٦
١ ”سِيوْضمْ إِخفْ نْومْ ذِي ڒَامَانْ زِي ڒْوسْثْ ن ؤُرْشَالِيمْ، أَ أَيْثْ ن بِينْيَامِينْ، ؤُشَا سُوضمْ ذڭْ ؤُيِيشّْ ن إِشَارِّي ذِي ثَاقُوعَا. سْڭعّْذمْ أَشنْيَالْ س دّخَّانْ زِي بَايْثْ-هَا-كَارِيمْ، مِينْزِي إِسِّيڭْوَاذْ ڒْْغَارْ زِي شَّامَالْ، لْمُوصِيبَا ثَامقّْرَانْثْ.
٢ ثَامْغَارْثْ إِشوَّارنْ ذ إِتّْوَاسُّوبُوضنْ، يدْجِيسْ ن صِيهْيُونْ، أَذْ ت سّْهلّْكغْ.
٣ إِمكْسَاونْ أَذْ غَارسْ د-أَسنْ أَكْ-ذ ثْحِيمْرِيوِينْ نْسنْ، نِيثْنِي أَذْ أَسْ د-قوَّارنْ، أَذْ وْثنْ إِقِيضَانْ نْسنْ خَاسْ، كُوڒْ إِجّْ أَذْ يَارْوسْ ذِي ثسْغَارْثْ نّسْ.
٤ أَذْ إِنِينْ ’قدّْسمْ أَمنْغِي ضِيدّْ نّسْ، كَّارمْ، جّمْ أَنغْ أَذْ غَارسْ نْڭعّذْ س ؤُزِيڒْ. ؤُشْثْ خَانغْ، مَاغَارْ أَسّْ عْڒَاينْ إِعْذُو، مِينْزِي ثِيڒِيوِينْ ن ثْمذِّيثْ تّْسَارّْحنْثْ-إِ-د.
٥ كَّارمْ، جّمْ أَنغْ أَذْ نْڭعّذْ سْ دْجِيڒثْ، أَذْ نهْذمْ ڒقْصُورْ نّسْ!‘
٦ مَاغَارْ أَمُّو إِ إِقَّارْ سِيذِي نْ ڒسْكَارَاثْ: قسّمْ ثِيشجِّيرَا، سْبدّمْ أَشْبَارْ إِ ڒحْصَارثْ ضِيدّْ إِ ؤُرْشَالِيمْ. ثَا ذ ثَانْذِينْثْ إِ غَا ثتّْوَاعَاقبْ، أَقَا دّدْجْ ذِي ڒْوسْثْ نّسْ مَارَّا.
٧ أَمْ وَانُو إِتّجَّا أَمَانْ نّسْ تّْبقْبُوقنْ، أَمُّو إِ ثتّجَّا ؤُرْشَالِيمْ أَذْ إِبقْبقْ مِينْ وَارْ إِحْڒِينْ. ڒْْحسّْ ن لْعُونْفْ ذ وَاردّدْجْ إِتّْوَاسڒْ ذَايمْ، ڒحْڒَاشْ ذ ثيِّيثَا أَقَا-ثنْثْ ڒبْذَا زَّاثْ إِ ثِيطَّاوِينْ إِنُو.
٨ أجّْ إِ شمْ أَذْ ثتّْوَاوبّْخذْ، أَ ؤُرْشَالِيمْ، حِيمَا ڒعْمَارْ إِنُو وَارْ خَامْ ثتّمْسبْضِي، حِيمَا وَارْ شمْ تَّارِّيغْ ذْ ثَامُّورْثْ إِتّْوَاردّْدْجنْ ذ ثَامُّورْثْ إِخْڒَانْ زڭْ إِمزْذَاغْ.“
٩ ”أَمُّو إِ إِقَّارْ سِيذِي نْ ڒْعسْكَارَاثْ: ’أَمْ ثْزَايَارْثْ أَذْ ڒقْضنْ مِينْ إِقِّيمنْ ن إِسْرَائِيل س شْضَارثْ. أَرّْ أَفُوسْ نّشْ غَارْ ثْسضْوِينْ أَمْ ونِّي إِڒقّْضنْ أَضِيڒْ.‘
١٠ وِي غَارْ إِ غَا سِّيوْڒغْ نِيغْ ؤُمِي غَاعڒْمغْ نشّْ، حِيمَا أَذْ سْڒنْ؟ خْزَارْ، أَمزُّوغْ نْسنْ وَارْ إِتّْوَاخْثنْ، أَڒَامِي وَارْ زمَّارنْ أَذْ سْڒنْ إِ وَالُو. أَقَا ذَا، أَوَاڒْأنْ ن سِيذِي تَّافنْ ثنْ ذ أَحشِّي، وَارْ ثنْ حْذِيجنْ.“
١١ ”س ؤُينِّي شُّورغْ س وسْعَارْ ن سِيذِي، أَقَا ؤُحْڒغْ أَذْ ث منْعغْ. ’زدْجعْ أَسْعَارْ نّشْ خنِّي خْ إِحنْجِيرنْ ذڭْ وبْرِيذْ ؤُڒَا خْ ؤُمُونِي ن إِحُوذْرِييّنْ، مَاغَارْ عَاذْ أَرْيَازْ ذ ثمْغَارْثْ أَذْ ثنْ حبّْسنْ، أَمُّو ؤُڒَا ذ أَمْغَارْ ذ ؤُوسَّارْ.
١٢ ثُوذْرِينْ نْسنْ أَذْ ذوْڒنْثْ إِ إِنّغْنِي، جْمِيعْ أَكْ-ذ إِحْوِيشنْ، ؤُڒَا ذ ثِيمْغَارِينْ، مَاغَارْ نشّْ أَذْ سْوِيژّْضغْ س ؤُفُوسْ إِنُو ضِيدّْ إِمزْذَاغْ ن ثمُّورْثْ-أَ، أَمُّو إِ إِقَّارْ سِيذِي.
١٣ مَاغَارْ زڭْ ؤُمژْيَانْ أَڒْ أَمقّْرَانْ أَرزُّونْ مَارَّا نِيثْنِي ثِيزِي نْسنْ، ؤُ زڭْ ؤُنَابِي أَڒْ أَكهَّانْ مَارَّا ثْشمّثْ.
١٤ ثَارژِّيثْ ن ڒْْڭنْسْ إِنُو خْسنْ أَذْ ت سّْڭنْفَانْ س ڒهْونْ، قَّارنْ: ’ڒهْنَا، ڒهْنَا!‘، مَاشَا وَارْ ذِينْ إِدْجِي ڒهْنَا.
١٥ مَا أَذْ سضْحَانْ مِينْزِي تّڭّنْ جّْعِيفشْثْ؟ نِيثْنِي وَارْ تّْسضْحِينْ شَا، ڒحْيَا وَارْ ث سِّيننْ. س ؤُيَا نِيثْنِي أَذْ وْضَانْ جَارْ إِنِّي إِوطَّانْ. غَارْ ڒْْوقْثْ نِّي أَذْ زَّايْسنْ خڒْفغْ أَذْ نّْقَارْضنْ!‘، أَمُّو إِ إِقَّارْ سِيذِي.“
١٦ ”أَمُّو إِ إِقَّارْ سِيذِي: ’بدّمْ غَارْ إِبْرِيذنْ، ؤُشَا حْذَامْ، سقْسَامْ خْ إِبْرِيذنْ ن وشْحَاڒْ ؤُيَا، مَانِي إِدْجَا وبْرِيذْ نِيشَانْ ؤُشَا ؤُيُورمْ خَاسْ، خنِّي أَذْ ثَافمْ أَرَّاحثْ إِ ڒعْمَارْ نْومْ!‘ نِيثْنِي مَاشَا قَّارنْ: ’نشِّينْ وَارْ خَاسْ نڭُّورْ!‘
١٧ نشّْ ڭِّيغْ أَومْ إِعسَّاسنْ، نِّيغْ: ’سْڒمْ إِ ؤُسُوضِي ذڭْ ؤُيِيشّْ ن إِشَارِّي!‘، مَاشَا نِيثْنِي قَّارنْ: ’نشِّينْ وَارْ غَارسْ نسْحسِّي شَا!‘
١٨ س ؤُيَا سْڒمْ، أَ كنِّيوْ ڒڭْنُوسْ، ؤُ شمْ، أَ ثَامسْمُونْثْ!، سّنْ مِينْ غَارْسنْ إِ غَا إِمْسَارنْ!
١٩ سڒْ، أَ ثَامُّورْثْ، خْزَارْ، نشّْ أَذْ سِّيوْضغْ ڒْْغَارْ ذ أَمقّْرَانْ خْ ڒْْڭنْسْ-أَ، ڒْغِيدْجثْ ن إِنْوَاينْ نْسنْ ثِيعفَّانِينْ، مَاغَارْ نِيثْنِي وَارْ خزَّارنْ شَا غَارْ وَاوَاڒنْ إِنُو ؤُ نْضَارنْ شَّارِيعَا إِنُو.
٢٠ مَايمِّي ذ أَيِي د غَا يَاوْينْ جَّاوِي زِي شَابَا ذ ؤُغَانِيمْ ؤُحمُّومْ إِتّْفُوحنْ زِي ثمُّورْثْ يِيڭّْوجنْ؟ ثِيغَارْصَا ن وشْمَاضْ نْومْ وَارْ ذ أَيِي د-ؤُسِينْثْ إِ ڒْخَاضَارْ ؤُ ثِيغَارْصَا نْومْ وَارْ ذ أَيِي عْجِيبنْثْ.
٢١ س ؤُيَا أَمُّو إِ إِقَّارْ سِيذِي: ’خْزَارْ، نشّْ أَذْ ڭّغْ ثِيعنْكْرِيفِينْ إِ ڒْْڭنْسْ-أَ ؤُشَا نِيثْنِي أَذْ ذَايْسنْثْ نّْقَارْضنْ جْمِيعْ أَكْ-ذ إِبَابَاثنْ ذ إِحنْجِيرنْ، أَكْ-ذ وَاجَّارْ ذ ؤُمْعَاشَارْ نّسْ، أَمُّو إِ غَا هلّْكنْ.‘ “
٢٢ ”أَمُّو إِ إِقَّارْ سِيذِي: ’خْزَارْ، أَذْ د-يَاسْ إِجّْ ن ڒْْڭنْسْ زِي شَّامَالْ، إِجّْ ن ڒْْڭنْسْ أَمقّْرَانْ أَذْ إِتّْوَاڒَاغَا زڭْ إِنڭُّورَا ن ثمُّورْثْ.
٢٣ نِيثْنِي طّْفنْ ڒْْقوْسْ ذ وحْرِيشْ، أَقَا-ث ذ إِجّْ ن ڒْْڭنْسْ إِوْعَارْ، وَارْ أَرّحْمنْ. دّْرِيزْ نْسنْ إِڭَّا أَمْ زّْهِيرْ ن ڒبْحَارْ ؤُشَا نِيثْنِي نْيِينْ خْ ييْسَانْ. أَمْ ورْيَازْ ن ؤُمنْغِي أَمُّو إِ إِسّْبدّْ نتَّا إِخفْ نّسْ ضِيدّْ نّمْ، أَ يدْجِيسْ ن صِيهْيُونْ!“
٢٤ ”نشِّينْ نسْڒَا خَاسْ ڒخْبَارْ، أَرْخُونْ أَنغْ إِفَاسّنْ نّغْ، إِڒْقفْ أَنغْ ؤُنذْقفْ، ڒحْرِيقْ أَمْ ن ثمْغَارْثْ إِتَّارْونْ.
٢٥ وَارْ تّفّْغمْ غَارْ بَارَّا غَارْ ييَّارْ، وَارْ ڭُّورمْ ذڭْ وبْرِيذْ، مَاغَارْ أَقَا ذِينْ سِّيفْ ن ڒعْذُو، ثِيڭّْوُوذِي أَقَا-ت مَانِي مَا!
٢٦ أَ يدْجِيسْ نْ ڒْڭنْسْ إِنُو، بيْسثْ إِخفْ نّمْ س ثْخَانْشثْ ن وشْضَانْ، زُوزَّارْ خَامْ إِغّضْ، شضْنثْ أَمْ خْ ؤُينِّي ن مِّيسْ نّمْ، سْغُويّْ س ثْغُويِّيثْ ثَامرْزَاڭْثْ، مَاغَارْ ذغْيَا أَذْ خَانغْ د-يَاسْ ؤُمْثحَّايْ.“
٢٧ ”نشّْ ڭِّيغْ شكْ ذ صُّومْعثْ ن ثْعسَّاسْثْ ذِي ڒْْڭنْسْ إِنُو، ذ إِشْثْ ن لْقلْعَا، حِيمَا أَذْ ثسّْنذْ أَبْرِيذْ نْسنْ، أَذْ ذَايسْ ثَارْزُوذْ.“
٢٨ ”نِيثْنِي مَارَّا ذ إِنِّي إِحيّْذنْ خْ وبْرِيذْ زِي مَارْكَاثْ إِوْعَارنْ قَاعْ، ڭُّورنْ تّنّْضنْ ذِي ثمُّورْثْ تّْشقَّافنْ، نِيثْنِي أَمْ نّْحَاسْ ذ وُوزَّاڒْ، مَارَّا إِذْسنْ ذ أَيْثْ ن بُو-إِمُورْضَاسْ.
٢٩ أَرَّابُوزْ إِشْمضْ، ڒخْفِيفْ ثشَّا ث ثْمسِّي، مَاشَا ذِي ڒْْبَاطڒْ إِسّفْسِي ؤُفسَّايْ أَمُّو س وشْضَارْ، إِعفَّاننْ وَارْ زمَّارنْ أَذْ تّْوَافَارْزنْ.
٣٠ قَّارنْ أَسْ: ’نُّوقَارْثْ إِمّنْضَارنْ!‘، مَاغَارْ إِنْضَارْ إِ-ثنْ سِيذِي.“