٣٣
١ إِسِّيوڒْ سِيذِي أَكْ-ذ مُوسَا: ”رُوحْ، ڭعّذْ سَّا، شكْ ذ ڒْْڭنْسْ نِّي د-ثسُّوفّْغذْ زِي ثمُّورْثْ ن مِيصْرَا، غَارْ ثمُّورْثْ نِّي خْ جُّودْجغْ إِ إِبْرَاهِيمْ ذ إِسْحَاقْ ذ يَاعْقُوبْ، نِّيغْ: ’إِ زَّارِيعثْ نّشْ أَذْ ت وْشغْ!‘
٢ نشّْ أَذْ سّكّغْ زَّاثْ إِ ؤُغمْبُوبْ نّشْ لْمَالَاكْ، ؤُشَا أَذْ أَژّْڒغْ خْ أَيْثْ ن كنْعَانْ ذ إِمُورِييّنْ ذ إِحِيتِّييّنْ ذ إِفِيرِيزِييّنْ ذ إِحِيوِييّنْ ذ إِيِيبُوسِييّنْ
٣ ذڭْ وبْرِيذْ نْومْ غَارْ إِشْثْ ن ثمُّورْثْ إِفيّْضنْ س ؤُغِي ذ ثَامّنْثْ. نشّْ س إِمَانْثْ إِنُو وَارْ تّْڭِيعِّيذغْ أَكِيذْومْ، حِيمَا وَارْ كنِّيوْ ثتّحِّيغْ ذڭْ وبْرِيذْ، مِينْزِي كنِّيوْ ذ إِجّْ ن ڒْْڭنْسْ إِقْسحْ.“
٤ ؤُمِي إِسْڒَا ڒْْڭنْسْ أَوَاڒْ-أَ أَعفَّانْ، شضْننْ ؤُشَا ؤُڒَا ذ إِجّْ إِڭَّا عَاذْ ڒهْزُوطْ نّسْ.
٥ أَقَا إِنَّا سِيذِي إِ مُوسَا: ”إِنِي إِ أَيْثْ ن إِسْرَائِيل: ’كنِّيوْ ذ إِجّْ ن ڒْْڭنْسْ إِقْسحْ. مَاڒَا ڭعّْذغْ جَارْ أَومْ مْغِيرْ إِجّْ ن ورْمَاشْ، أَذْ كنِّيوْ ثحِّيغْ. خنِّي ڒخُّو كّْسمْ ڒهْزُوطْ نْومْ، أَقَا نشّْ أَذْ سّْنغْ مِينْ ذ أَشْ غَا ڭّغْ.‘ “
٦ كّْسنْ أَيْثْ ن إِسْرَائِيل ڒهْزُوطْ نْسنْ زڭْ وذْرَارْ ن هُورِيبْ.
٧ إِكْسِي مُوسَا أَقِيضُونْ ؤُشَا إِوْثَا أَقِيضُونْ بَارَّا إِ ڒْْمَارْڭحْ ن ڒْْعسْكَارْ، إِڭّْوجْ أَطَّاسْ خْ ڒْْمَارْڭحْ، ؤُشَا إِڒَاغَا أَسْ ’أَقِيضُونْ ن ؤُمْسَاڭَارْ‘. كُوڒْ إِجّْ ونِّي ثُوغَا يَارزُّونْ سِيذِي، إِفّغْ غَارْ ؤُقِيضُونْ ن ؤُمْسَاڭَارْ، ونِّي إِدْجَانْ بَارَّا إِ ڒْْمَارْڭحْ.
٨ ؤُمِي إِفّغْ مُوسَا غَارْ ؤُقِيضُونْ، إِكَّارْ مَارَّا ڒْْڭنْسْ، بدّنْ بَارَّا، كُوڒْ إِجّْ غَارْ وَاذَافْ ن ؤُقِيضُونْ نّسْ، ؤُشَا نِيثْنِي خْزَارنْ غَارسْ أَمْ ثِيطَّاوِينْ نْسنْ ضفَّارنْ مُوسَا أَڒَامِي يُوذفْ غَارْ ؤُقِيضُونْ.
٩ ؤُمِي يُوذفْ مُوسَا غَارْ ؤُقِيضُونْ، أَقَا أَقلِّيجْ ن ؤُسيْنُو إِهْوَا، إِبدّْ غَارْ وَاذَافْ ن ؤُقِيضُونْ ؤُشَا نتَّا إِسِّيوڒْ أَكْ-ذ مُوسَا.
١٠ ؤُشَا مَارَّا ڒْْڭنْسْ إِژْرَا أَقلِّيجْ ن ؤُسيْنُو إِبدّْ غَارْ وَاذَافْ ن ؤُقِيضُونْ، خنِّي إِكَّارْ مَارَّا ڒْْڭنْسْ ؤُشَا إِبنْذقْ كُوڒْ إِجّْ غَارْ وَاذَافْ ن ؤُقِيضُونْ نّسْ.
١١ إِسِّيوڒْ سِيذِي أَكْ-ذ مُوسَا أَغمْبُوبْ ذڭْ ؤُغمْبُوبْ، أَمْ مَامّشْ إِسِّيوڒْ بْنَاذمْ أَكْ-ذ ؤُمدُّوكّڒْ نّسْ. خنِّي إِعْقبْ-د غَارْ ڒْْمَارْڭحْ ن ڒْْعسْكَارْ، مَاشَا أَمْسخَّارْ نّسْ يَاشُووَا، مِّيسْ ن نُونْ، ونِّي عَاذْ ذ أَحُوذْرِي،عمَّارْصْ وَارْ إِبعّذْ خْ ڒْْوسْطْ ن ؤُقِيضُونْ.
أَعُودْجِي ن سِيذِي
١٢ إِنَّا مُوسَا إِ سِيذِي: ”خْزَارْ، شكْ ثنِّيذْ أَيِي: ’نْذهْ ڒْْڭنْسْ-أَ!‘، مَاشَا شكْ وَارْ ذ أَيِي ثسّشْنذْ وِي كِيذِي إِ غَا ثسّكّذْ. شكْ ثنِّيذْ: ’نشّْ سّْنغْ شكْ س يِيسمْ نّشْ!‘ ؤُڒَا: ’ثُوفِيذْ أَرْضَا ذِي ثِيطَّاوِينْ إِنُو!‘
١٣ ڒخُّو خنِّي، مَاڒَا ؤُفِيغْ أَرْضَا ذِي ثِيطَّاوِينْ نّشْ، زَاوْڭغْ شكْ أَذْ أَيِي ثسّشْنذْ أَبْرِيذْ نّشْ، حِيمَا أَذْ شكْ سّْنغْ، مَاحنْذْ أَذْ أَفغْ أَرْضَا ذِي ثِيطَّاوِينْ نّشْ. خْزَارْ، شّعْبْ-أَ ذ ڒْْڭنْسْ نّشْ!“
١٤ إِنَّا: ”لْمَالَاكْ ن وُوذمْ إِنُو أَذْ يُويُورْ أَكِيذكْ ؤُ نشّْ أَذْ شكْ سَّاريّْحغْ.“
١٥ خنِّي يَارَّا-د خَاسْ: ”مَاڒَا ؤُذمْ نّشْ وَارْ كِيذْنغْ إِتّْرِيحْ، وَارْ تّجِّي خنِّي أَذْ نْڭعّذْ سَّا!
١٦ مَامّشْ غَا سّْننْ بلِّي أَقَا ؤُفِيغْ أَرْضَا ذِي ثِيطَّاوِينْ نّشْ، نشّْ ذ ڒْْڭنْسْ نّشْ؟ مَا وَارْ إِدْجِي مِينْزِي شكْ ثْرُوحذْ أَكِيذْنغْ، أَقَا نشِّينْ، نشّْ ذ ڒْْڭنْسْ نّشْ، نْفَارّزْ خْ كُوڒْ ڒْْڭنْسْ إِ إِدْجَانْ خْ وُوذمْ ن ثمُّورْثْ؟“
١٧ إِنَّا سِيذِي إِ مُوسَا: ”عَاوذْ أَذْ ڭّغْ أَوَاڒْ-أَ إِ ثنِّيذْ ؤُمِي ثُوفِيذْ أَرْضَا ذِي ثِيطَّاوِينْ إِنُو ؤُشَا سّْنغْ شكْ س يِيسمْ نّشْ.“
١٨ خَاسْ ؤُشَا إِنَّا مُوسَا: ”زَاوْڭغْ شكْ، سْشنْ أَيِي أَعُودْجِي نّشْ!“
١٩ إِنَّا: ”نشّْ أَذْ سّعْذُوغْ مَارَّا ثْشُونِي إِنُو زَّاثكْ ؤُشَا أَذْعيّْذغْ إِسمْ ن سِيذِي زَّاثْ إِ ؤُغمْبُوبْ نّشْ ؤُشَا أَذْ حِينّغْ خْ وِي غَا حِينّغْ، أَذْ أَرحْمغْ خْ وِي غَا أَرحْمغْ.“
٢٠ إِنَّا عَاوذْ: ”شكْ وَارْ ثْزمَّارذْ أَذْ ثْژَارذْ ؤُذمْ إِنُو، مِينْزِي وَارْ ذ أَيِي إِژَارّْ بْنَاذمْ ؤُشَا أَذْ إِقِّيمْ إِدَّارْ.“
٢١ خَاسْ ؤُشَا إِنَّا سِيذِي: ”خْزَارْ، زَّاثْ إِنُو أَمْشَانْ مَانِي غَا ثْبدّذْ خْ ثصْضَارْثْ.
٢٢ خْمِي غَا إِعْذُو ؤُعُودْجِي إِنُو، أَذْ شكْ ڭّغْ ذڭْ إِجّْ ن ؤُفدْجِيقْ ن ثصْضَارْثْ ؤُشَا أَذْ شكْ ذْڒغْ س ثْڒقَّا ن ؤُفُوسْ إِنُو أَڒْ د-ژْوِيغْ.
٢٣ ؤُ خْمِي غَا كّْسغْ أَفُوسْ إِنُو، خنِّي أَذْ أَيِي ثْژَارذْ زِي ضفَّارْ، مَاشَا وَارْ ثْژَارّذْ ؤُذمْ إِنُو!“