٣
أَژْوِي ن لْ-ؤُرْذُونْ
١ غَارْ ثُوفُّوثْ زِيشْ، إِكَّارْ يَاشُووَا ؤُشَا كْسِينْ إِقِيضَانْ نْسنْ زِي شِيطِّيمْ ؤُشَا ؤُسِينْ-د غَارْ لْ-ؤُرْذُونْ، نتَّا ذ مَارَّا أَيْثْ ن إِسْرَائِيل، ؤُشَا سّنْسنْ ذِينِّي قْبڒْ إِ غَا ژْوَانْ.
٢ إِمْسَارْ أَوَارْنِي ثْڒَاثَا ن وُوسَّانْ، أَقَا إِمحْضَاينْ ؤُيُورنْ خْ ڒْْوسْطْ ن ڒْْمَارْڭحْ ن ڒْْعسْكَارْ
٣ ؤُشَا ؤُمُورنْ ڒْْڭنْسْ، نَّانْ: ”خْمِي غَا ثْژَارمْ تَّابُوثْ ن ڒْْعَاهْذْ ن سِيذِي، أَربِّي نْومْ، ؤُشَا إِكهَّاننْ إِلَاوِييّنْ أَرْبُونْ ت، خنِّي ؤُڒَا ذ كنِّيوْ أَذْ ثمُّوطّْيمْ زڭْ ومْشَامْ نْومْ، أَذْ ت ثضْفَارمْ.
٤ مَاشَا إِتّْخصَّا أَذْ ثْعبَّارمْ تَّاسِيعْ عْڒَاحَاڒْ إِ أَڒْفَاينْ ن إِغَادْجنْ جَارْ أَومْ ذ نتَّا، وَارْ غَارسْ ثَاذْسمْ. أَمُّو إِ غَا ثسّْنمْ أَبْرِيذْ إِ غَا ثكّمْ، مَاغَارْ كنِّيوْ زِيشْعمَّارْصْ وَارْ ثكِّيمْ أَبْرِيذْ-أَ، وَارْ إِدْجِي إِضنَّاضْ ؤُ وَارْ إِدْجِي فَارِيضنَّاضْ.“
٥ إِنَّا يَاشُووَا إِ ڒْْڭنْسْ: ”قدّْسمْ إِخفْ نْومْ، مِينْزِي ثِيوشَّا أَذْ إِڭّْ سِيذِي ڒعْجَايبْ ذِي ڒْْوسْطْ نْومْ.“
٦ إِسِّيوڒْ يَاشُووَا عَاوذْ أَكْ-ذ إِكهَّاننْ، إِنَّا: ”سْڭعّْذمْ تَّابُوثْ ن ڒْْعَاهْذْ ؤُشَا ژْوَامْ زَّاثْ إِ وُوذمْ ن ڒْْڭنْسْ!“ نِيثْنِي سّْڭعّْذنْ تَّابُوثْ ن ڒْْعَاهْذْ ؤُ إِزْوَارنْ غَارْ زَّاثْ إِ وُوذمْ ن ڒْْڭنْسْ.
٧ ثُوغَا سِيذِي إِنَّا إِ يَاشُووَا: ”أَسّْ-أَ أَذْ كَّارغْ أَذْ شكْ سّمْغَارغْ زَّاثْ إِ ثِيطَّاوِينْ ن مَارَّا إِسْرَائِيل، مَاحنْذْ مَارَّا أَذْ سّْننْ، أَقَا نشّْ أَكِيذكْ إِ دْجِيغْ، أَمْ مَامّشْ إِ ذ أَيِي ثُوغَا أَكْ-ذ مُوسَا.
٨ شكْ أَذْ ثُومُورذْ إِكهَّاننْ إِنِّي يَاربُّونْ تَّابُوثْ ن ڒْْعَاهْذْ، أَذْ ثِينِيذْ: ’خْ مِينِّي إِ غَا ثَاوْضمْ غَارْ ثْمَا ن وَامَانْ ن لْ-ؤُرْذُونْ، أَذْ ذِينْ ثْبدّمْ ذِي لْ-ؤُرْذُونْ!‘ “
٩ خَاسْ ؤُشَا إِنَّا يَاشُووَا إِ أَيْثْ ن إِسْرَائِيل: ”أَسمْ-د ذَا ؤُ ثسْڒمْ أَوَاڒنْ ن سِيذِي، أَربِّي نْومْ.“
١٠ ؤُشَا إِنَّا يَاشُووَا: ”س مَانْ أَيَا أَذْ ثسّْنمْ، أَقَا إِجّْ ن أَربِّي إِدَّارْ أَقَا-ث جَارْ أَومْ ؤُ نتَّا أَذْ إِسُّوفّغْ أَيْثْ ن كنْعَانْ ذ إِحِيتِّييّنْ ذ إِحِيوِييّنْ ذ إِفَارِيزِييّنْ ذ إِجِيرْجَاشِييّنْ ذ إِمُورِييّنْ ذ إِيابُوسِييّنْ زَّاثْ إِ ثِيطَّاوِينْ نْومْ زِي ڒْْوَارْثْ نْسنْ.
١١ خْزَارمْ، تَّابُوثْ ن ڒْْعَاهْذْ ن سِيذِي ن مَارَّا ثَامُّورْثْ ثزْوَارْ أَومْ زَّاثْ إِ وُوذمْ نْومْ ذِي لْ-ؤُرْذُونْ.
١٢ ڒخُّو خنِّي، فَارْنمْ ثنْعَاشْ ن يرْيَازنْ زِي ثْقبَّاڒْ ن إِسْرَائِيل أَكِيذْومْ، إِجّْ ن ورْيَازْ زِي كُوڒْ ثَاقْبِيتْشْ.
١٣ خْمِي إِضَارنْ ن إِكهَّاننْ، إِنِّي يَاربُّونْ تَّابُوثْ ن سِيذِي، سِيذِي ن مَارَّا ثَامُّورْثْ، أَذْ بدّنْ ذڭْ وَامَانْ ن لْ-ؤُرْذُونْ، خنِّي أَذْ إِمْسَارْ أَقَا أَمَانْ ن لْ-ؤُرْذُونْ أَذْ نْقضْعنْ، أَمَانْ إِ د-إِهكّْوَانْ زِي سنّجْ غَارْ سْوَادَّايْ، ؤُشَا أَذْ قِّيمنْ بدّنْ أَمْ يِيجّْ ن وغْبَارْ.“
١٤ ڒَْامِي إِكّسْ ڒْْڭنْسْ إِقِيضَانْ نّسْ حِيمَا أَذْ إِژْوَا لْ-ؤُرْذُونْ، أَرْبُونْ إِكهَّاننْ تَّابُوثْ ن ڒْْعَاهْذْ زَّاثْ إِ وُوذمْ ن ڒْْڭنْسْ.
١٥ ؤُمِي إِوْضنْ إِحمَّاڒنْ ن تَّابُوثْ غَارْ لْ-ؤُرْذُونْ ؤُشَا حَاذَانْ إِضَارنْ ن إِكهَّاننْ، إِنِّي يَارْبُونْ تَّابُوثْ، خْ ثْمَا ن وَامَانْ - ثُوغَا لْ-ؤُرْذُونْ إِسّْفِييْ خْ مَارَّا ثْموَّا نّسْ ذِي مَارَّا ؤُسَّانْ ن ثْميْرَا -
١٦ بدّنْ وَامَانْ نِّي د-إِهكّْوَانْ زِي سنّجْ. أَمَانْ بدّنْ نِيشَانْ أَمْ يِيجّْ ن وغْبَارْ إِڭّْوجْ أَطَّاسْ، غَارْ ثنْذِينْثْ ن أَذَامْ ثنِّي زَّاثْ إِ صَارْثَانْ. أَمُّو إِ بدّنْ وَامَانْ إِنِّي د-إِهكّْوَانْ غَارْ سْوَادَّايْ، غَارْ ڒبْحَارْ ن ڒوْضَا، غَارْ ڒبْحَارْ أَمدْجَاحْ، أَقَا تّْوَاقضْعنْ قَاعْ. خنِّي إِژْوَا ڒْْڭنْسْ ذڭْ ؤُرنْذَاذْ ن أَرِيحَا.
١٧ إِكهَّاننْ، إِنِّي يَارْبُونْ تَّابُوثْ ن ڒْْعَاهْذْ ن سِيذِي، بدّنْ ذِي ڒَامَانْ خْ ڒَْاژَاغْ، ذِي ڒْْوسْطْ ن لْ-ؤُرْذُونْ ؤُمِي إِژْوَا مَارَّا إِسْرَائِيل خْ ڒَْاژَاغْ أَڒَامِي إِكمّڒْ مَارَّا ڒْْڭنْسْ أَژْوِي خْ لْ-ؤُرْذُونْ.