٣٠
ڒْعَاهْذْ إِبطّْڒنْ أَكْ-ذ مِيصْرَا
١ ”أَمُّو إِ إِقَّارْ سِيذِي: ’ؤُشْثْ خْ إِحنْجِيرنْ نِّي إِغوّْغنْ مَاحنْذْ أَذْ سُّوفّْغنْ شّْوَارْ، مَاشَا وَارْ إِدْجِي زَّايِي، مَاحنْذْ أَذْ ڭّنْ إِجّْ نْ ڒْعَاهْذْ، مَاشَا وَارْ إِدْجِي زِي أَرُّوحْ إِنُو، حِيمَا أَذْ سّْعُورّْشنْ دّنْبْ خْ دّنْبْ،
٢ إِنِّي إِڭُّورنْ مَاحنْذْ أَذْ هْوَانْ غَارْ مِيصْرَا نْهْڒَا مَا أَذْ أَيِي سّقْسَانْ، حِيمَا أَذْ أَفنْ أَسڒْقِي غَارْ جّهْذْ ن فِيرْعُونْ ؤُ مَاحنْذْ أَذْ أَروْڒنْ غَارْ ثِيڒِي ن مِيصْرَا.
٣ مَاشَا جّهْذْ ن فِيرْعُونْ أَذْ كنِّيوْ يَارّْ ثتّْسضْحَامْ ؤُشَا أَذُورِّي ذِي يِيڒِي ن مِيصْرَا أَذْ كنِّيوْ إِفْضحْ.
٤ مَاغَارْ ڒْْحُوكَّامْ نّسْ دْجَانْ ذِي صُوعَانْ ؤُشَا إِمْسكَّانْ نّسْ إِوْضنْ غَارْ حَانِيسْ.
٥ نِيثْنِي مَارَّا أَذْ تّْوَاسّْبَارّْقنْ زِي ڒْْڭنْسْ نِّي وَارْ ذ أَسنْ إِنفّْعنْ شَا، وَارْ إِتِّيشنْ أَفُوسْ ؤُڒَا ذ وَالُو ن ڒفْضڒْ، مَاشَا أَذْ ثنْ يَاوِي غَارْ ڒفْضِيحثْ ذ ڒْْهڭْرَا.“
٦ ڒْْحُوكْمْ إِسَّاڭّْوَاذنْ خْ ڒْْمَاڒْ ن ثمُّورْثْ ن لْجَانُوبْ. ”ذڭْ إِشْثْ ن ثمُّورْثْ ن ڒحْصَارثْ ذ دّدْجْ، مَانِي زَّايسْ د-ؤُسِينْ ثَايْرَاذْثْ ذ ويْرَاذْ ذ ؤُفِيغَارْ ذ ڒْْحَايْشثْ إِشمْضنْ إِطَّاونْ، أَربُّونْ-د نِيثْنِي أَڭْڒَا نْسنْ خْ وعْرُورْ ن إِسْنُوسنْ ذ ڒكْنُوزْ نْسنْ خْ ثعْرُورِينْ ن إِڒغْمَانْ غَارْ إِجّْ ن ڒْْڭنْسْ وَارْ ثنْ إِنفّعْ ذِي شَا.
٧ مَاغَارْ مِيصْرَا أَذْ إِوْشْ أَفُوسْ بَاطڒْ ؤُ إِ وَالُو. س ؤُيَا ڒَْاغِيغْ مِيصْرَا وَانِيثَا: ’رَاهَابْ، بُو-ثغْرُوضْثْ أَمقّْرَانْ، ثقِّيمْ وَاهَا!‘ “
ثَاغنَّانْثْ ن إِسْرَائِيل
٨ ”خنِّي ڒخُّو، أَسْ-د، أَرِي ث زَّاثْ إِ ثِيطَّاوِينْ نْسنْ خْ ثڒْوِيحْثْ، خبْشْ إِ-ث ذڭْ إِشْثْ ن ثبْرَاثْ إِتّْوَانّْضنْ، مَاحنْذْ أَذْ ثِيڒِي ثتّْوَاحْضَا أَڒْ أَسّْ إِ د غَا يَاسنْ، إِ ڒبْذَا نْ ڒبْذَاثْ.
٩ مَاغَارْ نِيثْنِي ذ ڒْْڭنْسْ إِغوّْغنْ، أَيْثْ ن بُو-إِخَارِّيقنْ، إِحنْجِيرنْ نِّي وَارْ إِخْسنْ أَذْ سْڒنْ إِ شَّارِيعَا ن سِيذِي،
١٠ إِنِّي إِقَّارنْ إِ إِمْوَاڒَاونْ: ’وَارْ تّْوِيڒِيمْ وَالُو!‘، ؤُ إِ يِينِّي إِخزَّارنْ إِوحَّانْ: ’وَارْ تّْوِيڒِيمْ إِوحَّانْ نِّي إِدْجَانْ ذ ثِيذتّْ. سِيوْڒمْ أَكِيذْنغْ مِينْ د إِسّْحِينِّيبنْ، مْڒِي ذ أَنغْ ثتّْوَاڒَامْ مِينْ إِغشّنْ!
١١ حيّْذمْ زڭْ وبْرِيذْ، فّْغمْ زڭْ وبْرِيذْ، جّمْ أَمْقدَّاسْ ن إِسْرَائِيل أَذْ خَانغْ يِيڭّْوجْ!‘ “
١٢ ”س ؤُيَا، أَمُّو إِ إِقَّارْ ؤُمْقدَّاسْ ن إِسْرَائِيل: ’مِينْزِي كنِّيوْ ثنْضَارمْ أَوَاڒْ-أَ، ثتّشْڒمْ خْ دّدْجْ ؤُ خْ مِينْ إِفّْغنْ زڭْ وبْرِيذْ، وَاهْ، ثتّڭّمْ ڒَْامَانْ نْومْ ذِي مَانْ أَيَا،
١٣ س ؤُيَا أَذْ ثِيڒِي ڒْْمُوعْصِييّثْ-أَ إِ كنِّيوْ أَمْ ثَازِّيثْ ذِي ڒْحِيضْ إِ غَا إِوْضَانْ، نِّي إِضهَّارنْ ذِي ڒْْحِيضْ يُوعْڒَانْ، أَقَا ثَارژِّيثْ نّسْ أَذْ د-ثَاسْ ذغْيَا، ذڭْ إِشْثْ ن ثشْثِي.
١٤ أَذْ ث يَارْژْ أَمْ إِتّْوَارْژْ إِجّْ ن ؤُغَارَّافْ ن بُو-ثْڒَاخْثْ نْهْڒَا أَحِينِّي. جَارْ مَارَّا إِفثْوِيثنْ نّسْ وَارْ إِتّْوَافْ ́́́عَاذْ ؤُڒَا ذ إِجّْ ن ؤُشقُّوفْ عَاذْ إِ زِي د غَا يَاوْينْ ثِيمسِّي زِي ڒْْمجْمَارْ نِيغْ أَذْ أَيْمنْ أَمَانْ زِي جُّوبْ.‘ “
تُّوبثْ ثتَّاوِي-د أَحِينِّي ذ ؤُسْڭنْفِي زِي أَربِّي
١٥ ”مَاغَارْ أَمُّو إِ إِقَّارْ سِيذِي إِنُو، سِيذِي، أَمْقدَّاسْ ن إِسْرَائِيل: ’س تُّوبثْ ذ ڒْْهُوذْنثْ أَذْ غَارْومْ يِيڒِي ؤُسنْجمْ، ذِي ثْرُوسِي ذ ڒَْامَانْ أَذْ غَارْومْ يِيڒِي جّهْذْ، مَاشَا كنِّيوْ وَارْ ثخْسمْ.‘
١٦ كنِّيوْ ثقَّارمْ: ’لَّ، خْ ييْسَانْ نخْسْ أَذْ نَارْوڒْ!‘ خْ ؤُيَا س ؤُغِيڒْ أَذْ ثَاروْڒمْ. ؤُشَا ثقَّارمْ عَاوذْ: ’خْ إِيْسَانْ ن حَامَاثْ نخْسْ أَذْ نِّييْ إِ ثَاروْڒَاثْ!‘ خْ ؤُيَا أَذْ قدْجْقنْ ؤُڒَا ذ إِمْسضْفَارنْ نْومْ!
١٧ إِجّْ نْ ڒُوڒُوفْ أَذْ يَارْوڒْ إِ ؤُهذِّي ن يِيجّْ ن ورْيَازْ. إِ ؤُهذِّي ن خمْسَا أَذْ ثَاروْڒمْ مَارَّا أَڒْ غَا ثقِّيممْ أَمْ ثْسنْيَانْثْ ن ؤُشنْيَالْ خْ ثْقِيشّثْ ن وذْرَارْ، أَمْ ثْعدْجَانْثْ خْ ثوْرِيرْثْ.“
١٨ ”س ؤُيَا أَذْ رَاجَا سِيذِي مَاحنْذْ أَذْ أَومْ إِسّْشنْ أَحِينِّي نّسْ، س ؤُينِّي أَذْ إِڭعّذْ سنّجْ أَڒَامِي إِ غَا يَارْحمْ كنِّيوْ أَوَارْنِي مَانْ أَيَا، مَاغَارْ سِيذِي ذ أَربِّي ن ڒْْحقّْ. سّعْذْ ن مَارَّا إِنِّي ث إِتّْرَاجَانْ.
١٩ مَاغَارْ ڒْْڭنْسْ أَذْ إِزْذغْ ذِي صِيهْيُونْ، ذِي ؤُرْشَالِيمْ. شكْ وَارْ ثتّْرُوذْعمَّارْصْ عَاذْ، نتَّا أَذْ خَاكْ إِحِينّْ، مَاڒَا إِسْڒَا إِ ثْمِيجَّا نّشْ ثتّْڒَاغَا، أَذْ خَاكْ د-يَارّْ.
٢٠ سِيذِي إِنُو أَذْ أَومْ إِوْشْ أَغْرُومْ ذِي ڒحْصَارثْ ؤُڒَا ذ أَمَانْ ذِي ڒغْبنْ، إِمسْغَارنْ نّشْ وَارْ إِتّْنُوفَّارنْ عَاذْ، مَاشَا ثِيطَّاوِينْ نّشْ أَذْ ژَترنْثْ إِمسْغَارنْ نّشْ.
٢١ إِمزُّوغنْ نّشْ أَذْ سْڒنْ إِ وَاوَاڒْ زِي غَارْ ضفَّارْ نّشْ إِ إِقَّارنْ: ’أَقَا أَبْرِيذْ، ؤُيُورمْ ذَايسْ. وَارْ تّفّْغمْ يفُوسْ ؤُڒَا ذ أَزڒْمَاضْ.‘
٢٢ أَذْ ثْحسْبمْ إِشلّلنْ إِ إِتّْوَاڭّنْ س نُّوقَارْثْ نّشْ ن ڒخْيَاڒَاثْ نّشْ إِنقْشنْ ؤُڒَا ذ أَڒحّفْ ن وُورغْ ن ڒخْيَاڒَاثْ نّشْ إِفسْينْ ذ ثخْمُوجِي. أَذْ ثنْ ثنْضَارذْ أَمْ وَارُّوضْ ثسّخْمجْ إِ-ث ثمْغَارْثْ إِ خْ دْجَانْ إِذَامّنْ، أَذْ ثِينِيذْ: ’غَارْ بَارَّا!‘ “
٢٣ ”خنِّي أَذْ إِوْشْ نتَّا أَنْژَارْ إِ زَّارِيعثْ نّشْ إِ ثْزَارْعذْ ذڭْ إِيَّارْ ؤُڒَا ذ أَغْرُومْ ذ صَّابثْ ن ثمُّورْثْ نّشْ. ذڭْ وَاسّْ نِّي أَذْ ثهْذَا ثْحِيمَارْثْ نّشْ خْ دّْمَانِي إِسَارّْحنْ.
٢٤ إِينْذُوزنْ ذ يغْيَاڒْ إِمژْيَاننْ، إِنِّي إِشَارّْزنْ ثَامُّورْثْ، أَذْ شّنْ ڒعْڒفْ إِردّْ إِ زُوزَّارنْ س دْجُوحْ ذ ثزَّارْثْ.
٢٥ خْ كُوڒْ أَذْرَارْ ؤُ خْ كُوڒْ ثَاوْرِيرْثْ إِڭعّْذنْ أَذْ إِڒِينْثْ ثِيغزْرَاثِينْ ذ ثْمِيزَابِينْ شُّورنْ س وَامَانْ، ذڭْ وَاسّْ ن ثْغَارْصْثْ ثَامقّْرَانْثْ، خْمِي غَا وْضَانْ صُّومْعَاثْ.
٢٦ ثَافَاوْثْ ن ثْزِيرِي أَذْ ثِيڒِي أَمْ ثْفَاوْثْ ن ثْفُوشْثْ ؤُشَا ثَافَاوْثْ ن ثْفُوشْثْ أَذْ ثِيڒِي ثجْهذْ سبْعَا ن ثْسقَّارْ خْ ثْفَاوْثْ ن سبْعَا ن وُوسَّانْ، ذڭْ وَاسّْ إِ ذِي إِ غَا إِشْفنْ سِيذِي ثَارژِّيثْ ن ڒْْڭنْسْ نّسْ ؤُشَا أَذْ إِسّْڭنْفَا أَيزِّيمْ ن ثشْثِي إِ إِوْثَا نتَّا.“
ڒْحُوكْمْ إِ د غَا يَاسنْ خْ أَشُّورْ
٢٧ ”خْزَارْ، إِتَّاسْ-د إِسمْ ن سِيذِي زِي ڒَْاڭّْوَاجْ، يَارقّْ وغْضَابْ نّسْ ؤُ أَسِيڭّْوذْ إِمْغَارْ، شُّورنْ إِينْشِيشنْ نّسْ س وسْخضْ ؤُ إِڒسْ نّسْ إِڭَّا أَمْ ثْمسِّي إِتّتّنْ.
٢٨ أَسُوضِي ن نّفْسْ نّسْ أَمْ يغْزَارْ إِسّفْينْ، إِتَّاكّْوَاضنْ أَڒْ إِرِي، مَاحنْذْ أَذْ إِزُّوزَارْ ڒڭْنُوسْ س ثَازَّارْثْ ن ؤُردّدْجْ، ؤُ مَاحنْذْ أَذْ يڭّْ إِ ڒڭْنُوسْ سْڒِيمثْ ن ؤُغَارِّي خْ إِغسْمَارنْ نْسنْ.“
٢٩ ”أَذْ غَارْومْ يِيڒِي إِجّْ ن إِزْڒِي، أَمْ ذِي دْجِيڒثْ نِّي ذِي إِسّوْجذْ بْنَاذمْ إِخفْ نّسْ إِ ڒْْعِيذْ، ؤُڒَا ذ ڒفْرَاحثْ ذڭْ وُوڒْ أَمْ غَارْ إِجّنْ إِڭُّورنْ ؤُمِي إِژمَّارْ ذِي ثمْجَا مَاحنْذْ أَذْ د-يَاسْ غَارْ وذْرَارْ ن سِيذِي، غَارْ ثصْضَارْثْ ن إِسْرَائِيل.
٣٠ سِيذِي أَذْ يجّْ أَذْ سْڒنْ إِ ثْمِيجَّا نّسْ يُوعْڒَانْ ؤُشَا أَذْ إِسّْشنْ مَامّشْ غَا إِهْوَا ؤُغِيڒْ نّسْ أَكْ-ذ وسْخضْ ن وغْضَابْ ذ ثْمسِّي إِتّحْذُوذُوقنْ إِتّتّنْ، أَذُوقّزْ ن ونْژَارْ ذ ڒْْحَاڒْ ن ونْژَارْ ذ إِبْقُوقنْ ن ثبْرُورِي.
٣١ مَاغَارْ أَشُّورْ أَذْ يَارْجِيجْ س ثْمِيجَّا ن سِيذِي خْمِي ث غَا إِوّثْ نتَّا س وعْمُوذْ نّسْ.
٣٢ قَاعْ ثْوَاڒَا إِعدُّو خَاسْ وعْمُوذْ ن ؤُسڭّذْ، أَعْمُوذْ نِّي خَاسْ إِسَّارْسْ سِيذِي، أَقَا ذ مَانْ أَيَا أَذْ يِيڒِي غَارْ ثِينخْثْ ن إِبنْذِيرنْ ذ سْنِيثْرَاثْ ن ڒْڭَامْبْرِييَّاثْ، مَاغَارْ نتَّا أَكِيذْسنْ إِمّْنغْ س إِغَادْجنْ إِتّنْهزَّانْ.
٣٣ مَاغَارْ زڭْ وشْحَاڒْ ؤُيَا إِوْجذْ ومْشَانْ إِ نّْعِي نِّي، إِوْجذْ ؤُڒَا إِ ؤُجدْجِيذْ. إِڭَّا إِ-ث يُودْجغْ ذ ؤُمِيرِيوْ. أَقلِّيجْ نّسْ ن ثْمسِّي ذ ؤُكشُّوضْ ذ أَمقّْرَانْ. ثْوَارِّيثْ ن نّفْسْ ن سِيذِي أَذْ ث إِقدّْ أَمْ يغْزَارْ ن ڒشْبَارِييّثْ.“