١٠
١ أَوَارْنِي أَيَا ژْرِيغْ، خْزَارْ، سنّجْ إِ ڒْْقُوبّثْ، سنّجْ إِ ؤُزدْجِيفْ ن إِكِيرُوبنْ، ثُوغَا ذِينْ شَا أَمْ وژْرُو ن صَافِّيرْ، مِينْ د-إِتّْبَاننْ أَمْ وُوذمْ ن مِينْ يَارْوسنْ ذڭْ إِجّْ ن ڒْْعَارْشْ، ؤُ سنّجْ إِ نِيثْنِي إِضْهَارْ-د نتَّا.
٢ ؤُشَا إِسِّيوڒْ أَكْ-ذ ورْيَازْ نِّي يَارْضنْ أَرُّوذْ نْ ڒقْطنْ، إِنَّا: ”أَذفْ-د غَارْ ذَاخڒْ جَارْ ثْجَارَّارِينْ إِتّنّْضنْ، أَڒْ سَاذُو إِ إِكِيرُوبنْ، ؤُشَا شُّورْ إِفَاسّنْ نّشْ س ڒفْحمْ إِتّحْذُوذُوقنْ زِي جَارْ إِكِيرُوبنْ ؤُشَا زدْجعْ إِ-ث خْ ثنْذِينْثْ!“ ؤُشَا يُوذفْ-د جَارْ أَسنْثْ زَّاثْ إِ ثِيطَّاوِينْ إِنُو.
٣ إِكِيرُوبنْ ثُوغَا بدّنْ غَارْ ؤُغزْذِيسْ أَفُوسِي ن ثَادَّارْثْ ؤُمِي د-يَاذفْ ورْيَازْ غَارْ ذَاخڒْ ؤُشَا أَسيْنُو إِشُّورْ ڒمْرَاحْ ن ذَاخڒْ.
٤ أَعُودْجِي ن سِيذِي إِسّْڭعّذْ إِخفْ نّسْ زِي سنّجْ ن ؤُخِيرُوبْ، إِعْذُو خْ ثْنبْذَاثْ ن ثوَّارْثْ ن ثَادَّارْثْ ؤُشَا ثتّْوَاشُّورْ ثَادَّارْثْ س ؤُسيْنُو ؤُ ڒمْرَاحْ ن زَّاثْ ثُوغَا إِشُّورْ س ثسِّيقْثْ ن ؤُعُودْجِي ن سِيذِي.
٥ ذْرِيزّْ ن وَافْرِيونْ إِتّْوَاسڒْ-د أَڒْ ذَاخڒْ ذِي ڒمْرَاحْ ن بَارَّا، أَمْ ثْمِيجَّا ن أَربِّي، أَمْزمَّارْ خْ كُوڒْشِي، خْمِي إِسَّاوَاڒْ.
٦ إِمْسَارْ أَوَارْنِي ڒَْامِي يُومُورْ نتَّا إِ ورْيَازْ نِّي يَارْضنْ ڒقْطنْ، إِنَّا: ”كْسِي ثِيمسِّي زِي جَارْ ثْجَارَّارِينْ إِتّنْضنْ، زِي جَارْ إِكِيرُوبنْ!“، أَقَا وَانِيثَا يُوذفْ-د ؤُشَا إِبدّْ زَّاثْ إِ ثْجَارَّارْثْ إِتّنْضنْ.
٧ خنِّي إِسّْوِيژّضْ إِجّْ ن ؤُكِيرُوبْ أَفُوسْ نّسْ زِي جَارْ إِكِيرُوبنْ غَارْ ثْمسِّي نِّي ثُوغَا جَارْ أَسنْ، إِكْسِي زَّايسْ ؤُشَا إِسَّارْسْ إِ-ت ذڭْ إِفَاسّنْ ن ونِّي يَارْضنْ ڒقْطنْ. وَانِيثَا إِكْسِي ت ؤُشَا إِفّغْ.
٨ سَاذُو وَافْرِيونْ ن إِكِيرُوبنْ إِتّْوَاژَارْ شَا أَمْ صِّيفثْ ن ؤُفُوسْ ن بْنَاذمْ.
٩ خنِّي ژْرِيغْ، خْزَارْ، أَقَا ذِينْ أَربْعَا ن ثْجَارَّارِينْ غَارْ ؤُغزْذِيسْ ن إِكِيرُوبنْ، إِشْثْ ن ثْجَارَّارْثْ غَارْ ؤُغزْذِيسْ ن إِجّْ ن ؤُكِيرُوبْ. ؤُذمْ ن ثْجَارَّارِينْ أَمْ وُوذمْ ن وژْرُو ن ثخْرِيسُولِيثْ.
١٠ خْ مَامّشْ د-ضْهَارنْ، أَقَا أَربْعَا غَارْسنْ صِّيفثْ ذ إِشْثنْ، أَخْمِي إِشْثْ ن ثْجَارَّارْثْ ثتّْڒِيقْ نِيشَانْ ذِي ڒْْوسْطْ ن ثْجَارَّارْثْ نّغْنِي.
١١ خْمِي ڭُّورنْ، ڭُّورنْ غَارْ أَربْعَا ن إِغزْذِيسنْ نْسنْ. نِيثْنِي وَارْ تّْنقْڒِيبنْ شَا خْمِي ڭُّورنْ، مِينْزِي أَمْشَانْ مَانِي ثَارَّا ثْجَارَّارْثْ ن زَّاثْ أَزدْجِيفْ نّسْ، أَقَا ضْفَارنْ ت-إِ-د. نِيثْنِي وَارْ نّْقڒْبنْ شَا خْمِي ڭُّورنْ.
١٢ مَارَّا أَرِّيمثْ نْسنْ: إِعُورَارْ نْسنْ، إِفَاسّنْ نْسنْ ذ وَافْرِيونْ نْسنْ، ؤُشَا ؤُڒَا ذ ثِيجَارَّارِينْ نْسنْ شُّورنْ س ثِيطَّاوِينْ ذڭْ ونّضْ نْسنْ غَارْ مَارَّا أَربْعَا إِمُودَّارنْ نِّي، وَاهْ عَاذْ ثِيجَارَّارِينْ نْسنْ.
١٣ سْڒِيغْ إِشْثْ ن ثْمِيجَّا أَقَا ثتّْڒَاغَا أَسنْثْ إِ ثْجَارَّارِينْ: ’ثَاجَارَّارْثْ ن دّوْرَانْ!‘
١٤ كُوڒْ إِجّْ غَارسْ أَربْعَا ن وُوذْمَاونْ: ؤُذمْ أَمزْوَارُو ثُوغَا ذ ؤُذمْ ن ؤُكِيرُوبْ، ؤُ ؤُذمْ وِيسّْ ثْنَاينْ ذ ؤُذمْ ن بْنَاذمْ، ؤُ ؤُذمْ وِيسّْ ثْڒَاثَا ذ ؤُذمْ ن ويْرَاذْ، ؤُ ؤُذمْ وِيسّْ أَربْعَا ذ ؤُذمْ ن ؤُڭِيذرْ.
١٥ سّْڭعّْذنْ إِكِيرُوبنْ إِخفْ نْسنْ. وَا ذ سِيمَانْثْ ن ؤُمُودَّارْ إِ ژْرِيغْ غَارْ يغْزَارْ ن خابُورْ.
١٦ ؤُمِي ؤُيُورنْ إِكِيرُوبنْ، ؤُيُورنْثْ ؤُڒَا ذ ثِيجَارَّارِينْ غَارْ ؤُغزْذِيسْ نْسنْ، ؤُمِي سّْڭعّْذنْ إِكِيرُوبنْ أَفْرِيونْ نْسنْ مَاحنْذْ أَذْ سّْڭعّْذنْ إِخفْ نْسنْ زِي ثمُّورْثْ، وَارْ قْنُونّْينْثْ ثْجَارَّارِينْ نِّي أَڒَامِي أَڭّْوجنْثْ خْ ؤُغزْذِيسْ نْسنْ.
١٧ ؤُمِي بدّنْ نِيثْنِي، بدّنْثْ ؤُڒَا ذ نِيثنْثِي، ؤُمِي سّْڭعّْذنْ نِيثْنِي إِخفْ نْسنْ، سّْڭعّْذنْثْ ؤُڒَا ذ نِيثنْثِي إِخفْ نْسنْثْ، مِينْزِي بُوحْبڒْ ن إِمُودَّارنْ ثُوغَا-ث ذَايْسنْثْ.
١٨ خنِّي إِفّغْ ؤُعُودْجِي ن سِيذِي زِي سنّجْ ن ثْنبْذَاثْ ن ثَادَّارْثْ ؤُشَا إِبدّْ سنّجْ إِ إِكِيرُوبنْ.
١٩ إِكِيرُوبنْ سّْڭعّْذنْ أَفْرِيونْ نْسنْ ؤُشَا، ؤُمِي د-فّْغنْ، سّْڭعّْذنْ إِخفْ نْسنْ زِي ثمُّورْثْ زَّاثْ إِ ثِيطَّاوِينْ إِنُو ؤُشَا ؤُڒَا ذ ثِيجَارَّارِينْ غَارْ ؤُغزْذِيسْ نْسنْ. نِيثْنِي قِّيمنْ بدّنْ غَارْ وَاذَافْ ن ثوَّارْثْ ن شَّارْقْ ن ثَادَّارْثْ ن سِيذِي ؤُشَا أَعُودْجِي ن أَربِّي ثُوغَا-ث خَاسنْ زِي سنّجْ.
٢٠ وَا ذ أَمُودَّارْ إِ ژْرِيغْ سَاذُو أَربِّي ن إِسْرَائِيل غَارْ يغْزَارْ ن خابُورْ. خنِّي سّْنغْ بلِّي ثُوغَا أَثنْ ذ إِكِيرُوبنْ.
٢١ كُوڒْ إِجّْ غَارسْ أَربْعَا ن وُوذْمَاونْ ؤُ كُوڒْ إِجّْ غَارسْ أَربْعَا ن وَافْرِيونْ ؤُ سَاذُو أَفْرِيونْ نْسنْ أَقَا ذِينْ مِينْ يَارْوسنْ ذڭْ إِفَاسّنْ ن إِوْذَانْ.
٢٢ ؤُذْمَاونْ نْسنْ أَمْ وُوذْمَاونْ نِّي ژْرِيغْ غَارْ يغْزَارْ ن خابُورْ، مَامّشْ د-بَاننْ وُوذْمَاونْ نِّي، ؤُڒَا ذ نِيثْنِي س يِيخفْ نْسنْ. نِيثْنِي ڭُّورنْ كُوڒْ إِجّْ نِيشَانْ غَارْ زَّاثْ نّسْ.