٥
١ ڒَْاغَا مَاشَا! مَا ذِينْ شَا ن يِيجّنْ
إِ خَاكْ د غَا يَارّنْ؟
غَارْ مَانْ زڭْ إِمْقدَّاسنْ إِ غَا ثْسوْضذْ؟
٢ مِينْزِي أَخيّقْ إِنقّْ أَبُوهَاڒِي،
ؤُ ثُوسْمِي ثْنقّْ أَقُوبَّانِي.
٣ ژْرِيغْ إِجّْ ن ؤُبُوهَاڒِي إِضْڒقْ إِ وژْوَارْ،
مَاشَا خْ إِشْثْ ن ڒْْغفْڒثْ
ثُوغَا إِتّْخصَّا أَذْ نعْڒغْ ثَازذِّيغْثْ نّسْ.
٤ إِڭّْوجنْ إِحنْجِيرنْ نّسْ خْ ؤُسنْجمْ،
تّْوَادّْزنْ غَارْ ثوَّارْثْ ن ثنْذِينْثْ
ؤُشَا وَارْ ثُوغِي ذِينْ وِي ثنْ إِ غَا إِفكّنْ،
٥ ؤُمِي إِشَّا ؤُمهْيُوفْ صَّابثْ نّسْ
- وَاهْ، وَانِيثَا إِسُّوفّغْ إِ-ث-إِ-د عَاذْ
زڭْ إِسنَّاننْ -
ؤُ إِسَارْضْ ؤُخوَّانْ أَڭْڒَا نْسنْ.
٦ مَاغَارْ وَارْ إِدْجِي زِي ثْعجَّاجْثْ
إِ زِي د-إِتّكّْ ڒْْغَارْ
ؤُ زِي ثمُّورْثْ وَارْ د-ثْغمِّي ثَامَارَا،
٧ مَاشَا بْنَاذمْ
ذ ونِّي د-إِتّْوَاخڒْقنْ إِ ثَامَارَا،
أَمْ ڭعّْذنْثْ ثْشعَّاڒِينْ ن ثْمسِّي
مَاحنْذْ أَذْ ضْوِينْثْ.
٨ مْڒِي ؤُفِيغْ أَذْ أَرْزُوغْ غَارْ أَربِّي،
أَذْ سِّيوْضغْ ثَامسْڒَاشْثْ إِنُو غَارْ أَربِّي،
٩ ونِّي إِتّڭّنْ ثِيمسْڒَايِينْ ثِيمقّْرَانِينْ،
وَارْ ذِينْ وِي ثنْثْ إِ غَا إِفهْمنْ،
إِتّڭّْ لْمُوعْجِيزَاثْ
إِ وَارْ إِزمَّارْ أَذْ تّْوَاحسْبنْثْ.
١٠ إِسَّاكّْوَاضْ أَنْژَارْ خْ وُوذمْ ن ثمُّورْثْ،
ؤُشَا إِسّكَّا أَمَانْ خْ وُوذمْ ن إِيَّارنْ،
١١ حِيمَا أَذْ إِسّْڭعّذْ إِمْوَاضْعنْ،
ؤُشَا إِنِّي إِشضْننْ أَذْ ثنْ سُّوعْڒَانْ غَارْ ڒَْامَانْ.
١٢ نتَّا إِسّْبطّڒْ
إِخَارِّيصنْ ن إِحْرَايْمِييّنْ،
أَڒَامِي إِفَاسّنْ نْسنْ
وَارْ زمَّارنْ أَذْ ڭّنْ وَالُو.
١٣ إِمِيغِيسنْ إِمنّعْ إِ-ثنْ
ذِي ثحْرَايْمشْثْ نْسنْ،
إِتّْوَاسّْبطّڒْ شّْوَارْ ن إِحْرَايْمِييّنْ.
١٤ ذڭْ ؤُزِيڒْ مّْسَاڭَارنْ أَكْ-ذ ثَادْجسْثْ
ؤُشَا ذِي طّْحَا ن ؤُزِيڒْ
تّْفَافَانْ أَمْ تّْفَافَانْ ذِي دْجِيڒثْ.
١٥ نتَّا إِسّنْجَامْ زِي سِّيفْ إِ د-إِتّفّْغنْ
زڭْ ؤُقمُّومْ نْسنْ،
ؤُڒَا ذ أَمزْڒُوضْ زڭْ ؤُفُوسْ ن ونِّي إِجهْذنْ.
١٦ أَمُّو إِ يدْجَا ڒَْايَاسْ إِ ؤُمزْڒُوضْ
ؤُشَا دّدْجْ أَذْ إِبلّعْ أَقمُّومْ نّسْ.
١٧ خْزَارْ، سّعْذْ ن ورْيَازْ
ونِّي إِسڭّمْ أَربِّي.
س ؤُيَا وَارْ ثسّحْقِيرِي شَا
تَّارْبِييّثْ ن ؤُمْزمَّارْ خْ كُوڒْشِي!
١٨ مَاغَارْ نتَّا إِسّْيزِّيمْ أَيِي
س إِجّْ ن ؤُيزِّيمْ إِتّقّْسنْ
ؤُشَا خنِّي إِتّْشدَّا،
إِشَّاثْ ؤُشَا خنِّي إِفَاسّنْ نّسْ سّْڭنْفَانْ.
١٩ ذِي ستَّا ن ڒحْصَارَاثْ أَذْ شكْ إِفكّْ،
ذِي ثنِّي وِيسّْ سبْعَا وَارْ شكْ إِڒقّفْ ڒْْغَارْ.
٢٠ ذِي ڒَْاژْ أَذْ شكْ إِسّنْجمْ زِي ڒْْموْثْ،
ذڭْ ؤُمنْغِي زِي ثِييِّيثَا ن سِّيفْ.
٢١ أَذْ ثِيڒِيذْ ذِي ڒَامَانْ
زَّاثْ إِ ؤُركُّوضْ ن يِيڒسْ،
وَارْ ثتّڭّْوذذْ شَا زڭْ وَاردّدْجْ
مَاڒَا يُوسَا-د.
٢٢ خْ وَاردّدْجْ ذ ڒَْاژْ
ثْزمَّارذْ أَذْ ثْضحْشذْ،
زِي ڒوْحُوشْ ن ڒخْڒَا ن ثمُّورْثْ
وَارْ ثتّڭّْوذذْ،
٢٣ مَاغَارْ ثْقضْعذْ ڒْْعَاهْذْ أَكْ-ذ إِژْرَا ن ييَّارْ،
خنِّي ڒوْحُوشْ ن ڒخْڒَا
أَذْ كِيذكْ دَّارنْ ذِي ڒهْنَا.
٢٤ أَذْ ثَارْڭْبذْ أَقَا ڒهْنَا ذ أَقِيضُونْ نّشْ،
أَذْ ثْبقّْشذْ ثَازذِّيغْثْ نّشْ،
أَذْ ثَافذْ وَارْ شكْ إِتّْخصِّي وَالُو.
٢٥ شكْ أَذْ ثسّْنذْ أَقَا أَرَّاوْ نّشْ أَطَّاسْ،
ؤُ دُّورّْيثْ نّشْ
أَمْ وفْسُو أَزِيزَا ن ثمُّورْثْ.
٢٦ أَذْ ثَاذْفذْ غَارْ ونْضڒْ ذِي ثوْسَارْ،
أَمْ مَامّشْ سّْڭعّْذنْ
إِجّْ ن ؤُعُورِّيشْ ن ثْقبِّيضِينْ ن إِمنْذِي
غَارْ ؤُنذْرَارْ ذِي ڒْْحَاڒْ نّسْ.
٢٧ خْزَارْ، مَانْ أَيَا، أَقَا نشِّينْ نَارْزُو ذَايسْ،
أَمُّو إِ ثدْجَا!
سڒْ غَارسْ، سّنْ إِ-ث ذڭْ يِيخفْ نّشْ!