٢٢
١ ”أَمُّو إِ إِقَّارْ سِيذِي: ’هْوَا غَارْ ثَادَّارْثْ ن ؤُجدْجِيذْ ن يَاهُوذَا، إِنِي ذِينْ أَوَاڒْ-أَ،
٢ أَذْ ثِينِيذْ: أَ أَجدْجِيذْ ن يَاهُوذَا، ونِّي إِقِّيمنْ خْ ڒْْعَارْشْ ن ذَاوُوذْ، سڒْ إِ وَاوَاڒْ ن سِيذِي، شكْ ذ إِمْسخَّارنْ نّشْ ذ ڒْْڭنْسْ نّشْ إِ إِتَّاذْفنْ زِي ثوُّورَا-يَا!
٣ أَمُّو إِ إِقَّارْ سِيذِي: ڭّمْ ڒْْحقّْ ذ ثْسڭْذَا ؤُ سّْنجْممْ مِينْ إِتّْوَاكشّْضنْ زڭْ ؤُفُوسْ ن ونِّي إِحصَّارنْ. وَارْ حصَّارمْ، وَارْ شَّاثمْ ڒْْبَارَّانِي ذ ؤُيُوجِيڒْ ذ ثَاجَّاتْشْ. وَارْ سِّيزِّيڒمْ إِذَامّنْ إِمزْذَاڭنْ ذِي ثمُّورْثْ-أَ!
٤ مَاڒَا كنِّيوْ أَذْ ثڭّمْ أَوَاڒْ-أَ س ثِيذتّْ، خنِّي أَذْ أَذْفنْ إِجدْجِيذنْ زِي ثوُّورَا ن ثنْذِينْثْ-أَ، إِنِّي إِ غَا إِقِّيمنْ غَارْ ذَاوُوذْ خْ ڒْْعَارْشْ نّسْ، إِنِّي إِ غَا إِنذْهنْ إِكَارُّوثنْ ذ ييْسَانْ، وَاهْ، نتَّا ذ إِمْسخَّارنْ نّسْ ذ ڒْْڭنْسْ نّسْ.
٥ مَاڒَا وَارْ ثسْڒِيمْ شَا غَارْ وَاوَاڒنْ-أَ، أَقَا جُّودْجغْ إِ يِيخفْ إِنُو، أَمُّو إِقَّارْ سِيذِي، أَذْ ثذْوڒْ ثَادَّارْثْ-أَ ذ ڒْْخِيرْبثْ.‘ “
٦ ”مَاغَارْ أَمُّو إِ إِقَّارْ سِيذِي خْ ثَادَّارْثْ ن ؤُجدْجِيذْ ن يَاهُوذَا: ’وَاخَّا شكْ ثُوسِيذْ أَيِي خْ ڒْْخَاضَارْ أَمْ جِيلْعَاذْ ؤُ أَمْ ثْقِيشّثْ ن لُوبْنَانْ، ذ ثِيذتّْ أَذْ شكْ تّڭّغْ ذ ڒخْڒَا، ثِيندَّامْ وَارْ إِزْذِيغنْ.
٧ نشّْ أَذْ حُوزغْ ضِيدّْ نّشْ إِمْثحَّايّنْ، كُوڒْ إِجّْ س ڒسْنَاحْ نّسْ إِ ونْغَايْ. نِيثْنِي أَذْ قسّنْ ثِيشجِّيرَا نّشْ ن ثنْڭلْثْ إِ إِشْنَانْ أَطَّاسْ س شّْوَاقَارْ نْسنْ ؤُشَا أَذْ ثنْثْ وْشنْ إِ ثْمسِّي.
٨ خنِّي أَذْ د-كّنْ أَطَّاسْ ن ڒڭْنُوسْ خْ ثنْذِينْثْ-أَ، أَذْ إِنِينْ، كُوڒْ إِجّْ إِ ؤُمْقَارَّابْ نّسْ: مَايمِّي سِيذِي إِڭَّا أَمُّو إِ ثنْذِينْثْ-أَ ثَامقّْرَانْثْ؟
٩ أَذْ إِنِينْ: مِينْزِي نِيثْنِي سمْحنْ ذِي ڒْْعَاهْذْ ن سِيذِي، أَربِّي نْسنْ، ؤُشَا سجْذنْ إِ إِربِّيثنْ نّغْنِي ؤُشَا ذوْڒنْعبّْذنْ أَسنْ.‘ “
خْ شَالُّومْ
١٠ ”وَارْ تّْرُومْ خْ ؤُمتِّينْ ؤُ وَارْ خَاسْ شَّاثمْ أَڭجْذُورْ. رُومْ خْ ونِّي يُويُورنْ، مَاغَارْ نتَّاعمَّارْصْ أَذْ د-إِعْقبْ،عمَّارْصْ أَذْ إِژَارْ عَاذْ ثَامُّورْثْ نّسْ مَانِي إِخْڒقْ.
١١ مَاغَارْ أَمُّو إِ إِقَّارْ سِيذِي خْ شَالُّومْ، مِّيسْ ن يُوشِييَا، أَجدْجِيذْ ن يَاهُوذَا، ونِّي إِذوْڒنْ ذ أَجدْجِيذْ ذڭْ ومْشَانْ ن بَابَاسْ يُوشِييَا، شَالُّومْ ونِّي د-إِفّْغنْ زڭْ ومْشَانْ-أَ: ’نتَّاعمَّارْصْ أَذْ د-إِعْقبْ ذِينِّي عَاذْ.
١٢ مَاغَارْ ذڭْ ومْشَانْ مَانِي ث نذْهنْ ذِي ثْمحْبَاسْثْ، ذِينِّي إِ غَا إِمّثْ،عمَّارْصْ أَذْ إِژَارْ ثَامُّورْثْ-أَ عَاوذْ.‘ “
خْ يَاهُويَاقِيمْ
١٣ ”أَخيّبْ إِ ونِّي إِ غَا إِسّْبدّنْ ثَازذِّيغْثْ نّسْ س ڒْْمُوعْصِييّثْ، ثِيغُورْفِينْ نّسْ س ڒْْغشّْ، ونِّي إِسّْخدَّامنْ ونِّي ث يُوذْسنْ نهْڒَا أَخدْجصْ ؤُ وَارْ ذ أَسْ إِتِّيشْ ڒْْمُونثْ نّسْ،
١٤ ونِّي إِقَّارنْ: ’نشّْ أَذْ سّْبدّغْ إِ يِيخفْ إِنُو إِشْثْ ن ثْزذِّيغْثْ يُوعْڒَانْ أَطَّاسْ س ثْغُورْفِينْ إِوسْعنْ.‘ خنِّي أَذْ ذَايسْ إِڭّْ ثِيبُورْجَاثِينْ ؤُشَا أَذْ ت إِسقّفْ س ؤُكشُّوضْ ن ثْشجِّيرَا ن ثنْڭلْثْ ؤُشَا أَذْ ت إِزوّقْ س ثِينْثَاثْ ثِيزڭّْوَاغِينْ.
١٥ مَا ثْحكّْمذْ أَمْ ؤُجدْجِيذْ ؤُمِي ثتّمْحِيزْوَارذْ زِي سِّيبّثْ ن ثْنڭْلِينْ؟ بَابَاشْ مَا وَارْ إِشِّي، مَا وَارْ إِسْوِي ؤُ مَا وَارْ إِڭِّي ڒْْحقّْ ذ ثْسڭْذَا؟ نتَّا ثُوغَا مْلِيحْ خَاسْ خنِّي!
١٦ نتَّا إِحْكمْ ثَامسْڒَاشْثْ ن ونِّي إِتّْوَاحْصَارنْ ذ ؤُمزْڒُوضْ. ثُوغَا مْلِيحْ خَاسْ خنِّي. مَا أَيَا وَارْ إِخْسْ أَذْ يِينِي أَقَا بْنَاذمْ إِسّنْ أَيِي؟، أَمُّو إِ إِقَّارْ سِيذِي.
١٧ مَاشَا ثِيطَّاوِينْ نّشْ ذ وُوڒْ نّشْ أَقَا ثنْ مْغِيرْ خْ ثِيزِي نّشْ وَاهَا، خْ إِذَامّنْ إِمزْذَاڭنْ مَاحنْذْ أَذْ ثنْ ثسِّيزّْڒذْ، ؤُ خْ دّدْجْ ذ ؤُبعّجْ، مَاحنْذْ أَذْ ثنْ ثڭّذْ.“
١٨ ”س ؤُيَا، أَمُّو إِ إِقَّارْ سِيذِي خْ يَاهُويَاقِيمْ، مِّيسْ ن يُوشِييَا، أَجدْجِيذْ ن يَاهُوذَا: ’نِيثْنِي وَارْ خَاسْ شطّْننْ: أَخْ، ؤُمَا! نِيغْ: أَخْ، ؤُتْشْمَا! نِيثْنِي وَارْ شطّْننْ: أَخْ، سِيذِي! نِيغْ: أَخْ، لْعَاضِيمْ!
١٩ أَذْ نضْڒنْ س ونْضَاڒْ ن إِجّْ ن وغْيُوڒْ. أَذْ ث جَارّنْ ؤُ أَذْ ث نْضَارنْ غَارْ ڒَْاڭّْوَاجْ، بَارَّا إِ ثِيوُّورَا ن ؤُرْشَالِيمْ.‘ “
خْ كُونْ-يَاهُو
٢٠ ”ڭعّذْ خْ إِذُورَارْ ن لُوبْنَانْ، سْغُويّْ ؤُشَا أجّْ ثْمِيجَّا نّمْ أَذْ ثتّْوَاسڒْ ذِي بَاشَانْ. سْغُويّْ-د عَاوذْ زِي أَبَارِيمْ، مَاغَارْ مَارَّا إِنِّي شمْ إِتّخْسنْ تّْوَارْژَانْ.
٢١ نشّْ سِّيوْڒغْ أَكِيذمْ ڒَْامِي شمْ ثُوغَا ذِي ڒَْامَانْ، شمْ مَاشَا ثنِّيذْ: ’نشّْ وَارْ خْسغْ أَذْ سْڒغْ!‘ أَمُّو إِ ث ثڭِّيذْ زِي ثمْژِي نّمْ، مَاغَارْ شمْ ثُوغَا وَارْ ثتّخْسذْ أَذْ ثسْڒذْ إِ ثْمِيجَّا إِنُو.
٢٢ مَارَّا إِمكْسَاونْ أَذْ ثنْ يَارْوسْ ؤُسمِّيضْ ؤُشَا إِنِّي شمْ إِتّخْسنْ أَذْ ؤُيُورنْ ذِي ثْمحْبَاسْثْ. خنِّي أَذْ ثْسضْحِيذْ ؤُشَا أَذْ ثنْفضْحذْ زِي سِّيبّثْ ن مَارَّا ثُوعفّْنَا نّمْ.
٢٣ شمْ، أَ ثنِّي إِزدّْغنْ خْ إِذُورَارْ ن لُوبْنَانْ، ثنِّي إِحبْضنْ ذِي ثْشجِّيرَا ن ثْنڭْلِينْ، مَامّشْ إِ غَا ثْزهَّارذْ خْمِي ذ أَمْ د غَا يَاسنْ ڒوْجعْ، ڒحْرِيقْ أَمْ يِيشْثنْ ثتَّارُو!“
٢٤ ”س ثِيذتّْ أَمْ دَّارغْ نشّْ، أَمُّو إِ إِقَّارْ سِيذِي: ’وَاخَّا، مَاڒَا كُونْ-يَاهُو، مِّيسْ ن يَاهُويَاقِيمْ، أَجدْجِيذْ ن يَاهُوذَا، ثُوغَا ذ ثْخَاذنْثْ ن ؤُشمِّيعْ ذڭْ ؤُفُوسْ إِنُو، أَقَا أَذْ شكْ كّْسغْ سّنِّي.
٢٥ نشّْ أَذْ شكْ وْشغْ ذڭْ ؤُفُوسْ ن يِينِّي يَارزُّونْ ثُوذَارْثْ نّشْ ؤُ ذڭْ ؤُفُوسْ ن ونِّي زِي ثتّڭّْوذذْ، ذڭْ ؤُفُوسْ ن نابُوخَاذْرَاصَّارْ، أَجدْجِيذْ ن بَابِيلْ، ؤُ ذڭْ ؤُفُوسْ ن إِكَالْذَانِييّنْ.
٢٦ شكْ ذ يمَّاشْ، أَذْ كنِّيوْ نْضَارغْ غَارْ إِشْثْ ن ثمُّورْثْ نّغْنِيثْ مَانِي وَارْ ثخْڒِيقمْ، ؤُشَا ذِينِّي أَذْ ثْمثْنمْ.
٢٧ وَارْ تّْعِيقِّيبمْعمَّارْصْ غَارْ ثمُّورْثْ نِّي ذِي ثمّژْرمْ مَاحنْذْ أَذْ غَارسْ د-ثْعقْبمْ.‘ “
٢٨ ”مَا كُونْ-يَاهُو أَرْيَازْ-أَ ذ إِجّْ ن ؤُغَارَّافْ إِمّنْضَارْ، يَارّژْ؟ نِيغْ نتَّا ذ إِجّْ ن ؤُغَارَّافْ وَارْ ث إِتّخْسْ عَاذْ ؤُڒَا ذ إِجّْ؟ مَايمِّي ث حجَّارنْ، نتَّا ذ زَّارِيعثْ نّسْ، نْضَارنْ ثنْ غَارْ إِشْثْ ن ثمُّورْثْ وَارْ ت سِّيننْ؟
٢٩ أَ ثَامُّورْثْ، ثَامُّورْثْ، ثَامُّورْثْ، سڒْ إِ وَاوَاڒْ ن سِيذِي!
٣٠ أَمُّو إِ إِقَّارْ سِيذِي: ’زمّْ أَرْيَازْ-أَ نْهْڒَا إِحنْجِيرنْ، إِجّْ ن ورْيَازْ نِّي وَارْ غَارْ إِدْجِي زّْهِيرْ ذڭْ وُوسَّانْ نّسْ. مَاغَارْ ؤُڒَا ذ إِجّْ زڭْ وَارَّاوْ نّسْ أَذْ غَارسْ يِيڒِي زّْهِيرْ أَڒَامِي إِ غَا إِقِّيمْ خْ ڒْْعَارْشْ ن ذَاوُوذْ، أَذْ إِحْكمْ عَاوذْ ذِي ثمُّورْثْ ن يَاهُوذَا.‘ “