إِعِيبْرَانِييّنْ
١
مِّيسْ يُوعْڒَا أَطَّاسْ خْ لْمَالَاكَاثْ
١ ذڭْ وُوسَّانْ إِعْذُونْ إِسِّيوڒْ أَربِّي ذِي كُوڒْ ڒْْوقْثْ ؤُ ذڭْ وَاطَّاسْ ن إِبْرِيذنْ أَكْ-ذ ڒجْذُوذْ نّغْ س إِنَابِييّنْ.
٢ ذڭْ وُوسَّانْ-أَ إِنڭُّورَا أَقَا إِسِّيوڒْ-د أَكِيذْنغْ س مِّيسْ، ونِّي إِڭَّا ذ أَوْرِيثْ ن كُوڒْشِي، س ونِّي عَاوذْ إِڭَّا زّْمَانَاثْ.
٣ مِينْزِي نتَّا ذ ثَاللّشْثْ ن ؤُعُودْجِي نّسْ ؤُڒَا ذ تّسْوِيرْثْ ن سِيمَانْثْ نّسْ، ؤُ نتَّا ذ ونِّي يَاربُّونْ مَارَّا ثِيمسْڒَايِينْ س جّهْذْ ن وَاوَاڒْ نّسْ. أَقَا نتَّا إِسِّيزْذڭْ دّْنُوبْ نّغْ ذِي طّْبِيعثْ ن يِيخفْ نّسْ، ؤُشَا إِرُوحْ إِقِّيمْ غَارْ يفُوسْ ن لْعَاضِيمْ ذِي ڒُْوعْڒَا.
٤ نتَّا يُوعْڒَا أَطَّاسْ خْ لْمَالَاكَاثْ أَمْ إِسمْ إِ إِطّفْ ذ ڒْْوَارْثْ، أَقَا إِشْنَا خْ ونِّي نْسنْ.
٥ مِينْزِي إِ مَانْ ثنْ زِي لْمَالَاكَاثْ إِنَّا أَربِّي:
”مِّي إِ ثدْجِيذْ شكْ،
أَسّْ-أَ نشّْ جِّيغْ-د شكْ!“،
ؤُشَا عَاوذْ إِنَّا:
”نشّْ أَذْ أَسْ إِڒِيغْ ذ بَابَاسْ
ؤُ نتَّا أَذْ أَيِي يِيڒِي ذ مِّي“؟
٦ ؤُشَا خنِّي خْمِي د-إِسِّيذفْ أَمنْزُو غَارْ دُّونشْثْ، إِنَّا:
”أَذْ أَسْ سجْذنْثْ مَارَّا لْمَالَاكَاثْ ن أَربِّي.“
٧ مَاشَا خْ لْمَالَاكَاثْ إِنَّا:
”نتَّا إِڭَّا لْمَالَاكَاثْ نّسْ ذ إِسمِّيضنْ،
ؤُشَا إِمْسخَّارنْ نّسْ
ذ إِشْثْ ن ثْمسِّي إِتّحْذُوذُوقنْ“،
٨ مَاشَا خْ مِّيسْ:
”ڒْْعَارْشْ نّشْ، أَ أَربِّي،
أَقَا إِدْجَا إِ ڒبْذَا قَاعْ.
أَزدْجَاضْ ن ثْڭلْذِيثْ نّشْ،
أَقَا-ت ذ أَزدْجَاضْ إِسڭّْذنْ.
٩ أَقَا ثخْسذْ ثَاسڭْذَا، ثْشَارْهذْ ڒْْغَارْ.
س ؤُينِّي أَقَا إِذْهنْ إِ شْ
أَربِّي، أَربِّي نّشْ،
س زّشْثْ ن ڒفْرَاحثْ
سنّجْ إِ إِمْعَاشَارنْ نّشْ.“
١٠ ؤُشَا خنِّي:
”زڭْ ؤُبدُّو ثڭِّيذْ شكْ ذْسَاسْ ن ثمُّورْثْ،
إِجنْوَانْ دْجَانْ ذ ڒْْخذْمثْ ن إِفَاسّنْ نّشْ.
١١ إِنَا أَذْ تّْوَاثحَّانْ، مَاشَا شكْ أَذْ ثْذُومذْ،
ؤُشَا إِنَا مَارَّا أَذْ أَرْشَانْ أَمْ وَارُّوضْ.
١٢ أَمشْنَاوْ إِجّْ ن ؤُسڒْهَامْ أَذْ ثنْ تّْضفْسذْ.
أَذْ تّْوَابدّْڒنْ أَمْ وَارُّوضْ،
مَاشَا شكْ أَذْ ثِيڒِيذْ ذ ونِّي
ؤُشَا إِسڭّْوُوسَا نّشْ وَارْ قطِّينْ شَا.“
١٣ مَاشَا إِ مَانْ ثنْ زِي لْمَالَاكَاثْ إِنَّا إِجّْ ن وَاسّْ:
”قِّيمْ غَارْ يفُوسْ إِنُو
أَڒْ ذ غَا ڭّغْ ڒْْعذْيَانْ نّشْ
ذ ثَانبْذَاثْ سَاذُو إِضَارنْ نّشْ“؟
١٤ مَا وَارْ دْجِينْثْ نِيثنْثِي ذ أَرُّوحَاثْ إِ ثْسخَّارْثْ، تّْوَاسّكّنْثْ-إِ-د حِيمَا أَذْ سخَّارنْثْ إِ يِينِّي غَا إِوَارْثنْ ثُوذَارْثْ؟