٢٣
ثِيوصَّا زِي جِّيهثْ ن مَامّشْ إِ غَا نمْصُورُّوفْ أَكْ-ذ ؤُمْقَارّبْ
١ ”وَارْ سُّوفُّوغْ ڒخْبَارْ إِسّْخَارِّيقنْ. وَارْ تِّيشْ أَفُوسْ نّشْ إِ ؤُعفَّانْ، مَاحنْذْ أَذْ ثِيڒِيذْ ذ أَشهَّاذْ ن دّدْجْ.
٢ وَارْ أَردّفْ أَزْينْ أَمقّْرَانْ ذِي ڒْْغَارْ ؤُ وَارْ د-تَّارِّي ذِي دّعْوثْ أَڒْ غَا ثْميّْڒذْ ثڭّْوجذْ خْ ڒْْحقّْ أَوَارْنِي إِ وَاطَّاسْ، أَذْ ثْفَارْغذْ ڒْْحقّْ.
٣ ذِي دّعْوثْ نّسْ وَارْ تّْرِيحْ شَا أَكْ-ذ ڒْْمسْكِينْ.
٤ مَاڒَا ثڒْقِيذْ أَفُونَاسْ نِيغْ أَغْيُوڒْ إِودَّارْ ن ڒعْذُو نّشْ، إِتّْخصَّا أَذْ أَسْ ث ثَارّذْ نِيشَانْ.
٥ مَاڒَا ثژْرِيذْ أَغْيُوڒْ ن ونِّي ثْشَارّْهذْ إِوْضَا س دّْقڒْ نّسْ، إِتّْخصَّا شكْ أَذْ ثحْضِيذْ إِخفْ نّشْ أَذْ ثجّذْ ثَامسْڒَاشْثْ إِ نتَّا وَاهَا، مَاشَا شكْ ذ نتَّا جْمِيعْ أَذْ ثْفكّمْ أَغْيُوڒْ قَاعْ.
٦ وَارْ سْفَارَّاغْ ثَاسْغَارْثْ ن ؤُمزْڒُوضْ إِ ذِينْ غَاركْ ذِي دّعْوثْ نّسْ.
٧ بعّذْ خْ ثْمسْڒَاشْثْ إِغشّنْ. وَارْ نقّْ أَفُورِّي نِيغْ أَمْسڭّذْ، مِينْزِي نشّْ وَارْ تّْبَارِّيغْ أَعفَّانْ.
٨ وَارْ كسِّي ثَارْزفْثْ، مِينْزِي ثَارْزفْثْ ثسّْذَارْغَاڒْ ثِيطَّاوِينْ يَارزْمنْ ؤُ ثسّْفَارَّاغْ أَوَاڒنْ ن إِمْسڭّْذنْ.
٩ وَارْ ثْزيَّارمْ خْ ؤُبَارَّانِي. أَقَا كنِّيوْ ثسّْنمْ نّفْسْ ن ؤُبَارَّانِي، مِينْزِي ثُوغَا كنِّيوْ ذ إِبَارَّانِييّنْ ذِي ثمُّورْثْ ن مِيصْرَا.
١٠ ستَّا ن إِسڭّْوُوسَا أَذْ ثْزَارْعذْ ثَامُّورْثْ نّشْ ؤُشَا أَذْ ثسّْمُونذْ ڒْْغِيدْجثْ نّسْ.
١١ ذڭْ ؤُسڭّْوَاسْ وِيسّْ سبْعَا أَذْ ت ثجّذْ أَذْ ثَاريّْحذْ ؤُشَا أَذْ أَسْ ثَارْخُوذْ، حِيمَا أَذْ زَّايسْ شّنْ إِمزْڒَاضْ ن ڒْْڭنْسْ نّشْ. ؤُشَا مِينْ غَا جّنْ نِيثْنِي أَذْ زَّايسْ شّنْ ڒْْمَاڒْ ن ڒخْڒَا. أَمُّو إِ غَا ثڭّذْ عَاوذْ س ؤُمَارْجعْ ن ؤُضِيڒْ نّشْ ذ زِّيثُونْ نّشْ.
١٢ ذِي ستَّا ن وُوسَّانْ أَذْ ثڭّذْ ڒْْخذْمثْ نّشْ ؤُ ذڭْ وَاسّْ وِيسّْ سبْعَا أَذْ ثَاريّْحذْ، مَاحنْذْ أَذْ يَاريّحْ ؤُفُونَاسْ نّشْ ذ وغْيُوڒْ نّشْ ؤُ أَذْ يَارّْ نّفْسْ مِّيسْ ن ثَايَّا نّشْ ذ ؤُبَارَّانِي.“
ثِيوصَّا زِي جِّيهثْ ن ؤُوقَّارْ إِ سِيذِي أَربِّي
١٣ ذِي مَارَّا مِينْ ذ أَومْ نِّيغْ، حْضَامْ ث. وَارْ تِّيذَارمْ إِسمْ ن إِربِّيثنْ نّغْنِي. وَارْ تّسْڒَانْ إِسمْ نّسْ زڭْ ؤُقمُّومْ نّشْ.
١٤ ثْڒَاثَا ن ثْوَاڒَاوِينْ ذڭْ ؤُسڭّْوَاسْ أَذْ أَيِي ثْعيّْذمْ إِجّْ ن ڒْْعِيذْ.
١٥ ڒْْعِيذْ ن وغْرُومْ بْڒَا أَنْثُونْ أَذْ ث ثحْضَامْ. سبْعَا ن وُوسَّانْ أَذْ ثشّذْ أَغْرُومْ بْڒَا أَنْثُونْ، أَمْ مَامّشْ كنِّيوْ ؤُمُورغْ نشّْ، ذِي ڒْْوقْثْ إِتّْوَاڭّنْ ذڭْ ؤُيُورْ أَبِيبْ، مِينْزِي ذَايسْ إِ د-ثفّْغذْ زِي مِيصْرَا. وَارْ د-تُّوسِيمْ س إِفَاسّنْ خْوَانْ زَّاثْ إِ وُوذمْ إِنُو.
١٦ حْضَامْ عَاوذْ ڒْْعِيذْ ن ثْميْرَا، ڒْْعِيذْ ن ثْمنْزُوثْ ن ڒْْخذْمثْ نّشْ إِ ثْزَارْعذْ ذڭْ إِيَّارْ، ؤُ ڒْْعِيذْ ن ؤُسْمُونِي ن صَّابثْ ذڭْ ؤُنڭَّارْ ن ؤُسڭّْوَاسْ، خْمِي غَا ثسّْمُونذْ ڒْْغِيدْجثْ ن ڒْْخذْمثْ نّشْ زڭْ إِيَّارْ.
١٧ ثْڒَاثَا ن ثْوَاڒَاوِينْ ذڭْ ؤُسڭّْوَاسْ أَذْ ضْهَارنْ مَارَّا إِرْيَازنْ ن ڒْْڭنْسْ نّشْ إِ وُوذمْ ن سِيذِي، سِيذِي.
١٨ وَارْ تّْقدَّامْ إِذَامّنْ ن ثْغَارْصْثْ إِنُو أَكْ-ذ مِينْ إِخمَّارنْ، ؤُ ثَاذُونْثْ ن ثْغَارْصْثْ ن ڒْْعِيذْ إِنُو وَارْ تّْنُوسِي دْجِيڒثْ ثكْمڒْ أَڒْ صّْبحْ.
١٩ ثَامزْوَارُوثْ ن ثْمنْزُوثْ زڭْ وُوذمْ ن ثمُّورْثْ نّشْ أَذْ ت ثَاوْيذْ غَارْ ثَادَّارْثْ ن سِيذِي، أَربِّي نّشْ. وَارْ سْننِّي إِغَايْضْ ذ أَمژْيَانْ س ؤُغِي ن يمَّاسْ.
٢٠ خْزَارْ، أَذْ سّكّغْ إِجّْ ن لْمَالَاكْ زَّاثْ إِ وُوذمْ نّشْ، حِيمَا أَذْ شكْ إِحْضَا ذڭْ وبْرِيذْ ؤُشَا أَذْ شكْ يَاوِي غَارْ ومْشَانْ نِّي سّْوجْذغْ.
٢١ حْضَا أَرنْذَاذْ إِ وُوذمْ نّسْ ؤُشَا سڒْ إِ وَاوَاڒْ نّسْ، وَارْ خَاسْ سَّارْزِيڭْ شَا ڒعْمَارْ، مِينْزِي نتَّا وَارْ إِتّكّسْ إِعذِّيينْ نْومْ، مِينْزِي إِسمْ إِنُو أَقَا-ث ذَايسْ.
٢٢ مَاشَا مَاڒَا س ثِيذتّْ أَذْ ثسْڒذْ إِ وَاوَاڒْ نّسْ، أَذْ ثڭّذْ مَارَّا مِينْ ذ أَشْ غَا إِنِيغْ، أَذْ إِڒِيغْ ذ ڒعْذُو إِ ڒْْعذْيَانْ نّشْ ؤُشَا أَذْ حْصَارغْ إِنِّي شكْ إِحصَّارنْ.
٢٣ مِينْزِي لْمَالَاكْ إِنُو أَذْ يِيڒِي زَّاثكْ، أَذْ شكْ سِّيذْفغْ ذِي ثمُّورْثْ ن إِمُورِييّنْ ذ إِحِيتِّييّنْ ذ إِفِيرِيزِييّنْ ذ أَيْثْ ن كنْعَانْ ذ إِحِيوِييّنْ ذ إِيابُوسِييّنْ، ؤُ نشّْ أَذْ ثنْ ثحِّيغْ.
٢٤ وَارْ تّْبنْذِيقْ إِ إِربِّيثنْ نْسنْ نِيغْ أَذْ ثنْ ثْعبْذذْ نِيغْ أَذْ ثڭّذْ أَمْ تّڭّنْ نِيثْنِي، مَاشَا أَذْ ثنْ ثثحِّيذْ قَاعْ ؤُشَا أَذْ ثَارْژذْ مَارَّا إِمَايْضُوثنْ نْسنْ إِقدّْسنْ.
٢٥ أَذْ ثْعبْذمْ سِيذِي، أَربِّي نْومْ، ؤُ نتَّا أَذْ إِبَاركْ أَغْرُومْ نّشْ ذ وَامَانْ نّشْ. نشّْ أَذْ كّْسغْ ڒهْڒَاشَاثْ زِي ڒْْوسْطْ نّشْ.
٢٦ وَارْ تِّيڒِي ثمْغَارْثْ نِّي ؤُمِي إِوْضَا ؤُعذِّيسْ نِيغْ وَارْ إِتِّيرْونْ ذِي ثمُّورْثْ نّشْ. نشّْ أَذْ كمّْڒغْ ڒْْقدّْ ن وُوسَّانْ نّشْ.
٢٧ أَذْ سّكّغْ أَنخْڒِيعْ زَّاثْ إِ ؤُغمْبُوبْ نّشْ، أَذْ سّْخَاروْضغْ مَارَّا ڒْْڭنْسْ إِ غَا ثَافذْ ذڭْ وبْرِيذْ نّشْ ؤُشَا أَذْ أَرّغْ مَارَّا ڒْْعذْيَانْ نّشْ أَذْ خَاكْ أَروْڒنْ.
٢٨ نشّْ أَذْ سّكّغْ إِرزَّانْ زَّاثْ إِ ؤُغمْبُوبْ نّشْ، إِنِّي غَا يَاژّْڒنْ خْ إِحِيوِييّنْ ذ أَيْثْ ن كنْعَانْ ذ إِحِيتِّييّنْ زَّاثْ إِ وُوذمْ نّشْ.
٢٩ وَارْ خَاسنْ تَّاژّْڒغْ زِي زَّاثْ نْومْ ذڭْ إِجّْ ن ؤُسڭّْوَاسْ، مَاحنْذْ وَارْ ثتّْغِيمِي ثمُّورْثْ ذ ڒخْڒَا ؤُ ڒْْمَاڒْ ن ڒخْڒَا وَارْ خَاكْ تّْمَارْنِينْ أَطَّاسْ.
٣٠ س شْوَايْ شْوَايْ أَذْ خَاسنْ أَژّْڒغْ زِي زَّاثْ نشّْ، أَڒْ غَا ثمَّارنْيذْ ذڭْ وَاطَّاسْ ؤُشَا أَذْ ثْزمَّارذْ أَذْ ثكْسِيذْ ثَامُّورْثْ ذ ڒْْوَارْثْ.
٣١ نشّْ أَذْ ڭّغْ إِيْمِيرنْ زِي ڒبْحَارْ ن ثلْڭَا أَڒْ ڒبْحَارْ ن إِفِيلِيسْطِينِييّنْ ؤُ زِي ڒخْڒَا أَڒْ إِغْزَارْ ن لْفُورَاطْ، مِينْزِي أَذْ أَرّغْ إِمزْذَاغْ ن ثمُّورْثْ ذڭْ ؤُفُوسْ نّشْ ؤُشَا أَذْ شكْ أَرّغْ أَذْ خَاسنْ ثَاژّْڒذْ زِي زَّاثْ نّشْ.
٣٢ وَارْ كِيذْسنْ تّڭّْ ڒْْعَاهْذْ نِيغْ أَكْ-ذ إِربِّيثنْ نْسنْ.
٣٣ وَارْ إِعدّڒْ أَذْ زذْغنْ ذِي ثمُّورْثْ نّشْ، حِيمَا وَارْ شكْ تَّارِّينْ أَذْ أَكِيذِي ثخْضِيذْ. مَاڒَا ثْعبْذذْ إِ إِربِّيثنْ نْسنْ، أَذْ أَشْ يِيڒِي مَانْ أَيَا ذ ڒْْفخْ إِ شكْ.“