١ خنِّي يَارَّا أَيِي عَاوذْ غَارْ ثوَّارْثْ ن بَارَّا ن زَّاوشْثْ إِقدّْسنْ نِّي إِخزَّارنْ غَارْ شَّارْقْ. ثُوغَا ثْبلّعْ. ٢ إِنَّا أَيِي سِيذِي: ”ثَاوَّارْثْ-أَ أَذْ ثقِّيمْ ثْبلّعْ، وَارْ ثَارْزمْ شَا ؤُشَا ؤُڒَا ذ إِجّْ أَذْ زَّايسْ يَاذفْ. مِينْزِي سِيذِي، أَربِّي ن إِسْرَائِيل، يُوذفْ زَّايسْ، خْ ؤُيَا أَذْ ثقِّيمْ ثْبلّعْ. ٣ ڒْْحَاكمْ وَاهَا إِ يدْجَانْ ذ ڒْْحَاكمْ، أَذْ ذِينْ إِقِّيمْ حِيمَا أَذْ يشّْ أَغْرُومْ زَّاثْ إِ وُوذمْ ن سِيذِي. أَذْ يَاذفْ س ؤُكُولْوَارْ ن وسْقِيفْ ن ڒبْنِي ن ثوَّارْثْ ؤُشَا أَذْ إِفّغْ س ؤُكُولْوَارْ نّسْ.“

٤ أَوَارْنِي أَسْ إِنْذهْ أَيِي س ثوَّارْثْ ن شَّامَالْ غَارْ زَّاثْ ن ثَادَّارْثْ. خزَّارغْ، ؤُشَا خْزَارْ، أَعُودْجِي ن سِيذِي إِشُّورْ ثَادَّارْثْ ن سِيذِي. خنِّي وْضِيغْ س ؤُغمْبُوبْ إِنُو غَارْ ثمُّورْثْ. ٥ إِنَّا أَيِي سِيذِي: ”أَ مِّيسْ ن بْنَاذمْ، أڭّْ ؤُڒْ نّشْ، خْزَارْ س ثِيطَّاوِينْ نّشْ ؤُشَا سڒْ س إِمزُّوغنْ نّشْ مَارَّا مِينْ ذ أَشْ غَا سِّيوْڒغْ خْ مَارَّا ثِيوصَّا ن ثَادَّارْثْ ن سِيذِي ؤُ خْ مَارَّا إِزرْفَانْ نّسْ. أڭّْ ؤُڒْ نّشْ خْ كُوڒْ إِجّنْ إِ إِتَّاذْفنْ ثَادَّارْثْ س مَارَّا ؤُفُّوغنْ ن زَّاوشْثْ إِقدّْسنْ ٦ ؤُشَا إِنِي إِ يِينِّي إِتّْغوّْغنْ، إِ ثَادَّارْثْ ن إِسْرَائِيل: ’أَمُّو إِ إِقَّارْ سِيذِي إِنُو، سِيذِي: شْفَا مَارَّا جّْعَايفْ نْومْ، أَ ثَادَّارْثْ ن إِسْرَائِيل، ٧ مَاغَارْ كنِّيوْ ثسِّيذْفمْ إِبَارَّانِييّنْ، إِنِّي وَارْ إِتّْوَاخثْننْ ن وُوڒْ ؤُ إِنِّي وَارْ إِتّْوَاخثْننْ ن أَرِّيمثْ، مَاحنْذْ أَذْ إِڒِينْ ذِي زَّاوشْثْ إِنُو إِقدّْسنْ ؤُ أَذْ سّْعِيدْجْثنْ أَمُّو ثَادَّارْثْ إِنُو، ڒَْامِي كنِّيوْ ثِيوْيمْ أَغْرُومْ إِنُو، إِخْسْ أَذْ يِينِي ثَاذُونْثْ ذ إِذَامّنْ، ؤُ أَرْژِينْ نِيثْنِي ڒْْعَاهْذْ إِنُو سنّجْ إِ مَارَّا جّْعَايفْ إِ ثڭِّيمْ س يِيخفْ نْومْ. ٨ كنِّيوْ وَارْ ثحْضِيمْ أَحطُّو خْ مِينْ إِدْجَانْ إِقدّْسنْ إِ نشّْ ؤُشَا ثڭِّيمْ إِمحْضَاينْ إِ يِيخفْ نْومْ مَاحنْذْ أَذْ حْضَانْ خْ زَّاوشْثْ إِنُو إِقدّْسنْ.“

٩ ”أَمُّو إِ إِقَّارْ سِيذِي إِنُو، سِيذِي: ’ؤُڒَا ذ إِجّْ ن ڒْْبَارَّانِي نِّي وَارْ إِتّْوَاخثْننْ ؤُڒْ نّسْ ؤُ وَارْ إِتّْوَاخثْننْ أَيْسُومْ نّسْ أَذْ يَاذفْ غَارْ زَّاوشْثْ إِنُو إِقدّْسنْ. أَمُّو إِ غَا يِيڒِي إِ كُوڒْ ڒْْبَارَّانِي نِّي إِدْجَانْ ذِي ڒْْوسْطْ ن أَيْثْ ن إِسْرَائِيل. ١٠ إِلَاوِييّنْ نِّي يَاڭّْوجنْ خَافِي أَطَّاسْ ؤُمِي زَّايِي إِودَّارْ إِسْرَائِيل، فّْغنْ زڭْ وبْرِيذْ، ؤُيُورنْ أَوَارْنِي إِميْضَا نْسنْ ن لْ-أَصْنَامْ. أَقَا نِيثْنِي أَذْ أَرْبُونْ ڒْْمُوعْصِييّثْ نْسنْ. ١١ أَذْ حْضَانْ ذِي زَّاوشْثْ إِنُو إِقدّْسنْ غَارْ ڒبْنِييَّاثْ ن ثوَّارْثْ ن ثَادَّارْثْ ؤُشَا أَذْ سخَّارنْ عَاوذْ ذِي ثَادَّارْثْ. نِيثْنِي أَذْ غَارْصنْ ثَاغَارْصْثْ ن وشْمَاضْ ذ ثْغَارْصْثْ إِ ڒْْڭنْسْ ؤُشَا أَذْ بدّنْ زَّاثْ إِ وُوذمْ ن ڒْْڭنْسْ مَاحنْذْ أَذْ أَسنْ سخَّارنْ. ١٢ ؤُمِي ثُوغَا تّْسخَّارنْ زَّاثْ إِ وُوذمْ ن إِميْضَا نْسنْ ن لْ-أَصْنَامْ ؤُ ؤُمِي ثنْ ثُوغَا ذ إِشْثْ ن سِّيبّثْ إِ د-يِيوْينْ ڒْْمُوعْصِييّثْ إِ ثَادَّارْثْ ن إِسْرَائِيل، خْ ؤُيَا أَقَا سّْڭعّْذغْ نشّْ أَفُوسْ إِنُو خَاسنْ ؤُ نِيثْنِي أَذْ أَرْبُونْ ڒْْمُوعْصِييّثْ نْسنْ، أَمُّو إِ إِقَّارْ سِيذِي إِنُو، سِيذِي. ١٣ وَارْ إِعدّڒْ أَذْ غَارِي د-قَارّْبنْ مَاحنْذْ أَذْ أَيِي إِڒِينْ ذ إِكهَّاننْ ؤُ مَاحنْذْ أَذْ د-قَارّْبنْ غَارْ مَارَّا ثِيمسْڒَايِينْ إِقدّْسنْ إِنُو، غَارْ ثْمسْڒَايِينْ إِقدّْسنْ قَاعْ. نِيثْنِي أَذْ أَرْبُونْ ڒفْذِيحثْ نْسنْ ذ جّْعَايفْ إِ ڭِّينْ. ١٤ أَذْ ثنْ ڭّغْ مَاحنْذْ أَذْ حْضَانْ خْ ثْسخَّارْثْ ذِي ثَادَّارْثْ، خْ مَارَّا ڒْْخذْمثْ نّسْ ؤُ خْ مَارَّا مِينْ إِتّْخصَّا أَذْ ذَايسْ إِتّْوَاڭّْ.‘ “

١٥ ”مَاشَا إِكهَّاننْ إِلَاوِييّنْ، أَيْثْ ن صَاذُوقْ، إِنِّي إِحْضَانْ أَحطُّو ن زَّاوشْثْ إِنُو إِقدّْسنْ خْمِي خَافِي إِڭّْوجنْ أَيْثْ ن إِسْرَائِيل، أَذْ غَارِي د-قَارّْبنْ مَاحنْذْ أَذْ أَيِي سخَّارنْ. نِيثْنِي أَذْ بدّنْ زَّاثْ إِ وُوذمْ إِنُو مَاحنْذْ أَذْ غَارِي د-أَوْينْ ثَاذُونْثْ ذ إِذَامّنْ، أَمُّو إِ إِقَّارْ سِيذِي إِنُو، سِيذِي. ١٦ نِيثْنِي أَذْ أَذْفنْ غَارْ زَّاوشْثْ إِنُو إِقدّْسنْ ؤُشَا أَذْ د-قَارّْبنْ غَارْ طَّابْڒَا إِنُو مَاحنْذْ أَذْ أَيِي سخَّارنْ ؤُ أَذْ حْضَانْ ثَاسخَّارْثْ إِنُو. ١٧ أَذْ يِيڒِي خْمِي غَا يَاذْفنْ غَارْ ڒبْنِييَّاثْ ن ثوَّارْثْ ن ڒمْرَاحْ ن ذَاخڒْ، أَذْ أَرْضنْ أَرُّوضْ ن ڒقْطنْ. وَارْ إِعدّڒْ أَذْ أَرْضنْ شَا ن ثَاضُوفْثْ خْمِي غَا سخَّارنْ ذِي ڒبْنِييَّاثْ ن ثوَّارْثْ ن ڒمْرَاحْ ن ذَاخڒْ ؤُ غَارْ ذَاخڒْ نّسْ. ١٨ أَرژَّاثْ ن ڒقْطنْ أَذْ إِڒِينْ خْ إِزدْجِيفنْ نْسنْ ؤُ سّْرَاوڒْ نْ ڒقْطنْ أَذْ إِڒِينْ خْ ثجْعِينَّاثِينْ نْسنْ، وَارْ بيْسنْ شَا مِينْ زِي غَا سُّوفّْغنْ ثِيذِي. ١٩ خْمِي غَا فّْغنْ غَارْ ڒمْرَاحْ ن بَارَّا، غَارْ ڒمْرَاحْ ن بَارَّا غَارْ ڒْْڭنْسْ، خنِّي أَذْ كّْسنْ أَرُّوضْ نْسنْ إِ ذِي سخَّارنْ ؤُشَا أَذْ ث سَّارْسنْ ذڭْ إِخَّامنْ إِقدّْسنْ. أَوَارْنِي أَسْ أَذْ أَرْضنْ أَرُّوضْ نّغْنِي، حِيمَا وَارْ سّْقدَّاسنْ ڒْْڭنْسْ س وَارُّوذْ نْسنْ. ٢٠ وَارْ سّْقُوشَّارنْ أَزدْجِيفْ نْسنْ ؤُ وَارْ تّجِّينْ ثِيجطَّايِينْ نْسنْ أَذْ أَيْڒنْثْ أَمنِّي وَاهَا. نِيثْنِي أَذْ قسّنْ أَشُوَّافْ ن ؤُزدْجِيفْ نْسنْ مْلِيحْ. ٢١ وَارْ إِعدّڒْ ؤُڒَا إِ يِيجّْ ن ؤُكهَّانْ أَذْ إِسُو بِينُو، خْمِي غَا يَاذفْ غَارْ ڒمْرَاحْ ن ذَاخڒْ. ٢٢ وَارْ ذ أَسنْ إِعدّڒْ إِ إِكهَّاننْ مَاحنْذْ أَذْ أَوْينْ إِشْثْ ن ثَاجَّاتْشْ نِيغْ إِشْثْ ن ثْنُوڒُوفْثْ ذ ثَامْغَارْثْ إِ يِيخفْ نْسنْ. إِعدّڒْ مَاحنْذْ أَذْ أَوْينْ مْغِيرْ ثِيعْزُورَايْ زِي زَّارِيعثْ ن ثَادَّارْثْ ن إِسْرَائِيل إِشْثْ ن ثَاجَّاتْشْ ثنِّي ذ ثَاجَّاتْشْ ن إِجّْ ن ؤُكهَّانْ. ◘ ٢٣ أَذْ سّْڒمْذنْ ڒْْڭنْسْ إِنُو ڒْْفَارْقْ جَارْ مِينْ إِدْجَانْ إِقدّْسنْ ذ مِينْ وَارْ إِدْجِينْ إِقدّْسنْ ؤُشَا أَذْ ثنْ سَّارڭْبنْ ڒْْفَارْزْ جَارْ مِينْ إِخمْجنْ ذ مِينْ إِزْذِيڭنْ. ٢٤ ذڭْ ؤُمْشُوبّشْ أَذْ كَّارنْ حِيمَا أَذْ شَارّْعنْ. أَذْ ثنْ حَاكْمنْ عْلَاحْسَابْ لْفَارَايِيضْ إِنُو. نِيثْنِي أَذْ حْضَانْ ثِيوصَّا إِنُو ذ لْفَارَايِيضْ إِنُو ذِي مَارَّا ڒعْيُوذَاثْ إِنُو إِتّْوَاڭّنْ ؤُشَا أَذْ سّْقدّْسنْ ؤُسَّانْ إِنُو ن سّبْثْ. ٢٥ وَارْ إِعدّڒْ أَذْ إِرحّڭْ ؤُكهَّانْ غَارْ إِجّْ ن بْنَاذمْ إِمُّوثنْ أَڒَامِي غَا إِسّخْمجْ إِخفْ نّسْ. إِعدّڒْ وَاهَا أَذْ سّْخمْجنْ إِخفْ نْسنْ مْغِيرْ إِ بَابَاثْسنْ نِيغْ إِ يمَّاثْسنْ نِيغْ إِ مِّيثْسنْ نِيغْ إِ يدْجِيثْسنْ نِيغْ إِ ؤُمَاثْسنْ نِيغْ إِ ؤُتْشْمَاثْسنْ نِّي وَارْ إِمْڒِيشنْعمَّارْصْ. ٢٦ أَوَارْنِي ؤُسِيزْذڭْ نّسْ إِتّْخصَّا أَسنْ أَذْ حسّْبنْ سبْعَا ن وُوسَّانْ إِ نتَّا. ٢٧ ذڭْ وَاسّْ نِّي إِ غَا يَاذفْ غَارْ ؤُقدَّاسْ، غَارْ ڒمْرَاحْ ن ذَاخڒْ، مَاحنْذْ أَذْ إِسخَّارْ ذڭْ ؤُقدَّاسْ، إِتّْخصَّا أَسْ أَذْ د-إِسّْقَارّبْ ثَاغَارْصْثْ ن دّنْبْ، أَمُّو إِ إِقَّارْ سِيذِي إِنُو، سِيذِي.“

٢٨ ”وَا أَذْ يِيڒِي ذ ڒْْوَارْثْ نْسنْ: نشّْ ذ ڒْْوَارْثْ نْسنْ. وَارْ ذ أَسنْ ثتِّيشِيمْ ؤُڒَا ذ إِجّْ ن وَاڭْڒَا ن ثمُّورْثْ ذِي إِسْرَائِيل: نشّْ ذ أَڭْڒَا نْسنْ. ◘ ٢٩ إِعدّڒْ أَذْ شّنْ ثَاوْهِيبْثْ ن ڒْْغِيدْجثْ ذ ثْغَارْصْثْ ن دّنْبْ ذ ثْغَارْصْثْ ن ؤُمَارْوَاسْ. مَارَّا مِينْ إِتّْوَاحَارّْمنْ ذِي إِسْرَائِيل أَذْ أَسنْ يِيڒِي. ٣٠ مُومُّو ن ثْمنْزُوثْ ن مَارَّا ؤُ مَارَّا ثَاوْهِيبْثْ ن ؤُسْڭعّذْ، زِي مَارَّا ثِيوْهِيبِينْ نْومْ ن ؤُسْڭعّذْ، أَذْ يِيڒِي إِ إِكهَّاننْ. ثَامزْوَارُوثْ ن وَارشْثِي نْومْ أَذْ ت ثوْشذْ إِ ؤُكهَّانْ، حِيمَا أَذْ ثَارْسَا لْبَارَاكَا خْ ثَادَّارْثْ نّشْ. ◘ ٣١ ؤُڒَا ذ إِشْثْ ن ڒْْخشْبثْ نِيغْ مِينْ إِتّْوَاشَارّْڭنْ ن إِجْضَاضْ نِيغْ نْ ڒبْحَايمْ، وَارْ إِعدّڒْ أَذْ ث شّنْ إِكهَّاننْ.“ ◘