٣٤
سِيذِي ذ أَمكْسَاوْ أَصبْحَانْ خْ ڒْْڭنْسْ نّسْ
١ يُوسَا-د غَارِي وَاوَاڒْ ن سِيذِي، إِنَّا:
٢ ”أَ مِّيسْ ن بْنَاذمْ، نَابّْ ضِيدّْ إِ إِمكْسَاونْ ن إِسْرَائِيل ؤُشَا إِنِي أَسنْ: ’أَمُّو إِ إِقَّارْ سِيذِي إِنُو، سِيذِي! ؤُشْثْ خْ إِمكْسَاونْ ن إِسْرَائِيل نِّي يَاركّْوسنْ إِخفْ نْسنْ! مَا وَارْ إِتّْخصِّي إِ إِمكْسَاونْ أَذْ أَروْسنْ ؤُدْجِي؟
٣ كنِّيوْ ثتّتّمْ ثَاذُونْثْ ؤُشَا ثَارّْضمْ ثَاضُوفْثْ، ثْغَارّْصمْ إِ ڒْْمَاڒْ إِمسّْڒنْ مْلِيحْ، مَاشَا وَارْ ثَاركّْوِيسمْ ؤُدْجِي.
٤ وَارْ ثسّْمعْزمْ مِينْ إِهيّْفنْ، وَارْ ثتّسّْڭنْفِيمْ مِينْ إِحڒْشنْ، مِينْ إِتّْوَارْژِينْ وَارْ ث ثْشفّْنمْ، مِينْ إِودَّارنْ وَارْ ث ثتَّارِّيمْ ؤُ مِينْ إِخْسَارنْ وَارْ خَاسْ ثَارزُّومْ، مَاشَا س ؤُقابُو ذ ؤُفُوسْ إِقسْحنْ ثْحكّْممْ خَاسنْ.
٥ أَمُّو إِ تّْوَازُوزَّارنْ، مِينْزِي وَارْ ذِينْ ثُوغِي بُو ؤُمكْسَاوْ. نِيثْنِي ذوْڒنْ ذ ثيْمَارْثْ ن ڒوْحُوشْ ن بَارَّا نِّي إِدْجَانْ ذِي ڒخْڒَا ؤُشَا أَمُّو إِ تّْوَابزّْعنْ.
٦ ؤُيُورنْ ودَّارنْ ؤُدْجِي إِنُو خْ مَارَّا إِذُورَارْ ؤُ خْ كُوڒْ ثَاوْرِيرْثْ يُوعْڒَانْ، ؤُدْجِي إِنُو تّْوَابزّْعنْ خْ مَارَّا ثَامُّورْثْ. وَارْ ذِينْ وِي خَاسنْ إِ غَا إِسّقْسَانْ ؤُشَا وَارْ ذِينْ وِي خَاسنْ يَارزُّونْ.‘ “
٧ ”س ؤُيَا، أَ إِمكْسَاونْ، سْڒمْ إِ وَاوَاڒْ ن سِيذِي:
٨ ’س ثِيذتّْ أَمْ دَّارغْ نشّْ، أَمُّو إِ إِقَّارْ سِيذِي إِنُو، سِيذِي، مَا وَارْ تِّيڒِيغْ نشّْ خَاسنْ؟ مِينْزِي ؤُدْجِي إِنُو ذوْڒنْ ذ ثَايْمَارْثْ ؤُ ؤُدْجِي إِنُو ذوْڒنْ ذ مَاشَّا إِ ڒوْحُوشْ ن ڒخْڒَا، ؤُمِي وَارْ ذِينْ إِدْجِي ؤُمكْسَاوْ ؤُ مِينْزِي إِمكْسَاونْ إِنُو وَارْ تّْسقْسَانْ شَا خْ وُودْجِي إِنُو ؤُ ؤُمِي إِمكْسَاونْ إِنُو أَروْسنْ إِخفْ نْسنْ، وَارْ إِدْجِي ؤُدْجِي إِنُو!‘ “
٩ ”س ؤُيَا، أَ إِمكْسَاونْ، سْڒمْ إِ وَاوَاڒْ ن سِيذِي!
١٠ أَمُّو إِ إِقَّارْ سِيذِي إِنُو، سِيذِي: ’خْزَارْ، نشّْ أَقَا أَيِي ضِيدّْ إِ إِمكْسَاونْ نِّي! نشّْ أَذْ تَّارغْ ؤُدْجِي إِنُو زڭْ ؤُفُوسْ نْسنْ ؤُشَا أَذْ ثنْ سّْبدّغْ زڭْ وَارْوَاسْ ن وُودْجِي، أَڒَامِي إِمكْسَاونْ وَارْ يَاركّْوسنْ عَاذْ إِخفْ نْسنْ. نشّْ أَذْ سّْنجْمغْ ؤُدْجِي إِنُو زڭْ ؤُقمُّومْ نْسنْ، أَڒَامِي وَارْ ذ أَسنْ تِّيڒِينْ عَاذْ ذ مَاشَّا.‘
١١ مِينْزِي أَمُّو إِ إِقَّارْ سِيذِي إِنُو، سِيذِي: ’خْزَارْ، نشّْ أَذْ سّقْسِيغْ خْ وُودْجِي إِنُو ؤُ أَذْ خَاسنْ أَرْزُوغْ.
١٢ أَمْ ؤُمكْسَاوْ أَذْ إِسّْمُونْ ثَاحِيمَارْثْ نّسْ ذڭْ وَاسّْ نِّي ذِي يدْجَا ذِي ڒْوسْثْ ن وُودْجِي نّسْ إِبزّْعنْ، أَمنِّي إِ غَا يْأَرْزُوغْ نشّْ خْ وُودْجِي إِنُو. نشّْ أَذْ ثنْ سّْنجْمغْ زِي مَارَّا إِمُوشَانْ مَانِي تّْوَابزّْعنْ، ذڭْ وَاسّْ ن إِسيْنُوثنْ ذ ثَادْجسْثْ.
١٣ نشّْ أَذْ ثنْ سُّوفّْغغْ زِي ڒڭْنُوسْ، أَذْ ثنْ سّْمُونغْ زِي ثمُّورَا ؤُشَا أَذْ ثنْ أَوْيغْ غَارْ ثمُّورْثْ نْسنْ. نشّْ أَذْ ثنْ أَروْسغْ خْ إِذُورَارْ ن إِسْرَائِيل، غَارْ ثْغزْرَاثِينْ ؤُ ذِي مَارَّا إِمُوشَانْ إِ إِتّْڒِيقنْ إِ ثْزذِّيغْثْ ذِي ثمُّورْثْ.
١٤ نشّْ أَذْ ثنْ أَروْسغْ خْ إِشْثْ ن دّمْنثْ ن ثَاروْسَا ذ ثَاصبْحَانْثْ. خْ إِذُورَارْ يُوعْڒَانْ ن إِسْرَائِيل أَذْ يِيڒِي ڒْْمذْوڒْ ن ثَاروْسَا نْسنْ. ذِينِّي أَذْ أَريّْحنْ ذڭْ إِشْثْ ن دّمْنثْ ن ثَاروْسَا ثَاصبْحَانْثْ ؤُ أَذْ أَروْسنْ ذڭْ إِشْثْ ن دّمْنثْ ن ثَاروْسَا ذ لمْلِيحْ أَطَّاسْ، خْ إِذُورَارْ ن إِسْرَائِيل.
١٥ نشّْ أَذْ أَروْسغْ ؤُدْجِي إِنُو ؤُشَا أَذْ ثنْ سَّاريّْحغْ!‘، أَمُّو إِ إِقَّارْ سِيذِي إِنُو، سِيذِي.
١٦ ’نشّْ أَذْ أَرْزُوغْ مِينْ إِخْسَارنْ ؤُشَا مِينْ إِودَّارنْ أَذْ ث أَرّغْ ؤُ مِينْ إِتّْوَارْژِينْ أَذْ ث شفْنغْ ؤُ مِينْ إِهڒْشنْ أَذْ ث سّْجهْذغْ، مَاشَا مِينْ إِمسّْڒنْ ذ مِينْ إِجهْذنْ أَذْ ث أَردّْدْجغْ. نشّْ أَذْ ثنْ أَروْسغْ سْ ڒْحقّْ.
١٧ ؤُ كنِّيوْ، أَ ؤُدْجِي إِنُو، أَمُّو إِ إِقَّارْ سِيذِي إِنُو، سِيذِي، خْزَارْ، نشّْ أَذْ حكْمغْ جَارْ إِجّنْ زڭْ وُودْجِي ذ وُودْجِي نّغْنِي، جَارْ إِشَارِّييّنْ ذ إِغَايْضنْ.
١٨ مَا ذْرُوسْثْ أَومْ ؤُمِي ثشِّيمْ دّمْنثْ ن ثَاروْسَا إِنُو ذ ثَاصبْحَانْثْ؟ مَا ثخْسمْ خنِّي عَاوذْ أَذْ ثْعفْسمْ خْ مِينْ إِقِّيمنْ إِ ثَاروْسَا س إِضَارنْ نْومْ؟ مَا ثخْسمْ أَذْ ثسْومْ أَمَانْ إِصْفَانْ ؤُشَا خنِّي أَذْ ثسَّارْوْينْ مِينْ إِقِّيمنْ س إِضَارنْ نْومْ؟
١٩ مَا إِتّْخصَّا خنِّي إِ وُودْجِي إِنُو أَذْ شّنْ مِينْ خفْعفْسنْ إِضَارنْ نْومْ ؤُ أَذْ سْونْ مِينْ سَّارْوْينْ إِضَارنْ نْومْ؟‘ “
٢٠ ”س ؤُيَا أَمُّو إِ ذ أَسنْ إِقَّارْ سِيذِي إِنُو، سِيذِي: ’خْزَارْ، نشّْ أَذْ شَارّْعغْ جَارْ وُودْجِي إِمسّْڒنْ ذ وُودْجِي إِكُّوشْضنْ،
٢١ مِينْزِي مَارَّا ؤُدْجِي إِضعْفنْ ثْعَارْنمْ إِ-ثنْ س ؤُغزْذِيسْ ؤُ س ثغْرُوضْثْ ؤُ ثسّْقَارْبمْ ثنْ س وَاشَّاونْ نْومْ، أَڒَامِي ثنْ ثْبزّْعمْ ذِي بَارَّا.
٢٢ نشّْ أَذْ سّْنجْمغْ ؤُدْجِي إِنُو أَڒَامِي وَارْ تِّيڒِينْ عَاذْ إِ ثيْمَارْثْ ؤُ نشّْ أَذْ شَارّْعغْ جَارْ إِجّنْ زڭْ وُودْجِي ذ وُودْجِي نّغْنِي.
٢٣ نشّْ أَذْ خَاسنْ سّكَّارغْ إِجّْ ن ؤُمكْسَاوْ نِّي ثنْ إِ غَا يَاروْسنْ: أَمْسخَّارْ إِنُو ذَاوُوذْ. نتَّا أَذْ ثنْ يَارْوسْ ؤُ نتَّا أَذْ أَسنْ يِيڒِي ذ أَمكْسَاوْ.
٢٤ نشّْ، سِيذِي، أَذْ أَسنْ إِڒِيغْ ذ أَربِّي ؤُ أَمْسخَّارْ إِنُو ذَاوُوذْ أَذْ يِيڒِي ذ ڒْْحَاكمْ ذِي ڒْْوسْطْ نْسنْ، نشّْ، سِيذِي، أَقَا نِّيغْ ث.
٢٥ نشّْ أَذْ ڭّغْ إِجّْ ن ڒْْعَاهْذْ ن ڒهْنَا أَكِيذْسنْ ؤُشَا أَذْ كّْسغْ ڒوْحُوشْ إِوْعَارنْ زِي ثمُّورْثْ. نِيثْنِي أَذْ زذْغنْ ذِي ڒخْڒَا سْ ڒَامَانْ ؤُشَا أَذْ طّْصنْ ذڭْ إِزغْرَانْ.
٢٦ أَذْ ڭّغْ مِينْ إِنّْضنْ إِ وذْرَارْ إِنُو ذ لْبَارَاكَا ؤُ نشّْ أَذْ د-سّهْوِيغْ أَنْژَارْ ذِي ڒْْوقْثْ نّسْ. أَذْ ذِينْ يِيڒِي ونْژَارْ أَطَّاسْ س لْبَارَاكَا.
٢٧ ثِيشجِّيرَا ن ييَّارْ أَذْ وْشنْثْ ڒْْغِيدْجثْ نْسنْثْ ؤُشَا ثَامُّورْثْ أَذْ ثوْشْ صَّابثْ نّسْ ؤُشَا نِيثْنِي أَذْ زذْغنْ ذِي ڒَامَانْ ذِي ثمُّورْثْ نْسنْ. خنِّي أَذْ سّْننْ بلِّي نشّْ ذ سِيذِي، خْمِي غَا أَرْژغْ إِمْقدْجَاذنْ ن زَّايْڒثْ نْسنْ ؤُشَا أَذْ ثنْ قڒْعغْ زڭْ ؤُفُوسْ ن يِينِّي ثنْ إِجِّينْ أَذْ أَسنْ سخَّارنْ.
٢٨ وَارْ تِّيڒِينْ عَاذْ ذ ثَاكشَّاضْثْ إِ ڒڭْنُوسْ ؤُشَا ڒوْحُوشْ ن ثمُّورْثْ وَارْ ثنْ صَارّْضنْ عَاذْ، مَاشَا نِيثْنِي أَذْ زذْغنْ ذِي ڒَامَانْ ؤُ وَارْ ثنْ إِسّْنخْڒِيعْ ؤُڒَا ذ إِجّْ.
٢٩ نشّْ أَذْ أَسنْ سّْذُوقّْزغْ إِجّْ ن ؤُغمُّويْ، أَذْ يِيڒِي إِ يِيجّْ ن يِيسمْ إِشنّْعنْ. خنِّي وَارْ تّْمكْسِينْ عَاذْ س ڒَْاژْ زِي ثمُّورْثْ ؤُشَا وَارْ أَربُّونْ عَاذْ ڒْْحڭْرَا ن ڒڭْنُوسْ.
٣٠ خنِّي أَذْ سّْننْ بلِّي نشّْ، سِيذِي أَربِّي نْسنْ، أَقَا أَيِي كِيذْسنْ، ؤُشَا نِيثْنِي ذ ڒْْڭنْسْ إِنُو، ثَادَّارْثْ ن إِسْرَائِيل!، أَمُّو إِ إِقَّارْ سِيذِي إِنُو، سِيذِي.
٣١ كنِّيوْ، أَ ؤُدْجِي إِنُو، ؤُدْجِي ن ڒْْمذْوڒْ إِنُو ن ثَاروْسَا، كنِّيوْ ذ بْنَاذمْ، مَاشَا نشّْ ذ أَربِّي نْومْ، أَمُّو إِ إِقَّارْ سِيذِي إِنُو، سِيذِي.‘ “