١ خنِّي قَارّْبنْ-د مَارَّا إِكُومَانْذَارنْ ن ڒْْعسْكَارْ، يُوحَانَانْ، مِّيسْ ن قَارِييَاحْ، ذ يَازَانْيَا، مِّيسْ ن هُوشَاعْيَا، ذ مَارَّا ڒْْڭنْسْ، زڭْ ؤُمژْيَانْ أَڒْ أَمقّْرَانْ. ٢ نِيثْنِي نَّانْ إِ ؤُنَابِي إِرْمْيَا: ”إِڒِي أَذْ يَافْ ثُوثْرَا نّغْ أَرْضَا زَّاثْ إِ وُوذمْ نّشْ. تَّارْ أَنغْ غَارْ سِيذِي، أَربِّي نّشْ، ذِي طّْوعْ ن مَارَّا مِينْ إِقِّيمنْ، مِينْزِي نشِّينْ نقِّيمْ عَاذْ س ذْرُوسْ زڭْ وَاطَّاسْ، أَمْ مَامّشْ ثْزمَّارذْ أَذْ ثثْوَارِيذْ س ثِيطَّاوِينْ نّشْ ؤُمِي غَارْنغْ ثْخزَّارذْ. ٣ إِڒِي سِيذِي، أَربِّي نّشْ، أَذْ أَنغْ إِسّْشنْ مَانْ أَبْرِيذْ إِ غَا نضْفَارْ ذ مِينْ غَا نڭّْ.“ ٤ إِنَّا أَسنْ ؤُنَابِي إِرْمِييَا: ”نشّْ سْڒِيغْ ث. خْزَارْ، نشّْ أَذْ تَّارغْ ذِي طّْوعْ نْومْ غَارْ سِيذِي، أَربِّي نْومْ، عْلَاحْسَابْ أَوَاڒنْ نْومْ. نشّْ أَذْ أَومْ إِنِيغْ مَارَّا أَوَاڒْ نِّي زِي د خَاومْ إِ غَا يَارّْ سِيذِي، وَارْ زَّايْومْ سّْنُوفَّارغْ ؤُڒَا ذ إِجّْ ن وَاوَاڒْ.“ ٥ نِيثْنِي نَّانْ إِ إِرْمِييَا: ”سِيذِي أَذْ يِيڒِي ذ شَّاهذْ ذ أَمْثِيقِّي ذ أَصْذِيقْ جَارْ أَنغْ، مَاڒَا وَارْ نتّڭّْ عْلَاحْسَابْ كُوڒْ أَوَاڒْ نِّي كِيذكْ غَارْنغْ د غَا إِسّكّْ سِيذِي، أَربِّي نّشْ! ٦ ذ أَصبْحَانْ نِيغْ ذ أَعفَّانْ، أَذْ نْسڒْ غَارْ ثْمِيجَّا ن سِيذِي، أَربِّي نّغْ، إِ ؤُمِي شكْ إِ غَا نسّكّْ مَاحنْذْ أَذْ نِيڒِي مْلِيحْ خْمِي غَا نْسڒْ غَارْ ثْمِيجَّا ن سِيذِي، أَربِّي نّغْ.“ ◘

٧ أَوَارْنِي ڒَْامِي عْذُونْعشْرَا ن وُوسَّانْ، إِمْسَارْ أَقَا إِفّغْ وَاوَاڒْ ن سِيذِي غَارْ إِرْمِييَا. ٨ خَاسْ ؤُشَا إِڒَاغَا نتَّا خْ يُوحَانَانْ، مِّيسْ ن قَارِييَاحْ، ؤُ خْ مَارَّا إِكُومَانْذَارنْ ن ڒْْعسْكَارْ نِّي ثُوغَا غَارسْ إِدْجَانْ، ؤُڒَا خْ مَارَّا ڒْْڭنْسْ، زڭْ ؤُمژْيَانْ أَڒْ أَمقّْرَانْ. ٩ إِنَّا أَسنْ: ”أَمُّو إِ إِقَّارْ سِيذِي، أَربِّي ن إِسْرَائِيل، غَارْ ونِّي ذ أَيِي ثسّكّمْ، حِيمَا أَذْ أَسْ سِّيوْضغْ ثُوثْرَا نْومْ زَّاثْ إِ وُوذمْ نّسْ: ١٠ ’مَاڒَا كنِّيوْ ثقِّيممْ ثْزدّْغمْ ذِي ثمُّورْثْ-أَ، أَمُّو كنِّيوْ إِ غَا سّْبدّغْ ؤُ وَارْ كنِّيوْ هدّْمغْ، أَذْ كنِّيوْ ژُّوغْ ؤُ وَارْ كنِّيوْ قڒْعغْ، مَاغَارْ نشّْ ندّْمغْ خْ ڒْْغَارْ إِ ذَايْومْ ڭِّيغْ. ◘ ١١ وَارْ تّڭّْوْذمْ شَا زڭْ ؤُجدْجِيذْ ن بَابِيلْ، ونِّي زِي ثتّڭّْوذمْ. وَارْ زَّايسْ تّڭّْوْذمْ، أَمُّو إِ إِقَّارْ سِيذِي. مَاغَارْ نشّْ أَكِيذْومْ حِيمَا أَذْ كنِّيوْ سّْنجْمغْ ؤُ أَذْ كنِّيوْ فكّغْ زڭْ ؤُفُوسْ نّسْ. ١٢ نشّْ أَذْ كنِّيوْ أَرحْمغْ مَاحنْذْ نتَّا أَذْ كنِّيوْ يَارْحمْ ؤُ أَذْ كنِّيوْ يَارّْ أَذْ ثْذوْڒمْ غَارْ ثمُّورْثْ نْومْ.

١٣ مَاشَا مَاڒَا كنِّيوْ ثقَّارمْ: نشِّينْ وَارْ نتّْغِيمِي شَا ذِي ثمُّورْثْ-أَ، ؤُ مَاڒَا كنِّيوْ وَارْ ثتّسْڒِيمْ شَا غَارْ ثْمِيجَّا ن سِيذِي، أَربِّي نْومْ، ١٤ أَذْ ثِينِيمْ: لَّ، نخْسْ أَذْ نُويُورْ غَارْ مِيصْرَا مَانِي وَارْ نْژَارّْ أَمنْغِي ؤُ وَارْ نتّسْڒِي إِ ؤُسُوضِي ذڭْ ؤُيِيشّْ ن إِشَارِّي ؤُ وَارْ نتّْڒِيژِي أَغْرُومْ. أَقَا ذِينِّي إِ نخْسْ أَذْ نقِّيمْ!‘، ١٥ خنِّي سْڒمْ ڒخُّو غَارْ وَاوَاڒْ ن سِيذِي، كنِّيوْ مِينْ إِقِّيمنْ ن يَاهُوذَا. أَمُّو إِ إِقَّارْ سِيذِي ن ڒْْعسْكَارَاثْ، أَربِّي ن إِسْرَائِيل: ’مَاڒَا كنِّيوْ ثْعمّْذمْ أَذْ ثُويُورمْ غَارْ مِيصْرَا ؤُشَا أَذْ د-ثَاوْضمْ حِيمَا أَذْ ذِينْ ثْزذْغمْ أَمْ يِيبَارَّانِييّنْ، ١٦ خنِّي سِّيفْ إِ زِي ثتّڭّْوذمْ أَذْ كنِّيوْ إِڒْقفْ ذِينِّي ذِي مِيصْرَا ؤُ ڒَْاژْ إِ زِي ثتّڭّْوذمْ أَذْ كنِّيوْ د-إِضْفَارْ ذِينِّي ذِي مِيصْرَا ؤُ أَذْ ذِينِّي ثمّْثمْ. ١٧ خنِّي مَارَّا إِرْيَازنْ نِّي إِخْسنْ أَذْ ؤُيُورنْ غَارْ مِيصْرَا حِيمَا أَذْ ذِينْ زذْغنْ أَمْ يِيبَارَّانِييّنْ أَذْ مّْثنْ س سِّيفْ ذ ڒَْاژْ ذ طَّاعُونْ. وَارْ زَّايْسنْ إِنجّمْ نِيغْ إِتَّاركّْوَاڒْ ؤُڒَا ذ إِجّنْ زِي ڒْْغَارْ إِ خَاسنْ د غَاغضْڒغْ.‘ ١٨ مَاغَارْ أَمُّو إِ إِقَّارْ سِيذِي، أَربِّي ن إِسْرَائِيل: ’أَمْ مَامّشْ أَغْضَابْ إِنُو ذ وسْعَارْ إِنُو تّْوَازدْجْعنْ خْ إِمزْذَاغْ ن ؤُرْشَالِيمْ، أَمُّو إِ غَا إِتّْوَازدْجعْ ؤُڒَا ذ أَسْعَارْ إِنُو خَاومْ مَاڒَا ثِيوْضمْ غَارْ مِيصْرَا. كنِّيوْ أَذْ ثْذوْڒمْ ذ ڒْْقشْعثْ ن وخْزِي ذ ؤُنخْڒِيعْ ذ ثْسضْحَاشْثْ، ؤُڒَا ذ نّعْڒثْ ذ ڒْْحڭْرَا. أَمْشَانْ-أَعمَّارْصْ أَذْ ت ثْژَارمْ عَاذْ.‘ ◘ ١٩ سِيذِي إِسِّيوڒْ غَارْومْ، أَ مِينْ إِقِّيمنْ ن يَاهُوذَا! وَارْ تِّيذْفمْ غَارْ مِيصْرَا. سْنمْ مْلِيحْ أَقَا نشّْعڒْمغْ أَومْ أَسّْ-أَ. ٢٠ مَاغَارْ كنِّيوْ ثْغشّمْ خْ يِيخفْ نْومْ. كنِّيوْ سِيمَانْثْ نْومْ ثسّكّمْ أَيِي-د غَارْ سِيذِي، أَربِّي نْومْ، ثنَّامْ: ’ژَتدْجْ أَنغْ غَارْ سِيذِي، أَربِّي نّغْ. إِنِي أَنغْ مَارَّا مِينْ غَا يِيڒِي أَذْ يِينِي سِيذِي، أَربِّي نّغْ، ؤُشَا نشِّينْ أَذْ ث نڭّْ!‘ ٢١ أَسّْ-أَ نِّيغْ أَومْ، مَاشَا كنِّيوْ وَارْ ثسْڒِيمْ شَا غَارْ ثْمِيجَّا ن سِيذِي، أَربِّي نْومْ، غَارْ مَارَّا س مِينْ زِي إِ ذ أَيِي غَارْومْ د-إِسّكّْ. ٢٢ خنِّي ڒخُّو، سْنمْ مْلِيحْ أَقَا أَذْ ثمّْثمْ س سِّيفْ ذ ڒَْاژْ ذ طَّاعُونْ ذڭْ ومْشَانْ مَانِي ثخْسمْ أَذْ ثُويُورمْ حِيمَا أَذْ ذِينِّي ثقِّيممْ أَمْ يِيبَارَّانِييّنْ.“