١٧
١ ”وَارْ غَارّصْ شَا إِ ؤُفُونَاسْ نِيغْ إِ يِيجّنْ زڭْ وُودْجِي إِ ذِي إِدْجَا شَا ن ڒْْعِيبْ، نِيغْ شَا ن ڒْْمَاڒْ إِعفّْننْ، إِ سِيذِي، أَربِّي نّشْ، مِينْزِي مَانْ أَيَا ذ جّْعِيفشْثْ إِ سِيذِي، أَربِّي نّشْ.
٢ ؤُمِي يُوفَا ذِي ڒْْوسْطْ نّشْ، غَارْ ذَاخڒْ إِ ثوُّورَا نّشْ، ثِينِّي ذ أَشْ إِوْشَا سِيذِي، أَربِّي نّشْ، شَا ن ورْيَازْ نِيغْ شَا ن ثمْغَارْثْ إِ إِڭِّينْ مِينْ إِدْجَانْ ذ ڒْْغَارْ ذِي ثِيطَّاوِينْ ن سِيذِي، أَربِّي نّشْ، ؤُشَا أَمُّو إِ غَا إِعدُّو خْ ڒْْعَاهْذْ نّسْ،
٣ ؤُشَا أَذْ يُويُورْ، أَذْ إِعْبذْ إِ إِربِّيثنْ نّغْنِي ؤُشَا أَذْ أَسنْ إِبنْذقْ، إِ ثْفُوشْثْ نِيغْ إِ يُويُورْ نِيغْ إِ مَارَّا إِثْرَانْ ن ؤُجنَّا، مِينْ وَارْ خفْ ؤُمُورغْ نشّْ،
٤ ؤُشَا يِيوضْ إِ شكْ-د ڒخْبَارْ ؤُشَا ثسْڒِيذْ ت، خنِّي إِتّْخصَّا أَذْ ت ثَارْزُوذْ مْلِيحْ، ؤُ خْزَارْ، مَاڒَا ذ ثِيذتّْ ؤُشَا ثْبَانْ بلِّي ثتّْوَاڭّْ ذِي إِسْرَائِيل جّْعِيفشْثْ ثَانِيثَا،
٥ خنِّي أَذْ ثسُّوفّْغذْ أَرْيَازْ نِّي نِيغْ ثَامْغَارْثْ نِّي إِ إِڭِّينْ ڒْْغَارْ-أَ غَارْ ثوُّورَا نّشْ، أَرْيَازْ نِّي نِيغْ ثَامْغَارْثْ نِّي، ؤُشَا أَذْ ثنْ ثْحجَّارذْ س إِژْرَا أَڒْ غَا مّْثنْ.“
٦ ”خْ وَاوَاڒْ زڭْ ؤُقمُّومْ ن ثْنَاينْ نِيغْ ثْڒَاثَا ن ڒشْهُوذْ أَذْ إِتّْوَانغْ ونِّي إِتّْوَاحْكمْ سْ ڒْموْثْ. خْ وَاوَاڒْ زڭْ ؤُقمُّومْ ن إِجّْ ن ؤُشهَّاذْ وَارْ إِحدْجڒْ أَذْ إِتّْوَانغْ.
٧ أَفُوسْ ن ڒشْهُوذْ أَذْ خَاسْ وْضَانْ ذ أَمزْوَارُو مَاحنْذْ أَذْ ث نْغنْ ؤُشَا أَوَارْنِي أَسْ أَذْ خَاسْ وْضَانْ إِفَاسّنْ ن مَارَّا ڒْْڭنْسْ. أَمُّو إِ غَا ثكّْسذْ ڒْْغَارْ زِي ڒْْوسْطْ نّشْ.“
٨ ”خْمِي خَاكْ غَا ثقْسحْ شَا ن ثْمسْڒَاشْثْ ذِي لْحُوكْمْ جَارْ ؤُسِيزّڒْ ن إِذَامّنْ ذ ؤُسِيزّڒْ ن إِذَامّنْ نّغْنِي، جَارْ دّعْوثْ ذ دّعْوثْ، جَارْ ثِيشْثِي ذ ثشْثِي، نِيغْ ذِي لْحُوكْمْ ذڭْ إِمْشُوبَّاشْ غَارْ ذَاخڒْ إِ ثوُّورَا نّشْ، خنِّي أَذْ ثكَّارذْ، أَذْ ثْڭعّْذذْ غَارْ ومْشَانْ نِّي غَا يِيخْضَارْ سِيذِي، أَربِّي نّشْ.
٩ ؤُشَا أَذْ د-ثَاوْضذْ غَارْ إِكهَّاننْ، غَارْ إِلَاوِييّنْ، ؤُشَا خنِّي غَارْ ڒْْقَاضِي نِّي ذِينْ إِدْجَانْ ذڭْ وُوسَّانْ نِّي، ؤُشَا أَذْ ثسّقْسِيذْ ؤُ نِيثْنِي أَذْ شكْ خبَّارنْ خْ ڒحْكَامْ.
١٠ أَذْ ثڭّذْ أَمْ ثنْفُوتْشْ نِّي إِ شكْ غَا خبَّارنْ ذڭْ ومْشَانْ نِّي إِ غَا يِيخْضَارْ سِيذِي ؤُشَا أَذْ ثحْضِيذْ مَارَّا مِينْ ذ أَشْ غَا سّعْذُونْ.
١١ أَذْ ثڭّذْ عْلَاحْسَابْ أَوَاڒْ ن شَّارِيعَا نِّي ذ أَشْ غَا سشّْننْ ؤُ عْلَاحْسَابْ ڒحْكَامْ نِّي ذ أَشْ غَا إِنِينْ. وَارْ تّْحيِّيذْ خْ وَاوَاڒْ إِ ذ أَشْ غَا إِنِينْ غَارْ يفُوسْ ؤُڒَا غَارْ ؤُزڒْمَاضْ.
١٢ أَرْيَازْ نِّي إِتّڭّنْ س ثُوفّثْ ؤُ وَارْ إِتّسْڒِي غَارْ ؤُكهَّانْ نِّي إِ ذِينْ إِبدّنْ، حِيمَا أَذْ ذِينْ إِسخَّارْ سِيذِي، أَربِّي نّشْ، نِيغْ وَارْ إِتّسْڒِي غَارْ ڒْْقَاضِي، أَقَا أَرْيَازْ نِّي أَذْ إِمّثْ. إِتّْخصَّا أَذْ ثكّْسذْ ڒْْغَارْ زِي إِسْرَائِيل.
١٣ مَارَّا ڒْْڭنْسْ إِتّْخصَّا أَسنْ أَذْ سْڒنْ ؤُ أَذْ ڭّْوذنْ ؤُ وَارْ تُّوفّنْ عَاذْ.“
خْ ؤُجدْجِيذْ
١٤ ”خْمِي غَا ثَاذْفذْ غَارْ ثمُّورْثْ نِّي إِ ذ أَشْ غَا إِوْشْ سِيذِي، أَربِّي نّشْ ؤُشَا أَذْ ت ثطّْفذْ ذ ڒْْوَارْثْ ؤُشَا أَذْ ذَايسْ ثْزذْغذْ ؤُ خنِّي أَذْ ثِينِيذْ: ’أَذْ خَافِي ڭّغْ إِجّْ ن ؤُجدْجِيذْ أَمْ مَارَّا ڒڭْنُوسْ إِ ذ أَيِي د-إِنّْضنْ!‘،
١٥ خنِّي أَذْ خَاكْ ثڭّذْ ذ أَجدْجِيذْ ونِّي إِ غَا يِيخْضَارْ سِيذِي، أَربِّي نّشْ. زِي ڒْْوسْطْ ن أَيْثْمَاشْ أَذْ ثڭّذْ ذ إِجّْ ن ؤُجدْجِيذْ خَاكْ، وَارْ خَاكْ تّڭّْ شَا أَبَارَّانِي إِ وَارْ إِدْجِينْ شَا ذ ؤُمَاشْ.
١٦ مَاشَا وَارْ إِحدْجڒْ أَذْ يَارْنِي إِيْسَانْ إِ إِخفْ نّسْ ؤُ وَارْ إِتَّارِّي شَا ڒْْڭنْسْ غَارْ مِيصْرَا مَاحنْذْ أَذْ يَارْنِي إِيْسَانْ، مِينْزِي سِيذِي إِنَّا أَومْ: زِي سَّا ذ ثْسَاونْثْ وَارْ د-ثْعِيقِّيبمْعمَّارْصْ خْ وبْرِيذْ-أَ!
١٧ وَارْ إِكسِّي شَا إِ إِخفْ نّسْ أَطَّاسْ ن ثمْغَارِينْ، حِيمَا وَارْ إِتّْغَارِّي وُوڒْ نّسْ. وَارْ يَارنِّي شَا إِ يِيخفْ نّسْ نُّوقَارْثْ نِيغْ ؤُرغْ س وَاطَّاسْ.
١٨ خْمِي غَا إِقِّيمْ خْ ڒْْعَارْشْ ن ثْڭلْذِيثْ نّسْ، خنِّي أَذْ يَارِي إِ يِيخفْ نّسْ إِشْثْ ن ؤُعَاوذْ ن ثِيرَا ن شَّارِيعَا-يَا ذڭْ إِجّْ ن وذْلِيسْ إِتّْوَانّْضنْ زَّاثْ إِ وُوذمْ ن إِكهَّاننْ، إِلَاوِييّنْ.
١٩ أَذْ غَارسْ يِيڒِي ؤُعَاوذْ ن ثِيرَا-يَا، أَذْ ذَايسْ إِغَارْ مَارَّا ؤُسَّانْ ن ثُوذَارْثْ نّسْ، حِيمَا أَذْ إِڒْمذْ أَذْ إِڭّْوذْ سِيذِي، أَربِّي نّسْ، أَذْ إِحْضَا مَارَّا أَوَاڒنْ ن شَّارِيعَا-يَا ذ ثْوصَّا-يَا ؤُشَا أَذْ زَّايْسنْثْ إِڭّْ،
٢٠ حِيمَا وَارْ إِسِّيڒِييْ ؤُڒْ نّسْ خْ يَايْثْمَاسْ نِيغْ أَذْ إِحيّذْ خْ وبْرِيذْ ن ثوْصيّثْ، وَارْ إِدْجِي غَارْ يفُوسْ ؤُڒَا غَارْ ؤُزڒْمَاضْ، مَاحنْذْ أَذْ إِزُّوڭَارْثْ ؤُسَّانْ ن ثْڭلْذَا نّسْ، نتَّا ذ وَارَّاوْ نّسْ، ذِي ڒْْوسْطْ ن إِسْرَائِيل.“