٣
ڒخْبَارْ إِسّْفَارّْحنْ زِي ثِيمُوثِييُو
١ ؤُمِي وَارْ نْزمَّارْ أَذْ ث نصْبَارْ كْثَارْ، ثُوغَا إِتّْغِيڒْ أَنغْ مْلِيحْ مَاحنْذْ أَذْ نقِّيمْ ذِي أَثِينَا وحّذْنغْ،
٢ ؤُشَا نسّكّْ أَومْ-د ؤُمَاثْنغْ ثِيمُوثِييُو. نتَّا ذ أَمْسخَّارْ ن أَربِّي ذ أَمْعَاونْ نّغْ ذِي ثْبَارّحْثْ ن ڒخْبَارْ أَصبْحَانْ ن لْمَاسِيحْ، أَڒَامِي إِزمَّارْ أَذْ كنِّيوْ إِسّجْهذْ ؤُ أَذْ إِقدْجبْ لْ-إِيمَانْ نْومْ،
٣ حِيمَا ؤُڒَا ذ إِجّْ زَّايْومْ وَارْ إِقطّعْ ڒَْايَاسْ زِي سِّيبّثْ ن ڒمْحَايمْ-أَ. أَقَا كنِّيوْ ثسّْنمْ سِيمَانْثْ نْومْ، بلِّي نتّْوَاڭّْ إِ مَانْ أَيَا.
٤ مَاغَارْ ڒَْامِي ذ أَنغْ ثُوغَا أَكِيذْومْ، نِيزَّارْ ننَّا، بلِّي أَذْ خَانغْ ثكّْ ڒحْصَارثْ، ؤُشَا أَمُّو إِ إِمْسَارْ أَمْ مَامّشْ ثسّْنمْ كنِّيوْ.
٥ س ؤُينِّي، ؤُمِي وَارْ زمَّارغْ أَذْ صْبَارغْ كْثَارْ، أَقَا سّكّغْ ث-إِ-د حِيمَا أَذْ سّْنغْ خْ لْ-إِيمَانْ نْومْ، مَا أَذْ ثَاغْ ونِّي إِتّْجَارَّابنْ أَقَا إِجَارّبْ كنِّيوْ ؤُشَا أَذْ إِفّغْ أَرْبرْ نّغْ ذ وَالُو.
٦ مَاشَا ڒخُّو إِذْوڒْ-د غَارْنغْ زَّايْومْ ثِيمُوثِييُو ؤُشَا إِسِّيوضْ أَنغْ-د ڒخْبَارْ أَصبْحَانْ ن لْ-إِيمَانْ نْومْ ذ ثَايْرِي نْومْ، أَقَا كنِّيوْ ڒبْذَا ثتِّيذَارمْ أَنغْ س ڒْْخَارْ زِي مَارَّا إِغزْذِيسنْ ؤُ ذَايْومْ مژْرِي مَاحنْذْ أَذْ أَنغْ ثْژَارمْ، أَمْ ؤُڒَا ذ نشِّينْ ذَايْنغْ مژْرِي أَذْ كنِّيوْ نْژَارْ.
٧ س ؤُينِّي نتّْوَافوّجْ زَّايْومْ، أَ كنِّيوْ أَوْمَاثنْ نّغْ، ذِي مَارَّا ثَامَارَا نّغْ ذ ڒمْحَايمْ نّغْ، زِي سِّيبّثْ ن لْ-إِيمَانْ نْومْ،
٨ ؤُشَا ڒخُّو نتّْوَانْعشّْ، مَاڒَا كنِّيوْ ثتّْغِيمَامْ ثتّْبدَّامْ نِيشَانْ ذِي سِيذِيثْنغْ.
٩ مَامّشْ إِ غَا نڭّْ أَذْ نْقَاذَا أَربِّي زِي سِّيبّثْ نْومْ خْ مَارَّا ڒفْرَاحثْ إِ زِي نْفَارّحْ زَّايْومْ،
١٠ مْغِيرْ ؤُمِي نتّتَّارْ دْجِيڒثْ ذ وَاسّْ س وَاطَّاسْ زَّاثْ إِ وُوذمْ ن أَربِّي، حِيمَا أَذْ كنِّيوْ نْژَارْ س ؤُغمْبُوبْ ؤُشَا أَذْ نْكمّڒْ مِينْ إِتّْخصَّانْ عَاذْ إِ لْ-إِيمَانْ نْومْ.
١١ مَاشَا أَربِّي، بَابَاثْنغْ، ذ سِيذِيثْنغْ يَاسُوع لْمَاسِيحْ، أَذْ إِسڭّمْ أَبْرِيذْ نّغْ غَارْومْ.
١٢ نتَّا أَذْ يَارْنِي ذِي ثَايْرِي نْومْ ن إِجّنْ إِ ونّغْنِي ؤُ ثَايْرِي نْومْ إِ مَارَّا، أَمْ مَامّشْ نتّخْسْ نشِّينْ ؤُڒَا إِ كنِّيوْ،
١٣ ؤُشَا نتَّا أَذْ إِسّْمحّذْ ؤُڒَاونْ نْومْ، حِيمَا أَذْ ثِيڒِيمْ بْڒَا ڒْْعِيبْ ذِي ثْقدَّاسْثْ قِيبَاتْشْ إِ أَربِّي بَابَاثْنغْ، خْ مِينِّي د غَا يَاسْ سِيذِيثْنغْ يَاسُوع لْمَاسِيحْ أَكْ-ذ مَارَّا إِمْقدَّاسنْ نّسْ.