١٠
أَيُوبْ إِسِّيوڒْ أَكْ-ذ بِيلْذَاذْ خْ لْغَارَاضْ ن أَربِّي س ؤُودّبْ
١ إِتّْعِيفِّي ڒعْمَارْ إِنُو زِي ثُوذَارْثْ إِنُو،
أَذْ بَارّْحغْ أَشثْشِي إِنُو
أَمُّو وَاهَا بْڒَا أَمْنَاعْ،
أَذْ سِّيوْڒغْ غَارْ ثَارْزُوڭِي ن ڒعْمَارْ إِنُو.
٢ نشّْ أَذْ إِنِيغْ إِ أَربِّي:
’وَارْ ذ أَيِي تّڭّْ ذ أَعفَّانْ،
سْشنْ أَيِي، مَايمِّي أَكِيذِي ثتّْمنْغِيذْ.
٣ مَا غَاركْ ڒفْضڒْ أَقَا شكْ ثْحصَّارذْ أَيِي،
أَقَا ثْنطَّارضْ ڒْْخذْمثْ ن إِفَاسّنْ نّشْ،
أَمْ ثتّڭّذْ ثَافَاوْثْ
خْ إِخَارِّيصنْ ن إِعفَّاننْ؟
٤ مَا غَاركْ ثِيطَّاوِينْ ن بْنَاذمْ،
مَا ثتّْوَاڒِيذْ شكْ
أَمْ مَامّشْ تّْوَاڒَانْ إِوْذَانْ؟
٥ مَا ؤُسَّانْ نّشْ أَمْ وُوسَّانْ ن بْنَاذمْ؟
مَا إِسڭّْوُوسَا نّشْ
أَمْ يِيسڭّْوُوسَا ن ورْيَازْ،
٦ أَقَا شكْ ثَارزُّوذْ
أَمُّو خْ ڒْْمُوعْصِييّثْ إِنُو،
ثتّْبقّْشذْ ذِي دّْنُوبْ إِنُو؟
٧ وَاخَّا شكْ ثسّْنذْ
أَقَا نشّْ وَارْ دْجِيغْ ذ أَعفَّانْ،
وَارْ ذِينْ ونِّي إِ غَا إِفكّنْ زڭْ ؤُفُوسْ نّشْ.
٨ إِفَاسّنْ نّشْ خڒْقنْ أَيِي، ڭِّينْ أَيِي،
أَقَا تّنّْضنْ أَيِي،
ؤُشَا ڒخُّو شكْ ثْصَارْضذْ أَيِي.
٩ عْقڒْ أَقَا شكْ ثڭِّيذْ أَيِي أَمْ ثَارِّيسْثْ،
ؤُ غَارْ ثْعجَّاشْثْ ثخْسذْ أَذْ أَيِي ثَارّذْ.
١٠ مَا وَارْ ذ أَيِي ثْزدْجْعذْ أَمْ ؤُغِي،
أَمْ كِيسُو ثجِّيذْ أَيِي أَذْ شّْرغْ؟
١١ س ثڒْمشْثْ ذ ويْسُومْ ثسّْيَارْضذْ أَيِي،
س إِغْسَانْ ذ إِژوْرَانْ ثمُّوذذْ أَيِي.
١٢ ثُوذَارْثْ ذ ثْمخْسِيوْثْ إِشُووَّارنْ
ثوْشِيذْ أَيِي ثنْثْ،
أَحطُّو نّشْ إِحْضَا بُوحْبڒْ إِنُو.
١٣ ثْخمّْڒذْ أَيَا ذڭْ وُوڒْ نّشْ،
نشّْ سّْنغْ بلِّي أَيَا ثُوغَا-ث غَاركْ ذِي ڒْْبَاڒْ.
١٤ مَاڒَا خْضِيغْ، شكْ أَذْ أَيِي ثحْضِيذْ،
وَارْ ذ أَيِي ثتّْبَارِّيذْ زِي ڒْْمُوعْصِييّثْ إِنُو.
١٥ مَاڒَا ڭِّيغْ ڒْْغَارْ، ؤُشْثْ خَافِي!
مَاڒَا نشّْ ذ أَمْسڭّذْ إِ دْجِيغْ،
وَارْ زمَّارغْ أَذْ سّْڭعّْذغْ أَزدْجِيفْ إِنُو.
جِّيوْنغْ س ڒفْضِيحثْ،
تَّاشِيغْ أَكْ-ذ ڒمْحَاينْ إِنُو.
١٦ مَاڒَا سّْڭعّْذغْ إِخفْ إِنُو،
أَذْ أَيِي ثْنيْمَارذْ أَمْ وَايْرَاذْ إِزهَّارنْ،
ڒبْذَا ثتّْنقْڒَابذْ خَافِي س ڒْْغفْڒثْ.
١٧ معْلِيكْ ؤُفِيغْ أَذْ خَافِي ثسّْبدّذْ ڒبْذَا
إِشهَّاذنْ نّغْنِي،
أَذْ ثَارْنِيذْ عَاذْ ذڭْ وغْضَابْ نّشْ خَافِي،
إِعسَّاسنْ إِ إِخدْجْفنْ إِجّْ إِ ونّغْنِي ڒبْذَا،
وَاهْ، أَذْ غَارِي ثْنذْهذْ إِجّْ ن ڒْْعسْكَارْ.
١٨ مَايمِّي ذ أَيِي ثجِّيذْ أَذْ د-فّْغغْ
زڭْ ؤُعذِّيسْ ن يمَّا؟
مْڒِي سُّوفّْغغْ بُوحْبڒْ،
وَارْ ذ أَيِي ثْژَارْ ؤُڒَا ذ إِشْثْ ن ثِيطّْ!‘
١٩ معْلِيكْ ؤُفِيغْ أَخْمِي وَارْ إِڒِيغْعمَّارْصْ،
مّكْسِيغْ غَارْ ونْضڒْ
زڭْ ؤُعذِّيسْ ن يمَّا.
٢٠ مَا وَارْ دْجِينْ وُوسَّانْ ن ثُوذَارْثْ إِنُو ؤُذْرُوسنْ؟
مْڒِي ذ أَيِي إِجَّا، أَذْ خَافِي إِنّقْڒبْ
مَاحنْذْ أَذْ فَارْهغْ شْوَايْثْ عَاوذْ،
٢١ قْبڒْ إِ غَا ؤُيُورغْ - وَارْ ذِيكّْوِيڒغْ عَاذْ -
غَارْ ثمُّورْثْ ن ثَادْجسْثْ ذ ثِيڒِي ن ڒْْموْثْ،
٢٢ غَارْ ثمُّورْثْ ذ ثَابَارْشَانْثْ أَمْ ثْمذِّيثْ،
أَمْ ثِيڒِي ن ڒْْموْثْ، وَارْ ذِينْ إِتّْبِينْ وَالُو،
مَانِي ثڭَّا ثْفَاوْثْ أَمْ ثْمذِّيثْ.