١٤
مُوسَا ذ ڒْْڭنْسْ ژْوَانْ ڒبْحَارْ ن ثلْڭَا
١ خنِّي إِسِّيوڒْ سِيذِي أَكْ-ذ مُوسَا، إِنَّا:
٢ ”سِيوڒْ أَكْ-ذ أَيْثْ ن إِسْرَائِيل، مَاحنْذْ أَذْ د-ذوْڒنْ ؤُشَا أَذْ وْثنْ إِقِيضَانْ نْسنْ زَّاثْ إِ فِي-هَاخِيرُوثْ، جَارْ مِيڭْذُولْ ذ ڒبْحَارْ، قِيبَاتْشْ إِ بَاعَالْ-صَافُونْ. أَرنْذَاذْ نّسْ أَذْ ثوْثمْ إِقِيضَانْ نْومْ خْ ثْمَا ن ڒبْحَارْ.
٣ خنِّي أَذْ يِينِي فِيرْعُونْ خْ أَيْثْ ن إِسْرَائِيل: ’أَقَا نِيثْنِي ودَّارنْ ذِي ثمُّورْثْ، أَقَا ڒخْڒَا إِحْصَارْ إِ-ثنْ.‘
٤ ؤُشَا نشّْ أَذْ سّْقسْحغْ ؤُڒْ ن فِيرْعُونْ، حِيمَا أَذْ ثنْ إِضْفَارْ ؤُ نشّْ أَذْ تّْوَاسّْعُودْجِيغْ خْ فِيرْعُونْ ؤُ خْ مَارَّا ڒْْعسْكَارْ نّسْ ؤُشَا أَذْ سّْننْ إِمِيصْرِييّنْ بلِّي نشّْ ذ سِيذِي.“ ؤُشَا أَمُّو إِ ت ڭِّينْ نِيثْنِي.
٥ ؤُشَا خبَّارنْ إِ ؤُجدْجِيضْ ن مِيصْرَا بلِّي ڒْْڭنْسْ يَارْوڒْ. خنِّي إِبدّڒْ وُوڒْ ن فِيرْعُونْ ذ إِمْسخَّارنْ نّسْ خْ ڒْْڭنْسْ ؤُشَا نَّانْ: ”مَامّشْ إِ نڭَّا أَيَا، نسّكّْ إِسْرَائِيل زِي ثسْمُوغِي إِ إِڭِّينْ إِ نشِّينْ؟“
٦ ؤُشَا إِحزّمْ فِيرْعُونْ أَكَارُّو نّسْ، إِكْسِي أَكِيذسْ ڒْْڭنْسْ نّسْ.
٧ إِكْسِي أَكِيذسْ ستَّا-مْيَا ن إِكَارُّوثنْ إِشوَّارنْ ذ مَارَّا إِكَارُّوثنْ ن مِيصْرَا ؤُشَا إِڭَّا أَشوَّارْ ن إِنغْرَافنْ زِي ڒْْعسْكَارْ نّسْ خْ كُوڒْ إِجّْ زَّايْسنْ.
٨ أَقَا إِسّقْسحْ سِيذِي ؤُڒْ ن فِيرْعُونْ، أَجدْجِيذْ ن مِيصْرَا، ؤُشَا يَارْذفْ نتَّا أَيْثْ ن إِسْرَائِيل، مَاشَا أَيْثْ ن إِسْرَائِيل ثُوغَا فّْغنْ س يِيجّْ ن ؤُفُوسْ إِتّْوَاسّْڭعّْذنْ.
٩ أَرذْفنْ ثنْ إِمِيصْرِييّنْ ؤُشَا إِوْضنْ غَارْسنْ س مَارَّا إِيْسَانْ ذ إِكَارُّوثنْ ن فِيرْعُونْ ذ إِمْنَاينْ نّسْ ذ ڒْْعسْكَارْ نّسْ، غَارْ فِي-هَاخَارُوثْ، غَارْ ؤُجمَّاضْ ن بَاعَالْ-صَافُونْ، مَانِي وْثِينْ إِقِيضَانْ نْسنْ غَارْ ڒبْحَارْ.
١٠ ڒَْامِي ثنْ د-يُوذسْ فِيرْعُونْ، سّْڭعّْذنْ أَيْثْ ن إِسْرَائِيل ثَامُوغْڒِي نْسنْ، ژْرِينْ بلِّي إِمِيصْرِييّنْ ضْفَارنْ ثنْ-د ؤُشَا نِيثْنِي ڭّْوذنْ أَطَّاسْ. خنِّي سْغُوينْ أَيْثْ ن إِسْرَائِيل غَارْ سِيذِي.
١١ نَّانْ إِ مُوسَا: ”مَا وَارْ دْجِينْ عَاذْ إِمضْڒَانْ ذِي مِيصْرَا أَڒْ ذ أَنغْ د-ثَاوْيذْ، مَاحنْذْ أَذْ نمّثْ ذِي ڒخْڒَا-يَا؟ مَاغَارْ ثڭِّيذْ أَمُّو، ثسُّوفّْغذْ أَنغْ-د زِي مِيصْرَا؟
١٢ مَا وَارْ كِيذكْ نسِّيوڒْ مَارَّا أَوَاڒنْ-أَ ذِي مِيصْرَا، ننَّا: ’أجّْ أَنغْ أَذْ نخْذمْ إِ إِمِيصْرِييّنْ‘؟ خَارْ مَاڒَا ثُوغَا نقِّيمْ نخْذمْ إِ إِمِيصْرِييّنْ خْ مَاڒَا نمُّوثْ ذِي ڒخْڒَا.“
١٣ خنِّي إِنَّا مُوسَا إِ ڒْْڭنْسْ: ”وَارْ تّڭّْوذمْ، بدّمْ، ثخْزَارمْ أَسنْجمْ ن سِيذِي إِ ذ أَومْ غَا يوْشْ أَسّْ-أَ، مِينْزِي إِمِيصْرِييّنْ نِّي ثتّْوَاڒَامْ أَسّْ-أَ،عمَّارْصْ أَذْ ثنْ ثْژَارمْ عَاذْ إِ ڒبْذَا.
١٤ سِيذِي أَذْ خَاومْ إِمّْنغْ ؤُشَا كنِّيوْ أَذْ ثْسغْذمْ وَاهَا.“
١٥ إِنَّا سِيذِي إِ مُوسَا: ”مَايمِّي غَارِي ثتّْڒَاغِيذْ؟ إِنِي إِ أَيْثْ ن إِسْرَائِيل حِيمَا أَذْ فسْينْ إِقِيضَانْ نْسنْ.
١٦ سْڭعّذْ ثَاغَّارْشْثْ نّشْ، سْوِيژّضْ أَفُوسْ نّشْ خْ ڒبْحَارْ ؤُشَا فَارْقْ إِ-ث، حِيمَا أَذْ إِژْوَا أَيْثْ ن إِسْرَائِيل خْ ڒْْبَارّْ ذِي ڒْْوسْطْ ن ڒبْحَارْ.
١٧ خْزَارْ، نشّْ أَذْ سّْقسْحغْ ؤُڒْ ن إِمِيصْرِييّنْ، مَاحنْذْ أَذْ ثنْ أَرذْفنْ ذِي ڒبْحَارْ ؤُ نشّْ أَذْ سّْعُودْجِيغْ إِخفْ إِنُو س فِيرْعُونْ ؤُ س مَارَّا ڒْْعسْكَارْ نّسْ، إِكَارُّوثنْ نّسْ ذ إِمْنَاينْ نّسْ ن إِيْسَانْ.
١٨ أَذْ سّْننْ إِمِيصْرِييّنْ بلِّي نشّْ ذ سِيذِي، خْمِي غَا تّْوَاسّْعُودْجِيغْ س فِيرْعُونْ، س إِكَارُّوثنْ نّسْ ذ إِمْنَاينْ نّسْ ن إِيْسَانْ.“
١٩ خنِّي إِمُّوطِّي لْمَالَاكْ ن أَربِّي نِّي يُويُورنْ زَّاثْ إِ ڒْْعسْكَارْ ن إِسْرَائِيل ؤُشَا إِذْوڒْ غَارْ ضفَّارْ نْسنْ: أَقلِّيجْ ن ؤُسيْنُو إِمُّوطِّي زِي زَّاثْ إِ وُوذمْ نْسنْ ؤُشَا إِبدّْ غَارْ ضفَّارْ نْسنْ.
٢٠ يُوذفْ ؤُقلِّيجْ جَارْ ڒْْعسْكَارْ ن إِمِيصْرِييّنْ ذ ڒْْعسْكَارْ ن إِسْرَائِيل. ثُوغَا أَسيْنُو ذ ثَادْجسْثْ غَارْ ؤُغزْذِيسْ-أَ ؤُ إِسِّيغْ إِ ؤُغزْذِيسْ نّغْنِي س دْجِيڒثْ ؤُ وَارْ د-إِقَارّبْ إِجّنْ غَارْ ونّغْنِي دْجِيڒثْ ثكْمڒْ.
٢١ ؤُشَا إِسّْوِيژّضْ مُوسَا أَفُوسْ نّسْ خْ ڒبْحَارْ ؤُشَا إِعَارْنْ سِيذِي خنِّي ڒبْحَارْ غَارْ ؤُغزْذِيسْ س يِيجّْ ن ؤُسمِّيضْ ذ أَشَارْقِي إِجْهذْ، مَارَّا دْجِيڒثْ نِّي، ؤُشَا يَارَّا ڒبْحَارْ أَذْ إِجفّفْ. أَمُّو إِ تّْوَامّْسبْضَانْ وَامَانْ.
٢٢ ؤُيُورنْ أَيْثْ ن إِسْرَائِيل خْ مِينْ يُوژْغنْ ذِي ڒْْوسْطْ ن ڒبْحَارْ ؤُشَا أَمَانْ ڭِّينْ أَمشْنَاوْ ڒْْحِيضْ خْ يفُوسْ نْسنْ ذ ؤُزڒْمَاضْ نْسنْ.
٢٣ أَرذْفنْ ثنْ إِمِيصْرِييّنْ، رُوحنْ أَوَارْنِي أَسنْ ذِي ڒْْوسْطْ ن ڒبْحَارْ س مَارَّا إِيْسَانْ ن فِيرْعُونْ ذ إِكَارُّوثنْ نّسْ ذ إِمْنَاينْ نّسْ ن يِييْسَانْ.
٢٤ ڒَْامِي ذ يفُّو ڒْْحَاڒْ، إِمْسَارْ بلِّي سِيذِي إِصْوضْ غَارْ ڒْْعسْكَارْ ن إِمِيصْرِييّنْ زڭْ ؤُقلِّيجْ ن ثْمسِّي ذ إِسيْنُوثنْ ؤُشَا إِسّْخَارْوضْ ڒْْعسْكَارْ ن مِيصْرَا.
٢٥ إِجَّا ثِيجَارَّارِينْ ن إِكَارُّوثنْ نْسنْ أَذْ فسْخنْثْ، أَڒَامِي إِذْوڒْ إِوْعَارْ خَاسنْ أَذْ ؤُيُورنْ غَارْ زَّاثْ. ڒخْذنِّي نَّانْ إِمِيصْرِييّنْ، كُوڒْ إِجّنْ زَّايْسنْ إِ يِيخفْ نّسْ: ”إِتّْخصَّا أَيِي أَذْ أَروْڒغْ زِي زَّاثْ ن ثِيطَّاوِينْ ن إِسْرَائِيل، مِينْزِي سِيذِي إِمّْنغْ ذِي طّْوعْ نْسنْ ضِيدّْ إِ إِمِيصْرِييّنْ.“
٢٦ إِنَّا سِيذِي إِ مُوسَا: ”سْوِيژّضْ أَفُوسْ نّشْ خْ ڒبْحَارْ، حِيمَا أَذْ ذوْڒنْ وَامَانْ خْ إِمِيصْرِييّنْ، خْ إِكَارُّوثنْ نْسنْ ؤُ خْ إِمْنَاينْ نْسنْ ن إِيْسَانْ.“
٢٧ خنِّي إِسّْوِيژّضْ مُوسَا أَفُوسْ نّسْ خْ ڒبْحَارْ ؤُ غَارْ ڒفْجَارْ ن صّْبحْ إِذْوڒْ ڒبْحَارْ غَارْ مَانِي ث ثُوغَا قْبڒْ ؤُشَا أَروْڒنْ إِمِيصْرِييّنْ نِيشَانْ ضِيدّْ نّسْ ؤُشَا إِغْضڒْ سِيذِي إِمِيصْرِييّنْ ذِي ڒْْوسْطْ ن ڒبْحَارْ.
٢٨ ذوْڒنْ-د وَامَانْ ؤُشَا تّْوَانضْڒنْ إِكَارُّوثنْ ذ إِمْنَاينْ ن إِيْسَانْ ن مَارَّا ڒْْعسْكَارْ ن فِيرْعُونْ إِ ثُوغَا يُوذفْ أَوَارْنِي أَسنْ غَارْ ڒبْحَارْ. وَارْ زَّايْسنْ إِقِّيمْ ؤُڒَا ذ إِجّنْ.
٢٩ مَاشَا أَيْثْ ن إِسْرَائِيل ؤُيُورنْ خْ مِينْ يُوژْغنْ ذِي ڒْْوسْطْ ن ڒبْحَارْ ؤُ أَمَانْ ثُوغَا ڭِّينْ أَمشْنَاوْ ڒْْحِيضْ غَارْ يفُوسْ نْسنْ ذ ؤُزڒْمَاضْ نْسنْ.
٣٠ أَمُّو إِ إِسّنْجمْ سِيذِي إِسْرَائِيل ذڭْ وَاسّْ نِّي زڭْ ؤُفُوسْ ن إِمِيصْرِييّنْ ؤُشَا إِسْرَائِيل إِژْرَا إِمِيصْرِييّنْ إِ إِمُّوثنْ خْ ثْمَا ن ڒبْحَارْ.
٣١ إِژْرَا إِسْرَائِيل أَفُوسْ إِمْغَارنْ إِ إِڭَّا سِيذِي ذڭْ إِمِيصْرِييّنْ ؤُشَا إِڭّْوذْ ڒْْڭنْسْ زِي سِيذِي، ؤُشَا ؤُمْننْ نِيثْنِي ذِي سِيذِي ؤُ ذِي مُوسَا، أَمْسخَّارْ نّسْ.