١ بَاصَالِييِيلْ ذ أَهُولِييَابْ ذ كُوڒْ أَرْيَازْ س وُوڒْ أَمِيغِيسْ إِ ؤُمِي إِوْشَا سِيذِي ثِيغِيثْ ذ ڒعْقڒْ، مَاحنْذْ أَذْ سّْننْ مَامّشْ غَا ڭّنْ مَارَّا ڒْْخذْمثْ إِ ثْسخَّارْثْ ن زَّاوشْثْ إِقدّْسنْ، ڭِّينْ مَارَّا أَمْ مَامّشْ ثنْ يُومُورْ سِيذِي. ٢ مُوسَا إِڒَاغَا-د إِ بَاصَالِييِيلْ ذ أَهُولِييَابْ ذ كُوڒْ أَرْيَازْ س وُوڒْ أَمِيغِيسْ، ؤُمِي إِڭَّا سِيذِي ثِيغِيثْ ذڭْ وُوڒْ نّسْ، ؤُڒَا مَارَّا ونِّي ؤُمِي إِنْهزّْ وُوڒْ نّسْ، مَاحنْذْ أَذْ د-يَاسْ غَارْ ڒْْخذْمثْ ؤُشَا أَذْ ت إِڭّْ.

٣ نِيثْنِي كْسِينْ زِي زَّاثْ ن وُوذمْ ن مُوسَا مَارَّا ثَاوْهِيبْثْ نِّي سّْڭعّْذنْ أَيْثْ ن إِسْرَائِيل إِ ڒْْخذْمثْ ذِي طّْوعْ نِي ثْسخَّارْثْ ن زَّاوشْثْ إِقدّْسنْ، مَاحنْذْ أَذْ ڭّنْ ڒْْخذْمثْ نِّي. ؤُشَا أَقَا عَاذْ ڭِّينْ أَذْ أَسْ د-أَوْينْ كُوڒْ صّْبحْ ثِيوْهِيبِينْ س ڒْْخَاضَارْ. ٤ خنِّي ؤُسِينْ-د مَارَّا إِرْيَازنْ إِمِيغِيسنْ، إِنِّي ثُوغَا إِشغْڒنْ خْ مَارَّا ڒْْخذْمثْ ن زَّاوشْثْ إِقدّْسنْ، إِجّْ إِجّْ ذوْڒنْ-د زِي ڒْخذْمثْ نِّي ڭِّينْ نِيثْنِي، ◼ ٥ ؤُشَا سِّيوْڒنْ أَكْ-ذ مُوسَا، نَّانْ: ”ڒْْڭنْسْ يِيوِي-د كْثَارْ زِي مِينْ إِتّْخصَّانْ ذِي طّْوعْ نْ ڒْخذْمثْ نِّي إِ ذ أَنغْ يُومُورْ سِيذِي، حِيمَا أَذْ ت نڭّْ.“ ٦ خَاسْ ؤُشَا يُومُورْ مُوسَا، حِيمَا أَذْ بَارّْحنْ ذِي ڒْْمَارْڭحْ ن ڒْْعسْكَارْ، أَذْ إِنِينْ: ”وَارْ تّجِّي أَرْيَازْ نِيغْ ثَامْغَارْثْ عَاذْ أَذْ يڭّْ شَا ن ڒْْخذْمثْ نِّي إِ غَا إِسّْڭعّذْ ذ ثَاوْهِيبْثْ إِ زَّاوشْثْ إِقدّْسنْ!“ أَمُّو إِ إِسّْبدّْ مُوسَا ڒْْڭنْسْ أَذْ يَاوِي عَاذْ كْثَارْ، ٧ مِينْزِي شْفَا ثِيمسْڒَايِينْ نِّي ذ إِوْينْ إِ مَارَّا ڒْْخذْمثْ إِ غَا ڭّنْ، أَقَا ثْشطّْ عَاذْ كْثَارْ.

٨ جَارْ يِينِّي غَارْ ثُوغَا ڒْْخذْمثْ، أَقَا مَارَّا إِمِيغِيسنْ ن وُوڒْ ڭِّينْ ثَازذِّيغْثْ زِي عشْرَا ن ثْجَارْثِيڒِينْ ن ڒقْطنْ أَزْذَاذْ إِمُوذنْ ؤُ س ؤُفِيڒُو أَذحْمِي ذ ؤُرْجُووَانِي ذ ؤُزڭّْوَاغْ إِحذْقنْ أَكْ-ذ إِكِيرُوبنْ نِّي خَاسنْثْ إِڭَّا أَمْ يِيجّْ ن وَارْشَامْ ن ؤُفنَّانْ. ◼ ٩ ثُوزّڭَّارْثْ ن إِشْثْ ن ثْجَارْثِيڒْثْ ثُوغَا-ت ثْمنْيَا ؤُ -عشْرِينْ ن إِغَادْجنْ ؤُ ثِيرُو ن إِشْثْ ن ثْجَارْثِيڒْثْ ثُوغَا-ث أَربْعَا ن إِغَادْجنْ ؤُ مَارَّا ثِيجَارْثِيڒِينْ غَارْسنْثْ ذ ڒعْبَارْ ذ إِجّْ. ◘ ١٠ إِسّْمُونْ خمْسَا ن ثْجَارْثِيڒِينْ إِشْثْ أَكْ-ذ ثنّغْنِي ؤُشَا خمْسَا ن ثْجَارْثِيڒِينْ إِسّْمُونْ إِ-ثنْثْ عَاوذْ إِشْثْ أَكْ-ذ ثنّغْنِيثْ. ◼ ١١ خنِّي إِڭَّا ثِيسَارَاوِينْ إِذحْمَانِييّنْ ذِي ثْمَا ن يِيشْثْ ن ثْجَارْثِيڒْثْ غَارْ طَّارْفْ غَارْ ؤُسڒْقِي ؤُشَا أَمنِّي إِ ثنْثْ إِڭَّا عَاوذْ ذِي ثْمَا ن ثْجَارْثِيڒْثْ نّغْنِي غَارْ طَّارْفْ، غَارْ مَانِي إِدْجَا ؤُسڒْقِي نّغْنِي. ◘ ١٢ إِڭَّا خمْسِينْ ن ثْسَارَاوِينْ خْ ثْمَا ن يِيشْثْ ن ثْجَارْثِيڒْثْ ذ خمْسِينْ ن ثْسَارَاوِينْ غَارْ طَّارْفْ ن ثْجَارْثِيڒْثْ نّغْنِي غَارْ ؤُسڒْقِي نّغْنِي. ثِيسَارَاوِينْ طّْفنْثْ نِيشَانْ إِشْثْ ذِي ثنّغْنِيثْ. ◘ ١٣ إِڭَّا عَاوذْ خمْسِينْ ن ثْسنَّارِينْ ن وُورغْ ؤُشَا إِسّْمُونْ ثِيجَارْثِيڒِينْ إِشْثْ إِ ثنّغْنِي س ثْسنَّارِينْ ؤُشَا أَمُّو ثذْوڒْ ثْزذِّيغْثْ ذ إِشْثْ. ◘

١٤ إِڭَّا عَاوذْ ثِيجَاڒْثِيڒِينْ ن شّْعَارْ ن إِغَايْضنْ، أَذْ إِڒِينْثْ ذ أَقِيضُونْ خْ ثْزذِّيغْثْ. إِڭَّا حِيطَاشْ ن ثْجَارْثِيڒِينْ. ١٥ ثُوزّڭَّارْثْ ن إِشْثْ ن ثْجَارْثِيڒْثْ ثُوغَا-ت ثْڒَاثِينْ ن إِغَادْجنْ ؤُ ثِيرُو ن إِشْثْ ن ثْجَارْثِيڒْثْ ذ أَربْعَا ن إِغَادْجنْ. حِيطْعَاشْ ن ثْجَارْثِيڒِينْ غَارْسنْثْ ڒعْبَارْ ذ إِجّْ. ١٦ نتَّا إِسّْمُونْ خمْسَا ن ثْجَارْثِيڒِينْ وحّذْسنْثْ ؤُ عَاوذْ ستَّا ن ثْجَارْثِيڒِينْ وحّذْسنْثْ. ١٧ إِڭَّا خمْسِينْ ن ثْسَارَاوِينْ خْ ثْمَا ن ثْجَارْثِيڒْثْ ثَانڭَّارُوثْ غَارْ طَّارْفْ ن ؤُسڒْقِي أَكْ-ذ ثنّغْنِي ؤُشَا إِڭَّا عَاوذْ خمْسِينْ ن ثْسَارَاوِينْ خْ ثْمَا ن ثْجَارْثِيڒْثْ غَارْ طَّارْفْ ن ؤُسڒْقِي نّغْنِي. ١٨ إِڭَّا عَاوذْ خمْسِينْ ن ثْسنَّارِينْ ن نّْحَاسْ، حِيمَا أَذْ إِسّْمُونْ أَقِيضُونْ مَاحنْذْ أَذْ ث يَارّْ ذ إِجّنْ. ◘

١٩ إِڭَّا عَاوذْ إِشْثْ ن ثْسقَّافْثْ ن إِڒْمَاونْ إِزڭّْوَاغنْ ن إِشَارِّييّنْ إِ ؤُقِيضُونْ ؤُشَا سنّجْ إِ مَانْ أَيَا إِشْثْ ن ثْسقَّافْثْ ن إِڒْمَاونْ ن دّنْفِيڒَاثْ. ◘

٢٠ إِڭَّا ثِيفڒْوِينْ إِ ثْزذِّيغْثْ س ؤُكشُّوضْ ن ؤُكَاسِييَا نِّي إِبدّنْ نِيشَانْ. ◘ ٢١ ثُوزّڭَّارْثْ ن إِشْثْ ن ثفْڒَاوْثْ ثُوغَا-تعشْرَا ن إِغَادْجنْ ؤُ ثِيرُو ن يِيشْثْ ن ثفْڒَاوْثْ ذ إِجّْ ن ؤُغِيڒْ ذ وزْينْ. ◘ ٢٢ كُوڒْ ثَافْڒوْثْ غَارسْ ثْنَاينْ ن إِضَارنْ، إِنِّي إِسّْمڒْقَانْ إِشْثْ أَكْ-ذ ثنّغْنِيثْ أَمْ ثْوتْشْمَاثِينْ أَمُّو إِ إِڭَّا س مَارَّا ثِيفڒْوِينْ ن ثْزذِّيغْثْ. ◘ ٢٣ إِڭَّا ثِيفڒْوِينْ إِ ثْزذِّيغْثْ، عِيشْرِينْ ن ثْفڒْوِينْ غَارْ جِّيهثْ ن لْجَانُوبْ، غَارْ يفُوسْ. ◘ ٢٤ إِڭَّا عَاوذْ أَربْعِينْ ن ثْيَارْسَاوِينْ ن نُّوقَارْثْ سَاذُو عِيشْرِينْ ن ثْفڒْوِينْ، ثْنَاينْ ن ثْيَارْسَاوِينْ سَاذُو إِشْثْ ن ثفْڒَاوْثْ إِ ثْنَاينْ ن إِضَارنْ نّسْ، ؤُڒَا ذ ثْنَاينْ ن ثْيَارْسَاوِينْ سَاذُو ثَافْڒَاوْثْ نّغْنِي إِ ثْنَاينْ ن إِضَارنْ نّسْ. ◘ ٢٥ إِڭَّا عَاوذْ عِيشْرِينْ ن ثْفڒْوِينْ إِ ؤُغزْذِيسْ نّغْنِي ن ثْزذِّيغْثْ، غَارْ ؤُغزْذِيسْ ن شَّامَالْ، ◘ ٢٦ س أَربْعِينْ ن ثْيَارْسَاوِينْ نّسْ ن نُّوقَارْثْ: ثْنَاينْ ن ثْيَارْسَاوِينْ سَاذُو إِشْثْ ن ثفْڒَاوْثْ ذ ثْنَاينْ ن ثْيَارْسَاوِينْ سَاذُو ثَافْڒَاوْثْ نّغْنِي. ◘ ٢٧ إِ إِغزْذِيسنْ ن ضفَّارْ ن ثْزذِّيغْثْ، غَارْ ؤُغزْذِيسْ ن ڒْْغَارْبْ، إِڭَّا ستَّا ن ثْفڒْوِينْ. ◘ ٢٨ إِڭَّا ثْنَاينْ ن ثْفڒْوِينْ ذ ثِيفڒْوِينْ إِ ثْغمُّورَا ن ثْزذِّيغْثْ غَارْ ثْنَاينْ ن إِغزْذِيسنْ غَارْ ضفَّارْ. ◘ ٢٩ زِي سْوَادَّايْ ثُوغَا ڒصْقنْثْ أَمْ وَاشْنِيونْ ؤُشَا أَمُّو إِ ثنْثْ ثُوغَا ذ إِشْثنْ أَڒْ د-أَوْضنْثْ سنّجْ ذڭْ إِشْثْ ن ثخْرَازْثْ. أَمُّو إِ إِڭَّا س ثْنَاينْ ن ثْفڒْوِينْ إِ ثْنَاينْ ن ثْغمُّورَا. ◘ ٣٠ أَمُّو إِ ذِينْ ثُوغَا ثْمنْيَا ن ثْفڒْوِينْ س ثْيَارْسَاوِينْ نْسنْثْ ن نُّوقَارْثْ، أَقَا أَثنْثْ ذ سطَّاشْ ن ثْيَارْسَاوِينْ، ثْنَاينْ ن ثْيَارْسَاوِينْ سَاذُو كُوڒْ ثَافْڒوْثْ. ◘ ٣١ إِڭَّا عَاوذْ ثِيحنْيَا ن ؤُعَارّضْ زڭْ ؤُكشُّوضْ ن ؤُكَاسِييَا، خمْسَا ن ثْفڒْوِينْ غَارْ إِجّْ ن ؤُغزْذِيسْ ن ثْزذِّيغْثْ، ◘ ٣٢ ؤُ خمْسَا ن ثْحنْيَا ن ؤُعَارّضْ إِ ثْفڒْوِينْ غَارْ ؤُغزْذِيسْ نّغْنِي ن ثْزذِّيغْثْ ذ خمْسَا ن ثْحنْيَا ن ؤُعَارّضْ إِ ثْفڒْوِينْ ن ثْزذِّيغْثْ غَارْ ثْنَاينْ ن ثْغمُّورَا نْ ضفَّارْ غَارْ ڒْْغَارْبْ. ◘ ٣٣ ثَاحْنَاشْثْ ن ؤُعَارّضْ ذِي ڒْْوسْطْ إِڭَّا إِ-ت أَذْ ثژْوَا زِي ڒْْوسْطْ ن ثْفڒْوِينْ زڭْ إِخفْ أَڒْ ونّغْنِي. ◘ ٣٤ إِغدْجفْ ثِيفڒْوِينْ س وُورغْ ؤُشَا إِڭَّا ثِيخْرَازِينْ نْسنْثْ ن وُورغْ، مَاحنْذْ أَذْ ذَايْسنْثْ سِّيذْفنْ ثِيحنْيَا ن ؤُعَارّضْ ؤُشَا ؤُڒَا ذ ثِيحنْيَا ن ؤُعَارّضْ إِشلّلْ إِ-ثنْثْ س وُورغْ. ◘

٣٥ إِڭَّا إِجّْ ن ؤُڒحَّافْ س ؤُفِيڒُو أَذحْمِي ذ ؤُرْجُووَانِي ذ ؤُزڭّْوَاغْ إِحذْقنْ ؤُ س ڒقْطنْ أَزْذَاذْ إِمُوذنْ، إِڭَّا إِ-ث ذ إِجّْ ن وَارْشَامْ ن ؤُفنَّانْ أَكْ-ذ إِكِيرُوبنْ خَاسْ. ◘ ٣٦ إِڭَّا أَسْ أَربْعَا ن إِپِيلَارنْ ن ؤُكشُّوضْ ن ؤُكَاسِييَا ؤُشَا إِغدْجفْ إِ-ثنْ س وُورغْ. ثِيسنَّارِينْ نْسنْ ثُوغَا أَثنْثْ ن وُورغْ. إِسّفْسِي إِ إِپِيلَارنْ أَربْعَا ن ثْيَارْسَاوِينْ نْسنْثْ ن نُّوقَارْثْ. ◘

٣٧ إِڭَّا إِجّْ ن أَرْوَاقْ إِ وَاذَافْ ن ؤُقِيضُونْ س ؤُفِيڒُو أَذحْمِي ذ ؤُرْجُووَانِي ذ ؤُزڭّْوَاغْ إِحذْقنْ ؤُ س ڒقْطنْ أَزْذَاذْ إِمُوذنْ، إِڭَّا إِ-ث ذ إِجّْ ن ؤُمُوذِي ن ؤُخيَّاضْ، ◘ ٣٨ س خمْسَا ن إِپِيلَارنْ نّسْ ذ ثْسنَّارِينْ نّسْ. إِغدْجفْ ثِيزدْجِيفِينْ نْسنْ ذ إِقضْبَانْ نْسنْ إِ ؤُسڒْقِي س وُورغْ. ثِييَارْسَاوِينْ نْسنْ ثُوغَا أَثنْثْ ن نّْحَاسْ. ◘