْ، ثَامْغَارْثْ ن فَارْقْ-شّْغڒْ ذ ڒَْادْجْ ن ثَادَّارْثْ ن بَابَاسْ ذ مَارَّا مِينْ إِدْجَانْ نّسْ، إِجَّا إِ-ثنْ يَاشُووَا أَذْ دَّارنْ. ؤُ نتَّاثْ ثْزدّغْ ذِي ڒْْوسْطْ ن إِسْرَائِيل أَڒْ أَسّْ-أَ، مِينْزِي ثُوغَا ثسّْنُوفَّارْ خْ إِرقَّاسنْ إِ ثُوغَا إِسّكّْ يَاشُووَا، حِيمَا أَذْ برْڭَاڭنْ ثَامُّورْثْ. ٢٦ ذِي ڒْْوقْثْ نِّي إِجِّيدْجْ يَاشُووَا، إِنَّا: ”أَرْيَازْ نِّي إِ غَا إِسّْبدّْ أَرِيحَا عَاوذْ أَذْ يِيڒِي إِتّْوَانْعڒْ زَّاثْ إِ وُوذمْ ن سِيذِي. أَذْ أَسْ يڭّْ ذْسَاسْ نّسْ ذِي ثَارژِّيثْ ن ؤُمنْزُو نّسْ، أَذْ إِسّْبدّْ ثِيوُّورَا نّسْ ذِي ثَارژِّيثْ ن مِّيسْ أَمَاژُوژْ.“ ◘ ٢٧ أَمُّو إِ ثُوغَا سِيذِي أَكْ-ذ يَاشُووَا، ؤُشَا ڒخْبَارْ إِكَّا مَارَّا ثَامُّورْثْ.