٢٦
إِزْڒِي ن ثمُّورْثْ ن يَاهُوذَا
١ ذڭْ وَاسّْ نِّي أَذْغنّْجنْ إِزْڒِي-يَا
ذِي ثمُّورْثْ ن يَاهُوذَا:
”نشِّينْ غَارْنغْ إِشْثْ ن ثنْذِينْثْ إِجهْذنْ،
نتَّا إِسّْبدّْ ’أَسنْجمْ‘
ذْ ڒحْيُوضْ ذ ڒقْوَارَاثْ.
٢ أَرْزْممْ ثِيوُّورَا،
مَاحنْذْ ڒْْڭنْسْ أَمْسڭّذْ أَذْ د-يَاذفْ،
ڒْْڭنْسْ نِّي إِحطَّانْ
ڒَْامَانْ إِ سِيذِي ڒبْذَا.
٣ س ڒْْبَاڒْ إِمْثنْ أَمْ ث إِدْجَا،
شكْ ثْحطِّيذْ ث ذِي ڒهْنَا،
وَاهْ ذِي ڒهْنَا،
مَاغَارْ ڒْْڭنْسْ إِتّْشَاڒَا خَاكْ.“
٤ ”ثشْڒمْ خْ سِيذِي إِ ڒبْذَا،
مَاغَارْ ذِي سِيذِي، سِيذِي،
إِ ثدْجَا ذ ثَاصْضَارْثْ ن زّْمَانَاثْ.
٥ مَاغَارْ نتَّا إِتَّارَّا أَذْ أَضَارنْ
إِنِّي إِزدّْغنْ ذِينِّي ذِي ڒُوعْڒَا،
ثَانْذِينْثْ يُوعْڒَانْ أَذْ ت إِسّهْوَا،
أَذْ ت إِسّهْوَا أَڒْ ثَامُّورْثْ،
أَذْ ت إِعَارْنْ ذڭْ ؤُشَاڒْ.
٦ أَذْ خَاسْ إِعْفسْ ؤُضَارْ،
إِضَارنْ ن ونِّي إِتّْوَاحْصَارنْ،
ڒَْاثَارَاثْ ن إِضَارنْ ن إِمزْڒَاضْ.“
٧ ”أَبْرِيذْ ن ؤُمْسڭّذْ إِوَاطَا،
نِيشَانْ إِ إِدْجَا ڒَْاثَارْ ن ؤُمْسڭّذْ،
شكْ ثتّْسڭَّامذْ ث.
٨ ؤُڒَا ذڭْ وبْرِيذْ ن ڒحْكَامَاثْ نّشْ،
أَ سِيذِي، ثُوغَا نسِّيثِيمْ أَشْ،
ڒعْمَارْ نّغْ إِمّژْرِي
ذڭْ يِيسمْ نّشْ ؤُ ذِي ڒِيذَارثْ نّشْ.
٩ ثُوغَا ڒعْمَارْ إِنُو إِتّْوحَّاشْ إِ شكْ ذِي دْجِيڒثْ،
ؤُڒَا ذ بُوحْبڒْ إِنُو ذَايِي،
ثُوغَا يَارزُّو خَاكْ س جّهْذْ.
مَاغَارْ مَاڒَا ڒحْكَامَاثْ نّشْ
ؤُسِينْثْ-إِ-د خْ ثمُّورْثْ،
أَذْ ڒمْذنْ إِمزْذَاغْ ن ثمُّورْثْ ثَاسڭْذَا.“
١٠ ”مَاڒَا إِسّْشنْ بْنَاذمْ أَحِينِّي إِ ؤُعفَّانْ،
وَانِيثَا وَارْ إِڒمّذْ ثَاسڭْذَا،
مَاشَا أَذْ يڭّْ ڒْْغَارْ
ذِي ثمُّورْثْ إِشُّورنْ س ثْسڭْذَا،
ؤُ وَارْ إِژَارّْ أَعُودْجِي ن سِيذِي.“
١١ ”أَ سِيذِي، أَفُوسْ نّشْ إِتّْوَاسّْڭعَّاذْ،
مَاشَا نِيثْنِي وَارْ ث تّْوِيڒِينْ.
وَاخَّا أَمنِّي أَذْ ث ژَترنْ عَاذْ،
مَاشَا أَذْ سضْحَانْ زڭْ وَاسَامْ نّشْ
إِ ڒْْڭنْسْ نّشْ،
وَاهْ، ثِيمسِّي أَذْ ثشّْ إِغْرِيمنْ نّشْ.
١٢ أَ سِيذِي، ڒْْحُوكْمْ نّشْ خَانغْ
أَذْ يِيڒِي ذ ڒهْنَا،
مَاغَارْ شكْ ثْكمّْڒذْ
مَارَّا ثِيمڭَّا نّغْ ذِي طّْوعْ نّغْ.
١٣ أَ سِيذِي، أَربِّي نّغْ،
إِسِيذِيثنْ نّغْنِي سدْجْضنْ خَانغْ.
زَّايكْ شكْ وحّْذكْ
أَقَا نتِّيذَارْ إِسمْ نّشْ.
١٤ إِمتَّانْ وَارْ تّدَّارنْ عَاوذْ،
ڒخْيَاڒَاثْ وَارْ تّْنكَّارَانْ.
س ؤُيَا ثْخڒْفذْ أَسنْ س ڒْْغَارْ
ؤُشَا ثقْضِيذْ ثنْ.
شكْ ثكّْسذْ مَارَّا ڒْْعقْرَانْ خَاسنْ.
١٥ أَ سِيذِي، شكْ ثَارْنِيذْ ذِي ڒْْڭنْسْ-أَ،
شكْ ثَارْنِيذْ ذِي ڒْڭنْسْ-أَ،
ثتّْوَاسّْعُودْجذْ ذَايسْ،
أَقَا ثسّْوسْعذْ مَارَّا إِيْمِيرنْ ن ثمُّورْثْ.“
١٦ ”أَ سِيذِي، ذِي ڒحْصَارثْ أَرْزُونْ خَاكْ،
زدْجْعنْ ثِيژَادْجِيثِينْ نْسنْ س ثْحسّشْثْ،
ؤُمِي خَاسنْ د-ثُوسَا ثَارْبِييّثْ نّشْ.
١٧ أَمْ مَامّشْ ثتّْنزْبَارْ
إِشْثْ ن ثمْغَارْثْ س دّيْسثْ،
ثنِّي إِڭُّورنْ أَذْ ثَارُو أَحنْجِيرْ نّسْ
ؤُ ثسْغُويُّو س ڒوْجعْ ن ثَارُوثْ نّسْ،
أَمُّو إِ ذ أَنغْ ثُوغَا نشِّينْ، أَ سِيذِي،
زَّاثْ إِ ثِيطَّاوِينْ نّشْ.
١٨ ثُوغَا نشِّينْ أَخْمِي نكْسِي س دّيْسثْ،
إِمْنعْ أَنغْ ڒحْرِيقْ ن ثَارْوَا،
ثُوغَا نشِّينْ أَخْمِي نُورُو أَسمِّيضْ.
وَارْ د-نِيوِي أَسنْجمْ إِ ثمُّورْثْ،
ؤُ إِمزْذَاغْ ن دُّونشْثْ وَارْ د-تّْوَاخڒْقنْ.“
١٩ ”إِمتَّانْ نّشْ أَذْ دَّارنْ!
ڒْْخشْبَاثْ إِنُو أَذْ بدّنْثْ!
فَاقمْ، ؤُشَا سْڒِيوڒْومْ كنِّيوْ،
إِنِّي إِزدّْغنْ ذڭْ ؤُشَاڒْ!
أَقَا نّْذَا ن ثْفَاوِينْ أَمْ نّْذَا نّشْ،
ؤُشَا ثَامُّورْثْ أَذْ ثَارُو ڒخْيَاڒَاثْ ن إِمتَّانْ.“
٢٠ ”ؤُيُورْ، أَ ڒْْڭنْسْ إِنُو،
أَذفْ غَارْ إِخَّامنْ نّشْ ن ذَاخڒْ،
بلّعْ ثِيوُّورَا أَوَارْنِي أَشْ.
سْنُوفَّارْ إِخفْ نّشْ
ڒْْقدّْ ن إِشْثْ ن ثْزحْزِيحْثْ
أَڒْ د إِعْذُو وسْخضْ.
٢١ مَاغَارْ خْزَارْ، سِيذِي أَذْ إِفّغْ زڭْ ومْشَانْ نّسْ
مَاحنْذْ أَذْ إِخْڒفْ إِ إِمزْذَاغْ ن ثمُّورْثْ
ڒْْمُوعْصِييّثْ نْسنْ،
ؤُشَا ثَامُّورْثْ أَذْ ثْعَارَّا إِذَامّنْ
إِ خَاسْ إِتّْوَاسِّيزْڒنْ،
وَارْ ثْخمِّيڒْ عَاذْ إِنِّي خَاسْ إِتّْوَانْغنْ.“