٨
مِينْ إِڭَّا ؤُجدْجِيذْ ذِي طّْوعْ ن وُوذَاينْ
١ ذڭْ وَاسّْ نِّي أَجدْجِيذْ إِوْشَا أَسْ إِ ثْجدْجِيذْثْ إِسْثِيرْ ثَادَّارْثْ ن هَامَانْ، ڒعْذُو ن وُوذَاينْ، ؤُشَا يُوسَا-د مُورْذَاخَايْ زَّاثْ إِ وُوذمْ ن ؤُجدْجِيذْ، مِينْزِي إِسْثِيرْ ثْخبَّارْ س مِينْزِي ذ أَسْ د-إِتَّاسْ إِ نتَّاثْ.
٢ إِكّسْ-د ؤُجدْجِيذْ ثَاخَاذنْثْ نّسْ ن ؤُشمِّيعْ، ثنِّي ثُوغَا د-إِكّسْ زِي هَامَانْ ؤُشَا إِوْشَا أَسْ-ت إِ مُورْذَاخَايْ، ؤُ إِسْثِيرْ ثڭَّا مُورْذَاخَايْ خْ ثَادَّارْثْ ن هَامَانْ.
٣ ثسِّيوڒْ إِسْثِيرْ ثْوَاڒَا نّغْنِي أَكْ-ذ ؤُجدْجِيذْ، ثوْضَا أَسْ غَارْ إِضَارنْ، ثثْرُو ؤُ ثْحشّمْ إِ-ث مَاحنْذْ أَذْ إِسِّيڭّْوجْ ثَاعفَّانْثْ ن هَامَانْ، أَجَاجِي، ؤُڒَا ذ ثَامعْمُوتْشْ إِ ثُوغَا إِخَارّصْ ضِيدّْ إِ وُوذَاينْ.
٤ إِسّْوِيژّضْ ؤُجدْجِيذْ إِ إِسْثِيرْ أَزدْجَاضْ نّسْ ن وُورغْ. خنِّي إِسْثِيرْ ثكَّارْ، ثْبدّْ زَّاثْ إِ وُوذمْ ن ؤُجدْجِيذْ،
٥ ثنَّا: ”مَاڒَا مْلِيحْ إِ ؤُجدْجِيذْ ؤُ نشّْ ؤُفِيغْ ڒْْخَاضَارْ زَّاثْ إِ وُوذمْ نّسْ ؤُ مَاڒَا ثْسڭّمْ ثْمسْڒَاشْثْ-أَ زَّاثْ إِ وُوذمْ ن ؤُجدْجِيذْ ؤُ نشّْ ؤُذْفغْ أَسْ ذِي ڒْْخَاضَارْ ذِي ثِيطَّاوِينْ نّسْ، أجّْ أَذْ أَرِينْ شَا حِيمَا أَذْ تّْوَابضْڒنْثْ ثبْرَاثِينْ نِّي ذِي ثدْجَا ثْمعْمُوتْشْ ن هَامَانْ، مِّيسْ ن هَامَّاذَاثَا، أَجَاجِي، ثِينِّي إِ يُورَا إِ ؤُهلّكْ ن وُوذَاينْ ذِي مَارَّا لْعَامَالَاثْ ن ؤُجدْجِيذْ.
٦ مَاغَارْ مَامّشْ زمَّاريْ أَذْ خْزَارغْ ڒْْغَارْ إِ غَا إِڒقْفنْ ڒْْڭنْسْ إِنُو؟ ؤُ مَامّشْ زمَّارغْ أَذْ خْزَارغْ أَهلّكْ ن جَّاذِيرَا إِنُو؟“
٧ خنِّي إِنَّا ؤُجدْجِيذْ أَحَاشْوِيرُوشْ إِ ثْجدْجِيذْثْ إِسْثِيرْ ؤُ إِ وُوذَايْ مُورْذَاخَايْ: ”خْزَارْ، وْشِيغْ ثَادَّارْثْ ن هَامَانْ إِ إِسْثِيرْ ؤُ نتَّا س يِيخفْ نّسْ ؤُيْڒغْ ث غَارْ ثْحنَاشْثْ، مِينْزِي إِسّْوِيژّذْ أَفُوسْ نّسْ غَارْ وُوذَاينْ.
٨ أَذْ ثَارِيمْ كنِّيوْ سِيمَانْثْ نْومْ س يِيسمْ ن ؤُجدْجِيذْ مِينْ إِدْجَانْ إِشْنَا ذِي ثِيطَّاوِينْ نْومْ ذِي طّْوعْ ن وُوذَاينْ. شمّْعمْ ث س ثْخَاذنْثْ ن ؤُجدْجِيذْ، مِينْزِي ثِيرَا إِ يُورَانْ س يِيسمْ ن ؤُجدْجِيذْ ؤُ شمّْعمْ ثنْثْ س ثْخَاذنْثْ ن ؤُشمِّيعْ ن ؤُجدْجِيذْ، وَارْ إِزمَّارْ حذْ أَذْ ثنْثْ إِبْضڒْ.“
٩ خنِّي تّْوَاڒَاغَانْ إِمَارِيرنْ ن ؤُجدْجِيذْ، ذڭْ وَاسّْ نِّي، ذڭْ ؤُيُورْ وِيسّْ ثْڒَاثَا، ونِّي ؤُمِي قَّارنْ أَسْ أَيُورْ ن سِيوَانْ، ذڭْ وَاسّْ وِيسّْ ثْڒَاثَا ؤُ-عِيشْرِينْ زَّايسْ، ؤُشَا ؤُرَانْ أَمْ مَامّشْ مَارَّا مِينْ يُومُورْ مُورْذَاخَايْ، أَقَا ؤُرَانْ ث إِ وُوذَاينْ، إِ إِجدْجِيذنْ إِ إِدْجَانْ سَاذُو إِ ؤُجدْجِيذْ ؤُ إِ لْوُولَاثْ ؤُ إِ ڒْْحُوكَّامْ ن لْعَامَالَاثْ، زِي ڒْْهنْذْ أَڒْ كُوشْ، مْيَا ؤُ-سبْعَا ؤُ-عِيشْرِينْ ن لْعَامَالَاثْ، إِ كُوڒْ لْعَامَالَا س ثِيرَا نّسْ ؤُ إِ كُوڒْ ڒْْڭنْسْ س يِيڒسْ نّسْ ؤُ عَاوذْ إِ وُوذَاينْ س ثِيرَا نْسنْ ؤُ س يِيڒسْ نْسنْ.
١٠ إِتّْوَارِي س يِيسمْ ن ؤُجدْجِيذْ أَحَاشْوِيرُوشْ ؤُ ثتّْوَاشمّعْ ثبْرَاثْ س ثْخَاذنْثْ ن ؤُشمِّيعْ ن ؤُجدْجِيذْ ؤُشَا سّكّنْ ثِيبْرَاثِينْ نِّي أَكْ-ذ إِرقَّاسنْ ن ثَازْڒَا خْ ييْسَانْ، نْيِينْ خْ ييْسَانْ ن ثَازْڒَا إِڭلّْذنْ ن جَّاذِيرَا إِشْنَانْ قَاعْ.
١١ ذِي ثبْرَاثِينْ نِّي إِوْشَا ؤُجدْجِيذْ تّسْرِيحْ إِ وُوذَاينْ مَاحنْذْ أَذْ مُوننْ ذِي كُوڒْ ثَانْذِينْثْ إِ ذِي دْجَانْ، أَذْ كَّارنْ ذِي طّْوعْ ن ثُوذَارْثْ نْسنْ، حِيمَا أَذْ أَردّْدْجنْ، أَذْ نْغنْ ؤُ أَذْ ثحَّانْ كُوڒْ ڒْْعسْكَارْ زِي ڒْْڭنْسْ ذ لْعَامَالَا نِّي ثنْ إِ غَا إِحْصَارنْ، ؤُڒَا ذ إِحنْجِيرنْ إِمژْيَاننْ ذ ثمْغَارِينْ، ؤُ حِيمَا أَذْ طّْفنْ مِينْ زَّايْسنْ،
١٢ ذ مَانْ أَيَا ذڭْ وَاسّْ ذ إِجّنْ ذِي مَارَّا لْعَامَالَاثْ ن ؤُجدْجِيذْ أَحَاشْوِيرُوشْ، ذڭْ وَاسّْ وِيسّْ ثْڒطَّاشْ ن ؤُيُورْ وِيسّْ ثنْعَاشْ، أَقَا-ث ذ أَيُورْ ن أَذَارْ.
١٣ ثُوغَا إِتّْخصَّا أَذْ ثتّْوَاسُّوفّغْ إِشْثْ ن ثِيڒمْثْ ن ثِيرَا-يَا أَمْ ؤُزرْفْ ذِي مَارَّا لْعَامَالَاثْ مَاحنْذْ أَذْ إِتّْوَاسَّارْڭبْ إِ مَارَّا ڒڭْنُوسْ، أَقَا ؤُذَاينْ أَذْ إِڒِينْ حزّْمنْ ذڭْ وَاسّْ نِّي حِيمَا أَذْ نْثَاقْمنْ زِي ڒْْعذْيَانْ نْسنْ.
١٤ إِرقَّاسنْ ن ثَازْڒَا، إِنِّي ينْيِينْ خْ ييْسَانْ ن ثَازْڒَا إِڭلّْذنْ، فّْغنْ ذغْيَا، تّْوَاشجّْعنْ س ؤُزيَّارْ س وَاوَاڒْ ن ؤُجدْجِيذْ. إِتّْوَاسُّوفّغْ ؤُزرْفْ عَاوذْ ذِي لْقلْعَا ن شُوشَانْ.
١٥ خَاسْ ؤُشَا إِفّغْ-د مُورْذَاخَايْ زَّاثْ إِ وُوذمْ ن ؤُجدْجِيذْ ذڭْ ؤُسڒْهَامْ إِڭلّْذنْ ن ؤُفِيڒُو أَذهْمَانِي ذ ؤُشمْڒَاڒْ ؤُ س إِجّْ ن تَّاجْ ذ أَمقّْرَانْ ن وُورغْ ذ ؤُسڒْهَامْ ن ڒقْطنْ أَزْذَاذْ ذ ؤُفِيڒُو أَرْجُووَانِي، ؤُشَا ثَانْذِينْثْ ن شُوشَانْ نڭْزنْ ذَايسْ إِوْذَانْ س ڒفْرَاحثْ.
١٦ ؤُذَاينْ ثُوغَا غَارْسنْ ثْفَاوْثْ ذ ڒفْرَاحثْ، ذ وَارْشُوقْ ذ شَّانْ.
١٧ ذِي كُوڒْ لْعَامَالَا ؤُ ذِي كُوڒْ ثَانْذِينْثْ مَانِي مَا د-يِيوضْ وَاوَاڒْ ن ؤُجدْجِيذْ ذ ؤُزرْفْ نّسْ، ثُوغَا ذِينْ ڒفْرَاحثْ ذ وَارْشُوقْ جَارْ وُوذَاينْ ذ زّْرُوذْ ذ وُوسَّانْ إِصبْحنْ ؤُ وَاطَّاسْ زِي ڒڭْنُوسْ ن ثمُّورْثْ ذوْڒنْ ذ ؤُذَاينْ، مِينْزِي ثوْضَا-د خَاسنْ ثِيڭّْوُوذِي زڭْ وُوذَاينْ.