١ ”أَذْ ثڭّذْ أَعَالْطَارْ ن ؤُكشُّوضْ ن ؤُكَاسِييَا ن خمْسَا ن إِغَادْجنْ ذِي ثُوزّڭَّارْثْ ذ خمْسَا ن إِغَادْجنْ ذِي ثِيرُو. أَذْ يِيڒِي س أَربْعَا ن ثْغمُّورَا ؤُ ڒُْوعْڒَا نّسْ أَذْ يِيڒِي ثْڒَاثَا ن إِغَادْجنْ. ◘ ٢ غَارْ أَربْعَا ن ثْغمُّورَا أَذْ ثڭّذْ أَشَّاونْ نّسْ. أَشَّاونْ نّسْ أَذْ ذوْڒنْ ذ إِجّنْ أَكِيذسْ ؤُشَا أَذْ ث ثْڒحّْفذْ س نّْحَاسْ. ◼ ٣ أَذْ ثڭّذْ ثِييْذُورِينْ نّسْ، حِيمَا أَذْ ذَايْسنْثْ ثنْضَارذْ إِغّضْ ن مِينْ إِقِّيمنْ ن ثَاذُونْثْ نّسْ إِتّْوَاشمْضنْ ؤُشَا أَذْ ثڭّذْ عَاوذْ إِغنْجَاينْ نّسْ ذ طَّاوْيَاثْ نّسْ إِ ؤُرُوشِّي ذ فُورْشَايَاثْ نّسْ ذ ثْمجْمَارِينْ نّسْ. أَذْ ثڭّذْ مَارَّا ڒقْشُوعْ نّسْ س نّْحَاسْ. ٤ أَذْ ثڭّذْ إِشْثْ ن ثْرَاشَّا، إِشْثْ ن ؤُمُوذِي ن نّْحَاسْ، ؤُشَا أَذْ ثڭّذْ أَربْعَا ن ثخْرَازِينْ ن نّْحَاسْ إِ ؤُمُوذِي نِّي، غَارْ أَربْعَا ن ثْغمُّورَا نّسْ. ٥ أَذْ ث ثْزيَّارذْ سَاذُو إِ ثْمَا ن ؤُعَالْطَارْ، سْوَادَّايْ، مَاحنْذْ أَذْ يِيڒِي ؤُمُوذِي ن نّْحَاسْ نِّي غَارْ وزْينْ ن ؤُعَالْطَارْ. ٦ أَذْ ثڭّذْ إِعُومَاذْ إِ ثَاربُّوثْ إِ ؤُعَالْطَارْ، إِعُومَاذْ ن ؤُكشُّوضْ ن ؤُكَاسِييَا ؤُشَا أَذْ ثنْ ثْڒحّْفذْ س نّْحَاسْ. ٧ إِعُومَاذْ نّسْ أَذْ تّْوَاسِّيذْفنْ ذِي ثخْرَازِينْ. أَذْ إِڒِينْ إِعُومَاذْ إِ ثَاربُّوثْ غَارْ ثْنَاينْ ن إِغزْذِيسنْ ن ؤُعَالْطَارْ خْمِي ث غَا أَرْبُونْ. ٨ أَذْ ثڭّذْ إِجّْ ن ڒْْخَاوِي غَارْ ذَاخڒْ ن ثْفڒْوِينْ. أَمْ مَامّشْ إِ ذ أَشْ إِمْڒَا خْ وذْرَارْ، أَمُّو إِ ث غَا ڭّنْ نِيثْنِي.

٩ أَذْ ثڭّذْ ڒمْرَاحْ ن ثْزذِّيغْثْ. غَارْ جِّيهثْ ن لْجَانُوبْ، غَارْ يفُوسْ، أَذْ ثڭّذْ ڒِْيزَارَاثْ س ڒقْطنْ أَزْذَاذْ إِمُوذنْ، كُوڒْ إِشْثْ زَّايْسنْثْ ن مْيَا ن إِغَادْجنْ ذِي ثُوزّڭَّارْثْ إِ يِيجّْ ن ؤُغزْذِيسْ. ◘ ١٠ عِيشْرِينْ ن إِپِيلَارنْ نّسْ ذ عِيشْرِينْ ن ثْيَارْسَاوِينْ نّسْ أَذْ إِڒِينْ ن نّْحَاسْ. ثِيسنَّارِينْ ن إِپِيلَارنْ ذ إِقضْبَانْ نْسنْ إِ ؤُسڒْقِي أَذْ إِڒِينْ ن نُّوقَارْثْ. ١١ أَمُّو غَارْ جِّيهثْ ن شَّامَالْ، ذِي ثُوزّڭَّارْثْ، أَذْ ذِينْ إِڒِينْثْ ڒِْيزَارَاثْ ن مْيَا إِغَادْجنْ. أَذْ إِڒِينْ عِيشْرِينْ ن إِپِيلَارنْ نْسنْثْ ذ عِيشْرِينْ ن ثْيَارْسَاوِينْ نْسنْ ن نّْحَاسْ. ثِيسنَّارِينْ ن إِپِيلَارنْ ذ إِقضْبَانْ نْسنْ إِ ؤُسڒْقِي أَذْ إِڒِينْ ن نُّوقَارْثْ. ١٢ ذِي ثِيرُو ن ڒمْرَاهْ، غَارْ ؤُغزْذِيسْ ن ڒْْغَارْبْ، أَذْ ذِينْ إِڒِينْثْ ڒِْيزَارَاثْ ن خمْسِينْ ن إِغَادْجنْ ذِي ثُوزّڭَّارْثْ أَكْ-ذعشْرَا ن إِپِيلَارنْ نْسنْثْ ذعشْرَا ن ثْيَارْسَاوِينْ نْسنْ. ١٣ ثِيرُو ن ڒمْرَاحْ غَارْ ؤُغزْذِيسْ ن شَّارْقْ، زِي مَانِيسْ د-ثْنقَّارْ ثْفُوشْثْ، أَذْ ثِيڒِي خمْسِينْ إِغَادْجنْ. ١٤ ڒِْيزَارَاثْ غَارْ يِيجّْ ن ؤُغزْذِيسْ ن زَّاثْ أَذْ إِڒِينْثْ خمّسْطَاشْ ن إِغَادْجنْ ذِي ثُوزّڭَّارْثْ، أَكْ-ذ ثْڒَاثَا ن إِپِيلَارنْ نْسنْثْ ذ ثْڒَاثَا ن ثْيَارْسَاوِينْ نْسنْ. ١٥ غَارْ ؤُغزْذِيسْ ن زَّاثْ نّغْنِي أَذْ ذِينْ إِڒِينْثْ عَاوذْ ڒِْيزَارَاثْ ن خمّسْطَاشْ ن إِغَادْجنْ ذِي ثُوزّڭَّارْثْ أَكْ-ذ ثْڒَاثَا ن إِپِيلَارنْ نْسنْثْ ذ ثْڒَاثَا ن ثْيَارْسَاوِينْ نْسنْ. ١٦ غَارْ وَاذَافْ ن ڒمْرَاحْ أَذْ ذِينْ يِيڒِي إِجّْ ن أَرْوَاقْ ن عِيشْرِينْ ن إِغَادْجنْ، ڭِّينْ ث س ؤُفِيڒُو أَذحْمِي ذ ؤُرْجُووَانِي ذ ؤُزڭّْوَاغْ إِحذْقنْ ؤُ س ڒقْطنْ أَزْذَاذْ إِمُوذنْ، إِجّْ ن ؤُمُوذِي ن ؤُخيَّاضْ، أَكْ-ذ أَربْعَا ن إِپِيلَارنْ نّسْ ذ أَربْعَا ن ثْيَارْسَاوِينْ نْسنْ. ١٧ مَارَّا إِپِيلَارنْ إِ ذ أَسْ د-إِنّْضنْ إِ ڒمْرَاحْ أَذْ إِڒِينْ س إِقضْبَانْ ن نُّوقَارْثْ إِ ؤُسڒْقِي ؤُشَا ثِيسنَّارِينْ نْسنْ أَذْ إِڒِينْثْ ن نُّوقَارْثْ ذ ثْيَارْسَاوِينْ نْسنْ ن نّْحَاسْ. ١٨ ثُوزّڭَّارْثْ ن ڒمْرَاحْ أَذْ ثِيڒِي مْيَا ن إِغَادْجنْ ؤُ ثِيرُو أَذْ ثِيڒِي خمْسِينْ ن إِغَادْجنْ ذ خمْسِينْ عَاوذْ ؤُشَا ڒُْوعْڒَا أَذْ يِيڒِي خمْسَا ن إِغَادْجنْ، مَارَّا س ڒقْطنْ أَزْذَاذْ إِمُوذنْ ؤُشَا ثْيَارْسَاوِينْ نْسنْ أَذْ إِڒِينْثْ ن نّْحَاسْ.

١٩ مَارَّا ڒقْشُوعْ ن ثْزذِّيغْثْ إِ إِدْجَانْ إِ مَارَّا ثَاسخَّارْثْ نّسْ ؤُڒَا ذ مَارَّا ڒوْثَاذْ نّسْ ذ مَارَّا ڒوْثَاذْ ن ڒمْرَاحْ أَذْ إِڒِينْ ن نّْحَاسْ. *

٢٠ أَذْ ثُومُورذْ أَيْثْ ن إِسْرَائِيل، حِيمَا أَذْ أَشْ د-أَوْينْ زّشْثْ ثصْفَا ثدّزْ زِي زِّيثُونْ إِ ثْفَاوْثْ، حِيمَا أَذْ ثَارغْ ثْفَاوْثْ ڒبْذَا. ◘ ٢١ هَارُونْ ذ وَارَّاوْ نّسْ أَذْ حْضَانْ مَانْ أَيَا زِي دْجِيڒثْ أَڒْ صّْبحْ زَّاثْ إِ وُوذمْ ن سِيذِي ذڭْ ؤُقِيضُونْ ن ؤُمْسَاڭَارْ زَّاثْ إِ ؤُڒحَّافْ إِ إِدْجَانْ زَّاثْ إِ شّْهَاذثْ. ذ مَانْ أَيَا أَذْ يِيڒِي ذ إِشْثْ ن ثوْصيّثْ إِ ڒبْذَا نِّي إِتّْخصَّا أَذْ ثتّْوَاحْضَا زِي جِّيهثْ ن أَيْثْ ن إِسْرَائِيل ذِي مَارَّا جِّيڒَاثْ نْسنْ.“