١٧
ڒْغذْرَانْ ن صِيذْقِييَا
١ يُوسَا-د غَارِي وَاوَاڒْ ن سِيذِي، إِنَّا:
٢ ”أَ مِّيسْ ن بْنَاذمْ، عَاوذْ إِشْثْ ن طْحَاجِيثْ ن ثْوَافِيثْ ؤُ أوْشْ إِجّْ ن ؤُمذْيَا إِ ثَادَّارْثْ ن إِسْرَائِيل
٣ ؤُشَا إِنِي:
’أَمُّو إِ إِقَّارْ سِيذِي إِنُو، سِيذِي!
أَڭِيذرْ ذ أَمقّْرَانْ س وَافْرِيونْ أَرزْمنْ،
ذَايْسنْ ڒوْثَاذْ إِزِيرَارنْ شُّورنْ
س وَارِّيشْ ذ ثِينْثَاثْ إِفَارْزنْ،
يُوسَا-د غَارْ إِذُورَارْ ن لُوبْنَانْ
ؤُشَا إِكّسْ ثُوشّنْثْ ن ثْشجَّارْثْ ن ثنْڭلْثْ.
٤ أَزدْجِيفْ ن ڒفْرُوعْ نّسْ إِسّنْذَاينْ إِكّسْ إِ-ث،
ؤُشَا يِيوْيِي ث غَارْ إِشْثْ ن ثمُّورْثْ ن تِّيجَارَا
ؤُشَا إِسَّارْسْ إِ-ث
ذڭْ إِشْثْ ن ثنْذِينْثْ ن إِسبَّابنْ.
٥ إِكْسِي زِي زَّارِيعثْ ن ثمُّورْثْ
ؤُشَا إِڭَّا إِ-ت ذڭْ إِجّْ ن ييَّارْ إِشْنَا إِ وزْرَاعْ.
إِكْسِي ت، إِژُّو ت
أَمْ ثْشجَّارْثْ ن ؤُصفْصَافْ غَارْ وَامَانْ أَطَّاسْ.
٦ ثغْمِي-د زَّارِيعثْ
ؤُشَا ثذْوڒْ ذ ثَازَايَارْثْ
س ڒفْرُوعْ وسّْعنْ
أَكْ-ذ ثْرُونْكُو ذ أَقُوضَاضْ
نِّي زِي ذوْڒنْثْ ثْسضْوِينْ غَارْ ؤُڭِيذرْ،
أَمْ ثُوغَا إِژوْرَانْ نّسْ قِّيمنْ سَاذُو نّسْ.
أَمُّو إِ ثذْوڒْ ذ إِشْثْ ن ثْزَايَارْثْ
نِّي إِسُّوفّْغنْ ثِيسضْوِينْ
ؤُشَا ثڭَّا أَذْ سّنْذْينْ إِفثْوَانْ.
٧ ثُوغَا عَاوذْ إِجّْ ن ؤُڭِيذرْ أَمقّْرَانْ نّغْنِي
س وَافْرِيونْ إِمْغَارنْ ذ وَاطَّاسْ ن أَرِّيشْ
ؤُشَا خْزَارْ، ثَازَايَارْثْ ثَارَّا إِژوْرَانْ نّسْ غَارسْ
ؤُشَا ثسّْوِيژّضْ ثِيسضْوِينْ نّسْ غَارسْ
زڭْ إِيَّارْ مَانِي ثتّْوَاژُّو
حِيمَا أَڭِيذرْ أَذْ أَسْ إِسّسُّو.
٨ ثُوغَا ثتّْوَاژُّو ذڭْ إِجّْ ن ييَّارْ إِسْبحْ زَّاثْ إِ وَامَانْ أَطَّاسْ
حِيمَا أَذْ ثسُّوفّغْ ثِيسضْوِينْ ؤُشَا أَذْ ثوْشْ ڒْْغِيدْجثْ،
حِيمَا أَذْ ثذْوڒْ ذ ثَازَايَارْثْ ثشُّورْ.‘
٩ إِنِي خنِّي:
’أَمُّو إِ إِقَّارْ سِيذِي إِنُو، سِيذِي:
مَا أَذْ إِفّغْ مَانْ أَيَا مْلِيحْ؟
مَا وَارْ إِتّكّسْ ؤُڭِيذرْ أَمقّْرَانْ
إِژوْرَانْ نّسْ
ؤُشَا أَذْ إِقْضعْ ڒْْغِيدْجثْ نّسْ
أَڒَامِي إِ غَا ثَاژغْ؟
وَاهْ أَذْ ثَاژغْ س مَارَّا ثِيفْرَايْ نِّي
غَارسْ إِغمّْينْ،
وَارْ إِتّْوَاحْذِيجْ عَاذْ
ُغِيڒْ إِجهْذنْ نِيغْ ڒْْغَاشِي أَطَّاسْ
حِيمَا أَذْ ت سّْڭعّْذنْ زڭْ إِژوْرَانْ نّسْ.
١٠ خْزَارْ، وَاخَّا ژُّونْ ت،
مَاشَا مَا خنِّي أَذْ ثفْڒحْ؟
مَا وَارْ ثتِّيژغْ
خْمِي ت غَا إِڒْقفْ ؤُسمِّيضْ ن ڒْْغَارْبْ؟
وَاهْ، أَذْ ثَاژغْ خْ إِعُورَارْ ن ڒعْرَاصِي
مَانِي د-ثْغمِّي.‘ “
١١ يُوسَا-د غَارِي وَاوَاڒْ ن سِيذِي، إِنَّا:
١٢ ”إِنِي ڒخُّو إِ ثَادَّارْثْ إِغوّْغنْ: ’مَا وَارْ ثسِّينمْ مِينْ عْنَانْثْ ثْمسْڒَايِينْ-أَ؟‘ إِنِي: ’خْزَارْ، أَجدْجِيذْ ن بَابِيلْ يُوسَا-د غَارْ ؤُرْشَالِيمْ ؤُشَا إِطّفْ أَجدْجِيذْ نّسْ ذ ڒْْحُوكَّامْ نّسْ ؤُشَا يِيوْيِي ثنْ غَارسْ ذِي بَابِيلْ.
١٣ إِطّفْ عَاوذْ إِجّنْ زِي زَّارِيعثْ إِڭلّْذنْ ؤُشَا إِڭَّا أَكِيذسْ إِجّْ ن ڒْْعَاهْذْ ؤُشَا يَارَّا إِ-ث أَذْ إِوْشْ ثَاجَادْجِيثْ ؤُ أَيْثْ ن جّهْذْ ذِي ثمُّورْثْ، أَقَا إِكّسْ إِ-ثنْ،
١٤ حِيمَا أَذْ ثِيڒِي ثْڭلْذِيثْ ثْوَاضعْ ؤُ وَارْ ثسّْڭِيعِّيذْ إِخفْ نّسْ ؤُ حِيمَا أَذْ ثحْضَا ڒْْعَاهْذْ نّسْ، أَذْ ثقِّيمْ ثتّْبدَّا.
١٥ مَاشَا نتَّا إِغوّغْ خَاسْ، إِسّكّْ إِرقَّاسنْ نّسْ غَارْ مِيصْرَا، مَاحنْذْ أَذْ أَسْ وْشنْ إِيْسَانْ ذ إِجّْ ن ؤُبَارُّو ن ڒْْڭنْسْ. مَا أَذْ إِفّغْ أَيَا مْلِيحْ؟ مَا إِزمَّارْ أَذْ يَارْوڒْ ونِّي إِڭِّينْ أَيَا؟ مَا إِزمَّارْ ونِّي يَارْژِينْ ڒْْعَاهْذْ أَذْ يَارْوڒْ؟‘ “
١٦ ”س ثِيذتّْ أَمْ دَّارغْ نشّْ، إِقَّارْ سِيذِي إِنُو، سِيذِي: ’ذڭْ ومْشَانْ مَانِي إِزدّغْ ؤُجدْجِيذْ نِّي ث إِڭِّينْ ذ أَجدْجِيذْ، ونِّي زِي إِسّحْقَارْ نتَّا ثَاجَادْجِيثْ إِ ذ أَسْ إِجِّيدْجْ، ذ ونِّي زِي يَارْژْ ڒْْعَاهْذْ إِ كِيذسْ إِڭَّا، أَقَا ذِينْ غَارسْ، ذِي ڒْوسْثْ ن بَابِيلْ، أَذْ إِمّثْ!
١٧ وَارْ إِزمَّارْ فِيرْعُونْ س إِجّْ ن ڒْْعسْكَارْ أَمقّْرَانْ ذ إِجّْ ن وڭْرَاوْ إِمْغَارْ أَذْ يڭّْ ؤُڒَا ذ إِشْثْ ن ڒْْحَاجّثْ ذِي طّْوعْ نّسْ ذڭْ ؤُمنْغِي، خْمِي غَا سّْڭعّْذنْ إِجّْ ن ڒْْحِيضْ ؤُشَا خْمِي غَا بْنَانْ إِجّْ ن وشْبَارْ مَاحنْذْ أَذْ نْغنْ أَطَّاسْ ن إِوْذَانْ.
١٨ أَقَا إِسّحْقَارْ ثَاجَادْجِيثْ ؤُمِي يَارْژَا ڒْْعَاهْذْ إِ خْ إِوْشَا أَفُوسْ نّسْ. مِينْزِي نتَّا إِڭَّا مَارَّا مَانْ أَيَا، وَارْ إِتّْرَاكّْوَاڒْ.‘ “
١٩ ”س ؤُيَا، أَمُّو إِ إِقَّارْ سِيذِي إِنُو، سِيذِي: ’س ثِيذتّْ أَمْ دَّارغْ نشّْ، ثَاجَادْجِيثْ إِ ذ أَيِي إِجِّيدْجْ ؤُشَا خنِّي إِسّحْقَارْ إِ-ت، ؤُڒَا ذ ڒْْعَاهْذْ إِ كِيذِي إِڭَّا ؤُشَا خنِّي يَارْژَا إِ-ث، أَذْ ثنْ-إِ-د أَرّغْ خْ ؤُزدْجِيفْ نّسْ!
٢٠ أَذْ خَاسْ بزّْعغْ ثْرَاشَّا إِنُو مَاحنْذْ أَذْ يِيڒِي إِشَارْفْ ذِي ڒْْفخْ إِنُو. أَذْ ث أَوْيغْ غَارْ بَابِيلْ ؤُشَا أَذْ خَاسْ شَارّْعغْ ذِينْ زِي سِّيبّثْ ن ڒغْذَارثْ نّسْ إِ زِي ذ أَيِي إِغْذَارْ.
٢١ مَارَّا إِنِّي زَّايسْ يَاروْڒنْ جْمِيعْ أَكْ-ذ مَارَّا ڒْْعسْكَارْ نّسْ، أَذْ وْضَانْ س سِّيفْ، ؤُشَا إِنِّي إِقِّيمنْ أَذْ تّْوَازدْجْعنْ غَارْ مَارَّا ثِيغمُّورَا ن ؤُسمِّيضْ. خنِّي كنِّيوْ أَذْ ثسّْنمْ بلِّي نشّْ، سِيذِي، سِّيوْڒغْ.‘ “
٢٢ ”أَمُّو إِ إِقَّارْ سِيذِي إِنُو، سِيذِي: ’نشّْ أَذْ كّْسغْ إِجّْ ن ؤُفثْوِي ن ثُوشّنْثْ ن ثْشجَّارْثْ ن ثنْڭلْثْ يُوعْڒَانْ ؤُشَا أَذْ ث ژُّوغْ. زڭْ ؤُزدْجِيفْ أَكْ-ذ ثْسضْوِينْ نّسْ أَذْ قڒْعغْ إِشْثْ ن ثْسطَّا ثَارْهفْ ؤُشَا أَذْ ت ژُّوغْ خْ إِجّْ ن وذْرَارْ يُوعْڒَانْ.
٢٣ أَذْ ت ژُّوغْ خْ وذْرَارْ يُوعْڒَانْ قَاعْ ذِي إِسْرَائِيل. ثَانِيثَا أَذْ ثَاوِي ثِيسضْوِينْ ؤُشَا أَذْ ثَارّْ ڒْْغِيدْجثْ، أَذْ ثذْوڒْ ذ ثَاشجَّارْثْ ن ثنْڭلْثْ إِجهْذنْ. عْڒَامْ كُوڒْ إِجْضَاضْ س عْڒَامْ كُوڒْ أَفْرِيونْ أَذْ زذْغنْ سَاذُو نّسْ، وَاهْ، ذِي ثِيڒِي نّسْ أَذْ زذْغنْ نِيثْنِي،
٢٤ ؤُشَا أَذْ سّْننْ مَارَّا ثِيشجِّيرَا ن ييَّارْ، أَقَا نشّْ، سِيذِي، سّهْوِيغْ ثَاشجَّارْثْ يُوعْڒَانْ ؤُشَا سّْڭعّْذغْ ثَاشجَّارْثْ ثَاقُوضَاضْثْ ؤُ سِّيژْغغْ ثَاشجَّارْثْ ثَازيْزَاثْ ؤُشَا أَرِّيغْ ثَاشجَّارْثْ يُوژْغنْ أَذْ ثْنوَّارْ. نشّْ، سِيذِي، سِّيوْڒغْ ؤُشَا أَذْ ث ڭّغْ.‘ “