٧
أَنڭَّارُو أَذْ د-يَاسْ!
١ يُوسَا-د غَارِي وَاوَاڒْ ن سِيذِي، إِنَّا:
٢ ”شكْ، أَ مِّيسْ ن بْنَاذمْ، أَمُّو إِ إِقَّارْ سِيذِي إِنُو، سِيذِي، إِ ثمُّورْثْ ن إِسْرَائِيل:
’أَنڭَّارْ، يُوسَا-د ؤُنڭَّارْ
خْ أَربْعَا ن إِغزْذِيسنْ ن ثمُّورْثْ.
٣ ڒخُّو يُوسَا-د خَامْ ؤُنڭَّارْ نّمْ،
مِينْزِي أَذْ غَارمْ د-سكّغْ أَغْضَابْ إِنُو
ؤُ أَذْ خَامْ حكْمغْ أَمْ يِيبْرِيذنْ نّمْ
ؤُشَا أَذْ خَامْ ڭّغْ مَارَّا جّْعَايفْ نّمْ.
٤ وَارْ ذ أَمْ زِّيدْجِيزنْثْ ثِيطَّاوِينْ إِنُو
ؤُ وَارْ أَرحّْمغْ،
مِينْزِي أَذْ أَرّغْ إِبْرِيذنْ نّمْ
خْ ؤُزدْجِيفْ نّمْ
ؤُ جّْعَايفْ نّمْ أَذْ شمْ ڒقْفنْثْ
ذِي ڒْْوسْطْ نّمْ.
أَمُّو إِ غَا ثسّْنمْ بلِّي نشّْ ذ سِيذِي.‘
٥ أَمُّو إِ إِقَّارْ سِيذِي إِنُو، سِيذِي:
’إِجّْ ن ڒْْغَارْ، إِجّْ ن ڒْْغَارْ إِفَارْزنْ،
أَقَا أَذْ د-يَاسْ.
٦ يُوسَا-د ؤُنڭَّارْ،
أَنڭَّارْ يُوسَا-د،
إِفَاقْ-د ضِيدّْ نّمْ،
أَقَا أَذْ د-يَاسْ!
٧ ثُوسَا-د غَاركْ ثْقدُّوحْثْ،
أَ أَمزْذُوغْ ن ثمُّورْثْ،
ثَاسَاعّثْ ثُوسَا-د،
أَسّْ ن ؤُخَارْوضْ إِقَارّبْ-د
ؤُ وَارْ ذِينْ أَسْڒِيوْڒوْ
زڭْ إِذُورَارْ.
٨ ڒخُّو ذغْيَا أَذْ خَامْ زدْجْعغْ أَسْعَارْ إِنُو
ؤُشَا أَذْ ذَايمْ كمّْڒغْ أَغْضَابْ إِنُو.
أَذْ خَامْ حكْمغْ أَنشْثْ ن إِبْرِيذنْ نّمْ
ؤُشَا أَذْ خَامْ سِّيوْضغْ
مَارَّا جّْعَايفْ نّمْ.
٩ وَارْ زِّيدْجِيزغْ ؤُ وَارْ أَرحّْمغْ.
أَذْ غَارمْ د-أَرّغْ
مِينْ ثسّْذَاهدْجذْ،
ؤُ جّْعَايفْ نّمْ أَذْ إِڒِينْثْ ذِي ڒْْوسْطْ نّمْ
ؤُ كنِّيوْ أَذْ ثسّْنمْ
بلِّي أَقَا نشّْ ذ سِيذِي
ونِّي كنِّيوْ إِشَّاثنْ.‘
١٠ ’خْزَارْ، أَسّْ، خْزَارْ،
أَقَا ذَا ثِيوضْ-د ثْقدُّوحْثْ،
ثقْضَا ثْقدُّوحْثْ،
ثْنوَّارْ ثَاغَّارْشْثْ،
ثسّنْذِي نّْفَاخثْ.
١١ إِڭعّذْ لْعُونْفْ أَمْ ؤُزدْجَاضْ ن ڒْْغَارْ.
وَارْ زَّايْسنْ إِقِّيمْ ؤُڒَا ذ إِجّْ،
وَالُو ن ڒْْغَاشِي نْسنْ إِنْهوْڒنْ،
وَالُو ن دّْرِيزْ نْسنْ
ؤُ وَالُو ن ؤُسمْغَارْ أَذْ غَارْسنْ إِقِّيمْ عَاذْ.
١٢ ثُوسَا-د ثْسَاعّثْ، إِخشّذْ وَاسّْ.
أجّْ ونِّي إِسْغِينْ وَارْ إِفَارّحْ
ؤُ أجّْ ونِّي إِزّْنُوزَانْ وَارْ إِتّشْضِينْ،
مِينْزِي ڒْْحَاذُوقْ ن وغْضَابْ
أَقَا-ث خْ مَارَّا ڒْْغَاشِي نّسْ إِنْهوْڒنْ.
١٣ مِينْزِي ونِّي إِزّْنُوزَانْ
وَارْ د-إِذِّيكّْوِيڒْ
غَارْ مِينْ إِمّنْزنْ،
وَاخَّا نِيثْنِي قِّيمنْ دَّارنْ،
مِينْزِي وَارْ إِبطِّيڒْ ڒوْحِييْ
خْ مَارَّا ڒْْغَاشِي إِنْهوْڒنْ ن ثمُّورْثْ،
ؤُشَا ؤُڒَا ذ إِجّْ وَارْ إِزمَّارْ س ڒْْمُوعْصِييّثْ نّسْ
أَذْ إِقِّيمْ إِتّطّفْ ذِي ثُوذَارْثْ نّسْ.
١٤ نِيثْنِي سُوضنْ س جّهْذْ ذِي ڒْبُوقْ
ؤُشَا سّْوجْذنْ مَارَّا ڒحْوَايجْ،
مَاشَا ؤُڒَا ذ إِجّْ وَارْ إِتّفّغْ غَارْ ؤُمنْغِي،
مِينْزِي ڒْْحَاذُوقْ ن وغْضَابْ إِنُو
أَقَا-ث خْ مَارَّا ڒْْغَاشِي إِنْهوْڒنْ ن ثمُّورْثْ.‘
١٥ ’زِي بَارَّا سِّيفْ
ؤُ زِي ذَاخڒْ طَّاعُونْ ذ ڒَْاژْ.
وِي إِدْجَانْ ذڭْ إِيَّارْ أَذْ إِمّثْ س سِّيفْ،
وِي إِدْجَانْ ذِي ثنْذِينْثْ أَذْ ث يشّْ ڒَْاژْ ذ طَّاعُونْ.
١٦ وِي زَّايْسنْ يَاروْڒنْ، وَاهْ أَذْ نجْمنْ،
مَاشَا أَذْ إِڒِينْ خْ إِذُورَارْ
أَمْ إِذْبِيرنْ زِي ثغْزُورِينْ،
أَذْ نّزْبَارنْ مَارَّا،
كُوڒْ إِجّْ خْ ڒْْمُوعْصِييّثْ نّسْ.
١٧ مَارَّا إِفَاسّنْ أَذْ هيّْفنْ،
ؤُ مَارَّا إِفَادّنْ أَذْ ذوْڒنْ ذ أَمَانْ.‘
١٨ ’أَذْ بيْسنْ س ثْخُونْشَايْ ن وشْضَانْ،
أَرْجفْ أَذْ ثنْ إِسّْذُورِييْ
خْ مَارَّا ؤُذْمَاونْ أَذْ يِيڒِي ڒحْيَا
ؤُ خْ مَارَّا إِزدْجِيفنْ نْسنْ ثُوقشَّارْثْ.
١٩ أَذْ نْضَارنْ نُّوقَارْثْ نْسنْ ذڭْ إِبْرِيذنْ
ؤُ ؤُرغْ نْسنْ أَذْ يِيڒِي أَمْ شَا ن ڒْْحَاجّثْ ثخْمجْ.
نُّوقَارْثْ نْسنْ ذ وُورغْ نْسنْ
وَارْ زمَّارنْ أَذْ ثنْ فكّنْ
ذڭْ وَاسّْ ن ؤُذُوقّزْ ن ؤُفُوڭمْ ن سِيذِي.
وَارْ زمَّارنْ أَذْ زَّايْسنْ سّْجِيوْننْ
ڒعْمَارْ نْسنْ
نِيغْ أَذْ زَّايْسنْ شُّورنْ ثَاكْرِيشْثْ نْسنْ،
مِينْزِي أَيَا ثُوغَا ذ سِّيبّثْ ن ؤُنقْرَاضْ
إِ د-يِيوْينْ ڒْْمُوعْصِييّثْ نْسنْ.
٢٠ أَژْرِي ن ثلْوِيزْثْ إِڭَّا إِ-ث ذ لْعَاضَامَا يُوعْڒَانْ،
مَاشَا نِيثْنِي ڭِّينْ ذَايسْ
ڒخْيَاڒَاثْ ن نّْعَاوَاثْ نْسنْ ن لْ-أَصْنَامْ
ؤُ ڒخْيَاڒَاثْ ن جّْعَايفْ نْسنْ.
خْ ؤُيَا أَرِّيغْ ثَالْوِيزْثْ ذ ثَاخْمُوجِي إِ نِيثْنِي.
٢١ نشّْ أَذْ ت وْشغْ ذ ثُوشّفّْرَا
ذڭْ ؤُفُوسْ ن إِبَارَّانِييّنْ
ؤُشَا أَذْ ت وْشغْ ذ ثَاكشَّاضْثْ
إِ إِعفَّاننْ ن ثمُّورْثْ،
ؤُشَا نِيثْنِي أَذْ سّْعِيدْجْثنْ ثَالْوِيزْثْ.
٢٢ نشّْ أَذْ خَاسْ سّنْقڒْبغْ ؤُذمْ إِنُو
ؤُ نِيثْنِي أَذْ سّْعِيدْجْثنْ ثَازذِّيغْثْ إِنُو إِنُّوفَارنْ،
مَاغَارْ إِشفَّارنْ أَذْ ذِينْ أَذْفنْ
ؤُشَا أَذْ سّْعِيدْجْثنْ مَارَّا.‘
٢٣ ’سوْجذْ سّْنسْڒثْ،
مِينْزِي ثَامُّورْثْ ثشُّورْ س ؤُسِيزّڒْ ن إِذَامّنْ
ؤُ ثَانْذِينْثْ ثشُّورْ س لْعُونْفْ.
٢٤ نشّْ أَذْ أَوْيغْ ڒڭْنُوسْ إِعفَّاننْ قَاعْ،
ؤُ نِيثْنِي أَذْ طّْفنْ ثُوذْرِينْ نْسنْ،
أَذْ سّْبدّنْ نّْفَاخثْ ن أَيْثْ ن جّهْذْ،
ؤُشَا أَذْ تّْوَاسّْعِيدْجْثنْثْ
ثْزَاوِييِّينْ نْسنْ إِقدّْسنْ.
٢٥ أَذْ د-يَاسْ ؤُنخْڒِيعْ ذ أَمقّْرَانْ.
نِيثْنِي أَذْ أَرْزُونْ ڒهْنَا،
مَاشَا وَارْ إِتِّيڒِي.
٢٦ أَقَا أَذْ د-يَاسْ ؤُشڒْوَاوْ أَوَارْنِي إِ ؤُشڒْوَاوْ،
أَذْ يِيڒِي ڒْْهَارْذْ أَوَارْنِي إِ ڒْهَارْذْ.
نِيثْنِي أَذْ أَرْزُونْ ڒوْحِييْ ن ؤُنَابِي،
وَاخَّا ثقْضَا شَّارِيعَا ن ؤُكهَّانْ
ذ شّْوَارْ ن إِمْغَارنْ
٢٧ أَجدْجِيذْ أَذْ إِشْضنْ،
ڒْْحَاكمْ أَذْ يَارْضْ أَنخْڒِيعْ
ؤُ إِفَاسّنْ ن ڒْْڭنْسْ
أَذْ قَارّْمنْ س ثِيڭّْوُوذِي.
نشّْ أَذْ زَّايْسنْ ڭّغْ أَمْ وبْرِيذْ نْسنْ
ؤُ نشّْ أَذْ خَاسنْ حكْمغْ
أَمْ لْفَارَايِيضْ نْسنْ.
أَمُّو إِ غَا سّْننْ أَقَا نشّْ ذ سِيذِي.‘ “