٤٢
إِخَّامنْ ن إِكهَّاننْ
١ نتَّا إِسُّوفّغْ أَيِي-د بَارَّا غَارْ ڒمْرَاحْ ن بَارَّا نِّي إِدْجَانْ غَارْ شَّامَالْ. نتَّا إِنْذهْ أَيِي غَارْ ڒبْنِي ن إِخَّامْأنْ نِّي إِدْجَانْ غَارْ ؤُغزْذِيسْ ن ڒمْرَاحْ إِتّْوَاعزْڒنْ ؤُ غَارْ ؤُغزْذِيسْ ن ڒبْنِي ن زَّاوشْثْ ثَامقّْرَانْثْ، غَارْ ؤُغزْذِيسْ ن شَّامَالْ،
٢ غَارْ ؤُغزْذِيسْ نّسْ ذ أَزِيرَارْ ن مْيَا ن إِغَادْجنْ، غَارْ وَاذَافْ ن شَّامَالْ، مَاشَا ثِيرُو نّسْ ثُوغَا ذِي خمْسِينْ ن إِغَادْجنْ.
٣ ثُوغَا ڒبْنِي زَّاثْ إِ تَّاسِيعْ يَارزْمنْ ن عِيشْرِينْ ن إِغَادْجنْ ن ڒمْرَاحْ ن ذَاخڒْ ؤُ زَّاثْ إِ زّلِّيجْ ن ڒمْرَاحْ ن بَارَّا. إِجّْ ن ؤُكُولْوَارْ أَكْ-ذ إِخَّامنْ نّسْ ثُوغَا إِسنّذْ خْ ؤُكُولْوَارْ نّغْنِي، ؤُشَا أَقَا ذِينْ ثْڒَاثَا ن طّبْقَاثْ.
٤ زَّاثْ ن إِخَّامنْ ثُوغَا ذِينْ إِجّْ ن ؤُكُولْوَارْ غَارْ ذَاخڒْ س إِشْثْ ن ثِيرُو نعشْرَا ن إِغَادْجنْ، إِشْثْ ن ثبْرِيذْثْ ن مْيَا ن إِغَادْجنْ، ؤُشَا ثِيوُّورَا ن وَاذَافْ نْسنْ ثُوغَا أَثنْثْ غَارْ شَّامَالْ.
٥ إِخَّامنْ ن سنّجْ ثُوغَا أَثنْ حْصَارنْ، مَاغَارْ إِكُولْوَارنْ كّْسنْ كْثَارْ تَّاسِيعْ زَّايْسنْ خْ يخَّامنْ ن وَادَّايْ ؤُ خْ يخَّامنْ غَارْ ڒْوسْثْ ن ڒبْنِي.
٦ مِينْزِي ثُوغَا أَثنْ ذِي ثْڒَاثَا ن ڒفْوَاقِي، مَاشَا وَارْ غَارْسنْ إِپِيلَارنْ أَمْ يِيپِيلَارنْ نْ ڒمْرَاحَاثْ. خْ ؤُيَا ثُوغَا أَثنْ إِخَامّنْ نِّي حْسَارنْ كْثَارْ خْ يِينِّي ن وَادَّايْ ذ يِينِّي ذِي ڒْْوسْطْ أَمْ غَارْسنْ ثْخزَّارذْ زِي ثمُّورْثْ.
٧ ڒْْحِيضْ نِّي ثُوغَا غَارْ بَارَّا قِيبَاتْشْ إِ يخَّامنْ، ڒْْحِيضْ نِّي إِدْجَانْ غَارْ ؤُغزْذِيسْ ن ڒمْرَاحْ ن بَارَّا، إِ د-إِتّكّنْ زَّاثْ إِ يخَّامنْ، ثُوغَا غَارسْ ثُوزّڭَّارْثْ ن خمْسِينْ ن إِغَادْجنْ.
٨ مِينْزِي ثُوزّڭَّارْثْ ن مَارَّا إِخَّامنْ نِّي إِدْجَانْ غَارْ ڒمْرَاحْ ن بَارَّا، ثُوغَا-ت ذِي خمْسِينْ ن إِغَادْجنْ. مَاشَا خْزَارْ، غَارْ ؤُغزْذِيسْ ن زَّاوشْثْ ثَامقّْرَانْثْ ثُوغَا-ت ذِي مْيَا ن إِغَادْجنْ.
٩ سْوَادَّايْ ن إِخَّامنْ-أَ ثڭُّورْ ثبْرِيذْثْ زِي شَّارْقْ خْمِي د غَارْسنْ ثِيوْضذْ زِي ڒمْرَاحْ ن بَارَّا.
١٠ غَارْ ثِيرُو ن ڒْْحِيضْ نْ ڒمْرَاحْ غَارْ شَّارْقْ، ڒْْحِيضْ زَّاثْ إِ ڒمْرَاحْ إِتّْوَاعزْڒنْ ؤُ غَارْ ؤُغزْذِيسْ ن ڒبْنِي، ثُوغَا ذِينْ عَاوذْ ڒبْنِييَّاثْ ن إِخَّامنْ،
١١ ؤُشَا أَكُولْوَارْ إِ د-إِتّكّنْ زَّاثْسنْ ثُوغَا أَمْ ثنِّي ن إِخَّامنْ نِّي إِدْجَانْ غَارْ ؤُغزْذِيسْ ن شَّامَالْ، أَنشْثْ ثُوزّڭَّارْثْ أَنشْثْ ثِيرُو ؤُ مَارَّا ؤُفُّوغنْ نّسْ ثُوغَا أَثنْ أَمْ صّنْعَاثْ ذ وَاذَافنْ نّسْ غَارْ ؤُغزْذِيسْ ن إِخَامّنْ غَارْ شَّامَالْ.
١٢ أَمْ مَامّشْ ذِينْ أَذَافنْ غَارْ ثخَّامِينْ ثِينِّي إِوجّْهنْ غَارْ لْجَانُوبْ، أَمنِّي إِ ذِينْ إِدْجَا ؤُڒَا ذ إِجّْ ن وَاذَافْ غَارْ بدُّو ن ثبْرِيذْثْ، ثَابْرِيذْثْ نِّي إِتّفّْغنْ زِي زَّاثْ إِ ڒْحِيذْ ن ڒمْرَاحْ إِتّْوَاعزْڒنْ ؤُشَا ثتَّاكّْوَاضْ غَارْ وبْرِيذْ إِ خْ د غَا يَاسْ بْنَاذمْ زِي شَّارْقْ غَارْ ڒمْرَاحْ إِتّْوَاعزْڒنْ.
١٣ خنِّي إِنَّا أَيِي: ”إِخَّامنْ نِّي إِدْجَانْ غَارْ شَّامَالْ ؤُ إِخَّامنْ نِّي إِدْجَانْ غَارْ لْجَانُوبْ، إِنِّي إِدْجَانْ غَارْ زَّاثْ ن ڒمْرَاحْ إِتّْوَاعزْڒنْ، أَقَا أَثنْ ذ إِخَّامنْ إِقدّْسنْ مَانِي إِكهَّاننْ، إِنِّي إِ غَا د-إِقَارّْبنْ غَارْ سِيذِي، أَذْ شّنْ ثِيوْهِيبِينْ إِقدّْسنْ أَطَّاسْ. ذِينْ إِتّْخصَّا أَذْ سَارْسنْ نِيثْنِي ثِيوْهِيبِينْ إِقدّْسنْ أَطَّاسْ: ثَاوْهِيبْثْ ن ڒْْغِيدْجثْ ذ ثوْهِيبْثْ ن دّنْبْ ذ ثوْهِيبْثْ ن ؤُمَارْوَاسْ، مِينْزِي أَمْشَانْ إِقدّسْ قَاعْ.
١٤ خْمِي غَا ؤُذْفنْ إِكهَّاننْ، وَارْ إِعدّڒْ أَذْ ؤُيُورنْ زِي زَّاوشْثْ إِقدّْسنْ غَارْ ڒمْرَاحْ ن بَارَّا. أَذْ سَّارْسنْ أَرُّوضْ نْسنْ ن ثْسخَّارْثْ، مَاغَارْ وَانِيثَا ذ أَمْقدّسْ. أَذْ أَرْضنْ أَرُّوضْ نّغْنِي ؤُشَا خنِّي أَذْ د-قَارّْبنْ غَارْ ڒمْرَاحْ نِّي إِدْجَانْ إِ ڒْْڭنْسْ.“ *
زَّاوشْثْ ثَامقّْرَانْثْ ن جْذِيذْ - جِّيهثْ إِقدّْسنْ
١٥ ؤُمِي إِكمّڒْ نتَّا ڒعْبَارْ ن مِينْ إِدْجَانْ ذَاخڒْ ن ثَادَّارْثْ، إِسُّوفُّوغْ أَيِي-د زڭْ وبْرِيذْ ن ثوَّارْثْ نِّي إِخزَّارنْ غَارْ شَّارْقْ ؤُشَا إِكْسِي ڒعْبَارْ ن جِّيهثْ إِقدّْسنْ ذڭْ ونّضْ مَارَّا.
١٦ إِعْبَارْ أَغزْذِيسْ ن شَّارْقْ س ؤُغَانِيمْ ن ڒعْبَارْ: خمْسَا-مْيَا ن إِغُونَامْ س ؤُغَانِيمْ ن ڒعْبَارْ ذڭْ ونّضْ.
١٧ إِعْبَارْ أَغزْذِيسْ ن شَّامَالْ، خمْسَا-مْيَا ن إِغُونَامْ س ؤُغَانِيمْ ن ڒعْبَارْ ذڭْ ونّضْ.
١٨ إِعْبَارْ أَغزْذِيسْ ن لْجَانُوبْ، خمْسَا-مْيَا ن إِغُونَامْ س ؤُغَانِيمْ ن ڒعْبَارْ.
١٩ إِنُوقَّارْ غَارْ ؤُغزْذِيسْ ن لْغَارْبْ ؤُشَا إِعْبَارْ خمْسَا-مْيَا ن إِغُونَامْ س ؤُغَانِيمْ ن ڒعْبَارْ.
٢٠ نتَّا إِعْبَارْ ڒبْنِي ن زَّاوشْثْ ثَامقّْرَانْثْ غَارْ أَربْعَا ن ثْغمُّورَا نّسْ. ثُوغَا غَارسْ ذڭْ ونّضْ نّسْ إِجّْ ن ڒْْحِيضْ س إِشْثْ ن ثُوزّڭَّارْثْ ن خمْسَا-مْيَا ن إِغُونَامْ ن ڒعْبَارْ ذ إِشْثْ ن ثِيرُو ن خمْسَا-مْيَا ن إِغُونَامْ ن ڒعْبَارْ مَاحنْذْ أَذْ إِفَارْزْ جَارْ مِينْ إِدْجَانْ إِقدّْسنْ ذ مِينْ وَارْ إِدْجِينْ إِقدّْسنْ.