١ ”ذ مَانْ أَيَا إِ ذ أَسنْ غَا ثڭّذْ، حِيمَا أَذْ ثنْ ثسّْقدّْسذْ، مَاحنْذْ أَذْ أَيِي إِڒِينْ ذ إِكهَّاننْ. كْسِي إِجّْ ن ؤُفُونَاسْ - أَمژْيَانْ ن ؤُفُونَاسْ - ذ ثْنَاينْ ن وَاشْرَارنْ إِشْنَانْ قَاعْ، ◘ ٢ ؤُ عَاوذْ أَغْرُومْ بْڒَا أَنْثُونْ ذ ڒمْسمْنَاثْ بْڒَا أَنْثُونْ إِخدْجْضنْ س زّشْثْ ذ ثڒْفَافْ بْڒَا أَنْثُونْ تّْوَاذهْننْثْ س زّشْثْ، ثِينِّي إِ غَا ثڭّذْ مَارَّا س وَارنْ أَزْذَاذْ ن يِيرْذنْ. ٣ أَذْ ثنْثْ ثڭّذْ ذڭْ إِشْثْ ن ثْسُودْجثْ ؤُشَا أَذْ ثنْثْ ثَاوْيذْ ذِي ثْسُودْجثْ جْمِيعْ أَكْ-ذ ؤُفُونَاسْ أَمژْيَانْ ذ ثْنَاينْ ن إِشَارِّييّنْ. ٤ أَذْ د-ثسّْقَارّْبذْ هَارُونْ ذ وَارَّاوْ نّسْ غَارْ وَاذَافْ ن ؤُقِيضُونْ ن ؤُمْسَاڭَارْ ؤُشَا أَذْ ثنْ ثسِّيرْذذْ س وَامَانْ. ٥ أَذْ ثكْسِيذْ أَرُّوضْ، أَذْ ثْيَارْضذْ هَارُونْ ثْشَامِيرْ ذ ؤُسڒْحَامْ إِ ؤُپَالْطُو ذ ؤُپَالْطُو سِيمَانْثْ نّسْ ذ ثجْمشْثْ ؤُشَا أَذْ أَسْ ثْبيْسذْ س ثْحزَّامْثْ إِزوّْقنْ ن ؤُپَالْطُو. ٦ أَذْ ثسَّارْسذْ أَرژّثْ خْ ؤُزدْجِيفْ نّسْ ؤُ خْ أَرژّثْ أَذْ ثڭّذْ تَّاجْ إِقدّْسنْ ن وعْزَاڒْ. ٧ أَذْ ثكْسِيذْ زّشْثْ إِ وذْهَانْ ؤُشَا أَذْ ت ثْزدْجْعذْ خْ ؤُزدْجِيفْ نّسْ ؤُشَا أَذْ ث ثْذهْنذْ. ◘ ٨ خنِّي أَذْ ثَاوْيذْ إِحنْجِيرنْ نّسْ، أَذْ أَسنْ ثْيَارْضذْ ثْشَامِيرَاثْ. ٩ أَذْ أَسنْ ثْبيْسذْ س ثْحزَّامْثْ، إِ هَارُونْ ذ وَارَّاوْ نّسْ، ؤُشَا أَذْ أَسنْ ثَاركّْبذْ ثِيشُوشَّايْ. أَذْ غَارْسنْ ثِيڒِي ثُوكهَّانْثْ عْلَاحْسَابْ إِشْثْ ن ثوْصيّثْ إِ ڒبْذَا. أَذْ ثَاڒقّْمذْ هَارُونْ ذ وَارَّاوْ نّسْ. ◼

١٠ خنِّي أَذْ ثَاوْيذْ أَفُونَاسْ أَمژْيَانْ زَّاثْ إِ ؤُقِيضُونْ ن ؤُمْسَاڭَارْ ؤُ هَارُونْ ذ وَارَّاوْ نّسْ أَذْ سَّارْسنْ إِفَاسّنْ نْسنْ خْ ؤُزدْجِيفْ ن ؤُفُونَاسْ أَمژْيَانْ. ◘ ١١ أَذْ ثْغَارْصذْ إِ ؤُفُونَاسْ أَمژْيَانْ زَّاثْ إِ وُوذمْ ن سِيذِي، غَارْ وَاذَافْ ن ؤُقِيضُونْ ن ؤُمْسَاڭَارْ. ١٢ خنِّي أَذْ ثكْسِيذْ إِذَامّنْ ن ؤُفُونَاسْ أَمژْيَانْ ؤُشَا أَذْ ثنْ ثڭّذْ س ؤُضَاضْ نّشْ خْ وَاشَّاونْ ن ؤُعَالْطَارْ ؤُشَا أَذْ ثْزدْجْعذْ مَارَّا إِذَامّنْ إِقِّيمنْ غَارْ إِضَارنْ ن ؤُعَالْطَارْ. ◼ ١٣ أَذْ ثكْسِيذْ عَاوذْ مَارَّا ثَاذُونْثْ نِّي إِذْڒِينْ أَذَانْ ذ مِينْ يُويْڒنْ غَارْ ثْسَا، ذ ثْنَاينْ ن ثِيژَّاڒْ أَكْ-ذ ثَاذُونْثْ إِ خَاسنْثْ إِدْجَانْ ؤُشَا أَذْ ثسّْبخَّارذْ أَيَا خْ ؤُعَالْطَارْ. ◼ ١٤ مَاشَا أَيْسُومْ ن ؤُفُونَاسْ أَمژْيَانْ ذ يِيڒمْ نّسْ ذ ؤُمسَّاڒْ نّسْ أَذْ ثنْ ثسّْشمْضذْ س ثْمسِّي بَارَّا إِ ڒْْمَارْڭحْ ن ڒْْعسْكَارْ، أَقَا ذ ثَاغَارْصْثْ ن دّنْبْ. ◘

١٥ خنِّي أَذْ ثكْسِيذْ إِجّْ ن ؤُشَارِّي ؤُشَا هَارُونْ ذ وَارَّاوْ نّسْ أَذْ سَّارْسنْ إِفَاسّنْ نْسنْ خْ ؤُزدْجِيفْ ن إِشَارِّي. ١٦ أَذْ ثْغَارْصذْ إِ إِشَارِّي ؤُشَا أَذْ ثكْسِيذْ إِذَامّنْ نّسْ، أَذْ ثنْ ثْزدْجْعذْ خْ ؤُعَالْطَارْ زِي مَارَّا إِغزْذِيسنْ نّسْ. ◘ ١٧ أَذْ ثبْضِيذْ إِشَارِّي ذ إِشدْجِيقنْ، أَذْ ثسِّيرْذذْ أَذَانْ نّسْ ذ إِشكْرَاذْ نّسْ ؤُشَا أَذْ ثنْ ثڭّذْ خْ إِشدْجِيقنْ نّسْ ؤُ خْ ؤُزدْجِيفْ نّسْ. ١٨ أَذْ ثسِّيغذْ إِ إِشَارِّي أَمْ إِكْمڒْ خْ ؤُعَالْطَارْ، أَقَا ذ ثَاغَارْصْثْ ن وشْمَاضْ إِ سِيذِي، إِشْثْ ن ڒفْوَاحثْ إِتّْفُوحنْ، أَقَا ذ إِشْثْ ن ثوْهِيبْثْ ن ثْمسِّي إِ سِيذِي. ١٩ خنِّي أَذْ ثكْسِيذْ إِشَارِّي نّغْنِي ؤُشَا هَارُونْ ذ وَارَّاوْ نّسْ أَذْ سَّارْسنْ إِفَاسّنْ نْسنْ خْ ؤُزدْجِيفْ ن إِشَارِّي.

٢٠ أَذْ ثْغَارْصذْ إِ إِشَارِّي ؤُشَا أَذْ ثكْسِيذْ زڭْ إِذَامّنْ نّسْ ؤُشَا أَذْ ثڭّذْ مَانْ أَيَا خْ إِغسْ ن ؤُمزُّوغْ أَفُوسِي ن هَارُونْ ؤُ خْ إِغسْ ن ؤُمزُّوغْ أَفُوسِي ن وَارَّاوْ نّسْ ؤُ عَاوذْ خْ ؤُضَاضْ ن يِيمزْ ن ؤُفُوسْ نْسنْ أَفُوسِي ؤُ خْ ؤُضَاضْ ن يِيمزْ ن ؤُضَارْ نْسنْ أَفُوسِي ؤُشَا أَذْ ثْزدْجْعذْ إِضَامّنْ إِقِّيمنْ خْ ؤُعَالْطَارْ زِي كُوڒْ جِّيهثْ. ٢١ خنِّي أَذْ ثكْسِيذْ زڭْ إِذَامّنْ نِّي إِدْجَانْ خْ ؤُعَالْطَارْ ؤُ زِي زّشْثْ إِ وذْهَانْ ؤُشَا أَذْ زَّايْسنْ ثْرُوشّذْ هَارُونْ ذ وَارُّوضْ نّسْ ؤُشَا أَذْ ثْرُوشّذْ عَاوذْ أَرَّاوْ نّسْ ذ أَرُّوضْ ن وَارَّاوْ نّسْ أَكِيذسْ، حِيمَا أَذْ يِيڒِي إِتّْوَاقدّسْ، نتَّا ذ أَرُّوضْ نّسْ، ؤُڒَا ذ ثَارْوَا نّسْ ذ أَرُّوضْ ن ثَارْوَا نّسْ أَكِيذسْ. ٢٢ أَذْ ثكْسِيذْ ثَاذُونْثْ ن إِشَارِّي ڒَْا ذ ثَاذُونْثْ غَارْ ؤُنوَّارْ ڒَْا ثَاذُونْثْ نِّي إِذْڒِينْ أَذَانْ، ؤُڒَا مِينْ يُويْڒنْ غَارْ ثْسَا ذ ثْنَاينْ ن ثِيژَّاڒْ س ثَاذُونْثْ إِ خَاسنْثْ إِدْجَانْ ذ أَشكْرُوذْ أَفُوسِي، مِينْزِي وَا ذ إِشَارِّي إِ ؤُذشّنْ ن إِكهَّاننْ. ٢٣ كْسِي عَاوذْ إِشْثْ ن ثشْنِيفْثْ ن وغْرُومْ ذ إِشْثْ ن ثمْسمّنْثْ ن وغْرُومْ إِتّْوَاسّْوجْذنْ س زّشْثْ ذ إِشْثْ ن ثڒْففْثْ زِي ثْسُودْجثْ ن وغْرُومْ بْڒَا أَنْثُونْ إِ إِدْجَانْ زَّاثْ إِ وُوذمْ ن سِيذِي. ٢٤ سَارْسْ مَانْ أَيَا مَارَّا خْ إِفَاسّنْ ن هَارُونْ ؤُ خْ إِفَاسّنْ ن وَارَّاوْ نّسْ ؤُشَا أَذْ ثنْ ثسّنْهزّذْ زِي سَّا غَارْ ذَا أَمْ إِشْثْ ن ثوْهِيبْثْ ن ونْهزِّي زَّاثْ إِ وُوذمْ ن سِيذِي. ٢٥ أَوَارْنِي أَسْ أَذْ ت ثكْسِيذْ زڭْ إِفَاسّنْ نْسنْ ؤُشَا أَذْ ت ثسّْبخَّارذْ خْ ؤُعَالْطَارْ، خْ ثْغَارْصْثْ ن وشْمَاضْ، أَذْ ثِيڒِي ذ إِشْثْ ن ڒفْوَاحثْ إِتّْفُوحنْ زَّاثْ إِ وُوذمْ ن سِيذِي. أَقَا-ت ذ إِشْثْ ن ثوْهِيبْثْ ن ثْمسِّي إِ سِيذِي. ٢٦ أَذْ ثكْسِيذْ إِذْمَارنْ ن إِشَارِّي إِ ؤُذشّنْ ن هَارُونْ ؤُشَا أَذْ ثنْ ثسّنْهزّذْ زِي سَّا غَارْ ذَا أَمْ إِشْثْ ن ثوْهِيبْثْ ن ونْهزِّي زَّاثْ إِ وُوذمْ ن سِيذِي. ثَانِيثَا أَذْ ثِيڒِي ذ ثَاسْغَارْثْ نّشْ. ٢٧ أَذْ ثسّْقدّْسذْ إِذْمَارنْ ن ثوْهِيبْثْ ن ونْهزِّي إِ إِتّْوَانْهزّنْ زِي سَّا غَارْ ذَا، ؤُڒَا ذ ؤُشكْرُوذْ إِ إِتّْوَانْهزّنْ زِي سَّا غَارْ ذَا ذ ونِّي إِتّْوَاسّْڭعّْذنْ. أَقَا-ثنْ زڭْ إِشَارِّي ن ؤُذشّنْ، أَمْ زڭْ ونِّي إِ يدْجَانْ إِ هَارُونْ أَمْ زڭْ ونِّي إِ يدْجَانْ إِ وَارَّاوْ نّسْ. ٢٨ أَيَا أَذْ يِيڒِي إِ هَارُونْ ذ وَارَّاوْ نّسْ ذ إِشْثْ ن ثوْصيّثْ إِ ڒبْذَا زِي جِّيهثْ ن أَيْثْ ن إِسْرَائِيل، مِينْزِي ذ ثَاوْهِيبْثْ ن ؤُسْڭعّذْ إِ ثدْجَا. أَذْ ثِيڒِي ذ إِشْثْ ن ثوْهِيبْثْ إِ غَا سّْڭعّْذنْ أَيْثْ ن إِسْرَائِيل زِي ثْغَارْصَا نْسنْ ن ڒهْنَا. أَقَا ذ ثَاوْهِيبْثْ نْسنْ ن ؤُسْڭعّذْ إِ سِيذِي. ◘

٢٩ أَرُّوضْ إِقدّْسنْ ن هَارُونْ أَذْ يِيڒِي إِ وَارَّاوْ نّسْ أَوَارْنِي أَسْ، مَاحنْذْ أَذْ ثنْ ذهْننْ ؤُ أَذْ ثنْ أَڒقْمنْ ذَايسْ. ٣٠ مَانْ ونْ زڭْ إِحنْجِيرنْ نّسْ إِ غَا يِيڒِينْ ذ أَكهَّانْ ذڭْ ومْشَانْ نّسْ ؤُشَا أَذْ يَاذفْ غَارْ ؤُقِيضُونْ ن ؤُمْسَاڭَارْ، مَاحنْذْ أَذْ إِسخَّارْ ذِي زَّاوشْثْ إِقدّْسنْ، أَذْ ث يَارْضْ سبْعَا ن وُوسَّانْ.

٣١ أَذْ ثكْسِيذْ إِشَارِّي إِ ؤُذشّنْ ؤُشَا أَذْ ثسّنْڭْوذْ أَيْسُومْ نّسْ ذڭْ إِجّْ ن ومْشَانْ إِقدّْسنْ. ٣٢ هَارُونْ ذ وَارَّاوْ نّسْ أَذْ شّنْ أَيْسُومْ ن إِشَارِّي ذ وغْرُومْ إِ إِدْجَانْ ذِي ثْسُودْجثْ غَارْ وَاذَافْ ن ؤُقِيضُونْ ن ؤُمْسَاڭَارْ. ◘ ٣٣ أَذْ شّنْ زِي مِينْ زِي إِتّْوَاڭّْ وسْڒَاحْ، حِيمَا أَذْ ثنْ ڒقّْمنْ ؤُ أَذْ ثنْ سّْقدّْسنْ. مَاشَا إِجّْ ن ؤُبَارَّانِي وَارْ زَّايسْ إِتّتّْ، مِينْزِي أَقَا ذ إِشْثْ ن ڒْْحَاجّثْ ذ ثَامْقدّسْثْ. ◘ ٣٤ مَاڒَا إِشطّْ شَا زڭْ ويْسُومْ ن ثْغَارْصَا إِ ؤُذشّنْ نِيغْ زڭْ وغْرُومْ أَڒْ صّْبحْ، أَذْ ثسّْشمْضذْ مِينْ إِشطّنْ ذِي ثْمسِّي. إِتّْخصَّا وَارْ ث إِتّتّْ حذْ، مِينْزِي ذ إِشْثْ ن ڒْْحَاجّثْ إِقدّْسنْ إِ يدْجَا.

٣٥ أَمُّو إِ غَا ثڭّذْ أَكْ-ذ هَارُونْ ؤُ أَكْ-ذ وَارَّاوْ نّسْ، أَذْ ثڭّذْ عْلَاحْسَابْ مَارَّا مِينْ ذ أَشْ وصِّيغْ. أَذْ ثنْ ثَاڒقّْمذْ سبْعَا ن وُوسَّانْ. ٣٦ كُوڒْ أَسّْ أَذْ ثسّْوجْذذْ أَفُونَاسْ أَمژْيَانْ ذ ثَاغَارْصْثْ ن دّنْبْ إِ وصْڒَاحْ ؤُشَا أَذْ ثكّْسذْ دّنْبْ خْ ؤُعَالْطَارْ ؤُمِي خَاسْ غَا ثسِّيوْضذْ أَصْڒَاحْ، ؤُشَا خنِّي أَذْ ث ثْذهْنذْ، مَاحنْذْ أَذْ ث ثسّْقدّْسذْ. ٣٧ سبْعَا ن وُوسَّانْ أَذْ ثڭّذْ أَصْڒَاحْ خْ ؤُعَالْطَارْ ؤُشَا أَذْ ث ثسّْقدّْسذْ، خنِّي أَذْ يِيڒِي ذ أَمْقدَّاسْ قَاعْ. ونِّي إِ غَا إِحَاذَانْ أَعَالْطَارْ، أَذْ يِيڒِي ذ أَمْقدَّاسْ. ٣٨ ذ مَانْ أَيَا إِ غَا ثسّْوجْذذْ خْ ؤُعَالْطَارْ: ثْنَاينْ ن إِزْمَارنْ ن إِجّْ ن ؤُسڭّْوَاسْ، كُوڒْ أَسّْ ڒبْذَا. ◘ ٣٩ أَذْ ثسّْوجْذذْ إِجّْ ن يزْمَارْ ذِي صّْبحْ ؤُ إِزْمَارْ نّغْنِي أَذْ ث ثسّْوجْذذْ جَارْ بدُّو ن وزْينْ ن وَاسّْ أَڒْ د-ثوْضَا ثْمذِّيثْ. ٤٠ إِ يِيجّْ ن يزْمَارْ أَذْ ثكْسِيذْعشْرَا ذِي ثسْغَارْثْ ن إِجّْ ن إِفَا ن وَارنْ أَزْذَاذْ إِخدْجْضنْ س زّشْثْ دّْزنْ ت-إِ-د زِي زِّيثُونْ، ؤُ أَربْعَا ذِي ثسْغَارْثْ ن إِجّْ ن ؤُهِينُو ن بِينُو ذ ثَاوْهِيبْثْ ن ؤُسيّبْ. ◼ ٤١ أَذْ ثْغَارْصذْ إِ يزْمَارْ نّغْنِي جَارْ بدُّو ن وزْينْ ن وَاسّْ أَڒْ د-ثوْضَا ثْمذِّيثْ. أَذْ غَارسْ ثَارْنِيذْ ثَاوْهِيبْثْ ن ڒْْغِيدْجثْ أَمْ مَامّشْ ثنِّي ن صّْبحْ ؤُ عَاوذْ ثَاوْهِيبْثْ نّسْ ن ؤُسيّبْ. أَقَا ذ ڒفْوَاحثْ إِتّْفُوحنْ. أَقَا ذ ثَاوْهِيبْثْ ن ثْمسِّي إِ سِيذِي. ٤٢ أَذْ ثِيڒِي ذ ثَاغَارْصْثْ ن وشْمَاضْ ڒبْذَا ذِي مَارَّا جِّيڒَاثْ نْومْ غَارْ وَاذَافْ ن ؤُقِيضُونْ ن ؤُمْسَاڭَارْ زَّاثْ إِ وُوذمْ ن سِيذِي، مَانِي غَا سّْمُونغْ أَكِيذْومْ، مَاحنْذْ أَذْ كِيذكْ سِّيوْڒغْ ذِينْ. ٤٣ أَذْ مّْسَاڭَارغْ ذِينْ أَكْ-ذ أَيْثْ ن إِسْرَائِيل، ؤُ أَقِيضُونْ أَذْ إِتّْوَاقدّسْ س ؤُعُودْجِي إِنُو. ٤٤ أَذْ سّْقدّْسغْ أَقِيضُونْ ن ؤُمْسَاڭَارْ ذ ؤُعَالْطَارْ. أَذْ سّْقدّْسغْ عَاوذْ هَارُونْ ذ وَارَّاوْ نّسْ، حِيمَا أَذْ أَيِي إِڒِينْ ذ إِكهَّاننْ. ٤٥ أَذْ زذْغغْ ذِي ڒْْوسْطْ ن أَيْثْ ن إِسْرَائِيل، أَذْ أَسنْ إِڒِيغْ ذ أَربِّي ◘ ٤٦ ؤُشَا أَذْ سّْننْ بلِّي نشّْ ذ سِيذِي، أَربِّي نْسنْ، ونِّي ثنْ إِسُّوفّْغنْ زِي ثمُّورْثْ ن مِيصْرَا، مَاحنْذْ أَذْ زذْغغْ ذِي ڒْْوسْطْ نْسنْ. نشّْ ذ سِيذِي، أَربِّي نْسنْ.“