٣
سِّيرّْ ن لْمَاسِيحْ
١ خْ ؤُينِّي نشّْ، بُولُوسْ، أَقَا أَيِي ذ أَمحْبُوسْ ن يَاسُوع لْمَاسِيحْ، إِ كنِّيوْ إِنِّي إِدْجَانْ زِي ڒڭْنُوسْ،
٢ مَاڒَا زعْمَا أَقَا ثسْڒَامْ خْ ثْسخَّارْثْ ن أَرْضَا ن أَربِّي إِ ذ أَيِي إِمّوْشنْ جَارْ أَومْ،
٣ بلِّي إِتّْوَاسَّارْڭبْ أَيِي-د سِّيرّْ، أَمْ إِزَّارغْ ؤُرِيغْ أَومْ-د س ذْرُوسْ.
٤ خْمِي غَا ثْغَارمْ مَانْ أَيَا، ثْزمَّارمْ أَذْ ثْفهْممْ ڒفْهَامثْ إِنُو ن سِّيرّْ ن لْمَاسِيحْ،
٥ ونِّي وَارْ إِتّْوَاسَّارْڭبْ شَا ذِي ثَارْوَا ن بْنَاذمْ ذِي ڒجْيُوڒْ نّغْنِي، أَمْ مَامّشْ إِتّْوَاعَارَّا خَاسْ ڒخُّو س أَرُّوحْ إِ رُّوسُولْ إِمْقدَّاسنْ نّسْ ؤُ إِ إِنَابِييّنْ نّسْ،
٦ أَحقَّا إِنِّي زِي ڒڭْنُوسْ أَذْ إِڒِينْ ذ إِوْرِيثنْ أَكِيذْسنْ ذ إِغزْذِيسنْ أَكِيذْسنْ ن أَرِّيمثْ نّسْ ؤُڒَا ذ إِشْرِيشنْ ن لْوَاعْذْ نِّي ذَايسْ إِمّوْشنْ س لْ-إِنْجِيلْ،
٧ إِ زِي ذوْڒغْ ذ أَمْسخَّارْ عْلَاحْسَابْ ثَاوْهِيبْثْ ن أَرْضَا ن أَربِّي إِ ذ أَيِي إِمّوْشنْ عْلَاحْسَابْ جّهْذْ نّسْ إِ ذَايِي إِخدّْمنْ.
٨ أَقَا إِمّوْشْ أَيِي أَرْضَا-يَا، إِ نشّْ ذ أَمُوقْڒِيڒْ قَاعْ جَارْ مَارَّا إِمْقدَّاسنْ، حِيمَا أَذْ بَارّْحغْ س ڒخْبَارْ أَصبْحَانْ، إِوَا أَڭْڒَا ن لْمَاسِيحْ إِ وَارْ نْزمَّارْ أَذْ نفْهمْ،
٩ ؤُ حِيمَا أَذْ سُّوفّْغغْ غَارْ ثْفَاوْثْ إِ مَارَّا، مِينْ إِخْسْ أَذْ يِينِي ؤُوكّڒْ ن سِّيرّْ إِ ثُوغَا إِنُوفَّارنْ ذِي زّْمَانَاثْ ن زِيشْ ذِي أَربِّي، ونِّي إِ د-إِخڒْقنْ كُوڒْشِي،
١٠ حِيمَا ثِيغِيثْ ن أَربِّي أَكْ-ذ وَاطَّاسْ ن إِغزْذِيسنْ نّسْ أَذْ ثِيڒِي ثتّْوَاسّْننْ س ثْمسْمُونْثْ غَارْ ڒحْكَامَاثْ ذ صُّولَاطَاثْ ذڭْ إِجنْوَانْ،
١١ ثِيغِيثْ إِ ثُوغَا إِسّوْجذْ نتَّا زِي زّْمَانْ ؤُشَا إِكمّڒْ إِ-ت ذِي سِيذِيثْنغْ يَاسُوع لْمَاسِيحْ،
١٢ ونِّي ذَايسْ أَقَا غَارْنغْ ثَارْيَاسْثْ ذ وَاذَافْ أَكْ-ذ تِّيقثْ س لْ-إِيمَانْ زَّايسْ.
١٣ س ؤُينِّي تّْزَاوَاڭغْ كنِّيوْ، مَاحنْذْ وَارْ تِّيحْڒمْ شَا س ڒمْحَايمْ إِنُو ذِي طّْوعْ نْومْ. أَقَا مَانْ أَيَا إِ ؤُعُودْجِي إِ كنِّيوْ.
ثَاژَادْجِيثْ ن بُولُوسْ خْ إِفَاسُوسِييّنْ
١٤ أَذْ أَذَارغْ س إِفَادّنْ إِنُو زَّاثْ إِ بَابَاسْ ن سِيذِيثْنغْ يَاسُوع لْمَاسِيحْ،
١٥ إِ ونِّي ؤُمِي سمَّانْ كُوڒْ إِجّْ ن ثْبَابَاثْ إِ إِدْجَانْ ذڭْ إِجنْوَانْ ذ ثمُّورْثْ،
١٦ حِيمَا أَذْ أَومْ إِوْشْ عْلَاحْسَابْ أَڭْڒَا ن ؤُعُودْجِي نّسْ ؤُ حِيمَا أَذْ ثتّْوَاسّْجهْذمْ س جّهْذْ س أَرُّوحْ نّسْ ذِي بْنَاذمْ نْومْ ن ذَاخڒْ.
١٧ حِيمَا لْمَاسِيحْ أَذْ إِزْذغْ ذڭْ وُوڒَاونْ نْومْ س لْ-إِيمَانْ، س ثَايْرِي، خْ مِينِّي ثشَّاثمْ إِژوْرَانْ ؤُ ذْسَاسْ نْومْ أَذْ يِيڒِي إِمْثنْ،
١٨ حِيمَا أَذْ ثْزمَّارمْ أَذْ ثْفهْممْ أَكْ-ذ مَارَّا إِمْقدَّاسنْ مِينْ ثعْنَا ثِيرُو ذ ثُوزّڭَّارْثْ ذ ڒُْوعْڒَا ذ ڒَْادْجَاغْ،
١٩ ؤُ أَذْ ثسّْنمْ عَاوذْ ڒمْغَارثْ ن ثُوسّْنَا ن ثَايْرِي ن لْمَاسِيحْ، ؤُشَا أَذْ ثِيڒِيمْ ثْعمَّارمْ س مَارَّا أَعمَّارْ ن أَربِّي.
٢٠ مَاشَا إِ نتَّا ؤُمِي غَارسْ ثِيزمَّارْ إِفيّْضنْ حِيمَا أَذْ إِڭّْ ذِي طّْوعْ نّغْ سنّجْ إِ مِينْ نتّتَّارْ نِيغْ نتّْخَارّصْ، عْلَاحْسَابْ جّهْذْ نّسْ إِ إِخدّْمنْ ذَايْنغْ،
٢١ إِ نتَّا إِكَّارْ أَسْ-د ؤُعُودْجِي ذِي ثْمسْمُونْثْ نّسْ، ذِي يَاسُوع لْمَاسِيحْ، ذِي مَارَّا ڒجْيُوڒْ إِ ڒبْذَا قَاعْ. أَمِينْ.