١٣
سِيذِي إِسِّيوڒْ أَكْ-ذ يَاشُووَا
١ ؤُمِي ثُوغَا يَاشُووَا ذ أَوسَّارْ ؤُشَا إِمْغَارْ ذڭْ وُوسَّانْ ن ثُوذَارْثْ نّسْ، إِنَّا أَسْ سِيذِي: ”شكْ ثوْسَارذْ ؤُ ثمْغَارذْ ذڭْ وُوسَّانْ ؤُشَا عَاذْ ثقِّيمْ أَطَّاسْ ن ثمُّورْثْ مَاحنْذْ أَذْ ت ثكْسِيذْ ذ ڒْْوَارْثْ. ٢ ثَا ذ ثَامُّورْثْ إِقِّيمنْ: مَارَّا إِذُووَّارنْ ن إِفِيلِيسْطِينِييّنْ ؤُ مَارَّا جّْوَايهْ ن إِجَاشُورِييّنْ، ٣ زڭْ يغْزَارْ ن شِيحُورْ نِّي إِسِّيزّْڒنْ زَّاثْ إِ وُوذمْ ن مِيصْرَا، أَڒْ أَيْمِيرْ ن عِيقْرُونْ ذِي شَّامَالْ نِّي إِتّْوَاحْسبْ-د ذ ثَامُّورْثْ ن أَيْثْ ن كنْعَانْ، ذَايسْ خمْسَا ن ڒْْبَاشَاثْ ن ثْندَّامْ ن إِفِيلِيسْطِينِييّنْ، إِخْسْ أَذْ يِينِي أَغَازِي ذ أَشْذُوذِي ذ أَشْقَالُونِي، أَجِيتِّي، ذ أَعَاقْرُونِي، ذ إِعَاوِييّنْ، ٤ ؤُشَا خنِّي زِي لْجَانُوبْ مَارَّا ثَامُّورْثْ ن أَيْثْ ن كنْعَانْ ذ مُوغَارَا ثنِّي ن إِصِيذُونِييّنْ، أَڒْ أَفِيقْ ؤُ أَڒْ ويْمِيرْ ن إِمُورِييّنْ، ٥ ؤُشَا خنِّي ثَامُّورْثْ ن إِجِيبْلِييّنْ ذ مَارَّا لُوبْنَانْ مَانِيسْ إِ د-ثْنقَّارْ ثْفُوشْثْ، زِي بَاعْلْ-جَاذْ سْوَادَّايْ إِ وذْرَارْ ن حِيرْمُونْ أَڒْ مَانِي إِتَّاكّْوَاضْ بْنَاذمْ غَارْ حَامَاثْ، ٦ مَارَّا إِنِّي إِزدّْغنْ ذِي جّْوَايهْ زڭْ إِذُورَارْ ن لُوبْنَانْ أَڒْ مِيسْرَافُوثْ-مَايِيمْ، مَارَّا إِصِيذُونِييّنْ. نشّْ أَذْ خَاسنْ أَژّْڒغْ زَّاثْ إِ وُوذمْ ن أَيْثْ ن إِسْرَائِيل. أڭّْ مَاشَا ثَامُّورْثْ ذ ڒْْوَارْثْ إِ إِسْرَائِيل وَاهَا، أَمْ مَامّشْ ذ أَشْ ؤُمُورغْ.“ *
 
ثَاسْغَارْثْ ن رُوبِينْ، ن جَاذْ ؤُ إِ وزْينْ ن ثقْبِيتْشْ ن مَانَاسِّي
٧ ”بْضَا ڒخُّو ثَامُّورْثْ-أَ ذ ڒْْوَارْثْ جَارْ ثسْعَا ن ثْقبَّاڒْ ذ وزْينْ ن ثقْبِيتْشْ ن مَانَاسَّا، ٨ إِرْيَازنْ ن مَانَاسَّا نِّي إِكْسِينْ أَكْ-ذ إِرُوبِينِييّنْ ذ إِجَاذِييّنْ ثَاسْغَارْثْ ن ڒْْوَارْثْ نْسنْ نِّي إِ ذ أَسنْ إِوْشَا مُوسَا خْ ؤُجمَّاضْ ن لْ-ؤُرْذُونْ ذِي شَّارْقْ، أَمْ مَامّشْ ذ أَسنْ ت إِوْشَا مُوسَا، أَمْسخَّارْ ن سِيذِي: ٩ زِي أَرُوعِيرْ إِ إِدْجَانْ خْ ثْمَا ن أَرْنُونْ ذ ثنْذِينْثْ إِ إِدْجَانْ ذِي ڒْْوسْطْ ن ثغْزُورْثْ ذ مَارَّا ڒْْوَاطَا يُوعْڒَانْ زِي مِييْذَابَا أَڒْ ذِيبُونْ، ١٠ ذ مَارَّا ثِيندَّامْ ن سِيحُونْ، أَجدْجِيذْ ن إِمُورِييّنْ ونِّي ثُوغَا إِحكّْمنْ ذِي حَاشْبُونْ، أَڒْ أَيْمِيرْ ن أَيْثْ ن عَامُّونْ ١١ ؤُڒَا ذ جِيلْعَاذْ ذ ثمُّورْثْ ن إِجَاشُورِييّنْ ذ إِمَاعْكِييّنْ ذ قَاعْ وذْرَارْ ن حِيرْمُونْ ذ مَارَّا بَاشَانْ أَڒْ سَالْخَا، ١٢ مَارَّا ثَاڭلْذِيثْ ن عُوجْ، ذِي بَاشَانْ، ونِّي ثُوغَا إِحكّْمنْ ذِي عَاشْثَارُوثْ ذ إِذْرَاعِي. نتَّا ثُوغَا إِقِّيمْ زِي مِينْ إِقِّيمنْ ن إِرَافَاوِييّنْ نِّي ثُوغَا إِوْثَا إِ-ثنْ مُوسَا ؤُشَا يُوژّڒْ خَاسنْ زِي ثسْغَارْثْ نْسنْ. ١٣ مَاشَا أَيْثْ ن إِسْرَائِيل وَارْ ؤُژّْڒنْ خْ أَيْثْ ن إِجَاشُورِييّنْ ذ إِمَاعْكِييّنْ زِي ثسْغَارْثْ نْسنْ. جَاشُورْ ذ مَاعْكَاثْ قِّيمنْ زدّْغنْ ذِي ڒْْوسْطْ ن أَيْثْ ن إِسْرَائِيل أَڒْ أَسّْ-أَ.
١٤ إِ ثقْبِيتْشْ ن لَاوِي وَاهَا ؤُمِي إِ وَارْ إِوْشِي ثَاسْغَارْثْ. ثِيغَارْصَا ن ثْمسِّي ن سِيذِي، أَربِّي ن إِسْرَائِيل، ذ ثَاسْغَارْثْ نّسْ، أَمْ مَامّشْ ثُوغَا إِ ذ أَسْ إِسِّيوڒْ نتَّا.
 
١٥ إِوْشَا مُوسَا إِ ثقْبِيتْشْ ن أَيْثْ ن رُوبِينْ ثَاسْغَارْثْ نْسنْ، عْلَاحْسَابْ ڒَْادْجَاثْ نْسنْ. ١٦ إِ نِيثْنِي ؤُمِي د-ثكَّارْ ثمُّورْثْ ن أَرُوعِيرْ، ثنِّي إِ إِدْجَانْ غَارْ ثْمَا ن ثغْزَارْثْ ن أَرْنُونْ أَكْ-ذ ثنْذِينْثْ نِّي إِدْجَانْ ذِي ڒْْوسْطْ ن ثغْزُورْثْ ذ مَارَّا ڒْْوَاطَا يُوعْڒَانْ أَڒْ مِيذِيبَا. ١٧ حَاشْبُونْ ذ مَارَّا ثِيندَّامْ نّسْ نِّي إِدْجَانْ خْ ڒْْوَاطَا يُوعْڒَانْ: ذِيبُونْ، بَامُوثْ-بَاعْلْ ذ بَايْثْ-بَاعْلْ-مَاعُونْ ١٨ ذ يَاهْصَا ذ قَاذِيمُوثْ ذ مَايْفَاعَا ١٩ ذ قَارْيَاثَايِيمْ ذ سِيبْمَا ذ صَارَاثْ-هَا-شَاحَارْ خْ وذْرَارْ ن ڒوْضَا ن ثغْزُورْثْ، ٢٠ ذ بَايْثْ-فَاغُورْ ذ ثِيسَاوْنِينْ ن فِيسْجَا ذ بَايْثْ-يَاشِيمُوثْ، ٢١ مَارَّا ثِيندَّامْ خْ ڒْْوَاطَا يُوعْڒَانْ ذ مَارَّا ثَاڭلْذِيثْ ن سِيحُونْ، أَجدْجِيذْ ن إِمُورِييّنْ، إِنِّي إِ ثُوغَا إِحكّْمنْ ذِي حَاشْبُونْ، إِ خْ إِغْڒبْ مُوسَا، أَمْ إِغْڒبْ ؤُڒَا خْ ڒْْحُوكَّامْ ن مِيذْيَانْ: أَوِي ذ رَاقَامْ ذ صُورْ ذ حُورْ ذ رَابَاعْ، إِنِّي إِ ذ أَسنْ إِوْشَا صِيهُونْ جّهْذْ أَكِيذسْ، إِمزْذَاغْ ن ثمُّورْثْ. ٢٢ سنّجْ إِ مَارَّا إِنِّي إِتّْوَانْغنْ ذِي ڭَارَّا، نْغِينْ أَيْثْ ن إِسْرَائِيل عَاوذْ بَالْعَامْ، مِّيسْ ن بَاعُورْ، أَڭزَّانْ، س ڒقْضعْ ن سِّيفْ. ٢٣ ثُوغَا لْ-ؤُرْذُونْ أَكْ-ذ جّْوَايهْ نّسْ ذ أَيْمِيرْ ن أَيْثْ ن رُوبِينْ أَكْ-ذ ثمُّورْثْ غَارْ ثْمَا نّسْ. ثَا ذ ثَاسْغَارْثْ ن أَيْثْ ن رُوبِينْ عْلَاحْسَابْ ڒَْادْجَاثْ نْسنْ، أَكْ-ذ ثْندَّامْ ذ ذْشُورَاثْ نْسنْ.
٢٤ إِوْشَا مُوسَا إِ ثقْبِيتْشْ ن جَاذْ، إِ أَيْثْ ن جَاذْ، ثَاسْغَارْثْ نْسنْ عْلَاحْسَابْ ڒَْادْجَاثْ نْسنْ. ٢٥ إِ نِيثْنِي ؤُمِي د-ثكَّارْ ثمُّورْثْ ن يَاعَازِيرْ ذ مَارَّا ثِيندَّامْ ن جِيلْعَاذْ ذ وزْينْ ن ثمُّورْثْ ن أَيْثْ ن عَامُّونْ أَڒْ أَرُوعِيرْ نِّي إِدْجَانْ زَّاثْ إِ وُوذمْ ن رَابَّا، ٢٦ زِي حَاشْبُونْ أَڒْ رَامَاثْ-مِيصْفَا ذ بُوطُونِيمْ، ؤُ زِي مَاحَانَايِيمْ أَڒْ أَيْمِيرْ ن ذَابِيرْ. ٢٧ ؤُ ذِي ڒوْضَا ن ثغْزُورْثْ: بَايْثْ-هَارَامْ ذ بَايْثْ-نِيمْرَا ذ سُوكُّوثْ ذ صَافُونْ ذ مِينْ إِقِّيمنْ ن ثْڭلْذِيثْ ن سِيحُونْ، أَجدْجِيذْ ن حَاشْبُونْ، لْ-ؤُرْذُونْ ذ جّْوَايهْ نّسْ أَڒْ أَنڭَّارْ نْ ڒبْحَارْ ن كِينَّارَاثْ خْ ؤُجمَّاضْ ن لْ-ؤُرْذُونْ غَارْ شَّارْقْ. ٢٨ ثَا ذ ثَاسْغَارْثْ ن أَيْثْ ن جَاذْ، عْلَاحْسَابْ ڒَْادْجَاثْ نْسنْ، ثِيندَّامْ ذ ذْشُورَاثْ نّسْ.
٢٩ إِوْشَا مُوسَا إِ وزْينْ ن ثقْبِيتْشْ ن مَانَاسَّا ثَاسْغَارْثْ نْسنْ. ثكَّارْ أَسْ-د إِ وزْينْ ن ثقْبِيتْشْ ن مَانَاسَّا، عْلَاحْسَابْ ڒَْادْجَاثْ نْسنْ. ٣٠ ثُوغَا ثَامُّورْثْ نْسنْ زِي مَاحَانَايِيمْ: مَارَّا بَاشَانْ، مَارَّا ثَاڭلْذِيثْ ن عُوجْ، أَجدْجِيذْ ن بَاشَانْ، ذ مَارَّا ذْشُورَاثْ ن يَا‘إِرْ نِّي إِدْجَانْ ذِي بَاشَانْ، ستِّينْ ن ثْندَّامْ. ٣١ ذ وزْينْ ن جِيلْعَاذْ ذ عَاشْثَارُوثْ ذ إِذْرِيعِي، ثِيندَّامْ ن ثْڭلْذِيثْ ن عُوجْ ذِي بَاشَانْ، كَّارنْ-د إِ إِحنْجِيرنْ ن مَاخِيرْ، مِّيسْ ن مَانَاسَّا، أَقَا إِ وزْينْ ن إِحنْجِيرنْ ن مَاخِيرْ، عْلَاحْسَابْ ڒَْادْجَاثْ نْسنْ. ٣٢ ثِينَا ذ جّْوَايهْ إِ ثُوغَا إِبْضَا مُوسَا ذ ڒْْوَارْثْ ذِي ڒوْضَاثْ ن مُوآبَ، خْ ؤُجمَّاضْ ن لْ-ؤُرْذُونْ، غَارْ أَرِيحَا، غَارْ شَّارْقْ.
٣٣ مَاشَا إِ ثقْبِيتْشْ ن لَاوِي وَارْ ذ أَسْ إِوْشِي مُوسَا شَا ثَاسْغَارْثْ. سِيذِي، أَربِّي ن إِسْرَائِيل ذ ثَاسْغَارْثْ نْسنْ، أَمْ مَامّشْ ثُوغَا أَكِيذْسنْ إِسِّيوڒْ.
 
 
١٣:٩ أَعَوذ. 2‏:‏36 ١٣:١٩ ’قِيرْيَاثَايِيمْ‘ - إِخْسْ أَذْ يِينِي ’ثْنَاينْ ن ثْندَّامْ‘. ١٣:٢٢ ڒخْڒ. 31‏:‏8 ١٣:٢٣ ڒخْڒ. 34‏:‏14، 15 ١٣:٣٠ ڒخْڒ. 32‏:‏14، أَعَوذ. 3‏:‏4، 14 ١٣:٣٣ ڒخْڒ. 18‏:‏20؛ أَعَوذ. 10‏:‏9؛ 18‏:‏2