٢٦
ثَامْوَارِّيثْ ن أَيُوبْ خْ بِيلْذَاذْ: ڒمْغَارثْ ن أَربِّي
١ خَاسْ ؤُشَا يَارَّا-د أَيُوبْ، إِنَّا:
٢ مَامّشْ ثڭِّيذْ ثوْشِيذْ أَفُوسْ
إِ ونِّي وَارْ غَارْ إِدْجِي جّهْذْ،
مَامّشْ ثْبدّذْ غَارْ ؤُغِيڒْ
ن ونِّي وَارْ غَارْ ثدْجِي ثْزمَّارْ!
٣ زعْمَا أَقَا ثوْشِيذْ أَوصِّي إِسبْحنْ
إِ ونِّي وَارْ غَارْ ثدْجِي ثِيغِيثْ،
مَامّشْ إِ ثسَّارْڭْبذْ أَطَّاسْ ن ثْوَاڒَاوِينْ
مُومُّو ن ثْمسْڒَاشْثْ!
٤ إِ ؤُمِي ثْعَاوْذذْ ڒخُّو أَوَاڒنْ نّشْ؟
مَانْ نّفْسْ د-إِفّْغنْ زَّايكْ؟
٥ ڒخْيَاڒَاثْ ن إِمتَّانْ فسّْينْ
سَاذُو وَامَانْ ذ إِمزْذَاغْ نْسنْ.
٦ ذ أَعَارْيَانْ ثزّڒْ زَّاثسْ ڒَْاخَارْثْ،
وَارْ ذِينْ ثدْجِي ثْقبَّارْثْ إِ ثسْرَافْثْ ن ؤُهلّكْ.
٧ إِبزّعْ أَجنَّا ذِي شَّامَالْ
ثِيوَا ڒْْخَاوِي ن وُوذمْ ن وَامَانْ،
يُويڒْ ثَامُّورْثْ غَارْ وَالُو.
٨ نتَّا إِتّْشدَّا أَمَانْ ذڭْ إِسيْنُوثنْ نّسْ،
مَاشَا وَارْ إِتَّارژِّي أَسيْنُو سْوَادَّايْ.
٩ إِسّْذُورُّويْ ؤُذمْ ن ڒْْعَارْشْ نّسْ،
إِتّْبزَّاعْ خَاسْ أَسيْنُو نّسْ.
١٠ يَارْشمْ ثَاقُورَاشْثْ خْ وُوذمْ ن وَامَانْ،
أَڒْ ثْمَا ن ثْفَاوْثْ أَكْ-ذ ثَادْجسْثْ.
١١ إِپِيلَارنْ ن ؤُجنَّا تَّارْجِيجِينْ،
تّْنخْڒَاعنْ زڭْ ؤُودّبْ نّسْ.
١٢ س جّهْذْ نّسْ إِسّْهَاجْ ڒبْحَارْ،
س ڒفْهَامثْ نّسْ إِڒْبزْ رَاهَابْ.
١٣ س أَرُّوحْ نّسْ إِتِّيسِّيقْ ؤُجنَّا
أَمْ وُوذمْ ن ثنِّي وَارْ إِتّْڒحِّيفنْ،
أَفُوسْ نّسْ إِسّْنُوقّبْ
أَفِيغَارْ إِتّحْڒُودْجُوضنْ س ثَازْڒَا.
١٤ خْزَارْ، مَانْ أَيَا وَاهَا
إِخفْ ن إِبْرِيذنْ نّسْ،
نسْڒَا مْغِيرْ ثَاحسّشْثْ
ن شَا ن وَاوَاڒنْ زَّايسْ.
وِي إِزمَّارنْ خنِّي
أَذْ إِسّنْ أَجَّاجْ ن جّْهذْ نّسْ؟