٧
أَيُوبْ يَارْنِي ذِي ثمْوَارِّيثْ نّسْ إِ إِلِيفَازْ: مَا وَارْ إِدَّارْ بْنَاذمْ ثُوذَارْثْ ثقْسحْ؟
١ مَا وَارْ ذِينْ إِدْجِي ؤُمنْغِي إِتّْخصَّا
أَذْ ث إِمّْنغْ بْنَاذمْ خْ ثمُّورْثْ،
مَا وَارْ دْجِينْ وُوسَّانْ نّسْ
أَمْ وُوسَّانْ ن ؤُشوَّاڒْ؟
٢ أَمْ مَامّشْ إِتّْمژْرِي إِمْسغْ غَارْ ثِيڒِي،
أَمُّو إِتّْرَاجَا ؤُشوَّاڒْ ڒْْمُونثْ،
٣ س ؤُيَا ذوْڒنْ إِيُورنْ شُّورنْ
س ؤُبَارّقْ ذ ثَاسْغَارْثْ إِنُو
ؤُ دْجْيَاڒِي شُّورنْثْ س ثَامَارَا
بْضَانْ أَيِي ثنْثْ.
٤ خْمِي تّزّْڒغْ تّطّْصغْ، قَّارغْ
’مڒْمِي زمَّارغْ أَذْ كَّارغْ،
مڒْمِي إِ غَا ثعْذُو دْجِيڒثْ؟‘
جِّيوْنغْ س ڒحْوڒْ أَڒْ ذ يفُّو ڒْْحَاڒْ.
٥ أَرِّيمثْ إِنُو ثْيَارْضْ ذڭْ إِكشَّاونْ
ؤُ ذِي ثقْشُورِينْ ن ؤُشَاڒْ،
ثِيڒْمشْثْ إِنُو ثْقطَّا ؤُ ثتّْڭيّحْ.
٦ ذغْيَا خْ ؤُمكُّوكْ ن ؤُخيَّاضْ
عدُّونْ وُوسَّانْ إِنُو،
عدُّونْ بْڒَا ڒَْايَاسْ.
٧ عْقڒْ، أَقَا ثُوذَارْثْ إِنُو
ذ أَسُوضِي ن نّفْسْ وَاهَا
ؤُ ثِيطّْ إِنُو وَارْ ثْژَارّْعمَّارْصْ عَاذْ
مِينْ إِصبْحنْ.
٨ ثِيطّْ ن ونِّي ذ أَيِي إِتّْوَاڒَانْ،
وَارْ ذ أَيِي ثْژَارّْ عَاذْ.
ثِيطَّاوِينْ نّشْ أَذْ خَافِي إِڒِينْثْ،
مَاشَا نّشْ وَارْ ذَا تِّيڒِيغْ عَاذْ.
٩ أَمْ مَامّشْ إِتّْذُورُّوقْ ؤُسيْنُو، إِعدُّو،
أَمُّو إِ غَا إِهْوَا ذِي ڒَْاخَارْثْ،
وَارْ زَّايسْ د-إِتّْڭعِّيذْ عَاذْ.
١٠ عمَّارْصْ وَارْ د-إِتّْعِيقِّيبْ
غَارْ ثَادَّارْثْ نّسْ،
عمَّارْصْ وَارْ خَاسْ إِتّعْقِيڒْ ومْشَانْ نّسْ.
١١ أَمُّو إِ وَارْ تّقّْنغْ أَقمُّومْ إِنُو،
أَذْ سِّيوْڒغْ ذِي ڒحْصَارثْ ن بُوحْبڒْ إِنُو،
أَذْ شثْشِيغْ ذِي ثَارْزُوڭِي ن ڒعْمَارْ إِنُو.
١٢ مَا نشّْ ذ ڒبْحَارْ نِيغْ ذ ڒْْهَايْشثْ،
أَقَا شكْ ثسّْبدّذْ خَافِي أَعسَّاسْ؟
١٣ مَاڒَا نِّيغْ نشّْ: ’ثَاسُّوثْ أَذْ أَيِي ثْعزَّا،
قَامَا إِنُو أَذْ خَافِي ثسّهْونْ أَشثْشِي إِنُو!‘،
١٤ أَمُّو إِذْ أَيِي ثتّْغزِّيذْ س ثِيرْجِيوِينْ
ؤُ س إِوحَّانْ ثسَّاڭّْوَاذذْ أَيِي،
١٥ أَڒَامِي إِذْوڒْ ڒعْمَارْ إِنُو
إِتِّيخْضَارْ أَجيّفْ،
إِتِّيخْضَارْ ڒْْموْثْ خْ ييْسَانْ إِنُو.
١٦ نشّْ تّْعِيفِّيغْ مَانْ أَيَا،
وَارْ تّخْسغْ أَذْ دَّارغْ إِ ڒبْذَا.
أَرْخُو زَّايِي، مَاغَارْ ؤُسَّانْ إِنُو
أَمْ أَسُوضِي ن نّفْسْ وَاهَا.
١٧ مِينْ إِعْنَا بْنَاذمْ أَقَا شكْ ثْحسّْبذْ ث
ذ أَمقّْرَانْ أَمُّو،
أَقَا ثڒْهِيذْ أَكِيذسْ س وُوڒْ نّشْ؟
١٨ أَقَا شكْ ثَارزّْفذْ غَارسْ قَاعْ أَثفُّو،
ثْقدْجْبذْ إِ-ث قَاعْ ثَازحْزِيهْثْ؟
١٩ مشْحَاڒْ عَاذْ
وَارْ زَّايِي ثتّكّْسذْ ثِيطَّاوِينْ،
وَارْ ذ أَيِي ثَارخُّوذْ
حِيمَا أَذْ سّْغڒْيغْ إِكُوفَّانْ إِنُو؟
٢٠ مَا خْضِيغْ؟ مِينْ ذ أَشْ إِ غَا ڭّغْ إِ شكْ،
إِ شكْ أَ-يْ-أَعسَّاسْ ن بْنَاذمْ؟
مَايمِّي ذ أَيِي ثسّْبدّذْ
ذ ثَاحْجُورْثْ زَّاثكْ،
ؤُ ذوْڒغْ ذ دّْقڒْ إِ يِيخفْ إِنُو؟
٢١ مَايمِّي وَارْ ذ أَيِي ثْغفَّارذْ
أَخطُّو إِنُو،
ؤُ وَارْ ثْعدُّوذْ خْ ڒْْمُوعْصِييّثْ إِنُو؟
مَاغَارْ ذغْيَا أَذْ زّْڒغْ ذِي ثْعجَّاجْثْ
ؤُ شكْ أَذْ خَافِي ثَارْزُوذْ،
مَاشَا وَارْ تِّيڒِيغْ عَاذْ.