١٥
ثَازَايَارْثْ ن ؤُرْشَالِيمْ
١ يُوسَا-د غَارِي وَاوَاڒْ ن سِيذِي، إِنَّا:
٢ ”أَ مِّيسْ ن بْنَاذمْ، مِينْ إِعْنَا ؤُكشُّوضْ ن ثْزَايَارْثْ كْثَارْ زڭْ ؤُكشُّوضْ نّغْنِي، كْثَارْ زڭْ ؤُكشُّوضْ نِّي ذِينْ إِدْجَانْ جَارْ ثْشجِّيرَا ن وزْغَارْ؟
٣ مَا إِزمَّارْ بْنَاذمْ أَذْ زَّايسْ إِكْسِي أَكشُّوضْ مَاحنْذْ أَذْ زَّايسْ إِڭّْ إِشْثْ ن ڒْْقشْعثْ إِنفّْعنْ إِ ڒْخذْمثْ؟ مَا إِتّْوَاكّْسِي زَّايسْ إِشْثْ ن ڒوْثذْ حِيمَا أَذْ ذَايسْ ثَايْڒذْ شَا ن ڒْْقشْعثْ؟
٤ خْزَارْ، أَذْ إِمّوْشْ ذ مَاشَّا إِ ثْمسِّي. ثِيمسِّي أَذْ ثشّْ ثْنَاينْ ن طّْرُوفَا نّسْ ؤُ أَغزْذِيسْ نْ ڒْوسْثْ إِتّْوَاشمْضْ. مَا أَذْ إِصْڒحْ ؤُكشُّوضْ نِّي عَاذْ إِ يِيشْثْ نْ ڒْقشْعثْ إِ ڒْْخذْمثْ؟
٥ خْزَارْ، ؤُمِي ثُوغَا عَاذْ إِمُونْ، وَارْ زَّايسْ ثتّْوَاڭّْ إِشْثْ ن ڒْْقشْعثْ إِ ڒْخذْمثْ. مشْحَاڒْ قلّْ عَاذْ ؤُمِي ث ثشَّا ثِيمسِّي، إِشْمضْ ؤُكشُّوضْ. مَا أَذْ زَّايسْ ڭّنْ عَاذْ شَا نْ ڒْقشْعثْ إِ ڒْخذْمثْ؟“
٦ ”س ؤُيَا، أَمُّو إِ إِقَّارْ سِيذِي إِنُو، سِيذِي: ’مَامّشْ إِ وْشِيغْ أَكشُّوضْ ن ثْزَايَارْثْ جَارْ ؤُكشُّوضْ ن وزْغَارْ إِ ثِيمسِّي، حِيمَا أَذْ إِتّْوَاشّْ، أَمُّو إِ غَا سلّْمغْ ؤُڒَا ذ إِمزْذَاغْ ن ؤُرْشَالِيمْ إِ ثْمسِّي!
٧ مَاغَارْ نشّْ أَذْ أَرّغْ ؤُذمْ إِنُو ضِيدّْ نْسنْ. خْمِي إِ غَا خْسنْ أَذْ د-فّْغنْ زِي ثْمسِّي، أَذْ ثنْ ثسّشْمضْ ثْمسِّي ؤُ كنِّيوْ أَذْ ثسّْنمْ بلِّي نشّْ ذ سِيذِي، ؤُمِي ڭِّيغْ ؤُذمْ إِنُو ضِيدّْ نْسنْ.
٨ أَذْ أَرّغْ ثَامُّورْثْ ذ إِشْثْ ن ثمُّورْثْ إِتّْوَاردّْدْجنْ، مِينْزِي نِيثْنِي غْذَارنْ أَيِي س إِشْثْ ڒغْذَارثْ إِقسْحنْ، أَمُّو إِ إِقَّارْ سِيذِي إِنُو، سِيذِي.‘ “