٥
إِزْڒِي ن ؤُغلّبْ ن ذَاپُورَا ذ بَارَاقْ
١ ذڭْ وَاسّْ نِّيغنّْجنْ ذابُورَا ذ بَارَاقْ، مِّيسْ ن أَبِينُوعَامْ، نَّانْ:
٢ ”بَارْكمْ سِيذِي إِ إِجطَّاينْ
ن ؤُشُوَّافْ إِتّْوَافسّْينْ ذِي إِسْرَائِيل،
س ؤُطوّعْ ن ڒْْڭنْسْ س ڒْْخَاضَارْ!
٣ سْڒمْ، كنِّيوْ، إِجدْجِيذنْ،
سْحسّمْ، كنِّيوْ، أَيْثْ ن جّهْذْ!
نشّْ أَذْغنّْجغْ إِزْڒَانْ إِ سِيذِي،
نشّْ أَذْ زهّْذغْ إِ سِيذِي، أَربِّي ن إِسْرَائِيل.
٤ أَ سِيذِي، ؤُمِي شكْ د-ثفّْغذْ زِي سَاعِيرْ،
ؤُمِي شكْ ثُوغَا ثڭُّورذْ زڭْ إِيَّارْ ن إِذُومْ،
ثنْهزّْ ثمُّورْثْ، يَارْجِيجْ ؤُجنَّا،
وَاهْ، ؤُڒَا ذ إِسيْنُوثنْ فَارّْغنْ-د س وَامَانْ.
٥ إِذُورَارْ فسْينْ زَّاثْ إِ وُوذمْ ن سِيذِي،
أَذْرَارْ نِّي ن سِينَا، إِفْسِي
زَّاثْ إِ وُوذمْ ن سِيذِي، أَربِّي ن إِسْرَائِيل.
٦ ذڭْ وُوسَّانْ ن شَامْجَارْ، مِّيسْ ن عَانَاثْ،
ذڭْ وُوسَّانْ ن يَاعِيلْ، قِّيمنْ إِبْرِيذنْ خْڒَانْ،
ؤُ إِنِّي ثُوغَا إِڭُّورنْ خْ ثبْرِيذِينْ،
تّكّنْ إِمسْرَاقْ إِعَارّْقنْ.
٧ إِمْجَاهذنْ وَارْ قِّيمنْ،
وَارْ قِّيمنْ ذِي إِسْرَائِيل،
أَڒَامِي كَّارغْ نشّْ، ذابُورَا،
أَڒَامِي كَّارغْ نشّْ، يمَّاسْ ن إِسْرَائِيل.
٨ ؤُمِي إِفَارْزْ ڒْْڭنْسْ إِربِّيثنْ نّغْنِي،
خنِّي ثُوغَا ذِينْ إِجّْ ن ؤُمنْغِي إِنقّنْ
غَارْ ثوُّورَا.
ثَاسدَّارْثْ ن ؤُعسْكَارْ ذ ؤُحْرِيشْ،
وَارْ إِتّْوَاژْرِي عَاذْ جَارْ أَربْعَا-أَڒَافْ
ذِي إِسْرَائِيل!
٩ ؤُڒْ إِنُو أَكْ-ذ إِمْڭوَّاذنْ ن إِسْرَائِيل،
إِنِّي إِطوّْعنْ إِخفْ نْسنْ جَارْ ڒْْڭنْسْ س ڒْْخَاضَارْ،
لْبَارَاكَا إِ سِيذِي!
١٠ أَ كنِّيوْ، إِنِّي إِنَّاينْ
خْ ثغْيَاڒْ ذ ثِيشمْڒَاڒِينْ،
كنِّيوْ إِنِّي إِتّْغِيمَانْ خْ ثْزَارْبِييِّينْ
ذ كنِّيوْ إِنِّي إِڭُّورنْ ذڭْ وبْرِيذْ،
سِيوْڒمْ خْ مَانْ أَيَا!
١١ س ثْمِيجَّا ن إِمْجبَّاذنْ نْ ڒْقوْسْ
إِ ذِينْ جَارْ وَانُوثنْ،
أَقَا إِتّْوَاسڒْ وَاوَاڒْ
خْ ثْمڭَّا إِسڭّْذنْ ن سِيذِي،
ثِيمڭَّا إِسڭّْذنْ ن ؤُمْجَاهَاذْ ن إِسْرَائِيل.
خنِّي إِهْوَا-د ڒْْڭنْسْ ن سِيذِي
غَارْ ثوُّورَا ن ثنْذِينْثْ.
١٢ حْضَاثْ، حْضَاثْ، ذابُورَا،
حْضَاثْ، حْضَاثْ، سِيوڒْ س يِيجّْ ن إِزْڒِي!
كَّارْ، بَارَاقْ، أَوِي إِمحْبَاسْ نّشْ،
أَ شكْ، مِّيسْ ن أَبِينُوعَامْ!
١٣ خنِّي إِهْوَا كُوڒْ وِي يَاروْڒنْ
غَارْ أَيْثْ ن جّهْذْ ن ڒْْڭنْسْ،
سِيذِي إِهْوَا-د غَارِي أَكْ-ذ أَيْثْ ن بُو-ثغْرُوضْثْ.
١٤ زڭْ إِفْرَايِيمْ ؤُسِينْ-د
إِنِّي أَژْوَارْ نْسنْ ذِي عَامَالِيقْ
ؤُ أَوَارْنِي أَشْ يُويُورْ بِينْيَامِينْ
جَارْ ڒْْعسْكَارَاثْ ن يوْذَانْ نّشْ.
زِي مَاخِيرْ هْوَانْ إِمْڭوَّاذنْ،
ؤُ زِي زابُولُونْ إِنِّي إِطّْفنْ
أَعكَّازْ ن ونِّي إِحسّْبنْ.
١٥ ڒْْحُوكَّامْ ن إِسَّاكَارْ هْوَانْ-د أَكْ-ذ ذابُورَا،
ؤُشَا أَمْ مَامّشْ إِتّْوَاسّكّْ إِسَّاخَارْ،
أَمُّو إِ إِتّْوَاسّكّْ ؤُڒَا ذ بَارَاقْ
ذِي ڒوْضَا ن ثغْزُورْثْ.
ذِي ڒصْفُوفْ ن رُوبِينْ
ثُوغَا إِخَارِّيصنْ ن وُوڒْ ذ أَطَّاسْ.
١٦ مَايمِّي ثقِّيمذْ جَارْ إِغنْذِيفنْ،
ثسّْحسّذْ غَارْ وسْبُوعْرِييْ ن ثْحِيمْرِيوِينْ؟
ذِي ڒصْفُوفْ ن رُوبِينْ
ڭِّينْ أَذْ بقّْشنْذڭْ وُوڒْ أَطَّاسْ.
١٧ جِيلْعَاذْ إِقِّيمْ إِزدّغْ
خْ ؤُجمَّاضْ ن لْ-ؤُرْذُونْ
ؤُ مَايمِّي إِقِّيمْ ذَانْ غَارْ ثْغَارُّوبَا؟
أَشِيرْ إِقِّيمْ غَارْ ثْمَا ن ڒبْحَارْ
ؤُشَا إِقِّيمْ إِزْذغْ غَارْ إِفْثَاسنْ نّسْ.
١٨ زابُولُونْ ذ إِجّْ ن ڒْْڭنْسْ
إِسبّڒْ ثُوذَارْثْ نّسْ أَڒْ ڒْْموْثْ،
أَمْ ث إِڭَّا ؤُڒَا ذ نَافْثَالِي
خْ ڒڭْعُوذِي ن وَازَّايْ ن ؤُمنْغِي.
١٩ إِجدْجِيذنْ ؤُسِينْ-د، مّنْغنْ.
ڒخْذنِّي مّنْغنْ إِجدْجِيذنْ ن كنْعَانْ
ذِي ثَاعْنَاكْ غَارْ وَامَانْ ن مَاجِيدُّو،
مَاشَا وَارْ كْسِينْ ثَاكشَّاضْثْ ن نُّوقَارْثْ.
٢٠ مِينْزِي إِثْرَانْ مّنْغنْ زڭْ ؤُجنَّا،
مّنْغنْ أَكْ-ذ سِيسَارَا زِي ثبْرِيذِينْ نْسنْ.
٢١ إِغْزَارْ ن قِيشُونْ إِوْيِي إِ-ثنْ،
ثِيغْزَارْثْ ن مشْحَاڒْ ؤُيَا، ثِيغْزَارْثْ ن قِيشُونْ!
ؤُيُورْ س جّهْذْ، أَ ڒعْمَارْ إِنُو.
٢٢ ڒخْذنِّي نّْخُوخْڒنْثْ ثِيشضْيِينْ ن إِيْسَانْ
زڭْ ؤُرَابعْ بْڒَا ؤُقطُّو
زڭْ أَيْثْ ن بُو-صُّولْطَا نّسْ.
٢٣ نعْڒمْ مِيرُوزْ، إِنَّا لْمَالَاكْ ن سِيذِي،
نعْڒمْ إِمزْذَاغْ نّسْ س إِشْثْ ن نّعْڒثْ،
مِينْزِي وَارْ د-ؤُسِينْ
حِيمَا أَذْ وْشنْ أَفُوسْ إِ سِيذِي،
حِيمَا أَذْ وْشنْ أَفُوسْ إِ سِيذِي
س أَيْثْ ن بُو-ثغْرُوضْثْ نْسنْ.
٢٤ ثتّْوَابَاركْ يَاعِيلْ، ثَامْغَارْثْ ن حَابِيرْ، أَقِينِي،
سنّجْ إِ مَارَّا ثِيمْغَارِينْ.
ثتّْوَابَاركْ نتَّاثْ سنّجْ
إِ مَارَّا ثِيمْغَارِينْ إِزدّْغنْ ذڭْ إِقِيضَانْ.
٢٥ نتَّا إِتَّارْ أَمَانْ، نتَّاثْ ثوْشَا أَسْ أَغِي،
ثِيوِي أَسْ-د ثْرُوسِّي
ذڭْ إِشْثْ ن طّبْصِي ذ أَمقّْرَانْ أَطَّاسْ.
٢٦ س ؤُفُوسْ نّسْ ثسّْوِيژّضْ غَارْ ڒوْثذْ،
أَفُوسْ أَفُوسِي نّسْ غَارْ وفْضِيسْ ن إِخدَّامنْ.
نتَّاثْ ثوْثَا سِيسَارَا،
ثخْبضْ أَسْ خْ ؤُزدْجِيفْ نّسْ،
ثڒْبزْ ؤُشَا ثسّْنُوقّبْ أَسْ
أَغزْذِيسْ ن ؤُزدْجِيفْ نّسْ.
٢٧ إِكْمُومّشْ جَارْ إِضَارنْ نّسْ،
إِبُّوزّڒْ، أَقَا إِزّڒْ ذِينْ.
أَقَا إِكْمُومّشْ جَارْ إِضَارنْ نّسْ، إِبُّوزّڒْ.
ؤُمِي ثُوغَا إِتّكْمُومُّوشْ،
إِوْضَا ذِينْ، ؤُشَا إِوْضَا-د إِڒقّفْ!
٢٨ زِي ڒْْكَازِي نّسْ ثخْزَارْ-د يمَّاسْ ن سِيسَارَا
ؤُشَا ثسْغُويْ جَارْ إِقْضِيبنْ ن وُوزَّاڒْ
’مَايمِّي إِعطَّاڒْ ؤُكَارُّو نّسْ ن ؤُمنْغِي
أَمُّو أَطَّاسْ؟
مَايمِّي إِعطَّاڒْ دّْرِيزْ ن إِكَارُّوثنْ نّسْ‘
٢٩ إِنِّي ذ ثِيغْمِيسِينْ أَطَّاسْ جَارْ ثْجدْجِيذِينْ نّسْ
أَرِّينْثْ-إِ-د،
ؤُشَا ؤُڒَا ذ نتَّاثْ سِيمَانْثْ نّسْ
ثَارَّا-د خْ مِينْ ثنَّا:
٣٠ ’مَا خنِّي نِيثْنِي وَارْ ؤُفِينْ وَالُو
ؤُشَا أَقَا أَثنْ وَارْ بطِّينْ ثَاكشَّاضْثْ؟
إِ كُوڒْ أَرْيَازْ إِجهْذنْ إِشْثْ ن ثعْزَارشْثْ
نِيغْ ثْنَاينْ ن ثعْزَارِييِّينْ؟
ثَاكشَّاضْثْ ن إِكتَّاننْ إِتّْوَاسّْقَارقْشنْ
إِ سِيسَارَا،
ثَاكشَّاضْثْ ن إِكتَّاننْ إِتّْوَاسّْقَارقْشنْ،
أَبُورْضَا، ڒْْخذْمثْ ن ؤُمُوذِي
غَارْ ثْنَاينْ ن إِغزْذِيسنْ
زڭْ ؤُكتَّانْ إِتّْوَاسّْقَارقْشنْ إِ إِرَاونْ،
أَمْ ثْكشَّاضْثْ؟‘
٣١ أَمُّو إِ غَا هلّْكنْ ڒْْعذْيَانْ نّشْ، أَ سِيذِي،
مَاشَا إِنِّي شكْ إِتّخْسنْ أَذْ إِڒِينْ أَمْ ثْفُوشْثْ
إِ د-إِنقَّارنْ ذِي جّهْذْ نّسْ.“
أَوَارْنِي أَيَا ثَاريّحْ ثمُّورْثْ أَربْعِينْ ن إِسڭّْوُوسَا.