٤
أَرَّاونْ ن أَربِّي
١ خْسغْ أَذْ إِنِيغْ، مشْحَاڒْ مَا ذ أَوْرِيثْ أَقَا-ث عَاذْ ذ أَحنْجِيرْ، وَارْ ذِينْ بُو ڒْْفَارْقْ خْ ؤُمْسخَّارْ، وَاخَّا نتَّا ذ بَابْ ن مَارَّا نِيثْنِي.
٢ نتَّا إِدْجَا عَاذْ سَاذُو إِمحْذَاينْ ؤُ سَاذُو إِنِّي إِتّْسيَّارنْ ثَادَّارْثْ أَڒْ ڒْْوقْثْ إِ يڭَّا بَابَاسْ.
٣ أَمُّو عَاوذْ نشِّينْ، ؤُمِي ذ أَنغْ ثُوغَا عَاذْ ذ إِحنْجِيرنْ، ثُوغَا أَنغْ ذ إِسمْغَانْ سَاذُو صُّولْطَا ن لْفَارَايِيضْ ن دُّونشْثْ-أَ.
٤ مَاشَا ؤُمِي د-يِيوضْ ؤُعمَّارْ ن ڒْْوقْثْ، أَربِّي أَقَا إِسّكّْ-د مِّيسْ إِ يدْجَانْ زِي ثمْغَارْثْ ذ ونِّي إِدْجَانْ سَاذُو شَّارِيعَا،
٥ حِيمَا أَذْ إِفْذِي إِنِّي إِدْجَانْ سَاذُو شَّارِيعَا ؤُشَا خنِّي نشِّينْ أَذْ نطّفْ ڒفْضڒْ مَاحنْذْ أَذْ نتّْوَاقْبڒْ ذ مِّيسْ.
٦ مِينْزِي كنِّيوْ ثدْجَامْ ذ أَرَّاونْ، أَربِّي إِسّكّْ أَرُّوحْ ن مِّيسْ ذڭْ وُوڒَاونْ نْومْ، ونِّي إِتّْڒَاغَانْ: ’بَابَا، بَابَاثْنغْ!‘
٧ س ؤُينِّي وَارْ ثدْجِيمْ عَاذْ ذ إِمْسخَّارنْ، مَاشَا ذ أَرَّاونْ ؤُ مَاڒَا أَرَّاونْ إِ ثدْجَامْ، أَقَا كنِّيوْ عَاوذْ ذ إِوْرِيثنْ ن أَربِّي س يَاسُوع لْمَاسِيحْ.
٨ مَاشَا ذِي زّْمَانْ إِ وَارْ ثسِّينمْ شَا أَربِّي، ثُوغَا ثْعبّْذمْ إِنِّي وَارْ إِدْجِينْ س ثوَّا ذ إِربِّيثنْ.
٩ مَاشَا ڒخُّو، أَوَارْنِي ڒَْامِي ثسّْنمْ أَربِّي، عَاذْ حْسنْ أَربِّي يَارْڭبْ خَاومْ، أَقَا ثْعقْبمْ عَاوذْ غَارْ صُّولْطَا ن لْفَارَايِيضْ إِضعْفنْ إِزڒْضنْ ن دُّونشْثْ-أَ، ثخْسمْ عَاوذْ أَذْ أَسنْثْ ثمَّارْسمْ إِخفْ نْومْ أَمْ زڭْ وشْحَاڒْ ؤُيَا!
١٠ ثْحطَّامْ ؤُسَّانْ ذ إِيُورنْ ذ زّْمَانَاثْ ذ إِسڭّْوُوسَا.
١١ تّڭّْوذغْ خَاومْ أَقَا تَّامَارغْ جَارْ أَومْ خْ وَالُو.
ثْغُويِّيثْ ن ذغْيَا
١٢ أَ أَيْثْمَا، تّْزَاوَاڭغْ كنِّيوْ، إِڒِيمْ أَمْ نشّْ، مِينْزِي نشّْ أَمْ كنِّيوْ. كنِّيوْ وَارْ ذ أَيِي ثڭِّيمْ وَالُو مِينْ وَارْ إِحْڒِينْ.
١٣ أَقَا كنِّيوْ ثسّْنمْ بلِّي بَارّْحغْ أَومْ-د س ڒخْبَارْ أَصبْحَانْ ذڭْ ؤُمزْوَارُو س ثُوضْعفْثْ ن أَرِّيمثْ إِنُو.
١٤ كنِّيوْ وَارْ ثسّحْقَارمْ نِيغْ ثسّْطيّْحمْ زڭْ ؤُمَارّثْ ن أَرِّيمثْ إِنُو، مَاشَا ثْقبْڒمْ أَيِي أَمْ يِيجّْ ن لْمَالَاكْ ن أَربِّي ؤُ أَمْ يَاسُوع لْمَاسِيحْ.
١٥ مَانِي ثْرُوحْ خنِّي لْبَارَاكَا نْومْ؟ مِينْزِي شهّْذغْ خَاومْ بلِّي، مَاڒَا ثُوغَا ثْزمَّارمْ، أَذْ ثْقڒْعمْ ثِيطَّاوِينْ نْومْ، حِيمَا أَذْ أَيِي ثنْثْ ثوْشمْ.
١٦ مَا ذوْڒغْ ذ ڒعْذُو نْومْ، مِينْزِي بَارّْحغْ كنِّيوْ س ثِيذتّْ؟
١٧ نِيثْنِي شْضَارنْ أَطَّاسْ خَاومْ، مَاشَا وَارْ إِدْجِي أَمنِّي وَاهَا، مَاغَارْ خْسنْ أَذْ كنِّيوْ حبّْسنْ، حِيمَا كنِّيوْ أَذْ ثشْضَارمْ خَاسنْ.
١٨ وَاهْ، مْلِيحْ أَذْ ثِيڒِيمْ ڒبْذَا ثْشطَّارمْ ذِي مِينْ إِدْجَانْ ذ أَصبْحَانْ، مَاشَا وَارْ إِدْجِي خْمِي كِيومْ إِ غَا حْضَارغْ وَاهَا.
١٩ أَ إِحنْجِيرنْ إِنُو، ثْوَاڒَا نّغْنِيثْ أَقَا أَيِي إِ كنِّيوْ أَمْ يِيشْثْ ن ثمْغَارْثْ ثنِّي إِكْسِينْ دّيْسثْ زَّايْومْ س ؤُنزْبَارْ ن ثَارْوَا، أَڒْ ذَايْومْ إِ غَا إِڒِينْثْ ثفْرَاسْ ن لْمَاسِيحْ.
٢٠ خْسغْ ڒخُّو أَذْ إِڒِيغْ أَكِيذْومْ ؤُشَا أَذْ بدّْڒغْ ثْمِيجَّا إِنُو، مِينْزِي أَقَا ؤُڭْنُوغْ زَّايْومْ.
أَمذْيَا ن هَاجَارْ ذ سَارَا
٢١ إِنِيمْ أَيِي، كنِّيوْ إِنِّي إِتّخْسنْ أَذْ ثِيڒِيمْ سَاذُو شَّارِيعَا، مَا وَارْ ثطِّيعمْ شَا شَّارِيعَا؟
٢٢ مِينْزِي أَقَا ثُورَا بلِّي إِبْرَاهِيمْ ثُوغَا غَارسْ ثْنَاينْ ن إِحنْجِيرنْ، إِجّنْ ن ثَايَّا، ونّغْنِي ن ثْحُورّشْثْ.
٢٣ ونِّي ن ثَايَّا أَقَا إِتّْوَاخْڒقْ-د عْلَاحْسَابْ دَّاثْ، مَاشَا ونِّي ن ثْحُورّشْثْ إِتّْوَاخْڒقْ-د عْلَاحْسَابْ لْوَاعْذْ.
٢٤ ثِينَا ذ ثْنَاينْ ن إِمذْيَا ن ثْنَاينْ ن ڒْْعُوهُوذْ، إِجّنْ ن وذْرَارْ ن سِينَا، ونِّي إِ د-إِتَّارْونْ ثَاسْمُوغِي، أَقَا-ث هَاجَارْ.
٢٥ مِينْزِي هَاجَارْ ذ أَذْرَارْ ن سِينَا ذِي عَارَابِييَّا، ثنِّي يَاروْسنْ ذِي ؤُرْشَالِيمْ ن ڒخُّو، ثنِّي إِدْجَانْ ذِي ثسْمُوغِي أَكْ-ذ ثَارْوَا نّسْ.
٢٦ مَاشَا ؤُرْشَالِيمْ ن سنّجْ ذ ثَاحُورّشْثْ، أَقَا-ت ذ يمَّاثْنغْ.
٢٧ مِينْزِي ثُورَا:
”فَارْحْ، ثنِّي وَارْ إِتِّيرْونْعمَّارْصْ!
ذُوقّزْ س ؤُسْڒِيوْڒوْ، سْغُويّْ س جّهْذْ،
أَ شمْ ثنِّي وَارْ إِسِّيننْ ڒوْجعْ ن ثَارْوَا،
مَاغَارْ ثَارْوَا ن ثنِّي ذِي سمْحنْ
ذ أَطَّاسْ خْ ثَارْوَا ن ثنِّي غَارْ إِدْجَا ورْيَازْ.“
٢٨ مَاشَا نشِّينْ، أَ أَيْثْمَا، ذ ثَارْوَا ن لْوَاعْذْ أَمْ إِسْحَاقْ.
٢٩ مَاشَا أَمْ ذِي ڒْْوقْثْ نِّي وِي د-إِثْوَاخڒْقنْ عْلَاحْسَابْ دَّاثْ ثُوغَا إِمَارّثْ ونِّي د-إِتّْوَاخڒْقنْ عْلَاحْسَابْ أَرُّوحْ، أَمُّو عَاوذْ ڒخُّو.
٣٠ مَاشَا مِينْ قَّارنْثْ ثِيرَا إِقدّْسنْ؟ ”نْضَارمْ بَارَّا ثَايَّا ذ مِّيسْ، مِينْزِي وَارْ إِتِّيڒِي مِّيسْ ن ثَايَّا ذ أَوْرِيثْ أَكْ-ذ مِّيسْ ن ثْحُورّشْثْ.“
٣١ س ؤُينِّي، أَ أَيْثْمَا، أَقَا وَارْ ندْجِي شَا ذ ثَارْوَا ن ثَايَّا، مَاشَا ثَارْوَا ن ثْحُورّشْثْ.