١٢
أَمْشَانْ إِقدّْسنْ
١ ”ذ ثِينَا ذ ثِيوصَّا ذ لْفَارَايِيضْ نِّي إِ غَا ثحْضَامْ مَاحنْذْ أَذْ ثنْثْ ثڭّمْ ذِي ثمُّورْثْ نِّي إِ ذ أَشْ إِوْشَا سِيذِي، أَربِّي ن ڒجْذُوذْ نّشْ، حِيمَا أَذْ ت ثكْسِيذْ ذ ڒْْوَارْثْ، مَارَّا ؤُسَّانْ نِّي إِ غَا ثدَّارمْ كنِّيوْ خْ وُوذمْ ن ثمُّورْثْ.
٢ أَذْ ثَاردّْدْجمْ قَاعْ مَارَّا إِمُوشَانْ مَانِي ثُوغَا سخَّارنْ ڒڭْنُوسْ إِ إِربِّيثنْ نْسنْ، مَارَّا إِمُوشَانْ نِّي إِ غَا ثطّْفمْ ذ ڒْْوَارْثْ: خْ إِذُورَارْ يُوعْڒَانْ، خْ ثوْرِيرِينْ ؤُ سَاذُو كُوڒْ ثَاشجَّارْثْ ثَازِيزَاوْثْ.
٣ أَذْ ثنْضَارمْ إِعَالْطَارنْ نْسنْ، أَذْ ثَارْژمْ إِمَايْضُوثنْ نْسنْ إِقدّْسنْ ؤُ ثِيربِّينْ نْسنْ ن شْوَارْثِي أَذْ ثنْثْ ثسّْشمْضمْ س ثْمسِّي ؤُشَا أَذْ ثْهذْممْ ڒخْيَاڒَاثْ إِنقْشنْ ن إِربِّيثنْ نْسنْ ؤُشَا أَذْ ثمْحَامْ إِسمْ نْسنْ زڭْ ومْشَانْ نِّي.
٤ مِينْزِي أَمُّو وَارْ ثْعبّْذمْ إِ سِيذِي، أَربِّي نْومْ أَمْ تّڭّنْ نِيثْنِي،
٥ مَاشَا أَذْ ثَارْزُومْ خْ ومْشَانْ نِّي إِ غَا يِيخْضَارْ سِيذِي، أَربِّي نْومْ، زِي جَارْ مَارَّا ثِيقبَّاڒْ نْومْ، حِيمَا أَذْ ذِينْ إِڭّْ إِسمْ نّسْ، وَاهْ، غَارْ ثْزذِّيغْثْ نّسْ إِ غَا ثَارْزُومْ ؤُ ذِينْ إِ غَا ثَاوْضمْ
٦ ؤُشَا ذِينِّي إِ غَا ثَاوْيمْ ثِيغَارْصَا نْومْ ن وشْمَاضْ ذ ثْغَارْصَا نْومْ ذ ڒعْشُورْ نْومْ ذ ثوْهِيبْثْ نِّي إِسّْڭعّذْ ؤُفُوسْ نْومْ ذ ثوْهِيبِينْ نْومْ س ڒْْخَاضَارْ ذ إِمنْزَا ن إِفُونَاسنْ ذ ثْفُونَاسِينْ نْومْ ذ إِمنْزَا ن وُودْجِي نْومْ،
٧ ؤُشَا ذِينِّي إِ غَا ثشّمْ زَّاثْ إِ وُوذمْ ن سِيذِي، أَربِّي نْومْ، أَذْ ثْفَارْحمْ، كنِّيوْ ذ ڒَْادْجْ ن ثُوذْرِينْ نْومْ، زِي مَارَّا مِينْ إِڭَّا ؤُفُوسْ نْومْ ؤُ زِي مِينْ ذِي كنِّيوْ إِبَاركْ سِيذِي، أَربِّي نّشْ.
٨ وَارْ تّڭّمْ أَمْ مَارَّا مِينْ نتّڭّْ نشِّينْ ذَا أَسّْ-أَ: كُوڒْ أَرْيَازْ إِتّڭّْ مِينْ ذ أَسْ إِتّْوَاڒَا نِيشَانْ ذِي ثِيطَّاوِينْ نّسْ.
٩ مِينْزِي أَقَا عَاذْ ڒخُّو وَارْ ثُوذِيفمْ شَا غَارْ أَرَّاحثْ ؤُ غَارْ ڒْْوَارْثْ نِّي ذ أَومْ إِوْشَا سِيذِي، أَربِّي نّشْ.
١٠ خْمِي غَا ثژْوَامْ لْ-ؤُرْذُونْ ؤُشَا أَذْ ثْزذْغمْ ذِي ثمُّورْثْ نِّي ذ أَومْ غَا إِوْشْ سِيذِي، أَربِّي نْومْ، ذ ڒْْوَارْثْ، نتَّا أَذْ أَومْ إِوْشْ أَرَّاحثْ زِي مَارَّا ڒْْعذْيَانْ نْومْ إِ ذ أَومْ د-إِنّْضنْ ؤُشَا أَذْ ثْزذْغمْ ذِي ڒَامَانْ.
١١ ذِينْ إِ غَا يِيڒِي ومْشَانْ نِّي إِ غَا يِيخْضَارْ سِيذِي، أَربِّي نْومْ، حِيمَا أَذْ إِسّزْذغْ ذِينْ إِسمْ نّسْ ؤُشَا ذِينِّي إِ غَا ثَاوْيمْ مَارَّا مِينْ خْ شكْ ؤُمُورغْ: ثِيغَارْصَا ن وشْمَاضْ نْومْ، ثِيغَارْصَا نْومْ، ڒعْشُورْ نْومْ، ثِيوْهِيبِينْ ن ؤُسْڭعّذْ ن ؤُفُوسْ نْومْ ذ مَارَّا ثِيوْهِيبِينْ ن لْوَاعْذْ نِّي إِ غَا ثْوعْذمْ إِ سِيذِي.
١٢ أَذْ ثْفَارْحمْ زَّاثْ إِ وُوذمْ ن سِيذِي، أَربِّي نْومْ، كنِّيوْ ذ إِحنْجِيرنْ نْومْ ذ ثْحنْجِيرِينْ نْومْ ذ إِسمْغَانْ نْومْ ذ ثِييَّا نْومْ ذ ؤُلَاوِي نِّي إِزدّْغنْ ذَاخڒْ إِ ثوُّورَا نْومْ، مِينْزِي وَارْ غَارسْ ثَاسْغَارْثْ نِيغْ ڒْْوَارْثْ أَكِيذْومْ.
١٣ حْضَا وَارْ سّْبخَّارَا ثِيغَارْصَا نّشْ ن وشْمَاضْ ذِي مِينْ مَا أَمْشَانْ نِّي ثْوَاڒِيذْ،
١٤ مَاشَا وَاهَا ذڭْ ومْشَانْ نِّي إِ غَا يِيخْضَارْ سِيذِي ذڭْ إِشْثنْ زِي ثْقبَّاڒْ نّشْ، ذِينِّي وَاهَا إِ غَا ثسّْبخَّارذْ ثِيغَارْصَا ن وشْمَاضْ ؤُشَا ذِينِّي إِ غَا ثڭّذْ مَارَّا مِينْ ذ أَشْ ؤُمُورغْ.
ثَاوْصيّثْ خْ إِذَامّنْ ؤُ ضِيدّْ إِ وعْبذْ ن لْ-أَصْنَامْ ن ڒڭْنُوسْ
١٥ س مَارَّا ثْزمَّارذْ أَذْ ثْغَارْصذْ ذَاخڒْ إِ ثوُّورَا نّشْ مَارَّا مِينْ إِمّژْرِي وُوڒْ نّشْ ؤُشَا أَذْ زَّايسْ ثشّذْ عْلَاحْسَابْ لْبَارَاكَا نِّي ذ أَشْ غَا إِوْشْ سِيذِي، أَربِّي نّشْ، ذَاخڒْ إِ ثوُّورَا نّشْ. أَمخْمُوجْ ذ ؤُمزْذَاڭْ زمَّارنْ أَذْ زَّايسْ شّنْ، أَخْمِي تّتّنْ زڭْ إِغَايْضْ ن وزْغَارْ ؤُ زڭْ ؤُذَاذْ.
١٦ مْغِيرْ إِذَامّنْ وَارْ ثنْ ثتّتّذْ. أَذْ ثنْ ثْنغْڒذْ خْ ثمُّورْثْ أَمْ وَامَانْ.
١٧ وَارْ إِعدّڒْ أَذْ ثشّذْ ذَاخڒْ إِ ثوُّورَا نّشْ زِي ڒعْشُورْ ن إِرْذنْ ذ بِينُو نّشْ ن جْذِيذْ ذ زّشْثْ نّشْ ن طّْرِي ؤُڒَا زڭْ إِمنْزَا ن إِفُونَاسنْ ذ ثْفُونَاسِينْ ذ وُودْجِي نّشْ نِيغْ زِي ثوْهِيبِينْ ن وَاوَاڒْ إِ ثوْشِيذْ نِيغْ زِي ثوْهِيبِينْ س ڒْْخَاضَارْ نِيغْ زِي ثوْهِيبْثْ نِّي إِسّْڭعّذْ ؤُفُوسْ نّشْ.
١٨ مِينْزِي أَذْ ثنْ ثشّذْ زَّاثْ إِ وُوذمْ ن سِيذِي، أَربِّي نّشْ، ذڭْ ومْشَانْ نِّي غَا يِيخْضَارْ سِيذِي، أَربِّي نّشْ، شكْ، مِّيشْ، يدْجِيشْ، إِسْمغْ نّشْ، ثَايَّا نّشْ ذ ؤُلَاوِي نِّي إِزدّْغنْ ذَاخڒْ إِ ثوُّورَا نّشْ ؤُشَا أَذْ ثْفَارْحذْ زَّاثْ إِ وُوذمْ ن سِيذِي، أَربِّي نّشْ، ذِي مَارَّا مِينْ غَارْ غَا إِسّْوِيژّذْ ؤُفُوسْ نّشْ.
١٩ حْضَا، وَارْ سمّحْ غَارْ ؤُزدْجِيفْ نّسْ أَلَاوِي ذِي مَارَّا ؤُسَّانْ نّشْ خْ ثمُّورْثْ نّشْ.“
٢٠ ”خْمِي سِيذِي، أَربِّي نّشْ، أَذْ إِسِّييْرُو أَيْمِيرْ ن ثمُّورْثْ نّشْ، أَمْ مَامّشْ ذ أَشْ إِنَّا، ؤُشَا أَذْ ثِينِيذْ: ’خْسغْ أَذْ شّغْ أَيْسُومْ‘، مِينْزِي إِمّژْرِي ڒعْمَارْ نّشْ أَذْ يشّْ أَيْسُومْ، خنِّي أَذْ ثشّذْ أَيْسُومْ أَنشْثْ ن مَارَّا مِينْ إِمژْرِي ڒعْمَارْ نّشْ.
٢١ مَاڒَا ثُوغَا شكْ ثِيڭّْوجذْ خْ ومْشَانْ نِّي إِ غَا يِيخْضَارْ سِيذِي، أَربِّي نّشْ، حِيمَا أَذْ ذِينْ إِسّمْثنْ إِسمْ نّسْ، خنِّي ثْزمَّارذْ أَذْ ثْغَارْصذْ زڭْ إِفُونَاسنْ ذ ثْفُونَاسِينْ نّشْ ؤُ زڭْ وُودْجِي نّشْ نِّي ذ أَشْ إِوْشَا سِيذِي، أَمْ مَامّشْ شكْ ؤُمُورغْ، ؤُشَا أَذْ زَّايسْ ثشّذْ ذَاخڒْ إِ ثوُّورَا نّشْ أَنشْثْ ن مَارَّا مِينْ ذَايسْ إِمّژْرِي ڒعْمَارْ نّشْ.
٢٢ أَمْ مَامّشْ إِتّْوَاشّْ إِغَايْضْ ن وزْغَارْ ذ ؤُذَاذْ، أَمنِّي إِ زَّايسْ غَا ثشّذْ. أَمخْمُوجْ ذ ؤُمزْذَاڭْ زمَّارنْ أَذْ زَّايسْ شّنْ.
٢٣ مْغِيرْ وَارْ تّتّْعمَّارْصْ زڭْ إِذَامّنْ، مِينْزِي إِذَامّنْ ذ ڒعْمَارْ. وَارْ تّتّْ ڒعْمَارْ أَكْ-ذ ويْسُومْ.
٢٤ وَارْ ثنْ ثتّتّذْ، مَاشَا أَذْ ثنْ ثْنغْڒذْ خْ ثمُّورْثْ أَمْ وَامَانْ.
٢٥ وَارْ ثنْ ثتّتّذْ، حِيمَا أَذْ ثِيڒِيذْ شكْ مْلِيحْ ذ إِحنْجِيرنْ نّشْ أَوَارْنِي أَشْ، خْمِي غَا ثڭّذْ مِينْ إِسڭّْذنْ زَّاثْ إِ ثِيطَّاوِينْ ن سِيذِي.
٢٦ أَذْ ثَاوْيذْ مْغِيرْ ثِيمسْڒَايِينْ نِّي غَاركْ قدّْسنْثْ ذ ثْغَارْصَا ن لْوَاعْذْ نّشْ ؤُشَا أَذْ كِيذْسنْثْ د-ثَاسذْ غَارْ ومْشَانْ إِ غَا يِيخْضَارْ سِيذِي
٢٧ ؤُشَا أَذْ ثسّْوجْذذْ ثِيغَارْصَا ن وشْمَاضْ، أَيْسُومْ نّسْ ذ إِذَامّنْ نّسْ، خْ ؤُعَالْطَارْ ن سِيذِي، أَربِّي نّشْ، ؤُشَا إِذَامّنْ ن ثْغَارْصَا أَذْ تّْوَازدْجْعنْ خْ ؤُعَالْطَارْ ن سِيذِي، أَربِّي نّشْ، مَاشَا إِعدّڒْ أَذْ ثشّذْ أَيْسُومْ.
٢٨ حْضَا، ؤُ سڒْ إِ مَارَّا أَوَاڒنْ-أَ نِّي ذ أَشْ ؤُمُورغْ، حِيمَا أَذْ ثِيڒِيذْ مْلِيحْ، شكْ ذ إِحنْجِيرنْ نّشْ أَوَارْنِي أَشْ إِ ڒبْذَا، ؤُمِي غَا ثڭّذْ مِينْ إِشْنَانْ ذ مِينْ إِسڭّْذنْ ذِي ثِيطَّاوِينْ ن سِيذِي، أَربِّي نّشْ.“
٢٩ ”خْمِي غَا إِثحَّا سِيذِي، أَربِّي نّشْ، ڒڭْنُوسْ مَانِي غَا ثْرَاحذْ حِيمَا أَذْ ثنْ ثكْسِيذْ ذ ڒْْوَارْثْ ؤُشَا خنِّي شكْ أَذْ ثنْ ثكْسِيذْ ذ ڒْْوَارْثْ ؤُشَا أَذْ ثْزذْغذْ ذِي ثمُّورْثْ نْسنْ،
٣٠ حْضَا مَاحنْذْ وَارْ ثْضفَّارذْ أَوَارْنِي أَسنْ ذِي ڒْْفخْ ذ إِشْثْ، أَوَارْنِي مَا أَذْ تّْوَاثحَّانْ زَّاثْ إِ وُوذمْ نّشْ، ؤُشَا أَذْ ثَارْزُوذْ خْ إِربِّيثنْ نْسنْ، أَذْ ثِينِيذْ: ’أَمْ مَامّشْ سخَّارنْ نِيثْنِي إِ إِربِّيثنْ نْسنْ، أَمُّو إِ غَا ڭّغْ ؤُڒَا ذ نشّْ.‘
٣١ وَارْ تّڭّْ أَمنِّي إِ سِيذِي، أَربِّي نّشْ، مِينْزِي مَارَّا مِينْ إِدْجَانْ ذ جّْعِيفشْثْ إِ سِيذِي ذ مِينْ إِشَارّهْ نتَّا، أَقَا ڭِّينْ ث نِيثْنِي إِ إِربِّيثنْ نْسنْ. عَاذْ سّْشمْضنْ إِحنْجِيرنْ نْسنْ ذ يسِّيثْسنْ ذِي ثْمسِّي إِ إِربِّيثنْ نْسنْ.“