٣
ثَاڒَاغِيثْ إِ وعْقَابْ غَارْ سِيذِي أَربِّي
١ ”قَّارنْ: ’خْزَارْ، إِجّْ ن ورْيَازْ إِدْجفْ إِ ثمْغَارْثْ نّسْ ؤُ نتَّاثْ ثُويُورْ خَاسْ، ثذْوڒْ ذ ثَامْغَارْثْ ن إِجّْ نّغْنِي، مَا إِعدّڒْ أَذْ غَارسْ د-إِعْقبْ خنِّي؟ مَا وَارْ ثفْسذْ ثمُّورْثْ نِّي أَطَّاسْ؟‘ شمْ مَاشَا ثڭّذْ فَّارْقْ-شْغڒْ نّمْ أَكْ-ذ إِجّْ ن ؤُبَارُّو ن إِمدُّوكَّاڒْ، مَا خنِّي ثْزمَّارذْ أَذْ غَارِي د-ثْعقْبذْ، أَمُّو إِ إِقَّارْ سِيذِي.
٢ سْڭعّذْ ثَامُوغْڒِي نّمْ ذِي ڒڭْعُوذِي إِ خفْ وهّْبنْ ثِيغَارْصَا، خْزَارْ، مَانِي وَارْ شمْ خَارْضنْ؟ أَقَا ثُويُورذْ أَذْ ثقِّيمذْ ذڭْ إِبْرِيذنْ مَارَّا أَمْ يِيجّْ ن وعْرَابْ ذِي ڒخْڒَا. أَمُّو إِ ثسّْفسْذذْ ثَامُّورْثْ س فَارْقْ-شّْغڒْ نّمْ ذ ڒْْغَارْ نّمْ.
٣ س ؤُيَا إِتّْوَامْنعْ ونْژَارْ ؤُشَا وَارْ د-إِوْثِي ونْژَارْ أَجُورِي. مَاشَا شمْ ثُوغَا غَارمْ ثَانْيَارْثْ ثقْجَارْ ن ثمْغَارْثْ ن فَارْقْ-شّْغڒْ، وَارْ ثخْسذْ أَذْ ثْسضْحِيذْ.
٤ مَا وَارْ ثبْذِيذْ مْغِيرْ إِ شْوَايْثْ ن ڒْْوقْثْ وَاهَا أَذْ أَيِي ثتّْڒَاغَاذْ ’بَابَا! شكْ ذ أَمدُّوكّڒْ إِنُو زِي ثمْژِي إِنُو!
٥ مَا خنِّي أَذْ إِقِّيمْ وغْضَابْ نّسْ إِتّْبدَّا إِ ڒبْذَا؟ مَا نتَّا أَذْ ث إِحْضَا إِ ڒبْذَا؟‘ خْزَارْ، أَمُّو إِ ثقَّارذْ، أَمْ ثتّڭّذْ مَاڒَا ثِيمسْڒَايِينْ نِّي ثِيعفَّانِينْ ؤُ ثتّْخَارّْصذْ أَقَا أَيَا إِعدّڒْ أَذْ إِتّْوَاڭّْ.“
٦ سِيذِي إِنَّا أَيِي ذڭْ وُوسَّانْ ن يُوشِييَا: ”مَا ثژْرِيذْ مِينْ ثڭَّا ثمْغَارْثْ إِسْرَائِيل إِكْفَارنْ؟ نتَّاثْ ثْڭعّذْ كُوڒْ أَذْرَارْ يُوعْڒَانْ، ثزّڒْ سَاذُو كُوڒْ ثَاشجَّارْثْ ثَازِيزَاوْثْ ؤُشَا ثڭَّا ذِينْ أَمْ ثمْغَارْثْ ن فَارْقْ-شّْغڒْ!
٧ أَوَارْنِي ڒَْامِي ثڭَّا أَيَا، نِّيغْ: ’أَذْ د-ثذْوڒْ غَارِي!‘، مَاشَا نتَّاثْ وَارْ د-ثذْوِيڒْ شَا. خنِّي ثژْرِي أَيَا ؤُتْشْمَاسْ إِغدَّارنْ يَاهُوذَا.
٨ ژْرِيغْ، ؤُمِي ذ أَسْ دْجْفغْ زِي سِّيبّثْ ن مَارَّا مِينْ زِي ثزْنَا ثمْغَارْثْ إِسْرَائِيل إِكْفَارنْ ؤُ وْشِيغْ أَسْ ثَابْرَاثْ ن وَادْجَافْ، أَقَا أَيَا وَارْ إِسّْنخْڒِيعْ ؤُتْشْمَاسْ ثَاغدَّارْثْ يَاهُوذَا، مَاشَا نتَّاثْ ثُويُورْ، ثسّفْسذْ إِخفْ نّسْ ؤُڒَا ذ نتَّاثْ س فَارْقْ-شّْغڒْ نّسْ.
٩ س فَارْقْ-شّْغڒْ نّسْ إِهوْننْ، ثتّْوَاسّفْسذْ ثمُّورْثْ، مَاغَارْ نتَّاثْ ثزْنَا س وژْرُو ذ ؤُكشُّوضْ.
١٠ ذِي مَارَّا أَيَا وَارْ د غَارِي ثعْقِيبْ ؤُتْشْمَاسْ يَاهُوذَا ثَاغدَّارْثْ س مَارَّا ؤُڒْ نّسْ، مَاشَا ثسّْنِيعْمِيڒْ وَاهَا، أَمُّو إِ إِقَّارْ سِيذِي.“
١١ س ؤُيَا إِنَّا أَيِي سِيذِي: ”ثَاوتْشْمَاثْ إِسْرَائِيل إِكْفَارنْ، أَقَا ثَارَّا إِخفْ نّسْ ثْبَانْ-د ثْسڭّذْ كْثَارْ خْ ؤُتْشْمَاسْ يَاهُوذَا ثَاغدَّارْثْ.
١٢ ؤُيُورْ، ڒَْاغَا أَوَاڒنْ-أَ غَارْ شَّامَالْ، إِنِي: ’ذْوڒْ-د، أَ شمْ ثمْغَارْثْ إِسْرَائِيل إِكْفَارنْ!‘، أَمُّو إِ إِقَّارْ سِيذِي. أَغمْبُوبْ إِنُو وَارْ إِتّْبَارْشِينْ، مَاغَارْ نشّْ شُّورغْ س ثْمخْسِيوْثْ إِشوَّارنْ، أَمُّو إِ إِقَّارْ سِيذِي. نشّْ وَارْ تِّيڒِيغْ تّْفُوڭْمغْ ڒبْذَا.
١٣ مَاشَا نْعمْ س ڒْْمُوعْصِييّثْ نّمْ، أَقَا ثْعذِّيذْ خْ سِيذِي، أَربِّي نّمْ، ؤُشَا ثفّْغذْ زڭْ وبْرِيذْ غَارْ مَارَّا إِغزْذِيسنْ غَارْ إِبَارَّانِييّنْ، سَاذُو كُوڒْ ثَاشجَّارْثْ ثَازِيزَاوْثْ، مَاشَا كنِّيوْ وَارْ ثسْڒِيمْ شَا غَارْ ثْمِيجَّا إِنُو، أَمُّو إِ إِقَّارْ سِيذِي.“
١٤ ”ذوْڒمْ-د، أَ ثَارَّاوْثْ إِكْفَارنْ!، أَمُّو إِ إِقَّارْ سِيذِي، مَاغَارْ نشّْ ذ أَرْيَازْ نْومْ، نشّْ أَذْ كنِّيوْ قبْڒغْ عَاوذْ، إِجّْ زڭْ إِشْثْ ن ثنْذِينْثْ ؤُ ثْنَاينْ زڭْ إِجّْ ن ڒَْادْجْ، ؤُ نشّْ أَذْ كنِّيوْ أَوْيغْ غَارْ صِيهْيُونْ.
١٥ نشّْ أَذْ أَومْ وْشغْ إِمكْسَاونْ إِ إِخْسْ وُوڒْ إِنُو، إِنِّي كنِّيوْ إِ غَا يَاروْسنْ س ثُوسّْنَا ذ ڒعْقڒْ.
١٦ خْمِي غَا ثمَّارنْيمْ ذڭْ وُوسَّانْ نِّي، أَذْ د-ثَاوْيمْ ڒْْغِيدْجثْ ذِي ثمُّورْثْ، إِقَّارْ سِيذِي، أَذْ ثَافذْ وَارْ قَّارنْ عَاذْ ’تَّابُوثْ ن ڒْْعَاهْذْ ن سِيذِي!‘ وَارْ د أَسنْ ثتَّاڒِي غَارْ ڒْْبَاڒْ، وَارْ ت تِّيذَارنْ، وَارْ ت فقّْذنْ عَاذْ ؤُشَا وَارْ ت تّْسنَّاعنْ.“
١٧ ”ذِي ڒْوقْثْ نِّي أَذْ إِنِينْ إِ ؤُرْشَالِيمْ ’ڒْْكُورْسِي ن سِيذِي!‘، ؤُشَا مَارَّا ڒڭْنُوسْ أَذْ غَارسْ د-نّْيَارْونْ ذِي طّْوعْ ن يِيسمْ ن سِيذِي، غَارْ ؤُرْشَالِيمْ، ؤُشَا وَارْ تّْغِيمِينْ ڭُّورنْ شَا عْلَاحْسَابْ ڒقْسَاحثْ ن وُوڒْ نْسنْ أَعفَّانْ.
١٨ ذڭْ وُوسَّانْ نِّي أَذْ ثُويُورْ ثَادَّارْثْ ن يَاهُوذَا غَارْ ثَادَّارْثْ ن إِسْرَائِيل ؤُشَا نِيثنْثِي أَذْ فّْغنْثْ مُوننْثْ زِي ثمُّورْثْ ن شَّامَالْ غَارْ ثمُّورْثْ نِّي وْشِيغْ ذ ثَاسْغَارْثْ إِ ڒجْذُوذْ نْومْ.“
١٩ ”نشّْ ثُوغَا نِّيغْ: ’مَامّشْ زمَّارغْ أَذْ كنِّيوْ أَرّغْ ذ إِحنْجِيرنْ إِنُو ؤُشَا أَذْ أَومْ وْشغْ ثَامُّورْثْ إِعِيزّنْ، ثَاسْغَارْثْ نِّي إِدْجَانْ ذ ثَالْوِيزْثْ ن ڒْْعسْكَارَاثْ ن ڒڭْنُوسْ؟‘ نشّْ نِّيغْ: ’كنِّيوْ أَذْ غَارِي ڒَْاغَانْ: بَابَا! ؤُشَا وَارْ خَافِي ثتّْحيِّيذمْ عَاذْ!‘
٢٠ س ثِيذتّْ، أَمْ ثمْغَارْثْ ثغْذَارْ أَمدُّوكّڒْ نّسْ، أَمُّو ؤُڒَا ذ كنِّيوْ ثِيغْذَارمْ أَيِي، أَ ثَادَّارْثْ ن إِسْرَائِيل، أَمُّو إِ إِقَّارْ سِيذِي.“
٢١ إِتّْوَاسڒْ إِجّْ ن ڒْْحسّْ خْ ثوْرِيرِينْ إِقشَّارنْ، أَنِيخْسسْ ذ ثُوثْرَا ن أَيْثْ ن إِسْرَائِيل، مِينْزِي نِيثْنِي ؤُيُورنْ إِبْرِيذنْ فَارْغنْ ؤُشَا سِيذِي، أَربِّي نْسنْ، تُّونْ ث.
٢٢ ”ذوْڒمْ-د، أَ ثَارَّاوْثْ إِكْفَارنْ!، نشّْ خْسغْ أَذْ سّْڭنْفِيغْ أَكْفَارْ نْومْ.“
”خْزَارْ، أَقَا أَنغْ ذَا، نشِّينْ نُوسَا-د غَاركْ، مَاغَارْ شكْ ذ سِيذِي، أَربِّي نّغْ!
٢٣ نِيشَانْ خْ وَالُو إِ إِتّْرَاجَا بْنَاذمْ زِي ڒڭْعُوذِي ن ثوْهِيبِينْ ذ دْجْغَارغْ خْ إِذُورَارْ. نِيشَانْ، ذِي سِيذِي، أَربِّي نّغْ، أَقَا إِدْجَا ؤُسنْجمْ ن إِسْرَائِيل.
٢٤ ڒفْضِيحثْ ثشَّا ڒْْخذْمثْ ن ڒجْذُوذْ نّغْ زِي ثمْژِي نّغْ: ؤُدْجِي نْسنْ ذ إِفُونَاسنْ ذ ثْفُونَاسِينْ نْسنْ، إِحنْجِيرنْ نْسنْ ذ ثْحنْجِيرِينْ نْسنْ.
٢٥ نشِّينْ نزّڒْ ذِي ڒفْضِيحثْ نّغْ ؤُشَا ڒحْيَا نّغْ ثذْڒَا أَنغْ، مَاغَارْ نشِّينْ نخْضَا أَكْ-ذ سِيذِي، أَربِّي نّغْ، نشِّينْ ذ ڒجْذُوذْ نّغْ، زِي ثمْژِي نّغْ أَڒْ إِضَا. نشِّينْ وَارْ نسْڒِي شَا غَارْ ثْمِيجَّا ن سِيذِي، أَربِّي نّغْ.“