٧
مُوسَا ذ هَارُونْ رُوحنْ غَارْ فِيرْعُونْ ثْوَاڒَا نّغْنِي
١ إِنَّا سِيذِي إِ مُوسَا: ”خْزَارْ، نشّْ أَقَا ڭِّيغْ شكْ ذ أَربِّي إِ فِيرْعُونْ ذ ؤُمَاشْ هَارُونْ أَذْ أَشْ يِيڒِي ذ أَنَابِي إِ شكْ.
٢ شكْ أَذْ ثِينِيذْ مَارَّا مِينْ زِي شكْ غَا ؤُمُورغْ ؤُشَا هَارُونْ، ؤُمَاشْ، أَذْ إِسِّيوڒْ أَكْ-ذ فِيرْعُونْ، حِيمَا أَذْ يجّْ أَذْ فّْغنْ أَيْثْ ن إِسْرَائِيل زِي ثمُّورْثْ نّسْ.
٣ مَاشَا نشّْ أَذْ سّْقسْحغْ ؤُڒْ ن فِيرْعُونْ ؤُشَا أَذْ كتَّارغْ ڒعْڒَامَاثْ ذ لْمُوعْجِيزَاثْ إِنُو ذِي ثمُّورْثْ ن مِيصْرَا.
٤ مَاشَا فِيرْعُونْ وَارْ غَارْومْ-د إِسّْحسِّي ؤُ نشّْ أَذْ ڭّغْ أَفُوسْ إِنُو خْ مِيصْرَا ؤُشَا أَذْ سُّوفّْغغْ ڒْْعسْكَارَاثْ إِنُو، ڒْْڭنْسْ إِنُو، أَيْثْ ن إِسْرَائِيل، زِي ثمُّورْثْ ن مِيصْرَا س ڒحْكَامَاثْ إِمْغَارنْ.
٥ ڒخْذنِّي أَذْ سّْننْ إِمِيصْرِييّنْ بلِّي نشّْ ذ سِيذِي إِ دْجِيغْ خْمِي غَا سّْوِيژّْضغْ أَفُوسْ إِنُو خْ مِيصْرَا ؤُشَا أَذْ سُّوفّْغغْ أَيْثْ ن إِسْرَائِيل زِي ڒْْوسْطْ نْسنْ.“
٦ ؤُشَا ڭِّينْ مُوسَا ذ هَارُونْ أَمْ مَامّشْ ثنْ يُومُورْ سِيذِي، وَاهْ، أَمنِّي إِ ڭِّينْ.
٧ ثُوغَا مُوسَا ذ إِجّْ ن بْنَاذمْ ن ثْمنْيِينْ ن إِسڭّْوُوسَا ؤُ ثُوغَا هَارُونْ ذ إِجّْ ن بْنَاذمْ ن ثْڒَاثَا ؤُ-ثْمنْيِينْ ن إِسڭّْوُوسَا، ڒَْامِي سِّيوْڒنْ أَكْ-ذ فِيرْعُونْ.
٨ ؤُشَا إِسِّيوڒْ سِيذِي أَكْ-ذ مُوسَا ذ هَارُونْ، إِنَّا:
٩ ”مَاڒَا إِسِّيوڒْ أَكِيذْومْ فِيرْعُونْ، أَذْ يِينِي: ’سشْنمْ، أَقَا كنِّيوْ ثْزمَّارمْ أَذْ ثڭّمْ إِشْثْ ن لْمُوعْجِيزَا!‘، خنِّي أَذْ ثِينِيذْ إِ هَارُونْ: ’طّفْ ثَاغَّارْشْثْ نّشْ ؤُشَا نْضَارْ إِ-ت زَّاثْ إِ فِيرْعُونْ!‘، خنِّي أَذْ ثذْوڒْ ذ إِشْثْ ن ڒْْهَايْشثْ.“
١٠ ؤُذْفنْ خنِّي مُوسَا ذ هَارُونْ غَارْ فِيرْعُونْ ؤُشَا ڭِّينْ مَامّشْ إِ ذ أَسنْ يُومُورْ سِيذِي. إِنْضَارْ هَارُونْ ثَاغَّارْشْثْ نّسْ زَّاثْ إِ فِيرْعُونْ ذ إِمْسخَّارنْ نّسْ ؤُشَا ثذْوڒْ ذ إِشْثْ ن ڒْْهَايْشثْ.
١١ ڒخْذنِّي إِڒَاغَا-د عَاوذْ فِيرْعُونْ خْ إِمِيغِيسنْ ذ إِسحَّارنْ، ؤُشَا ثَارْوَا ن ثْسحَّارْثْ ن مِيصْرَا ڭِّينْ عَاوذْ أَمنِّي س ثْمڭَّا نْسنْ ن سْوَادَّايْ سْوَادَّايْ ذ إِشْثْ.
١٢ إِنْضَارْ كُوڒْ إِجّنْ ثَاغَّارْشْثْ نّسْ ؤُشَا ذوْڒنْثْ ثِيغَّارْينْ نِّي ذ ڒْْهَايْشَاثْ. مَاشَا ثَاغَّارْشْثْ ن هَارُونْ ثْسَارْضْ ثِيغَّارْينْ نْسنْ.
١٣ ؤُڒْ ن فِيرْعُونْ إِذْوڒْ إِقْسحْ ؤُشَا وَارْ غَارْسنْ إِسْڒِي شَا، أَمْ مَامّشْ ثُوغَا إِ ذ أَسنْ إِنَّا سِيذِي قْبڒْ.
ثسْعَا ن جّْرَايحْ ثِيمزْوُورَا
١٤ ڒخْذنِّي إِنَّا سِيذِي إِ مُوسَا: ”ؤُڒْ ن فِيرْعُونْ إِذْوڒْ إِقْسحْ. وَارْ إِخْسْ أَذْ يجّْ أَذْ إِفّغْ ڒْْڭنْسْ.
١٥ رُوحْ ثِيوشَّا غَارْ صّْبحْ غَارْ فِيرْعُونْ. خْزَارْ، نتَّا أَذْ إِفّغْ غَارْ وَامَانْ. شكْ رَاجَا ذِينْ غَارْ ثْمَا ن يِيغْزَارْ ؤُشَا كْسِي-د ثَاغَّارْشْثْ نِّي إِذوْڒنْ ذ أَفِيغَارْ ذڭْ ؤُفُوسْ نّشْ.
١٦ أَذْ أَسْ ثِينِيذْ: ’سِيذِي، أَربِّي ن إِعِيبْرَانِييّنْ إِسّكّْ أَيِي-د غَاركْ، إِنَّا: أجّْ أَذْ إِرَاحْ ڒْْڭنْسْ إِنُو، حِيمَا أَذْ أَيِي إِعْبذْ ذِي ڒخْڒَا! خْزَارْ، أَڒْ ڒخُّو وَارْ ثخْسذْ أَذْ ثْسدْجذْ.
١٧ أَمُّو إِ إِقَّارْ سِيذِي: ’س مَانْ أَيَا أَذْ ثسّْنذْ بلِّي نشّْ ذ سِيذِي!‘ خْزَارْ، نشّْ أَذْ وْثغْ أَمَانْ إِ إِدْجَانْ ذڭْ إِغْزَارْ س ثغَّارْشْثْ إِ غَارِي ذڭْ ؤُفُوسْ إِنُو ؤُشَا أَذْ ذوْڒنْ ذ إِذَامّنْ.
١٨ إِسڒْمَانْ إِ إِدْجَانْ ذڭْ إِغْزَارْ أَذْ مّْثنْ أَڒْ غَا يُورْصُوضْ إِغْزَارْ ن نِيلْ، أَذْ عِيفّنْ إِمِيصْرِييّنْ أَذْ سْونْ أَمَانْ ن إِغْزَارْ ن نِيلْ.‘ “
١٩ إِنَّا سِيذِي عَاوذْ إِ مُوسَا: ”إِنِي إِ هَارُونْ: ’كْسِي ثَاغَّارْشْثْ نّشْ، سْوِيژّضْ أَفُوسْ نّشْ خْ وَامَانْ ن مِيصْرَا، خْ إِغزْرَانْ نْسنْ، خْ ثْغزْرَاثِينْ نْسنْ، خْ إِيڒْمَامنْ نْسنْ خْ مَارَّا إِمُوشَانْ مَانِيسْ تّْمُونَانْ وَامَانْ ؤُشَا أَذْ ذوْڒنْ ذ إِذَامّنْ. أَذْ ذوْڒنْ ذ إِذَامّنْ خْ مَارَّا ثَامُّورْثْ ن مِيصْرَا، ؤُڒَا ذِي ڒقْشُوعْ ن ؤُكشُّوضْ ذ وژْرُو.‘ “
٢٠ مُوسَا ذ هَارُونْ ڭِّينْ أَمْ مَامّشْ إِ ذ أَسنْ يُومُورْ سِيذِي. إِسّْڭعّذْ هَارُونْ ثَاغَّارْشْثْ، إِوْثَا أَمَانْ نِّي ثُوغَا ذڭْ إِغْزَارْ قِيبَاتْشْ إِ ثِيطَّاوِينْ ن فِيرْعُونْ ذ إِمْسخَّارنْ نّسْ ؤُشَا مَارَّا أَمَانْ نِّي ثُوغَا ذڭْ إِغْزَارْ ذوْڒنْ ذ إِذَامّنْ.
٢١ مُّوثنْ إِسڒْمَانْ إِنِّي ثُوغَا ذڭْ إِغْزَارْ ؤُشَا يُورْصُوضْ يغْزَارْ أَڒَامِي ذوْڒنْ إِمِيصْرِييّنْ وَارْ زمَّارنْ أَذْ زَّايسْ سْونْ أَمَانْ ؤُشَا ذوْڒنْ وَامَانْ ذ إِذَامّنْ ذِي مَارَّا ثَامُّورْثْ ن مِيصْرَا.
٢٢ مَاشَا ثَارْوَا ن ثْسحَّارْثْ ن مِيصْرَا ڭِّينْ أَمنِّي س ثْمڭَّا نْسنْ ن سْوَادَّايْ سْوَادَّايْ أَڒَامِي ؤُڒْ ن فِيرْعُونْ إِذْوڒْ إِقْسحْ، ؤُ نتَّا وَارْ غَارْسنْ إِسّْحسّْ شَا، أَمْ مَامّشْ ذ أَسنْ ثُوغَا إِنَّا سِيذِي.
٢٣ إِنّقْڒبْ فِيرْعُونْ ؤُشَا يُوذفْ غَارْ ثَادَّارْثْ نّسْ ؤُشَا وَارْ إِڭِّي ؤُڒْ نّسْ عَاذْ ذِي مَانْ أَيَا.
٢٤ مَارَّا إِمِيصْرِييّنْ غْزَانْ خْ ثْمَا ن إِغْزَارْ ن نِيلْ مَاحنْذْ أَذْ أَفنْ أَمَانْ ن ثسِّيثْ، مِينْزِي وَارْ زمَّارنْ أَذْ سْونْ أَمَانْ ن إِغْزَارْ ن نِيلْ.
٢٥ أَمُّو إِ عْذُونْ سبْعَا ؤُسَّانْ أَوَارْنِي ڒَْامِي إِوْثَا سِيذِي إِغْزَارْ ن نِيلْ.
٢٦ خنِّي إِنَّا سِيذِي إِ مُوسَا: ”أَذفْ غَارْ فِيرْعُونْ، إِنِي أَسْ: ’أَمُّو إِ إِقَّارْ سِيذِي: أجّْ أَذْ إِفّغْ ڒْْڭنْسْ إِنُو حِيمَا أَذْ أَيِي إِعْبذْ.
٢٧ مَاڒَا ثُوڭِيذْ أَذْ ثنْ ثجّذْ أَذْ رَاحنْ، أَقَا أَذْ وْثغْ مَارَّا ثَامُّورْثْ نّشْ س إِقَارْقْرِيونْ
٢٨ ؤُشَا إِغْزَارْ ن نِيلْ أَذْ د-إِسفِّييْ خْ إِقَارْقْرِيونْ، أَذْ زَّايسْ-د ڭعّْذنْ، أَذْ أَذْفنْ غَارْ ثَادَّارْثْ نّشْ ؤُ غَارْ وخَّامْ نّشْ ن يِيضصْ، أَذْ د-أَسنْ خْ قَامَا نّشْ ؤُڒَا ذِي ثَادَّارْثْ ن إِمْسخَّارنْ نّشْ ؤُ جَارْ ڒْْڭنْسْ نّشْ، ؤُ عَاذْ ذڭْ إِفَارَّاننْ نّشْ ؤُ ذِي ثْبقْيِينْ نّشْ.
٢٩ أَذْ خَاكْ د-ڭعّْذنْ إِقَارْقْرِيونْ ؤُڒَا خْ ڒْْڭنْسْ نّشْ ؤُ خْ مَارَّا إِمْسخَّارنْ نّشْ.‘ “