٤
أَوَاڒْ ن سِيذِي ضِيدّْ إِ إِكهَّاننْ ذ ڒْْڭنْسْ
١ ”سْڒمْ إِ وَاوَاڒْ ن سِيذِي، أَيْثْ ن إِسْرَائِيل، مَاغَارْ سِيذِي إِكْسِي ثَانْفُوتْشْ ضِيدّْ إِ إِمزْذَاغْ ن ثمُّورْثْ، مِينْزِي وَارْ ذِينْ يدْجِي ڒَْامَانْ نِيغْ ثَامخْسِيوْثْ إِشوَّارنْ ؤُڒَا ذ ثُوسّْنَا ن أَربِّي ذِي ثمُّورْثْ.
٢ ثِيكّْوُورَا ذ إِخَارِّيقنْ ذ ؤُمنْغِي ذ ثُوشّفّْرَا ذ زِّينَا! أَقَا أَثنْ دُّوقّْزنْ، أَسِيزّڒْ ن إِذَامّنْ أَوَارْنِي إِ ؤُسِيزّڒْ ن إِذَامّنْ.
٣ خْ ؤُيَا ثْشطّنْ ثَامُّورْثْ ؤُ كُوڒْ إِجّنْ إِ ذَايسْ إِزدّْغنْ إِتَّاژغْ: ڒوْحُوشْ ن ييَّارْ ذ يِيجْضَاضْ ن ؤُجنَّا، وَاهْ، ؤُڒَا ذ إِسڒْمَانْ ذِي ڒبْحَارْ تّْوَاكّْسنْ.
٤ مَاشَا ؤُشْثْ خْ ورْيَازْ نِّي إِ ذ غَا إِكْسِينْ ثَانْفُوتْشْ ؤُ ؤُشْثْ خْ ورْيَازْ نِّي إِ غَا إِشثْشَانْ. ڒْْڭنْسْ نّشْ أَخْمِي يِينِّي إِتّمْشُوبّْشنْ أَكْ-ذ ؤُكهَّانْ.
٥ س ؤُزِيڒْ أَذْ ثنْقَارْضذْ ؤُ س دْجِيڒثْ أَذْ إِنْقَارْضْ عَاذْ أَنَابِي أَكِيذكْ، ؤُ يمَّاشْ أَذْ ت سّْهلّْكغْ.
٦ ڒْْڭنْسْ إِنُو إِذْوڒْ ذ أَيْنَاوْ، مِينْزِي أَقَا-ث بْڒَا ثُوسّْنَا. ؤُمِي شكْ ثنْضَارذْ ثُوسّْنَا، نْضَارغْ شكْ مَاحنْذْ وَارْ ذ أَيِي ثْسخَّارذْ عَاذْ أَمْ ؤُكهَّانْ. ؤُمِي شكْ ثتُّوذْ شَّارِيعَا ن أَربِّي، ؤُڒَا ذ نشّْ أَذْ تُّوغْ إِحنْجِيرنْ نّشْ.
٧ مَامّشْ مَا وسْعنْ¸ أَرْنِينْ ذِي دّْنُوبْ أَكِيذِي. أَذْ أَرّغْ شَّانْ نْسنْ ذْ ڒفْضِيحثْ.
٨ نِيثْنِي تّتّنْ زِي دّْنُوبْ ن ڒْْڭنْسْ إِنُو ؤُ س وُوڒْ نْسنْ تَّارَّانْ مژْرِي إِ ڒْْمُوعْصِييّثْ نْسنْ.
٩ أَمْ مَامّشْ إِ إِدْجَا ؤُكهَّانْ، أَمُّو إِ غَا يِيڒِي ؤُڒَا ذ ڒْْڭنْسْ. نشّْ أَذْ ذَايسْ خڒْفغْ إِبْرِيذنْ نّسْ ؤُ ثِيمڭَّا نّسْ أَذْ أَسْ ثنْثْ خدْجْصغْ.
١٠ نِيثْنِي أَذْ شّنْ، مَاشَا وَارْ ثتّْجِّيوِيننْ شَا، نِيثْنِي أَذْ سّْفسْذنْ إِخفْ نْسنْ، مَاشَا وَارْ تّْمَارنْينْ، مِينْزِي نِيثْنِي سمْحنْ ذڭْ ؤُحتُّو ن ثْسخَّارْثْ إِ سِيذِي.
١١ فَارْقْ-شّْغڒْ ذ بِينُو ؤُ بِينُو ن جْذِيذْ أَقَا كّْسنْ ؤُڒْ إِ بْنَاذمْ.
١٢ ڒْْڭنْسْ إِنُو إِتّْسقْسَا صَّانَامْ نّسْ ن ؤُكشُّوضْ ؤُ ثَاغَّارْشْثْ نّسْ أَذْ أَسْ ثوْشْ ڒخْبَارْ، مِينْزِي بُوحْبڒْ ن فَارْقْ-شّْغڒْ إِغَارَّا إِ-ثنْ أَڒَامِي فّْغنْ س فَارْقْ-شّْغڒْ نْسنْ زِي سَاذُو أَحطُّو ن أَربِّي نْسنْ.
١٣ خْ ثْقِيشَّاثْ ن إِذُورَارْ تّْقدَّامنْ ثِيغَارْصَا ؤُ خْ ثوْرِيرِيرِينْ تَّاوْينْ ثِيوْهِيبِينْ ن ڒبْخُورْ، سَاذُو ڒْْبدْجُوضْ ذ صّفْصَافْ ذ ثْشجَّارْثْ ن يِيڭّْ، مِينْزِي ثِيڒِي نْسنْ ثصْبحْ. خْ ؤُيَا سّفْسَاذنْثْ يسِّيثْومْ إِخفْ نْسنْثْ ؤُ ثِيسْڒَاثِينْ نْومْ تَّارژَّانْثْ ڒمْڒَاشْ س زِّينَا.
١٤ مَاشَا نشّْ وَارْ سِّيوِيضغْ ڒْْحُوكْمْ خْ يسِّيثْومْ ؤُمِي سّْفسْذنْثْ إِخفْ نْسنْثْ ؤُڒَا خْ ثسْڒَاثِينْ نْومْ ؤُمِي تَّارژَّانْثْ ڒمْڒَاشْ س زِّينَا. أَقَا نِيثنْثِي حُوزنْثْ إِخفْ نْسنْثْ أَكْ-ذ ثمْغَارِينْ ن فَارْقْ-شّْغڒْ ؤُ تّْقدَّامنْثْ ثِيغَارْصَا جْمِيعْ أَكْ-ذ ثمْغَارِينْ ن فَارْقْ-شّْغڒْ ن زَّاوشْثْ. أَذْ إِوْضَا ڒْْڭنْسْ إِ وَارْ غَارْ إِدْجِي ڒعْقڒْ.“
١٥ ”وَاخَّا شكْ، إِسْرَائِيل، ثسّفْسذذْ إِخفْ نّشْ، وَارْ تَّارِّي ؤُڒَا ذ يَاهُوذَا ذ بُو-ؤُمَارْوَاسْ. وَارْ د-تِّيسِيمْ غَارْ جِيلْجَالْ، وَارْ تّْڭعَّاذمْ غَارْ بَايْثْ-أَوَانْ ؤُ وَارْ تّْجَادْجَامْ: ’س ثِيذتّْ أَمْ إِدَّارْ سِيذِي!‘
١٦ مِينْزِي إِسْرَائِيل ذَايسْ ثَاغنَّانْثْ أَمْ يِيشْثْ ن ثْفُونَاسْثْ ثْعَارّنْ. خنِّي ڒخُّو، أَذْ ثنْ يَارْوسْ سِيذِي أَمْ يِيجّْ ن يزْمَارْ أَمژْيَانْ ذڭْ إِيَّارْ إِوسْعنْ أَطَّاسْ.
١٧ إِفْرَايِيمْ إِقّنْ إِخفْ نّسْ أَكْ-ذ ڒخْيَاڒَاثْ ن لْ-أَصْنَامْ، أجّْ إِ-ث، إِسْمحْ ذَايسْ.
١٨ ثَاسسِّيثْ نْسنْ ذَايسْ سّمْ، تّڭّنْ فَارْقْ-شّْغڒْ أَوَارْنِي إِ فَارْقْ-شّْغڒْ، ؤُ إِمحْضَاينْ نْسنْ تّخْسنْ مْغِيرْ ڒفْضِيحثْ وَاهَا.
١٩ إِشْثْ ن ثْحَارْيَاضْثْ ثسّْجبْذْ إِ-ت س وَافْرِيونْ نّسْ: أَقَا نِيثْنِي أَذْ ذوْڒنْ تّْسضْحَانْ زِي ثْغَارْصِي نْسنْ.“