إِفَاسُوسِييّنْ
١
أَسدْجمْ غَارْ ؤُمزْوَارُو
١ بُولُوسْ، رَّاسُولْ ن يَاسُوع لْمَاسِيحْ عْلَاحْسَابْ ڒْْخَاضَارْ ن أَربِّي، إِ يِينِّي إِدْجَانْ ذِي أَفَاسُوسْ، إِ إِمْقدَّاسنْ ذ يِينِّي يُومْننْ ذِي يَاسُوع لْمَاسِيحْ
٢ أَرْضَا ذ ڒهْنَا أَذْ كِيذْومْ إِڒِينْ زِي أَربِّي، بَابَاثْنغْ، ؤُ زِي سِيذِيثْنغْ يَاسُوع لْمَاسِيحْ.
٣ أَذْ إِتّْوَابَاركْ أَربِّي، بَابَاسْ ن سِيذِيثْنغْ يَاسُوع لْمَاسِيحْ، ونِّي ذ أَنغْ إِبَارْكنْ س مَارَّا لْبَارَاكَاثْ ن أَرُّوحْ إِ إِدْجَانْ ذڭْ إِجنْوَانْ ذِي لْمَاسِيحْ،
٤ أَمْ مَامّشْ إِخْضَارْ أَنغْ ذَايسْ، ذڭْ ؤُمزْوَارُو قْبڒْ مَا أَذْ إِتّْوَاڭّْ ذْسَاسْ ن دُّونشْثْ، حِيمَا أَذْ نِيڒِي ذ إِمْقدَّاسنْ بْڒَا ڒْْعِيبْ قِيبَاتْشْ نّسْ.
٥ ذِي ثَايْرِي إِزْوَارْ أَذْ أَنغْ يَارْشمْ إِ يِيخفْ نّسْ ؤُشَا أَقَا إِڭَّا أَنغْ ذ أَرَّاونْ ذِي يَاسُوع لْمَاسِيحْ أَمْ مَامّشْ ث إِخْسْ ڒْْخَاضَارْ نّسْ،
٦ إِ ؤُسمْغَارْ ن ؤُعُودْجِي ن أَرْضَا نّسْ إِ خَانغْ إِفَارّغْ ذڭْ ؤُمْعِيزّْ نّسْ.
٧ ذَايسْ غَارْنغْ أَسنْجمْ ذ وغْفَارْ ن دّْنُوبْ س إِذَامّنْ نّسْ عْلَاحْسَابْ أَڭْڒَا ن أَرْضَا نّسْ
٨ إِ ذَايْنغْ إِدْجَانْ س ؤُفيّضْ، ذِي مَارَّا ثِيغِيثْ ذ مَارَّا ڒفْهَامثْ.
٩ أَقَا إِسَّارْڭبْ أَنغْ خْ سِّيرّْ ن ڒْْخَاضَارْ نّسْ، إِ ثُوغَا إِزْعمْ قْبڒْ مَاحنْذْ أَذْ ث إِكمّڒْ ذڭْ يِيخفْ نّسْ،
١٠ حِيمَا، إِ ڒحْكَامثْ ن ؤُعمَّارْ ن زّْمَانَاثْ، أَذْ د-إِخْڒقْ مَارَّا مِينْ إِدْجَانْ ذڭْ إِجنْوَانْ ؤُ خْ ثمُّورْثْ ذ جْذِيذْ زڭْ ؤُزدْجِيفْ س لْمَاسِيحْ.
١١ أَقَا نتّْوَاخْضَارْ ذَايسْ، أَمْ مَامّشْ إِ إِزْوَارْ أَذْ إِمَّارْسْ إِ نشِّينْ ؤُ ثُوغَا إِخْسْ أَذْ زَّايْنغْ إِڭّْ، نتَّا ذ ونِّي إِتّڭّنْ مَارَّا عْلَاحْسَابْ لْقَارَارْ ن أَرَّايْ نّسْ،
١٢ حِيمَا نشِّينْ أَذْ نِيڒِي ذ إِمزْوُورَا إِ غَا إِسِّيثِيمنْ ذِي لْمَاسِيحْ إِ ؤُسمْغَارْ ن ؤُعُودْجِي نّسْ.
١٣ ذَايسْ أَقَا ثسْڒِيمْ أَوَاڒْ ن ثِيذتّْ، ڒخْبَارْ أَصبْحَانْ ن ؤُسنْجمْ نْومْ، خنِّي ثُومْنمْ ذَايسْ ؤُشَا ثكْسِيمْ أَشمِّيعْ ن أَرُّوحْ إِقدّْسنْ إِ ذ أَنغْ إِوَاعْذْ،
١٤ ونِّي ذ ڒْْعَارْبُونْ ن ڒْْوَارْثْ نّغْ إِ ؤُسنْجمْ ن يِينِّي إِدَّارنْ ؤُ إِ ؤُسمْغَارْ ن ؤُعُودْجِي نّسْ.
أَقَاذِي ذ ثْژَادْجِيثْ ن بُولُوسْ
١٥ خْزَارْ، س ؤُينِّي نشّْ، ڒَْامِي سْڒِيغْ خْ لْ-إِيمَانْ نْومْ ذِي سِيذِيثْنغْ يَاسُوع لْمَاسِيحْ ؤُ خْ ثَايْرِي نْومْ إِ مَارَّا إِمْقدَّاسنْ،
١٦ وَارْ بدّغْ شَا أَذْ قَاذِيغْ إِ كنِّيوْ نِيغْ أَذْ ذَايْومْ فكَّارغْ ذِي ثْژِيدْجَاثِينْ إِنُو،
١٧ حِيمَا أَربِّي ن سِيذِيثْنغْ يَاسُوع لْمَاسِيحْ، بَابَاسْ ن ؤُعُودْجِي، أَذْ أَومْ إِوْشْ أَرُّوحْ ن ثِيغِيثْ ذ ؤُسَارْڭبْ حِيمَا أَذْ ث ثسّْنمْ،
١٨ ؤُشَا أَذْ أَومْ إِوْشْ ثِيفَاوْثْ ذِي ثِيطَّاوِينْ ن وُوڒَاونْ نْومْ، حِيمَا أَذْ ثسّْنمْ مَانْ أَسِيثمْ ن ثْڒَاغِيثْ نّسْ ذ مَامّشْ إِمْغَارْ أَڭْڒَا ن ؤُعُودْجِي ن ڒْْوَارْثْ نّسْ ذِي مَارَّا إِمْقدَّاسنْ،
١٩ ؤُ مَامّشْ إِمْغَارْ أَطَّاسْ إِ يدْجَا جّهْذْ نّسْ ذَايْنغْ، ذڭْ إِنِّي يُومْننْ عْلَاحْسَابْ أَقَارُّو ن جّهْذْ ن صُّولْطَا نّسْ
٢٠ إِ إِخدّْمنْ ذِي لْمَاسِيحْ ؤُمِي ث-إِ-د-إِسّْنكَّارْ زِي ثَادَّارْثْ ن إِمتِّيننْ ؤُشَا إِڭَّا إِ-ث غَارْ ؤُغزْذِيسْ أَفُوسِي نّسْ ذڭْ إِجنْوَانْ،
٢١ سنّجْ إِ كُوڒْ أَزدْجِيفْ ذ صُّولْطَا ذ جّهْذْ ذ ڒحْكَامثْ ذ مَارَّا إِسمْ إِتّْوَاسمَّانْ، وَارْ إِدْجِي ذِي دُّونشْثْ-أَ وَاهَا، مَاشَا عَاوذْ ذِي ثنِّي إِ د غَا يَاسنْ.
٢٢ أَقَا نتَّا يَارَّا أَسْ-د مَارَّا سَاذُو إِضَارنْ نّسْ ؤُ ونِّي إِدْجَانْ سنّجْ إِ مَارَّا، أَقَا إِڭَّا إِ-ث ذ أَزدْجِيفْ إِ ثْمسْمُونْثْ،
٢٣ ثنِّي ذ أَرِّيمثْ نّسْ ؤُڒَا ذ أَعمَّارْ ن ونِّي إِتّْعمَّارنْ كُوڒْشِي ذِي مَارَّا.