٢٨
أَنَابِي حَانَانْيَا
١ ذڭْ ؤُسڭّْوَاسْ نِّي، ذڭْ ؤُمزْوَارُو ن ثْڭلْذَا ن ؤُجدْجِيذْ صِيذْقِييَا، أَجدْجِيذْ ن يَاهُوذَا، ذڭْ ؤُسڭّْوَاسْ وِيسّْ أَربْعَا، ذڭْ ؤُيُورْ وِيسّْ خمْسَا، إِسِّيوڒْ أَكِيذِي حَانَانْيَا، مِّيسْ ن عَازُورْ، أَنَابِي زِي جِيبْعُونْ، ذِي ثَادَّارْثْ ن سِيذِي زَّاثْ إِ ثِيطَّاوِينْ ن إِكهَّاننْ ذ ڒْْڭنْسْ إِمُونْ، إِنَّا:
٢ ”أَمُّو إِ إِقَّارْ سِيذِي ن ڒْْعسْكَارَاثْ، أَربِّي ن إِسْرَائِيل، إِقَّارْ: ’نشّْ أَذْ أَرْژغْ أَزَايْڒُو ن ؤُجدْجِيذْ ن بَابِيلْ.
٣ عَاذْ ثْنَاينْ ن إِسڭّْوُوسَا خنِّي نشّْ أَذْ د-أَرّغْ غَارْ ثمُّورْثْ-أَ مَارَّا ڒقْشُوعْ ن ثَادَّارْثْ ن سِيذِي، إِنِّي إِكْسِي نابُوخَاذْنَاصَّارْ، أَجدْجِيذْ ن بَابِيلْ، زڭْ ومْشَانْ-أَ ؤُشَا يِيوْيْ-إِ-ثنْ غَارْ بَابِيلْ.
٤ نشّْ أَذْ سّْعقْبغْ يَاكُونْيَا، مِّيسْ ن يَاهُويَاقِيمْ، ذ مَارَّا إِمنْفِييّنْ زِي يَاهُوذَا إِ د-يِيوْضنْ غَارْ بَابِيلْ، غَارْ ومْشَانْ-أَ، أَمُّو إِ إِقَّارْ سِيذِي، مِينْزِي نشّْ أَذْ أَرْژغْ أَزَايْڒُو ن ؤُجدْجِيذْ ن بَابِيلْ.‘ “
٥ خنِّي إِنَّا ؤُنَابِي إِرْمِييَا إِ ؤُنَابِي حَانَانْيَا - زَّاثْ إِ ثِيطَّاوِينْ ن إِكهَّاننْ ؤُ زَّاثْ إِ ثِيطَّاوِينْ ن ڒْْڭنْسْ إِمُونْ، إِنِّي إِبدّنْ ذِي ثَادَّارْثْ ن سِيذِي -
٦ وَاهْ أَمُّو إِ إِنَّا إِرْمِييَا: ”أَمِينْ، أَمُّو إِ غَا يڭّْ سِيذِي! إِڒِي أَذْ إِسّقْفڒْ سِيذِي أَوَاڒنْ نّشْ إِ ثْنبِّيذْ أَڒَامِي غَا يَارّْ ڒقْشُوعْ ن ثَادَّارْثْ ن سِيذِي ذ مَارَّا إِنِّي إِتّْوَانذْهنْ ذِي لْمنْفَا زِي بَابِيلْ غَارْ ومْشَانْ-أَ!
٧ سڒْ مَاشَا إِ وَاوَاڒْ-أَ إِ زِي سَّاوَاڒغْ ذڭْ إِمزُّوغنْ نْومْ ؤُ ذڭْ إِمزُّوغنْ ن ڒْْڭنْسْ إِمُونْ:
٨ ’إِنَابِييّنْ نِّي ثُوغَا ذِينْ إِدْجَانْ قْبڒْ إِنُو ذ كنِّيوْ زڭْ وشْحَاڒْ ؤُيَا، نبَّانْ ضِيدّْ إِ وَاطَّاسْ ن ثمُّورَا ؤُ ضِيدّْ إِ وَاطَّاسْ ن ثْڭلْذِيثِينْ خْ ڭَارَّا، خْ إِشڒْوَاونْ ؤُ خْ طَّاعُونْ.
٩ مَاشَا أَنَابِي نِّي إِتّْنَابّنْ خْ سْڒَامْ، مَاڒَا أَوَاڒْ ن ؤُنَابِي نِّي أَذْ د-إِفّغْ، خنِّي أَذْ يِيڒِي إِتّْوَاسّنْ س ثِيذتّْ أَقَا سِيذِي إِسّكّْ-د أَنَابِي نِّي.‘ “
١٠ خنِّي إِكْسِي ؤُنَابِي حَانَانْيَا أَزَايْڒُو ن يِيرِي ن ؤُنَابِي إِرْمِييَا، يَارْژْ إِ-ث.
١١ ؤُشَا إِسِّيوڒْ حَانَانْيَا زَّاثْ إِ ثِيطَّاوِينْ ن مَارَّا ڒْْڭنْسْ، إِنَّا: ”أَمُّو إِ إِقَّارْ سِيذِي: ’قْبڒْ إِ غَا عْذُونْ ثْنَاينْ ن إِسڭّْوُوسَا كمّْڒنْ أَذْ أَرْژغْ أَزَايْڒُو ن نابُوخَاذْنَاصَّارْ، أَجدْجِيذْ ن بَابِيلْ، إِ إِدْجَانْ خْ يِيڒَاونْ ن مَارَّا ڒڭْنُوسْ.“ ؤُشَا إِرْمِييَا يُويُورْ أَبْرِيذْ نّسْ.
١٢ خنِّي يُوسَا-د وَاوَاڒْ ن سِيذِي غَارْ إِرْمِييَا أَوَارْنِي إِ ؤُمِي يَارْژَا ؤُنَابِي حَانَانْيَا أَزَايْڒُو خْ يِيڒَاونْ ن ؤُنَابِي إِرْمِييَا، إِنَّا:
١٣ ”ؤُيُورْ، سِيوڒْ أَكْ-ذ حَانَانْيَا، إِنِي: ’أَمُّو إِ إِقَّارْ سِيذِي: إِزَايْڒُوثنْ ن ؤُكشُّوضْ ثَارْژِيذْ ثنْ، مَاشَا ثڭِّيذْ إِزَايْڒُوثنْ ن وُوزَّاڒْ ذڭْ ومْشَانْ نْسنْ.‘
١٤ مَاغَارْ أَمُّو إِ إِقَّارْ سِيذِي ن ڒْْعسْكَارَاثْ، أَربِّي ن إِسْرَائِيل: ’إِجّْ ن ؤُزَايْڒُو ن وُوزَّاڒْ سَّارْسغْ ث خْ يِيڒَاونْ ن مَارَّا ڒڭْنُوسْ، مَاحنْذْ أَذْ سخَّارنْ إِ نابُوخَاذْنَاصَّارْ، أَجدْجِيذْ ن بَابِيلْ. نِيثْنِي أَذْ أَسْ سخَّارنْ. ؤُڒَا ذ ڒْْمَاڒْ وْشِيغْ ثنْ ذڭْ ؤُفُوسْ نّسْ.‘ “
١٥ خَاسْ ؤُشَا إِنَّا ؤُنَابِي إِرْمِييَا إِ ؤُنَابِي حَانَانْيَا: ”سڒْ، حَانَانْيَا، سِيذِي وَارْ شكْ د إِسّكّْ شَا ؤُ شكْ ثْغَارّذْ ڒْْڭنْسْ-أَ أَذْ إِتّْشڒْ خْ إِخَارِّيقنْ.
١٦ س ؤُيَا، أَمُّو إِ إِقَّارْ سِيذِي، خْزَارْ، نشّْ أَذْ شكْ نْضَارغْ. عَاذْ ذڭْ ؤُسڭّْوَاسْ-أَ أَذْ ثمّْثذْ مِينْزِي ثسِّيوْڒذْ خْ ؤُحيّذْ ن سِيذِي.“
١٧ إِمُّوثْ ؤُنَابِي حَانَانْيَا ذڭْ ؤُسڭّْوَاسْ نِّي، ذڭْ ؤُيُورْ وِيسّْ سبْعَا.